هلا وغلا باللي داج ذا الموضوع ورجاء ولاتنسى تجيب القهوة وارقيلة المعسل علشان تركز تمام ولاتنسى تقفل الاتصال للتوفير ;)
نذ تسجيلي في المنتدى في شهر سبتمبر لعام 2000م وجميع الأخوة الأعزاء في منتدى الزعيم (( الزعيم الملكي سابقاً )) مع أن الإسم القديم أحلى لإرتباطه بالملكي ... وتغمر جميع الأخوة في المنتدى الحب والوفاء من خلال الترحيب والتشجيع للجميع وأكثر عضو كان يرحب بالجميع هو أسطورة المنتديات الحاضر الغائب (( الأســـطورة )) فهذا الشخص مهما قلت فلن أوفيه حقه من كلماته الجميلة والعطرة للجميع .. وتشجيعه الدائم للجميع وأعت بر نفسي تلميذ في مدرسته الأسطورية .. وأتمنى لقاءه في جدة في أقرب وقت ممكن ...
اللي خلاني أذكر الأسطورة في بداية الموضوع هو حب الجميع له ولمواضيعه الأسطورية وبصراحة وحشني كثييييير ومن زمان ماسمعت صوته ... وبالفعل اسم على مسمى (( الأســطورة )) ... تعرفت على كثير غير الاسطورة ومنهم الأخ الغالي (( هــاجس )) والي كان إسمه في السابق (( عاشق نواف )) ولكن ياخسارة غير اسمه من عاشق نواف الى هاجس لأسباب خاصة واتهامات خطيرة بحبه لنواف عن بقية لاعبي الهلال ..
كنت دائم الاتصال بهاجس والأسطورة وآخرون وهاجس اتصلت عليه مرة وحدة وماخلاني في حالي وبصراحة هاجس (( إزعااااااج )) في اليوم يتصل عليك عشرين مرة ونصيحة لاحد يعطيه رقمه – أسألوا مجرب – وإتصالاته تجيك من الصباح بكييييييير الين قبل النووووم والناس يردوا على أي موضوع في المنتدى وهذا يرد بالجوااااااال .. ياحبي لك ياهاجس ...
هاجس دائماً يقولي نبي نشوفك ياطلال ... متى نشوفك ؟! وأنا بصراحة نفس الشعور مشتاق له وللجميع ولكن هاجس له مكانة خاصة في القلب ....
وأخيراً تحقق الأمنية وقرب اللقاء بزيارته الميمونة مع عائلته الكريمة الى البلد الحرام (( مكة المكرمة )) ونزل في مكة بجوار البيت الحرام وأخذ العمرة وندعوا له بالتوفيق والله يتقبل منه ان شاء الله ...وأهم شيء ماتكون عيونه زاغت هنا ولا هنا في الحرم .. الله يهديك ياهاجس ;)
طبعاً في مكة المكرمة هناك أخ عزيز على الجميع وهو المشرف الخطير (( رامبو الأطخم )) أشهر من نار على علم في المنتدى وخاصة من ناحية العربجية وهو جار للغالي على الجميع (( فهد اللهيبي )) <<<<<<======== هذا اللي دايم يروق سفر وماحد يعرف لسفر غير فهوووووودي (( والعكس صحيح ... ))
في البداية هاجس ماكان يعرف رامبو وبعد ماراح مكة قال فرصة نتعرف على المشرف الجديد ونتشرف بالسلام عليه طال عمره ونهديه هدية تليق بالمقام وفي بال هاجس أنه بعد مايتعرف على رامبو الأطخم (( حتكون كل مواضيعه مرفوعة في شريط المهام ولا مثبته في أعلى الصفحة )) وأن رامبو راح يرد عليه في كل موضوع ويعطيه وجه ومايطنشه كما هي عادة مشرفي العام وخاصة النصاااااب الكبير صفر وهاجس يدندن بينه وبين نفسه ومعاناته مع صفر ورامبو ويقول <<<<<<======= ياشايف نفسك علي قولي على ايه (( من كثر التطنيش اللي يلاقيه منهم في المنتدى )) .
ارسل هاجس رساله خاصة لرامبو الأطخم وقاله أنا في مكة وودي أتعرف عليك وأشوفك وتشوفني واعطاله الجوال وقال اتمنى اسمع صوتك العذب يدندن جوالي يامشرفنا الغالي .. واتصل عليه رامبو ودار بينهم هذا الحوار:
رامبو: السلام عليكم ...
