ــــــــــــــــــــــــــــــــــــــــــــــ بسم الله الرحمن الرحيم ــــــــــــــــــــــــــــــــــــــــــــــ


.سمعنا جميعا مايدور في وسائل الاعلام حول نفي صحة الصور التي التقطت على سطح القمر من قبل وكالة ناسا
فلذلك اليكم هذه القصه ....................
رن جوال اخونا الحبيب سلمان عضو مجلس ادارة الموقع .........

سلمان : الو ...
المتصل : الو سلمان مرحبا ...
سلمان : هلا
المتصل : اخوي سلمان هذي رساله من قبل وكالة ناسا لكم.... حنا (وكالة ناسا ) بعد الشائعات اللي انطلقت ضدنا من قبل الدول العضمى والمنافسه لنا معلوماتيا وفضائيا قررنا اننا نطلق رحله فضائيه للقمر وللمريخ وطبعا احترنا من يطلع على متن هالرحله فقررنا انه لابد يكون المسافرين من دوله محايده لانه لو اخترنا مسافرين من عندنا ... قالو ايه من ربعهم وبيكذبونا ... ومانقدر نطلع احد من عندهم علشان مايسرقون معلوماتنا فاخترنا انهم يكونون من دوله محايده ..... وبما ان دولتكم تتمتع بعلاقات طيبه مع الجميع اخترنا انه يكون المسافرين من بلدكم هذا من ناحيه آما من ناحيه ثانيه احترنا مين بنختار من بلدكم بس سمعنا انه فيه منتدى من اشهر المنتديات في العالم كما ونوعا وانه فيه شباب جيدين فقلنا بدال مانتعب وندور نكلمكم وانتم ارسلولنا شباب بمعرفتكم يطلعون على الصاروخ آلي الفضاء ....

سلمان : ( بعد تتنيحه بسيطه ) ...طيب اخوي عطونا فرصه نرتب اوضاعنا ونفكر ونرد عليكم ..
المتصل: اوكيه نتصل عليكم بعد اسبوع .....وزعلى فكره عدد الركاب لايتعدون الثمانيه
سلمان : ابشر و حياك الله في امان الله ...

سلمان ماصدق يقلبها يمين يسار يمكن مزحه من احد الشباب لكن شاف ان الرقم من امريكا من بيمزح معه من هناك ....
سلمان طلب الروس الكبيره (المشرفين ) على المسنجر لامر عاجل ...

ياشباب اليوم صار معي كذا وكذا ......الخ

ردوا عليه الشباب : مادام اتصلوا عليك حنا والله نثق فيك ونحترم رايك تصرف انت واختر الاعضاء ولاتنسانا
سلمان المسيكين تلخبط مايدري وش يسوي من يختار عدد الاعضاء فوق الخمسة الاف وفيه اخوان عزيزين والمشرفين اساسا يتعدون الثمانيه ولايقدر ياخذ المشرفين لانه لو اخذهم لعبوا الاعضاء بالمنتدى لعب ....

المهم الرجال استخار وقال ياولد مابدهاش ....

ابختار سته رجال وبنتين عشان مايزعجونا حقوق المراه ....

بس من اختار (سلمان يفكر ) ياولد مابدهاش اربع ابختارهم عن طريق القرعه ......واربعه ابختارهم انا ..

اول اسم طلع زعيم اسيا .....(ياحضه ) ثاني اسم ......ماروكو .....الثالث ابو سليمان .....

الرابع الشايب فهد ......

زين هذولا بالقرعه طيب من اختار .... اول شي طبعا انا ...يالله صرنا خمسه و يالله ناخذ ابراهيم النجيدي لايحشنا وسفر المرزوقي لايحط فينا عمل سويتش يشوه صورتي وباقي بنت من اختار من اختار يالله عبير الهلال ...
بعد اسبوع ....رن التلفون ..

المتصل : الو سلمان كيف حالك ..

سلمان: يتنحنح (توه قايم من النوم ) هلا ..

المتصل : سلمان هاه جهزت الاسامي ...

سلمان : ايه نعم ...

المتصل : كويس خلاص بيجيكم واحد ويخلص كل اموركم ...

المهم سلمان اتصل وارسل ايميلات للمحضوضين السبعه يبشرهم ........ويجهزون امورهم ...

سفر الخبيث يوم عرف ويتصل علي ويعلمني ...هلا فيصل كيف حالك ...

انا : هلا سفر وش تبي ,,,,,,,,,,,,,, سفر : ابد بس ابعلمك وش صار .....

المهم هو علمني ولا ماعلمني ويضيق صدري واتكدر انا من يوم اني صغير حلم حياتي اروح للفضاء من يوم الامير سلطان بن سلمان راح وانا ودي اروح واطالع السماء وبنفسي اوصل للقمر ...

