بسم الله الرحمن الرحيم



والصلاة والسلام على اشرف الانبياء والمرسلين



عندما اردت الذهاب الى الفيصليه بالرياض



ذهبت الى مدينه الرياض وكلى شوق لكى اراء التحفه المعماريه فى الرياض


الفيصليه او لمملكه





ولكن عندما ذهبت الى احد الاقارب وقلت له بعد ماتقهوينا وخلصنا قلت مشينا




قال لى وين قلت للفيصليه



قال ليش قلت بشوفها وبنتمشاء


قال انت ماتخاف الله قلت ليش وانا وين ابروح لتل ابيب

قال والله كلهن مثل بعض قلت ليش :sad:



قال انت ماتخاف ان الله يخسف فيك الارض


قلت وانا وش سويت قال كل الفيصليه فساد فى فساد قلت ليش



وقالى عنها كلام كثير وطويل



بعد ها رجعت لديرتى وبعد كم يوم جتنى رساله فى البلتوث


فيها قصيدة عن الفيصليه


اعجبتنى كثير كثير


يقول

اللقافه حولتنى تحت برج الفيصليه ويعلم الله يوم جيتها ماحسب انى بالرياضي


لاكن هذا الشاعر كان يقولون عنه كلام عن الفيصليه ولا صدق هالاكلام


يقول

اثر معهم حق ربع شارحين الوضع ليه وكنت اكذبهم واقول الهرج هذا هرج فاضى


وقال عندما شاهد البنات والشباب لابسين جنز


يقول

والولد والبنت ماتفرق هذة عن شكل ذيه فالباس وفالمقاس وفالحمار وفالبياضى


واخيرا قال عن اهل العليا لان الفيصليه بحى العليه


قال

قلت ياقوم العليا ذمتى منكم بريه وهنى من حطكم بالقيض بذيك الفياضى


الى اخرة ولاكن


هل هذا كله فعلا فى الفيصليه وانا الى الحين ماجيتها ولا راح اجيها


وبعد كم اسبوع ارسل لى واحد مقطع فديو فيه مرقص بالفيصليه



واندهشت وقلت هل فعلا كل هذا فى المملكه العربيه السعوديه (بلاد الحرمين الشريفين )


هذا اللى فى الفيصليه وشلون المملكه

لاكن ماقدر اقول الا حسبنا الله ونعم والوكيل


وتقبلو خالص تحياتى

[align=center]اول شئ الحكم تحت وكالة يقولون من الامور السيئة.
انا اروح للفيصلية وماعمري لاشفت لا مراقص ولالبس جنز ولاهم يحزنون.
الي شفته ان كل واحد له دخل في نفسه واهله والباقي مسؤول عن نفسه.
اكبر شيئ تراه كشف الوجه والشعر مع لبس العباية وهذا موجود حتى في البطحاء وفي اي مكان وخصوصا من الاجانب.
تدري كنت قبل ماادخلها اسمع ان القبو مرقص لكن يوم دخلتها عرفت ان القبو العاب والدور الثالث مطاعم وفيه من جهة خارج المركز التجاري معارض وايضا فندق ولكن لم ارى مرقص وللمعلومية فكل المركز مفتوح بالكامل وليس هناك شئ ممنوع الدخول الا الاماكن السكنية.
لمعلوماتك فببرامج كمبيوتر استطيع ان آخذ صوتك واخليك تقول مااريد وايضا استطيع من صورتك ان ادور بك على انحاء العالم.
التذمر والسخط عادة لدينا ولكن ماالذي يمنعك من ان ترى هل فعلا هناك لبس جنز.
نحن نؤمن بوكالة يقولون ولكن ليس عليك الا ان تصدق عينك[/align]

والله بصراحه انا من اهل الشرقيه

وزرت الفيصيليه زياره بسيطه يعني ما طولت

ولكن الصحيح ان الولد والبنت ماتفرق هذة عن شكل ذيه فالباس وفالمقاس وفالحمار وفالبياضى

والله بصراحة اللي يروح إلى الفيصلية ما يستحي كلهم ماهم حقين دين

الله يهديهم

قولوا أميييييييييييييييييين.