هاجس: عليكم السلام ...
رامبو: الأخ هاجس.
هاجس: لا النمرة خطأ <<<<<<======== طبعاً هاجس اسم الشهره هو نسي انه أعطى أحد اسمه الشهره واسمه الحقيقي يبدأ أول حرف من (( صدام )).
وقام هاجس بإغلاق الخط طووووووووووووووط.
رامبو الأطخم أكلت معاه (( يعني انقهر ... )) وقال - في نفسه - أنا رامبو الأطخم والأجر على الله هاجس يقفل علي الخط ... واتصل عليه مرة أخرى وقاله:
رامبو: ألو ياهاجس معك عمك ابراهيم النجيدي.(( قوية يارامبو من أول اتصال عمك على طووووول)).
هاجس (( خااااايف ماهو عارف يتكلم )) هلا عمي .
رامبو: اش فيك تقفل الخط.
هاجس: آسف آسف ماعرفتك حسبت واحد يغازل.
رامبو: المهم ايش تبي انت ترسل لي ايميل وتقولي أبي اقابلك تقابلني.
هاجس: ابغى اتعرف عليك ياأستاذ ابراهيم.
رامبو: أستاذ في عينك أنا المشرف ابراهيم مو الأستاذ (( والله قوي ياهيييييمو )).
هاجس: ممكن نتعرف ((( ولا تقول يبي يتعرف على بنية )).
رامبو: طيب وين اجيك <<<<====== ماصدق يحصل واحد يبي يتعرف عليه ...
هاجس: في فندق الشيراتون.
رامبو: دقائق تلقاني عندك.
هاجس: مع السلامة يا سعادة المشرف.
رامبو: مع السلامة.
بدأ الخوف يملي قلب هاجس بعد أول محادثة بينه وبين رامبو ويقول في نفسه رامبو شايف نفسه وباين عليه شديد وفكر يجيب معه (( بودي قارد )) أثناء لقاءه مع رامبو وفعلاً جاب له واحد من (( بودي قارد )) علشان يحرسه من رامبو!!
رامبو وصل (( اللوبي )) للفندق ودق جوال على هاجس وقاله عمك رامبو في اللوبي وماقفل السماعة الاوهاجس قدامه .... وسلم عليه واتعرفوا على بعض وهاجس ماهو عارف ايش يسوي طلع رامبو اكبر مما يتخيل يعني كان يفكر انه في الخمسطعشر ولا الاثنعش ولكن طلع فوق الثلاثين كما هو مبين في الصور أدناه :
وشرط رامبو على هاجس انه يمشوا لوحدهم بدون (( البودي قارد )) وهاجس وافق بشرط انهم يفتشوا رامبوا قبل مايطلع السيارة ويتأكدوا أنه مايحمل أسلحة نارية ولا سواطير ولا سكانين ولا حاجه ...وطلع رامبو وهاجس في سيارة هاجس علشان رامبو يبغى يوفر البنزين يانذاله يارامبو ويفكروا وين نروح وين نروح ...
رامبو: هاجس نروح للطائف؟؟!
هاجس : لا .
رامبو: تجي البيت عندنا ...
هاجس : لالالالالالا <<<<====== خواااااااف .
وعلى طول جات فكرة لهاجس يروح لطلال في جدة .
ويقول هاجس: ايش رايك ننزل جدة ونزور طلال.
رامبو: لا ايش تبي بطلال خلينا لوحدنا أحسن <<<==== ماحصلت الا ذا الشايب تجيبه معك.
هاجس: (( قلبه يدق وهو يتخيل رامبو الأصلي )) لالالالا نروح لطلال نفسي أشوفه ... وبعد إلحاح شديد من هاجس وافق رامبو .
واتصل هاجس على طلال .
هاجس: ألو طلال.
طلال: هلا هجوووووسي <<<<< ===== اسم الدلع لهاجس.
هاجس: حبيب قلبي أنا ورامبو في الطريق اليك الحين جايينك لجدة.
طلال : هلا فيكم تننورا جدة (( قمة في الاخلاق هذا اللي اسمه طلال احم احم )) .
