بصراحة مر علي موقف بحياتي مانساه لين امووووووووووت (بسم الله علي) وهو :

مرة اول ماجيت للرياض من القصيم وبالعربي من الرس ديرتي الحبيبة ديرة الحبحر . المهم جيت عام 1406 هـ علشان اتمرجل على مايقولون وادور وظيفة واتسنع مع الرجاجيل . المهم رحت لناس يقربون لي بالرياض وكنت مستانس بلحيل علشاني بروح للرياض المهم وصلت الرياض وكان هاك الايام الدوري مدهر قلت لعيال ..... ابي اروح احضر مباراة للهلال علشان لارجعت لديرتي ابز عندهم واهلس عليهم واقول شفت لاعبين الهلال على الطبيعة وسولفت معهم وفعلا رحت للملعب وناظرت المبارة مغير ادربي راسي بين الناس ماهمتن النتيجة ولا شي بس اهم شي اشوف اللاعبين حقين الهلال وشفت النعيمة والمصيبيح والبيشي والحبشي وكل الباقين وكنت فرحان بس ابي اروح للرس علشان اهك على خوياي واقول اني قابلت اللاعبين المهم قضت المبارة خلونا بالموقف اللي قلت لكم عنه توه مابعد جت سالفته المهم رحنا للبيت وكنت جوعان بالحيل الصراحة من الظهر وانا مسنتر عند الملعب ابي اشوف المباراة بعذري المهم قلت لعيال ...... انا جوعان الصراحة بالحيل شوفو لي اي مطعم ولا بوفية ابي اكل شي وفعلا وقفنا عند هاك البوفيه وحنا نصفط الموتر على جنب ونحول وندخل البوفية اثر عيال ..... وهقون طلبوا شي والله العظيم اول مرة اسمعه بحياتي اسمه كوكتيل انا على حسن نية حسبتهم جوعانين وطلبوا اكل اثر دردغانة ادربي راسي مادري وش السالفة قلت بنفسي خل اسوي مثلهم واطلب كوكتيل نشوف وشو هالكوكتيل الى هنا الموضوع عادي بس من زود القرادة قلت وشلون ابلع هالكوكتيل بدون ماشرب شي معه يدفعه لااغص قمت وطلبت واحد برتقال على بالي اتيكيت يطلب برتقال وكوكتيل المهم جلسنا شوي ويوم اخذنا الا ابو يمن جايبن لنا هاك الصينية اللي نصة مصدي وبوسطة اربع اكواب ثلاثة حمر مدري وردي لاتقولون قروي بعد مايعرف الالوان والرابع برتقان اعرفه مايحتاج وليدة بالبرنقان المهم قلت وين الاكل يابو يمن قال اي اكل ياخي انتم طلبتوا بس عصير وهذا العصير ؟؟؟؟؟ قلت ابوك والكوكتيل اللي طلبنا وينهو قال انت اش فيك اعمى هذا اللي قودامك اش هو مفطح يعني هذا كوكتيل انا الصراحة يوم شفت العيال ضحكوا وواحد منهم مير الله لايوريكم انسدح على الارض وصار يضحك وينتفض تقول شاة ترفس توك مذكية بصراحة طاح وجهي مدري وش اقول والله وانا اعض طرف ثوبي واحط رجلي للسيارة والعيال قاموا يضحكون علي ومن عقبة صرت ماعاد اداني شي اسمه كوكتيل ابد بحياااااااتي الى هالحين .وسلامتكم وصدقوني انها قصة حقيقية حصلت لي شخصيا بس هاه لاتفضحوننا عاد استروا ماواجهتوا ... :p