*,*سوالــــــــــف زمـــــــان*,* - نادي الهلال السعودي - شبكة الزعيم

فرصه ضايعه · #1 07/06/2005, 06:31 AM

[align=center]السلام عليكم

حيّا الله الزعماء كولاياتهم

كل هالايام وأنا ودي أكتب شي عن الأولين

وقعدت أجمّع من أمي وجدتي الله يطول في أعمارهم اللين تعقدت من بعض الألفاظ

الموضوع وما فيه أني وأنا اكلمهم الكل انسجم معنا لدرجة أختي الصغيرة إذا وقفت أمي تقول لها كمـــــــــــــــــــــــلي

وكل سوا ليفنا تتعلق بالبزارين وش لون يلعبونهم

وش لون يخوفونهم

وكيف ينومونهم

وأنا بكتب لكم شوي منها واللي عنده زود لا يبخل علينا

نبدأ بسم الله

أول شي إذا جو يردّحون البزر ( يلعبونه )

وهم يلعبونه لازم ينشدون له
ومن الأناشيد اللي يقولونها بعضها إلى الآن تنقال
ومنها:
1
ياحبني ليتس حبين.... في قلبي لتس شعيبين
شعيب كتل الوادي.... وشعيب كتل سدير
شعيب ينبت الحنا.... وشعيب ينبت الهيل
وهذي خاصة بجدتي الله يرحمها

2
(....) الزين والبيض يعشقانّه
يرقن فوق الجبل
يبغن يشوفانّه

وهذي مكان النقط اسم الطفل

3
هلا هلا ومهلي .... جعله يكبر ويصلي
ويقرأ مع القرايه .... كملووووووها

<< عجزت أكملها هي أكثر من بيتين بس هذا اللي حافظته :p

4
ياهلا ومسهلا .... يادبدوب بسهالا
وأنت شمعة البيت .... واللي غيرك مابه حلا

لا تسألوني وش معنى بسهالا

5
هلا بك هلا بك.... تهنّا بك شبابك
والموت ما درى بك.... وخلاك ربي لحبابك

6وهذي قويه مره

جعل من قال ( فلان ) شين.... يعطى العمى في عينه
وزريزر في الأخرى.... يموت وما أوفى دينه

طبعاَ لكل وحده منهن لحن معين

ثانياَ: هدهدة النوم

ماعندي غير وحده بس

وهي
لا إله إلا الله.. محمد رسول الله.. خلو وليدي ينام..نعطيه فريخ الحمام.. نكذب عليك يالحمام .. ابغى وليدي ينام

ثالث شي: وهو المهم وهو التخويف

يعني تخويفهم على مستوى

مب مثلنا الذيب والحرامي

يعني مثلاَ عندهم

المقرصة الحاميه

وهذي يخوفون فيها البزر إذا أخطأ على اللي أكبر منه

عوافي الله

يعني ينزل العقاب مباشرة من السماء

السعلو

عاد هذا سالفته سالفه لاني كنت أخاف منه

وقصته تخوف لانه ياكل البزران

وبقولكم اللي أذكره من قصته
بس مالي دخل فيكم إذا أحد تروّع

يعني اللي مب قدّها لا يقراها

فيه سعلو وأمه وأخته
وكان السعلو صغير عمره يمكن 7 سنين
المهم مره من المرات راحت الأم عند الجيران وخلت البنت اللي أصغر منه
عنده ويوم رجعت للبيت جاء لها وقال يمه يمه كليت أختي

وأمه ما صدقته أول شي بس يوم دورتها ما لقتها :sad:
وخافت على نفسها :sad: :sad:
وقالت لازم اتخلص منه قبل ما ياكلني

وقعدت تفكر و ودته للقليب وقالت له شف فيه مويه ولا لا ويوم شاف وتدفه ويطيح وتستانس

:p
وما أمداها ترجع إلا وهو وراها يقول يمه يمه تسبّحيت وجيت

و مره كانت تقرص قرصان على المقرصه
وكل ما حطت قرص واحد وزينته بلعه

وبلشت فيه وقالت له شف النار طفت ولا لا ويقعد يشوف وتدفه فيها وتقعد تطامر من الفرحه

وشوي ويطلع لها

يمه يمه
تشعّليت وجيت

وأخر شي قررت أنها تقطعه حته حته
وترمي كل قطعه في مكان
وقطعته ورجعت للبيت وما أمداها إلا اللي يناديها
يمه يمه
تجمّعيت وجيت

والله البلشه

وش تسوي فيه

المهم مره قعدت تسولف هي وياه
وهو منسدح على رجلينها
وقالت له وشو اللي يموت السعلو وقال لها
تاخذين سبع شعرات من راسه

<< على نياته مسيكين

وهي اللي مغير كل شوي تنتف من راسه :p وهو يقول آي آي

ويقول لها وش تسوين
تقوله ما أسوي شي
المهم أنه مات وأفتكت منه

والله أني نسيتها أذكر أنها اطول من كذا بس هذي الزبده
وترى فيها لخبطه شوي معليش

هاه يحق لي أخاف منه ولا لا

وبقى آخر شي وهو
حمار القايله(الله يكرمكم)

وهذا ما يستخدمونه واجد بس هو حمار أسود ويطلع الظهر في حموة الشمس والحر
ويقولون أنه ياكل البزران

خلاص خلّص اللي عندي :p وأعذروني على عدم التنسيق وأنا تراني كاتبتها قبل ما أنام يعني أفهموها لا تتصيدون الأخطاء :p

بانتظار ردودكم

[/align]

قلب الشلهوب · #2 07/06/2005, 06:42 AM

سلمت .. روووووووعة ..!!

