نقلتها من أحد المنتديات .


الزواج الناجح، لازم تخطط له بداية من ليلة الزفاف ،، يعني يبي لك ترسمها بكل دقه وما تخلي احد من المتزوجين ما تسأله
عن اخطاء ليلةالزفاف ...

طبعا المفروض انك اول ما تملك عليها، وانتا مستلمها مكالمات هاتفيه، وما عليك من اهلها.. إتصل وقل عطوني المدام!.. وتراها بتحرص على مكالماتك اكثر منك، وبتنتظرها على نار ... بس خلك مظبوك على الوقت اللي تعودت انك تكلمها فيه ،،، وبالمكالمات تقدر تعودها عليك شوي شوي ،، بس انتبه لا تخور وتكلمها عن ماضيك.. ولا تطري لها خدامه ولا ممرضه، ولا اي انثى تجي على بالك .. حتى اختك ,, لا تمدحها قدامها !!.

في قصر الزواج :

العروس في اول ليله تكون مرعوبه ومرتبكه... يعني لا تحرجها وتقول وش فيتس؟ وراتس خايفه؟ ولا تسألها من اول ليله عن حبها لك حتى ماتجاملك !..

طبعا.. قبل ما تاخذها من قصر الزواج لازم تكون راسم مشوارك صح ،،. يعني بتركب الهايلكس وتسوقه انتا بنفسك .. وهي جمبك،، وانتم بلحالكم في السياره بس لا تنسى!. تنزل البشت عن كتوفك علشان الناس ما يطالعون فيك... وبعدين تمر لك هرفي ،، وتاخذ لك تشكن برغر بالجبن، عن طريق الشباك طبعا!، يعني لا تنزل من السياره !!! وإذا كنتا ما تعرف قلينزى فلا تتفلسف مع الفلبيني حق هرفي !!..
لا تطلب جمبري حتى ما تشين الريحه وحتى بعد ما تظن فيك ظن السوء..!!

طبعا بتروح لبيت وفيه واحد من اقاربك يتابعك من بعيد للطوارئ .. وفيه واحد ثاني ينتظرك عند الباب ،، واول ما تقبل يفتح لك الباب الكبير.. وتدخّل السياره وهو يصك الباب وراك !..
إذا كان البشت اللي انت لابسه لنفس راعي الهايلكس ... فاترك البشت في السياره حتى ما تتوهق، وتروح ترجع له البشت !.. ولا تنسى بعد تترك مفتاح الهايلكس عليه علشان ياخذه راعيه بدون ما يزعجك !!..

في الأفلام.. يقوم المعرس ويشيل عروسته في الدرجه ويرقى بها... لاتحاول تسويها..!!

فوق (في غرفة النوم):
احفظ الدعاء زين !.. وقله بصوت منخفض،، او بدون صوت .. ولا تخليها تنتبه ان يدك على جبهتَّا وقت الدعاء !!!.
* رح للغرفه الثانيه،، والبس قميص النوم!!( لا تصير دلخ وتجيها بسروال السنه وفنيله )!...

* صل ركعتين ،، وعطها فرصه كافيه للبس والصلاة ...
* نسيت ما قلت لك ... خلك على وضوء من قبل العرس !،، علشان ما تخرب تسريحتك وينغسل الكريم اللي على وجهك .. ونفس النصيحه للعروس !..
* إبدا أكّلها شوي شوي ولا تلزّم واجد.. وإذا قالت لك شبعانه .. فخلاص ,, لا تغصبها وهي منسده نفسها من الحياء.. بس لا تطلب منها انها تأكّلك !!...
* خلصوا اول ليله سواليف بس..( مافيه ..[ رقابه ] ..فاهم ؟)
يمكن يجي في بالك انك كلمتها كثير بالتلفون وانها خلاص تعودت عليك .. مهوب صحيح
* اول ليله هي اللي بتعطي انطباع عنك طول العمر يعني اما سعاده او صدمه بالنسبه للعروس
* نوموا بس لا تعطيها قفاك



*** احذر تقوم هي من النوم الصبح، وتلقاك قاعد تاكل عشاها اللي ماكلته هي في الليل ..
*** اول ما تقوم هي من النوم .. جب لها اكل بسرعه .. لأنها نامت جوعانه ..

وهالحين يالله عاد دوركم .. شاركونا وذكرونا بأخطاء ليلة الفاف .. ونبهوا العرسان الجدد على النقاط الهامه في الزواج الجديد ..

ملاحظه كبر البربري (بوباي) هذي الأخطاء والتنبيهات جمعتها لكم من واقعي ومن خيالي .. بس لا تحسبوني مفطر على عشا المدام .!!.