[align=center]الله يهدي الجميع
ولكن انه في مراقص مو صحيح
بالنسبة للشرقية فهو مثل الراشد بل الراشد ممكن اكثر مشاكل.
وبعدين الواحد جاي يشتري غرض وطالع
والرجال مثل البنات ممكن ولكن البنات مثل الرجال لا
يعني الخكري موجود ولكن نساء حركات لا
انا ماعندي مشكلة وحضوري لها بشكل كبير جدا سواء غداء اوعشاء وايضا تسوق كجزم او ساعات عالمية
انا اروح وبملئ الفم ومسألة انك شفت رجال مثل بنات فهذا موجود في كل مكان في الرياض.
ممكن مو متعودين على مثل هذه الحركات فأتمنى تشوف شارع التحلية وكأنك في شوارع نييورك ولكن كل هذه التصرفات من الرجال
انا مثلا لي قريب في ارامكو ويوجد هناك سينما ومسابح للعاملين مختلطة وهذا لايقارن بما عندنا من ناحية الاستقام
ممكن عندنا شوي تشدد من قبل البعض ولكن للمعلومية فالهيئة موجودة ومااتوقع راح تتفرج.
ولكن ماتقارن العاصمة بمنطقة غير تجارية.
انا احضر الفيصلية والمملكة واليوروماشية ولان اكون في يوم من الايام خارج منظومة المجتمع
وسأذهب غدا باذن الله.
ولكن يمكن لان مشاهدتكم لمرة واحدة ولحالة واحدة بدأ الحكم
انا عن نفسي والعائلة جميع ملابس العيد والمناسبات من الفيصلية والمملكة.
واقول في النهاية الفيصلية مركز تجاري وليس ملهى ليلي وهذا وذاك يفرق
اتمنى اذا جيت للرياض وانا اروح معك للفيصلية وللمعلومية فهيا عائلية ولايوجد بها مكان للتجمع.
والترقيم وغيره موجود في جميع شوارع الرياض واللبس شئ عادي في جميع شوارع الرياض.
وبعدين انت ماذا تريد من السوق؟
عندها استطيع ان اقول ماذا ستجد.
ان كان للتسوق فستجد ان كان للمطعم فستجد.
للمعلومية فأنا باذن الله بكرة مع العائلة في الفيصلية بسبب التخفيضات وسأشتري ساعة من الدهام. ولكل شخص قناعاته فأنا لااجد ان هناك سوق تجاري مميز غير الفيصلية[/align]

شكركم على مروركم يا المحب لزعيم اسياء و هلالى من المفيا وخالد3333


واقول الله يعطيكم العافيه


وانت يالمحب لزعيم اسياء والله ماتمنى الشى هذى يكون بالفصيليه وكل مسلم


وياليت اللى سمعت كله كذب فى كذب

والله يهدى الجميع

إقتباس والله بصراحة اللي يروح إلى الفيصلية ما يستحي كلهم ماهم حقين دين

عـيـــــــــــــــب هالكلام...............
اتوقع انك اذا رحت مكان ماترضى احد يقول هالكلام عليك...........



زي مافي الفيصله اشياء كذا في بكل مدينه سوق تصير فيه اشياء اكثررر

هذا اذا كان يصير في الفيصليه مرقص والخرابيط ذي

ماانكر انو فيه في الفيصليه

إقتباس اكبر شيئ تراه كشف الوجه والشعر مع لبس العباية

اتوقع شي راجعلهم وماتحكم على كل اللي يروحون بالحكم هذا!!!



الموضوع ماعجبني
ويريت يابو نوف كان رحت علشان تشوف وتحكم بنفسك

أختى تغريد وشلون كل واحد حر فى نفسه يعنى اللى يطلع الشعر عادى ولا وشلون


وبعدين الموضوع لاتقللين من اهميته ولله هو مهم وانا اشك ان فيه مرقص ولا اتمنى اشى هذا


والله يهدي الجميع

إقتباس وشلون كل واحد حر فى نفسه يعنى اللى يطلع الشعر عادى ولا وشلون

انا ماقلت كذا

لا مو عااااادي

لكن يعني بسبه ذولي خلاص مانروح!
على كذا مابنطلع ولا مكان ونقعد بالبيت!
لان كل مكان بتلقى وحده مطلعه شعرها!