ذكرتني بزمان أول =====>> اخس يالشايب ..!!

لك أكوس تحية ..!!

@البرفسور@ · #3 07/06/2005, 06:01 PM

[align=center]ثانياَ: هدهدة النوم

ماعندي غير وحده بس وهي
لا إله إلا الله.. محمد رسول الله.. خلو وليدي ينام..نعطيه فريخ الحمام.. نكذب عليك يالحمام .. ابغى وليدي ينام .

يلعن ام السحبــــه

من جد خلتــني اضحــك مشكوره يافرصه خطيره وكالعاده عنوانك الرجه.[/align]

كان هنا · #4 07/06/2005, 08:21 PM

قسم بالله زمان اول شي

هلالي حلووو21 · #5 07/06/2005, 08:38 PM

زمان يافن حلووووووووووه مره وتسلم اخوي

ذيـب الـمـسـاري · #6 08/06/2005, 12:38 AM

تغطيه تراثيه حلوه

يقولون إنهم يخوفونهم بعواف يالله

كلش إلا النومه على كـلام أخوي / البروفسور جــره مهيب صاحيه

ماجاءقدامي إلا أبو يعقوب يومه ينكس بإبن رخيصه مع الترجي التونسي رحمه الله

بروق نجد · #7 08/06/2005, 02:03 AM

[align=center]ذكرتنا بالايام الي راحت
هع هع

الصراااااحة موضوع

الف شكر لك اخوي

تحياتي لك
اخوك بروق نجد[/align]

الحاتمي · #8 08/06/2005, 06:18 AM

الـحـاتـمــي ...

مــر مـــن هـــنــــا ...

ويـقـول : لا تنسّق و لا يحزنون يا فرصة ضايعة

موضوعك كذا

و عموما ...

بالنسبة لـ( التخريع ) فهو يختلف من منقطة إلى منطقة و من جيل إلى جيل ;)

وهالجيل هذا .... الصغير يخرّع الكبير !!

يعني لا تستغرب إذا انك حاولت تخوّف واحد من جيل ( أبطال الديجتل ) و ( كونان ) بالسعلو !!

و قالك : قم بس قم

رفيف · #9 09/06/2005, 04:25 AM

[align=center] تسلمين يالغاليه على هالسوالف ..

في امان الله ..

اختك .. رفيــــف *[/align]

واحد زاحف · #10 09/06/2005, 02:03 PM

[align=center]ايه يازمن ..

الدنيا تدوووور وتدوووور !

والزمن غدار

>>> وش عنده معمر السعوديه

..

بالنسبه للموضوع كله روعه بس تراني ماعرف شي

( من جيل البلاي ستيشن واتاري العايله

) ..

اييه ايه وبابا فرحان

( اقول يازينك وانت ماترد على المواضيع بس

)

فرصه ضايعه ..

شكرا ً اختي

وشهادتك اللي هناك وسام على صدري

( راعي طويله ومتعيجز يرد هناك

)

وبث خلاث احث اني ثولفت واذد

ثي يو ثووون

ثانكث فرثه ذايعه

سوكرن .. [/align]

الشيفيلان · #11 09/06/2005, 11:17 PM

السعلوة تريترة :sad:

يامال العمرة ( كانت تخوف :sad: ) والحين ( تضحك

)

يحليل شيباننا اللي قبل مدري وشلون نصدقهم والله أننا مانفهم

بس الصحيح قبل عايشين ببر يعني لاضوء ولايحزنون يعني معهم حق يخافون منها

مشكورة أختي على الموضوع الرائع

رفيق الزعيم · #12 10/06/2005, 11:39 AM

ياعمار يازمان اول يوم الخوف له طعم

موضوع رائع من عضو ولااروع

الأزرق العالي · #13 10/06/2005, 03:45 PM

[align=center]فرصه ضايعه :

و عليكم السلام

..

مـوضوع جميل .. و عن ( سوالف زمان ) يحلو الكلام

..

شُــكــراً ..[/align]

GivenChy · #14 12/06/2005, 12:01 PM

أقول مثل ماقالوا اخواننا اهل الجنوب ...

والله إنّش تحييييييفة >> هذا مأخوذ من كلمة تحفة وهي شدة الجمال ...

لاتطيرين عاد ..

ايه ايام زمان ... أما السعلو ذا صراحة رعب ...

سوّت به أمه اللي ماينتسوّى عيا يموت ...

كلنا نبحلق عيوننا لاجت القصة : يمه وين يعيش فيه ؟؟

بس بصراحة سوااااااالف تهبّل ..

وألحين السعلو ماعاد ياكل قلوب الصغار حقّين كونان وابطال الديجيتال ..

مثل ماقال اخوي الحاتمي ...

فرصة ... مشكووووووووورة على موضوعك الروووووعة ..

الــــــزعيــــــم · #15 12/06/2005, 04:55 PM

سوالف روووووعة

مثل مايقال ناصر القحطاني

ســـــــــــــالفة عمري

بس ذي سوالف اجيال

يسلمووو