المهم ودقيت على سلمان ...... واتطلبه تكفى ابروح معكم الله يرحم والديك خذوني ...

والمسيكين : والله يا (بعدي) ماقدر وكثير كلموني بس ماقدر الظروف وحكمت قلت ...

سلمان(اقولها وانا معصب ) علم يوصلك ويتعداك ابروح يعني ابروح وابدبر واسطه ...ولا ابسويبكم زي القصبي يوم يلف اذانه وبنشرت الكفرات .........

قال من يون ..قلت ماهو شغلك اعرف ناس بالخطوط يدبروني قال وش دخل الخطوط ؟! قلت مدري لاواعرف واحد بالمرور بعد اكيد واحد منهم بيدبرني ( ياناس ابروح )...قال سلمان مااحد يقدر يفيدك .....

المهم واجلس ادعي لسلمان واتطلبه .....بس ماش الرجال مهوب بيده ....قال عموما ابشرط عليهم ناخذ اثنين بعد وانت واحد منهم قلت منهو الثاني قال الاعصار قلت زين ........

بعد كم يوم دق علي سفر قال هاه بتروح قلت مدري ......

قال: منت قدها انت وخشتك لا ومتميز بعد وخر بس ...
قلت : سفر ايه انا متميز باني اعرف اسكت اشكالك جعلك ماتروح انت ووجهك اللي كانه كمبياله مستحقه الدفع ..

قال زين .... وسكر بوجهي ...

عقبها دق سلمان ...هلا يابعدي كيف حالك ابشرك بتروح معنا جهز اغراضك وهات جوازك نسويله تاشيره من امريكا ..... قلتله وانا طاير من الفرح ابشر بس ماعلمتني كم القطه !!!!!

قال أي قطه الروحه على حسابهم لا وبيعطونا فلوس بعد ..قلت الله يبشرك بالخير .....مع السلامه

واتصل على سفر واعلمه قال زين بس ماودك يعطونا فلوسنا مقدم وندز للشام ونلحقهم قلت انا ماعندي مانع ...

(بس رفض سلمان قال نمشي من هنا كلنا )....

المهم خذو جوازاتنا وقالوا يوم الثلاثاء الوعد المطار .....

انا ودعت امي واخواني ودعولي بس ماش ماخش مزاجهم ان الروحه للفضاء يخبروني انصب عليهم اقول رايح للشرقيه واطلع انا وسفر بس الفضاء عاد مره وحده ....قويه

المهم جينا للمطار ولاكل الشباب موجودين ومعهم عفشهم بس ابراهيم النجيدي عفشه زايد جايب معه (معاميل) دلال وبرقان وهيل وكل المستلزمات ..(يحسبها كشته) ......

ورفضوا يدخلونهن بحجة العفش الزايد ......

وسافرنا بعد التوكل على الله حنا العشره ووصلنا لامريكا .......

قالوا الليله بتنامون في واشنطن وتسلمون على اعضاء الكونغرس بكره وتطلعون بعدها لمدينة هيوستن في تكساس للتدريب لمدة اسبوعين ..... وبعدها تروحون لفلوريدا علشان الانطلاق بيكون من هناك ....

المهم صحينا واخذونا للكونغرس وسلمنا على السيناتورات الامريكان ورحبوا فينا الجماعه وقالوا هذي فرصه ماحصلت حتى لابناء امريكا فلا تخذلونا .......

طرنا لهيوستن وسكنونا في القاعده هناك حنا يالشاب كل اربعه بغرفه ..والبنات لحالهم في غرفه .....

وعلمونا بالجدول كل يوم تدريب من الساعه 8 الصباح آلي 6 مساء واول يوم واخر يوم اجازه ...

طلعنا اول يوم وتمشينا كل واحد على راحته .........

انا وسلمان وابو سليمان ورامبو الاطخم سوا والبنات معنا .....ونوينا نروح لمعالم هيوستن ...

والباقين نووها على الملاهي (مهوب ليليه) بيلعبون ومعهم الشايب فهد يداريهم والاعصار يتوعد ترى اللي بيزعجنا بنحذف كل مواضيعه عبرة له ولغيره .........

وبعدها بدا العمل المتواصل لمدة اسبوعين ....... كانوا يدربونا ببدلات فضاء وفي اجواء تنعدم فيها الجاذبيه ..

والحمدالله ماوجهنا أي مشاكل باستثناء البنات الله يستر عليهن ويجزاهن خير رفضن يرمن العبايات ويلبسن البدل فعدلوا في تصميم البدلتين عشان يناسبهم وهم لابسين العبايات .......

وانتهينا من التدريب وسافرنا آلي فلوريدا للاقلاع آلي الفضاء ......................................................

اكمل لكم في الجزء الثاني .........وشكرا