ووصفت لهم عنوان سكني (( طبعاً ماراح اكتب العنوان علشان ماحد يجيني وخاصة سكان جدة )) .
ومافي دقائق الا وهم عند الباب.
كما توضح لكم هذه الصورة:
وبعد التعرف على الجميع ومارضيو يدخلوا البيت الا يبغوا يتمشوا في جدة غير ونفسهم يعرفوا ايش هذه الغير !!! مساكين ماعندهم غير ....
وهاجس كان نفسه يشوف كورنيش جده ولكن رامبو كان له رأي آخر ووده يروح لأسواق جدة وأختار (( أواسيس مول )) ورحنا لأواسيس مول ودخلنا السوق انا رامبو وهاجس ... وماشين شوي كذا اختفى رامبو ... أقول لهاجس وين رامبو قالي ماادري .. ويصكه ذاك الجوال ... ورامبو مطنش ... غريبة .. ايش فيه رامبو .. خطف ولا أنخطف !!! وأنا أقول لهاجس: أكيد رامبو شاف له صيده
وما أشوف رامبو الا ماشي لوحده ورى ذيك البنيه ومنزل الجوال بيده اليمين والسبحه باليسار وهو لابس الزي الرسمي (( لرامبو )) وشوي كذا ينزل الرقم ... اقول لهاجس أكفش رامبو الأطخم ناوي يرقم
ياهاجس يالله نمسكه لايجيب لنا بلوة مع الخلق الي في السوق !! ونروح ننادي بأعلى الصوت ( رااااااااااامبو )) والسوق مكيف والصدى (( راامبو رامبو راااامبو )) وكل اللي في السوق يناظروا لنا بإستغراب مين رامبو .. وشوي .. رامبو يجينا ايش فيكم فضحتونا ... وانكشفت شخصية رامبو وطبعاً رامبو زعل علشان طيرنا عليه الصيدة ... وبعد ماابعدنا رامبو عن البنية صاروا البنيات هم اللي يدوروا عليه وصدقوا انه هو رامبو (( الممثل الشهير )) خاصة وجود شبه كبير بيهم ولابس لبس رامبو الأصلي <<<<====== مصدق نفسه انه رامبو وكل شوي تجيله وحدة ممكن صورة ممكن توقيع ممكن الرقم .... الخ
وهذه صورته في السوق :
وعلى طول أخذنا رامبو وطلعناه من السوق وعلى السيارة ...
وين نروح قلنا مالنا الا الكورنيش لتلبية طلب حبيب القلب مازولا ... أقصد (( هاجس )) وأخذنا دورة على الكورنيش وبعدها قررنا نرتاح في منتزه النخيل...
قبل ماندخل المنتزه رامبو وهاجس شافو الدبابات اللي في جدة تقول عمرهم ماشافو دبابات ولزموا الا ويركوا (( دباب )) وقلنا يالله اطلعوا واخذوا لهم لفة وكان هاجس يسوق ورامبو رديفه وشوي رامبو ... شوفوا الصورة أحسن تعبير بدون كلام :
نزلنا المنتزه وجينا في الطلبات:
جالنا الجرسون ايش طلباتكم شباب....
على طووووول رامبو طاير : عطني واحد باعشن (( طبعاً الشيشة نسميها باعشن )) وواحد معسل بحريني .. وبراد شاي طايفي ..
والجرسون جاك ماشي...
قلنا له انا وهاجس بصوت واحد : وين رايح تعال خذ طلباتنا..
قال الجرسون: هذه طلباتكم اللي قالها الباشمهندس !!!
قلت له: لا هذه طلبات رامبو لوحده <<<====== آسف يا رامبو فضحتك قدام الأعضاء ولاتحذف شيء لاأوديك ورى الشمس
.
وطلبنا أنا وهاجس طلبات خفيفة ماراح اقولكم عليها;)
وحنا جالسين نسولف الا جاء اتصال على هاجس .
هاجس: ألو مرحبا... شوي يقول ... هلاهلاهلاهلا ... رامبو وطلال معايا.
تفاجأت انا ورامبو يحاكي مين هذا ..
هاجس: ياشباب معي عاشق النمر على الخط... خذ يارامبو كلم عاشق... ويرمي الجوال فوق الطاول..