إقتباس وانا اشك ان فيه مرقص ولا اتمنى اشى هذا

والله غرررررررريب

يعني لا اللي انتو دخلتو الفيصليه
ولا انتو راضييين تصدقون


ترى موحلوه بحقنا

معناها انو فيها مرقص وانا اروحلها وادافع عنها!!

اختى تغريد هى ماهيب حرب قبليه انا والله والله والله لااتمنى ان فيه مرقص ابد ابد ولا كل


مسلم يتمنى ذالك

اما عن البنات اللى يطلعون شعورهن نقول الله يهديهن ولاحول ولاقوة الا بالله

انا لله واانا اليه راجعون

إقتباس للمعلومية فأنا باذن الله بكرة مع العائلة في الفيصلية بسبب التخفيضات وسأشتري ساعة من الدهام. ولكل شخص قناعاته فأنا لااجد ان هناك سوق تجاري مميز غير الفيصلية

وش دخلنا فيك اللحين تروح تشتري ساعه بكره

ان شاء الله يعطونك الدهام نفسه هديه

احنا نتكلم عن السوق ما نتكلم عن جدولك بكره

بعض الناس والله ماتدري وش يبون

[align=center]

إقتباس الرسالة الأصلية كتبت بواسطة هلالي من المافيا وش دخلنا فيك اللحين تروح تشتري ساعه بكره ان شاء الله يعطونك الدهام نفسه هديه احنا نتكلم عن السوق ما نتكلم عن جدولك بكره بعض الناس والله ماتدري وش يبون

صادق في بعض الناس ماتدري وش يبون
ولكن في بعض الناس يبون شئ ولكن يحبون يلفون ويدورون
انا ماحبيتها منك ولكن هذا من صميم الموضوع فمو معقولة اروح مع اهلي لمرقص.[/align]

وش هالكلام ,,,,,,,, مع احترامي لك يابو نوف الا انك فاهم الدعوه غلط
بعدين ياخي خويك الله يجزاه خير وش بلاه مشبه الفيصليه بتل ابيب وين يالحبيب

وش يدريك ان المقطع في الفيصليه والا معتمد على عنوان المقطع
تلقاه في لبنان ومكتوب الفيصليه والا مثلك يالحبيب على نياته يصدق
ياخي الفيصليه انا ادخلها يعني خلاص انا صرت ديوث ومنافق وكافر مايصير هالكلام
عموما انا ماادري وش سبب الموضوع بالضبط حتى انه غريب بصراحه مع احترامي لك وتقديري ولا تزعل مني وانا اخوك ولكن الموضوع مافيه اي اثبات انه في الفيصليه مرقص
انا مانكر انه بعض الشباب يلبسون الجنز وقصات شعر و مابقى الا الروج
ولكن برضوه يالحبيب ترا في كل مكان تلقى هالاشكال يعني ماعاقت على الرياض
ويكون في علمك تراهم نسبه قليله جدا في الرياض الله يهدينا وياهم
تحياتي لك واعذرني على ردي اذا ماعجبك

خلوهااااااا

يقول المثل خذ العلم الوكادي من عند اهله ;)

بصراحة ماحد ينكر ان الفيصليه فيها فساد وايضا فيها ناس

عاقلين يجوها مثلي انا اشتغل في الفيصليه وشوف بأم عيني

والله فيها بنات تغطي وجهك من قوة بجاحتهم ولا تستغرب اذا قالت لك شغل البلتوث يا حلو

واما من ناحية المرقص فهو ماهو مرقص بس في قاعة احتفالات يصير فيها رقص خاص ؟؟

بس ما فيها اختلاط .. وبرضوا المسبح يكون فيه اغني هادئة بس بدون هز وبدون ؟؟؟

واذا جيت الفيصلية كلمني اوديك الاماكن الحلوة

سلااااااامي

ياخى هلالى سمعا وطاعه والله انا ماتمنى ان كون فيه مرقص فى


الفيصليه ولا كل مسلم يتمنى ذالك وبعدين الموضوع انا طارحه لكى تاكد

وبعدين ماجد مقبل قول فها فسا د

انا فى نفسي راح ازور الفيصليه ووبعدين بتاكد

اما عن سالفه المرقص ممكن انها حفلات خاصه ممكن

والله يهدى الجميع