اولاً اشكر بصراحه



الامير محمد بن فيصل


لتوفير الحافلات .. والله العظيم با الفعل انا رحت مع واحده من تقريباً خمس او ست حافلات كانت منطلقه من استاد الامير فيصل بن فهد



حافلات حديثه ومكيفه مريحه جداً موديلها 2004 او 2005

اقسم بالله وانا في الحافله وانا اصلي المغرب والعشاء في الاستاد اني ادعيلك يا بو سلطان على توفير الحافلات


واشكر الشيخ منصور البلوي على دخول الجماهير مجاناً .. والجميع شاهد 80 الف متفرج غصت بهم جنبات استاد الملك فهد وفي الكثير من الجماهير لم تستطيع الحصول على مقعد ففضلو الجلوس بين الممرات او على اسوار الملعب ا قسم بالله اني شايف جمهور كبير جداً على اسوار الملعب


قصتي مع مدرجات الدرجة الثانية


وصلت الى استاد الامير فيصل بن فهد الساعه 4.40 العصر :p

وكانت الحافلات الست واقفه في ساحات مواقف السيارات الخاصه با استاد الامير فيصل

وكان في شخصين حاطين بطاقات على صدورهم وفيها شعار الهلال يبدو انهم من لجنة التنظيم



للامانه كانو بشوشين جداً مع الجماهير اذكر واحد اسمه اذا ماني غلطان العطيوي

والثاني والله نسيت اسمه

بس للامانه تعاملهم راقي راقي راقي


طبعاً تحرك الباص الساعه 5.15 دقيقه

متجهين الى استاد الملك فهد الدولي .................

الجهور الذي كان داخل الباص كان هادي جداً وكانو ملتزمين با الهدو ما تسمع الا رنات الجول فقط


اما الكلام داخل الباص كان نادر ونادر جداً


ربما كان الهدو الذي يسبق العاصفه



مررنا بطريق خريص المزدحم وكان بعض من السيارات يشيرون بعلامة النصر لنا ويشدون من ازرنا ..

اتجهنا الى المخرج المودي الى بوابة رقم 5 في استاد الملك فهد .. وكانت البوابة مخصصه فقط للاحافلات ..

دخلنا مواقف السيارات وطلب منا احد افراد لجنة التنظيم النزول واشار الى ان بعد نهاية المبارة يجب على الجميع التوجه الى موقف الباص هنا ..

نزلنا وكان الجميع ينظر الينا (( مدري وش فيهم ربعنا الظاهر يحسبونا كويتيين ))


كانت الساعه 5.30 .. وكان الحضور كثيف .. قبل المباراه با اكثر من اربع ساعات


دخلنا الى البوابات الموديه الى مدرجات الاستاد .. قابلنا تفتيش .. ما اسميه تفتيش بصراحه

كنت اظن انه بيكون فيه تشديد كما تعودنا في مباريات الهلال ... لكن الشي هذا ما صار

وقفت عند التفتيش احتريه يفتش شوي الا دازني بيده يقول ياخي عطلت الناس اللي وراك ادخل وخلصنا وما فتشي الظاهر الاخو حاطينه كذا ديكور

قلت في نفسي لا مو معقوله اكيد في التفتيش الثاني بيتشددون


طبعا خلصنا من التفتيش الاول ..

طبعاً كان في افراد يوزعون التذاكر السحب على سياره بعد التفتيش الاول على طول ..


المهم خذينا التذاكر ..

الا والله اشوف الجماهير مهم البالونات اللي يتطلع صوت بالطريقه الكوريه ..

وما شفت احد يوزعها ..

سئلت واحد من الشباب ...... لو سمحت اخوي من وين يوزعون هذي ..

قال يوزعون مين .. هذي تشتريها قلت امس يقولون بيوزعونها على الجماهير


قال .. وكالة يقولون قلت طيب من وين اشتريها الا والله يشرلي على مصري قاعد على كرسي ..

اسمعه يقول شقع يابو الشباب شقع ..

قلت يا الحبيب ابي اشقع

قال بريالين ..

قلت اوكيه خذ ريالين

قال ( (بالهجه المصريه ) ماودك تشتري وتوزع على الجمهور

قلت عطني وحده الله يجزاك خير وخلني امشي ..

المهم دخلت من بوابه رقم 27 على ما اعتقد في الدرجة الثانية تحت
كان فيه عسكري واقف يفتش ديكور نفس الاول


علشان كذا شفنا بعض الالعاب الناريه في الملعب والترجيم بعلب الموية والببسي واشيا اخرى !!..