رامبو: لالالالا ماابغى اكلمه (( وعاشق النمر يسمعه <<<< ==== قوية في حقك ياعاشق )) .
هاجس: عيب عليك يارامبو الرجال على الخط.
رامبو: لالالا صفك منه ماابيه.
وبالقوة بعد رجاوي وتوسلات ومانبي نسوي مشاكل وافق رامبو يكلم عاشق النمر.
رامبو: ها يالــ **** ايش تبي... في المنتدى ورانا ... في الماسنجر ورانا ... طفشتنا ...
عاشق النمر: (( بصراحة ماادري ايش يقول لأن السماعة في اذن رامبو )) علشان احبكها تمام وماتقولوا اني نصاب;)
رامبو: انت يا الـ **** يالــ **** ماتعرف نفسك تحاكي مين أنا رامبو والأجر على الله .. لا ألغي يوزرك الحين وأمسكك شباك المنتدى وأوديك ورى الشمس انت تفهم ولا !!
عاشق النمر: (( الظاهر انه ماهو عارف كيف يصرف رامبو وقاله اعطيني طلال )) .
رامبو : طلال تبغاه .... طلال مايبغى يكلمك (( أوف يارامبو أنا قلت كذا ... مشرف وناوي يفرق بين الأعضاء
))
طلال: عيب عليك يارامبو عطيني عاشق النمر.
رامبو: اقولك قفل السماعة طلال مايوده يحكي معك.
طووووووووووووووووط.
(( طبعاً رامبو عادته انه يسوي نفسه شديد من أول لقاء لأي شخص علشان يكون في الذاكرة وعلشان يعرفوا مين رامبو ))
قام هاجس اتصل على عاشق النمر وبصراحة عاشق النمر خلووووق ومايستاهل اللي لقاه من رامبو بس ايش نقول عن ذا الداج ماعليه شرهه من جاور الليهيبي اتلهب
وبعد نهاية المكالمة مع (( عاشق النمر )) وحنا جالسين نسولف ... جانا هاجس يقول:
هاجس: تصدقوا ياشباب أن هذه الساعات من أجمل الساعات اللي في حياتي.
رامبو: هذه أحلى ولا لما قابلت الاسطورة والكاسر في الرياض ؟؟!
هاجس: لالالالالا هذه أحلى بكثير ايش جاب لجاب (( قلبه يترعش طبعاً قدامه رامبو )) .
طلال: عادي ياهاجس قول الحقيقة انت قلت ان الساعة اللي شفت فيها الأسطورة والكاسر أحلى ساعة في حياتك كلها .
هاجس: لالالا أنا قلت أحلى ساعة قضيتها في الرياض لانها الساعة الوحيدة اللي جلست بها في الرياض.
بصراحة ماقال هذه الكلمة من هنا الا وحنا نموت من الضحك هههههههه ههههههه ههههه نصاب تلميذ صفر ;)
وبعد ماخرجنا من منتزه النخيل ووصلوني لبيتي وراحوا لمكة على أمل لقاء آخر خلال اليومين القدمين ونقول ان شاء الله نلتقي ..
من ناحيتي كان اللقاء جداً جميل ومرح وخاصة وجود اثنين من أحلى الأعضاء في المنتدى (( هاجس & رامبو )) طبعاً هاجس أحلى من رامبو ... ولكن الاثنين ماهم احلى مني
واذا زعلتوا من نشري لفضايحكم في جدة غير تعالوا مرة ثانية علشان اشربكم من موية البحر اللي عندنا ;)
وانتم عارفين انه جدة اهل الرخا والشده <<<<===== شديد ياابو فيصل.
=============================================
للمعلومية القصة حقيقية وواقعية ومايقدر لا هاجس ولا رامبو ينكروا وكان معي شريط ممغنط وسجل كل الكلام اللي دار بينهم ومستعد أكتب مجلدات عن هذا اللقاء اللي دار لأكثر من ست (( رقم سته مو حاجه ثانية ;) )) ساعات ..
من جدة غير طلال أبو فيصل يحييكم على أمل في لقاء قادم مع أعضاء أو أعضاء ;) آخرين من المنتدى وأهم شيء يكونوا حلوين وتحياتي للجميع ...
رامبو وهاجس وفاضيح بالصور في جـــ غير ــدة 
,,,
,,,
,,,
الوضع العادي
