صدقوني ان هذا الحدث قد حصلي انا في السابق عندما كنت ادرس في الصف الثاني متوسط بمعهد الرس العلمي .
وقد حصل هذا الحدث بين والدي اطال الله في عمره وامده بالصحة والعافية (قولوا امين) حيث حصل ذات يوم ان قام احد المدرسين وهو (=============) يالقفكم تبون تعرفونه ؟ حرٍ يلقع كبادكم اعلمكم منهو فقد قام الله يحلله ويبحه ويسامحه بضربي ضربا مبرحا فقد كان سامحه الله يضرب ضرب تعذيب مهوب ضرب تأديب المهم ضربن لين تفلت العافية وخلان اوقف على رجل وحدة حصتين متتاليتين مع اني كنت مؤدب وشاطر بس مدري وراه علي هاكليوم مع اني ماسويت شي يستاهل ابد ابد ابد .
كل اللي سويته اني شارن لي دستة طرطعان ابو ثوم وكل مالتفت على الصبورة (ادري اسمها السبورة بس انا كذا عناد ابكتب صبورة)المهم كل مالتفت ابن الحلال يكتب شي قمت ورميت لي طرطعانة ولا طرطعانتين على الجدار . بس هذا كل اللي سويته يعني مجرد مزح بسيط بس هو الله يهدينا وياه اخذ الموضوع بجد مايدري اني بريء ومتعود على الدلال والنعمة حتى على طاري النعمة اذا كر هاكلحين انا الوحيد اللي بالرس كلها اجيب فطوري معي من البيت خبزتين مثل حقات همبرقر مدورات وكل الناس يجيبون خبز صامولي عادي المهم مالكم بطوالة الحكي الرجال فرشن لين اذنت ولعن سنسفيلي ويوم طلعنا من المدرسة عقب صلاة الظهر ونا اروح لم ابوي ادنها بكوة وابوي يقحص من فراشه كان يبي يقيل الله يعطيه العافية وشبك لعنبو بليسك وراك تصيح وش جايك من اللي عليك اروح اوريك به العن خامسه الخامس وامهن صيره قلت الاستاد (=============) (حريرة اعلمكم موتو قهر) قال ليش ضربك قلت ولد فلان يطرطع بالفصل ويحسبه انا قال بس وعلى شان كذا يسوي بك كل هالسوايا ؟
قلت ايه بس كذا قال ايه هين وانا ابوك تغد هالحين وباكر تشوف وانا ابوك ان مجيت لمكم بالمدرسة ولعنت ابو سنسفيله وخليتك تضحك عليه انت واخوياك ولا منب ابو محمد .
والله وانا انبصط واسفهل احتري متى بس يجي باكر علشان اضحك عليه ؟
والله يوم جاء باكر واروح اعلم كل عيال المدرسة قلت لهم هالحين يبي يجي ابوي يلعن خير المدرس (==============)(حارمن على زقومكم اعلمكم منهو) .
والله وكل ماجت الفسحة رحت انا واخوياي عند غرفة المدرسين نحتري ابوي يجي وشوي يومنه جاء الوالد قلت بس جاء ابوي هالحين تشوفون وش يسوي به والله ولا ابوي حمقان وفاتن ومعقدن حواجبه وبطول حسه يصوت عند غرفة المدرسين وين فلان وينه وين المدرس فلان وينه خلوه يجي ابي وينه باعلى صوته يلعلع عليهم شوي الا فلالالالان يوم طلع سم ياخوي وش فيك عسى ماشر ( عاد هو المدرس هذا مطوع ولحيته ماشالله طويلة الى نص بطنه) قال ابوي مهوب شغلك انت وين فلان بس ابيه قال ذاك انا فلان ياخوي وصلت سم امر تدلل عسى ماشر بس هد نفسك واللي تبيه يصير . اااااااااااااااااااه بس اااااااه
الى هنا وانا شادن الظهر بابوي بس عقب ماقاله المدرس هالكلام ولا ابوي تقول ددسن تمشي ميتين وبنشر عليها الكفر ولايوم انه هجد وهدا وراحت الحمقة قال ابوي هلا والله انت فلان ياهلا والله ياهلا انا حالف يمين عشاك الليلة عندي ؟؟؟؟؟؟؟؟؟؟
وشو انا بحلم ولا بعلم اثر ابوي مادري انه مطوع يحسبه من الناس العاديين .
المهم يوم قال ابوي كذا ولا يوم ضاقت بي الدنيا واستدار راسي وحامت كبدي كني مرتن حامل اعوذ بالله لاواللي زود الطينة بلة صار المدرس يشتكي لابوي من وابوي عطاه الضوء الاخضر وقال له لكم اللحم ولي العظم يعني خربت من كل جهة . وراح الحبحر طعم جحوش . وسلامتكم

حبحور مقطع البحور ومذوب الصخور ومغري الحور وحامي الضبان بالجحور
الحبحر الحار الهلالي/عاشق هلالي صميم
الزعيم زعيم يعرفه الفهيم ويجهله البهيــم
الرس / ابوتركي