وكان فيه جمهور كبيره من بدري جاي الله يعطيهم العافية

بين التصفيق بالبالونات والتشجيع الى ان وصلو روابط الاندية وبدو ياخذون اماكنهم المحدد مسبقاً مع شركة هاتريك


بس يا اخوان ذبحونا ها المصورين كل شوي واحد راز كمرته قدام وجهك ..

كنهم ما شافو جمهور


الساعه 7 امتلت مدرجات الثانية عن بكرت ابيها ;) وبدا الجمهور السعودي يتجه الى الدرجة الاولى خلف المرميين

شفنا رابطه جمهور نادي الاتحاد تنزل من المكان المخصص لتجمع الراوابط وتمشي من على المضمار وسط ذهول منظمين الجماهير وراوبط الاندية وهتافات الجمهور السعودي ضد هذا التصرف وقامت بعض الجماهير برمي الرابطه الاتحاديه .. ولكن لم يهمها الامر .. واتجهت الى يمين المنصه الرئيسيه في تصرف اغضب الجمهور السعودي المتواجد في الاستاد ..



محمد ابو لما شفناه اول ما وصلنا المدرج با النظارات الشمسية ومشغول با الاسلكي كل شوي رايح وجاي مشاء الله عليه وقابله جمهور الدرجة الثانية با التصفيق الحار ;)



اشتغلو روابط الاندية با الاهازيج الجميله وسط ترديد الجمهور الكبير



دخل ابو سلطان ولف على مدرجات الدرجة الثانية وقابله الجمهور بتصفيق حار جداً

وكان ابو سلطان يقول ان شاء الله ان شاء الله ويلوح بيده على الجماهير ;)


حماده المصري صاحب الطبل التركي الكبير كان يدق الطبل والجمهور يردد با الصفقات ..

وكانت حركه جميله من حماده ..


شفت اخوينا الثنين المشرفين على ركوب الجماهير الباص نازلين با المضمار


امتلت جميع المدرجات المخصصه للجمهور السعودي .. وكان فيه جمهور كبير خارج المدرجات ويريد الدخول فسمحت ادارة الاستاد بفتح المدرج المخصص للجمهور الكويتي مع عمل فاصل صغير بين الكويتيين والسعوديين

كان عدد الكراسي المخصصه للكويتيين 5 الاف .. لكن لم يحضر سوى الف او اقل تقريباً


وبدا الجمهور السعودي بعمل الامواج المكسيكيه بشكل خيالي اتمنى اني اشوفها على التلفزيون ..

وجميع من في الملعب شارك في حركة الامواج المكسيكيه .. حتى الدرجه الممتازه vip

يعطيهم الف عافيه اي كذا الواحد يجي الملعب علشان يشجع مهوب يقعد يشرب شاهي ويسوي ثقل بصراحه اعجبوني امس


دخل لاعبي المنتخب الكويتي قبل بداية المباراة بساعه !!!!!!!!


نحسبهم بيسخنون او بيجرون حركات الاحماء بس كانو قاعدين يتفرجون على الجمهور السعودي الكبير ويتمشون في الملعب .... (( علشان يتعودون على وضع الجمهور ))

وكانو يناظرون الجمهور ويتمشون في الملعب فقط من غير لمس اي كره

بس الصياح والزعاق والهدير السعودي ارعبهم وحتى الالعاب الناريه

والبالونات كانت ذات صوت قوي جداً ... شوي الا واذني بتنفقع من طن طن


حركة فاشله من الجهاز الفني .. اجل يتعودون على وضعيت الجمهور .. خير ان شاء الله


اشوى انهم من اول دقيقه الى اخر دقيقه كانو مرتبكين منكم

مدري هذا اللي اذكره ... توني جاي من الملعب وفيني النوم ..


اذا نسيت شي ذكروني ..



ذكرت شي قبل ما اطلع من المدرج اسمع الجمهور يصارخ واناظر الا ذاك الصغير اللي يلحقه عسكري بعد نهاية المباراة الظاهر انه طاب من المدرجات

شوي العسكري عجز وهو يلحقه ويـأشر للعساكر اللي قدام علشان يحدونه

بس ذا الولد عمل حركه تمويهيه ذكرتني بحركات ابو يعقوب .. وكان وراه اثنين عساكر يلحقونه شوي الا جايك ذاك العسكري المدرعم من قدامه .. الولد سوى نفسه بيروح يمين وراح شمال الا العسكري يسفط على وجهه على الارض ....... وسط صيحات و ضحكات الجمهور الكبير

اذا استجد شي راح اضيفه ..






تحياتي