السلام عليكم ورحمة الله وبركاته ...
مساء أو صباح الخير للجميع ...
*****************************
أقول بصراحة الله يعينكم على الحر والهم والطفش والملل والفراغ والخبال والعائلات
...
بصراحة صيفكم يملل
...
<-------------------- شديد في أمريكا حتة وحده
...
شباب أنا طفشت من أمريكا وراجع إنشاء الله هالأسبوعين بإذن الله للرياض ...
لأني إشتقت لها ((( طبعاً يوم واحد بس
))) ...
وهمن بعدها بدور أقرب طيارة توصلني للقريات وإذا مافيه الله يعين على طريف ;) ...
وإذا ما فيه الخطوط ما عندنا مانع
...
وش يعني 2000 كلم كلها حذفة حصاه
...
تبون الصدق اللي في مخباه دريهمات ووده يتمشى ويستانس ...
يترك عنه هالخرابيط السياحة الداخلية
...
بلا جده غير بلا الطايف بلا أبها بلا بطيخ :p ...
طفشونا منهم كل شيء للعائلات حتى الأسواق هالحين للعائلات
...
قبل سنتين في جده غير ... صار لنا موقف ...
طبعاً طلعنا وكنا مقرشين يعني فسقانين من الدراهم :p ...
ونطلع قلنا اليوم ماسكه نسكن في درة العروس
(( ما قلتلكم الدراهم واجد )) ...
ونمسك هالخطوط ونوصل للدرة على خير ...
بصراحة شيء خيالي أنا قمت أرتجف ماني مصدق :p ...
ويفاجأنا البواب قال ياشباب هنا عوائل فقط
...
قلت حسبي الله على بليسكم وكل هالمسافات والفلوس وتقول عوائل ...!!
قال أقول خلك رجال لأمحطك هنا ...
قلت خلاص أبشر لكن تكفا خلنا نشوف الدرة لو دقايق تراه حلم سنوات (( والله من النصب )) ...
قال خلاص باطلع معكم وناخذ لفة ونرجع قلنا أسلم يالذيب ...
وأخذنا اللفه خمس دقايق همن قال يالله اقلبوا خشتكم من هنا ...
قلنا تم ...
والساعة كانت 3 الفجر ...
وانا اللي أعصب قلت شباب أنا مسكت نسكن اليوم على البحر ...
قالوا براسك مشينا ...
قلت لا ولازم نسكن فندق 5 نجوم ...
قالوا هذي سهلة ...
ونجي للفنادق وكلها من يشوفون وجيهنا يقولون مافيه غرف
...
أنواع التصريف ...
ووصلنا لفندق الانتر والامل يطاردنا ...
والحمد لله وافقوا بعد اصرار طويل ...
قالوا لازم غرفتين قلنا ماهي مشكلة لأننا اربعة ...
قالوا ادفعوا اربعة الاف ريال تأمين وايجار ...!!!
قلنا خذ اربعة الاف ...
قال لازم الساعة 2 الظهر تتولكون على الله
...!!
والساعه هالحين 6 الفجر ...!!!
يعني كل الوقت نوم ...!!
ليه ...!!؟؟؟
قلنا أسمع يالحبيب تبي اربعة الاف نجلس اربع وعشرين ساعة والا بلاش ...!!
قال وين يا ابو الشباب انت وياه أنتم وجيه فنادق خمس نجوم روحوا للكرنتينا وتخب عليكم بعد
...
ونطلع قلنا يالله نلف على الشقق في البحر ...
وكل شقة نجيها نسمع الكلمة الرنانه للعوائل فقط ...!!
الله لا يبارك فيكم أنتم وشقككم ...!!
طيب وين نروح حنا نطب في البحر ونريحكم ...!!
قالوا أنتم أحرار ...!!
وبعد عناء طويل والساعة 10 الصباح ونحصل شقق وغرف على البحر في أبحر ...
وقال عوائل وكان الموجود على الكاونتر مصري ...
وطبعاً مصري ومقابل له سفر (( أنواع النصب أكيد )) ...
وأقوم أقرق معه من وين الأخ في مصر وقمت أتفلسف ...
وقمت ألمح بالبخشيش ...
وفي الأخير قال هات 300 ريال لي عن كل يوم ...!!
قلت تم ...
قال الشقة بـ 750 اليوم ...!!
قلنا تم ...
ونسكن ونجلس أسبوع ونص وكلها على نفس الروتين ...
بحر وقارب وخرطي ...!!
وفي الأخير ضاعت الدراهم على غير سنع
...
ومن بعدها بطلت أصيف في أي مدينة بالداخل ...
الصيف هالسنة إنشاء الله بيكون في دمشق ...
واللي بيخاويني يجهز جوازه ومشينا
...
<--------------- يفسد شعب كامل :p ...
ولكم تحياتي ...
أخوكم / سفر المرزوقي .