مـــــــــــــــرحبا ...

@@ بيان من منظمة قابليني واقابلك @@

لوحظ في الاعوام السابقه استخدام طرق بدائيه ومتخلفه وهمجيه من قبل شبابنا وشاباتنا في مجال المغازله وانخفاض معدل الترقيم عن المستوى الطبيعي وانخفاض قيمة فواتير الهاتف عن ما كانت عليه الميزانيه للعام السابق , كل هذه العوامل ادت الى توجيه إنذار شديد اللهجه من منظمة قابليني واقابلك المتحده ..

يحتوي على تهديد بالشطب من لائحة الدول المتقدمه في هذا المجال ..

ونتيجة لذلك عقدت مؤتمرات دوليه لمحاولة تفادي هذه المشكله وإيجاد حلول ناجحه وسهلة الدهن ..

وتم استضافة عدة شخصيات هامه من عرابجه وخكاريه , وخبراء في مجال الدواره في الاسواق , ومتخصصين في اساليب الترقيم ...

وكذلك عدائي المسافات الطويله للاستفاده من خبراتهم في مجال الهروب من هيئة الامر بالمعروف والنهي عن المنكر ..


ايها الشاب الداج .. ايها الشاب المستدلخ الى متى وانت تستخدم الاساليب القديمه هاه ... الى متى ؟؟

آن الاوان الآن لكي تصبح شاباً يواكب التطور التكنولوجي ويواكب الثورة المعلوماتيه ..

يا ثور كل شيء تطور واصبح بطرق سريعه وديناميكية .. والمغازله واساليبها تطورت ايضاً .. مع الخيل ياشقراء

ونظراً لتدني مستواك فقد قمنا بوضع بعض الخطوات لك تضعك على الطريق الصحيح لكي تصبح مغزلجياً محترفاً ... عليك اتباعها حرفياً ولا تحيد عنها قيد أنمله ( لا حلوه أنمله .. والله مادري وش معناها ) .. وفي حالة مخالفتك للاوامر فكل تبن وانثبر واترك غيرك يلقط رزقه , يا قليل الادب


ما يجب عليك فعله قبل التوجه الى المقناص ...

@ تروح للحلاق

مهوب اي حلاق من الهنود اللي يحلقونك بخمسة ريال ... رووووووح للحلاقين الغاليين ابو عشرين وخمسه وعشرين ريال من هاللبنانيين ولا الاترااااك

أول شيء خلهم يصنفروووون وجهك بليفه مطبخ انت وحب الشباب اللي مالي وجهك .. يالمراهق !!!

ثم يضبطوووون الشنب على شكل رقم ثمانيه ... لا مانع من بعض احمر البراطم الخفيف وبعض من المكياج .. تراها الموضه .. صدقني !!!!

واذا الدقن مهوب مضبوط خله يفغص لك سكسوكه بأي شكل ...

@ تلبس لك ثوب من هذا اللي يتعطف بسرعه ... والله مدري وش اسم القماش .. بس الظاهر انه اسمه تتروووووون !!!!
ولازم يكون ضيق شوي .. يعني مرسوم على جسمك ( بالعربي امخصر )؟؟؟

عقال مقاس 52 سنتيمتر وكعب ..

شماغ ملكي صابين عليه علبتين نشاء حق الكوي ... علشان تضبط الكشخه وعندك خيارين يا ان الشماغ يكون بمرزام أو بدون مرزام ... اللي يصلح لك .. ما يمديك تتصل بصديق

شوووووف لاتكون قديم وتكتب اسمك في ورقة قاطعها من بكت دخان ولا فاتوره تلفون ... واكب العصر يا لوووح

رووووووح واطبع كم كرت عليه صورة قلب احمر ولا منظر غروب الشمس عليه اسمك - اسمك الفني طبعاً وجوالك - شوف رقم جوالك مهوب رقم البيت ... تراني علمتك .. ولا مانع من بيت شعر كذا على ذوقك .. يبين انك رومانسي

صب على عمرك قاروره عطر .. واذا كنت مستعجل ولا امداك تحط عطر .. ملطف الجو يقضي بالغرض .

علم واحد من اخوياك يدهرك اتصالات وانت في السوق .. يعني لزوووووم الكشخه وال VIP

اياني وياك ترووووح للسوق على الكرولا حقت ؟؟؟؟

انت تبي تفضحنااااا ..؟؟؟؟

رح لواحد من اخوياك عيال النعمه وخذ سيارته ويا حبذا لو تكون ... كامري ..( واحد اقصى طموحه كامري )

لالالا تصدق ... شف لك شبح ولا كابرس اللي لا يمكن ان نعيش من دونه;)

ما يجب عليك فعله وانت داخل محمية الصيد ... السوق يعني


خلك ثقيل وبين للي حولك انك على نياتك ... يعني سو فيها عبيط .. لاتثير الشكوك حول نفسك تقعد تطالع في اللي رايحه واللي جايه .. اسفطهم كلهم

رح لاي محل يبيع حاجات رخيصه ( ادري انك مطفر ) واشتر لك شيء وحطه في كيس .. يعننك تتقضى .. لزوووووم الهيئه اذا طبوا عليك

خلك ماسك الجوال في يدك .. بحيث يكون ظاهراً للعيان ( ذبحتنا المظاهر ) واذا معك سماعه حطها في اذانك .. واقعد بربس حتى لو ما فيه احد يكلمك .

اجلس وزع ابتسامات هنا وهناك .. اللي تعرفه واللي ما تعرفه .

وزع .. وزع ... لاتبخل على احد واذا شفت لك طفل امطخه على جبهته ببوسه ( هذا يدل على انك بركان من الحنان ) .. واذا ما لقيت طفل من الحمران اقرب طفل تكروووووني يقضي اللزووووم .. كخخخخخخخخخخخخ

اياني وياك تطفي زقارتك

ابي اشوف الدخنه في كل مكان ابي اجراس الحريق شغاله .. ولا هوب اي نوع من التتن فيه انواع رايقه مثل دنهل ولا دوفيدوف المارلبورو موضه قديمه وفيه انواع بالنعناع والقرفه .. الله يقرفك

عندما تشاهد الفريسه انشب في حلقها ... ولا تخليها تغيب عن عينك دقيقه واذا حسيت انك بتضيعها ركز على لون الشنطه أو لون الجزمه .

في حالة وجود وحوووووش مفترسه اخرى تزاحمك على الفريسه توجه الى اقرب سيكورتي .

اذا لم تعطيك الفريسه وجه , لا تستسلم استخدم جميع طرق قطة الوجه والملحجه حتى لو ضربتك بجزمتها على راسك فيجب عليك ان تعطيها خدك لكي تطبع عليه ماركة الجزمه .. بهذه الطريقه تعرف الفريسه انك راعي نفس طويييييل ولا منك فكه .

اذا رفضت الفريسه ان تأخذ الرقم ما عليك الا ان تحشر الرقم بين القراطيس اللي في يدها ثم اطلق ساقيك للريح

ما يجب عليك فعله بعد ان قمت بالجربعه .. يجربع يعني

اخرج فوراً من السوق بلا تردد أو انتظار وسنتر عند التلفوووون اربع وعشرين ساعه .. يا لووووووح أنا ما قلت لك لا ترقم بتلفووووون البيت .. قلت لك الجوااااال ..



@ بيان موجه الى الشابات الداجات ..

ايتها الشابه الداجه

عليكِ بوضع خمسة لتر من أقوى العطووووور ذات الروائح الشفاطه .. من شفط .. يشفط .. فهو شفااااااط

ولبس العباءه المخصره التي تبرز مفاتنك

ووضع خمار اسود شفاف جداً بحيث يستطيع من يطالع فيك ان يعرف العدسات اللي انتي مركبتها اخضر فاتح ولا غامق ... ؟؟؟؟ يا كاثرين ريتا جونز

وضع كل ما تطاله يداك من المكياج على خشتك بأي لون اخضر .. احمر .. برتقالي .. طحلبي أي شيء .. أهم شيء ما تكونين ابيض و اسود .

ننصحك بعلك ابو سهم وعليكِ بعلكه بطريقه تظهر صوتاً ولا مانع من ان تنفخي لك نفيخه لكي تنفجر بصوت مسموووووع وذلك يعني ... نحن هنا .. لاحظووووونا .

تمنع الشباشب والاحذيه الماسحه ... الكعب الكعب الكعب ... ولن ارضى بغير الكعب بديلا .

عليك بتسبيل عينيك ( جعلها الاعمى ) كل ما طالع فيك شاب داج مثلك

ثم اديري له ظهرك ... اشكل يعني ..

وبين الفينه والفينه عطيه نظره خطافيه على السريع لكي يعلم انك معه على الخط

ثم شحططيه ورااااك في جميع ارجاء السوق ... وفي حالة عدم اعجابك بمن يطاردونك .. شوفي لك اقرب ليموزين وانقلعي لمحميه اخرى .. ياقليلة الادب ؟؟؟؟؟



*** كلمة للبروفسوووور BoW WoW ***

ان الهدف من هذا البيان .. هو المشاركة والاستفاده من تجارب وخبرات الآخرين في شتى المجالات العلميه والادبيه والساكيولوجيه ...( ايييه قابلني )



تقبلوا تحياااات البروفسوووور
BoW WoW ...

مشكووووور......
بس ما قلت
من اي منتدى نقلته؟؟؟؟؟؟؟؟؟؟؟؟؟؟؟

BoW WoW أزعل منك ترى ,,,

المصدر مهم .... ياتكتب شيء من عندك يا إنك تذكر المصدر ,,,

ترى حتى المواضيع " القديمه " اللي في الإقلاع نعرفها .... يعني لاتحاول تقلب بالمواضيع وتجيب شيء قديم ,,,

تخيل يجيك واحد ( مهوب أنا واحد غيري ) ويقول لك يالنطول .... وش يبي يكون موقفك , وماتتوقع إن وجهك يبي يضيع ؟؟ ,,,

الموضوع مغلق .... منعا للشبهات , وحتى ينظر في أمره من هيئة القضاء الأعلى ,,,