كيــفـــيـــات!! - نادي الهلال السعودي - شبكة الزعيم

كيفي كويتية · #1 09/04/2005, 01:18 PM

[align=center]

أهلا وسهلا بالجميع

:: وسعوا الملعب وزين العذارى في وصول ::

تخيل لما تكون في دوامك او في كليتك او في مدرستك وتحس انك قاعد في صالة افراح

يمكن تتقبل الوضع وتقول زيران تجي وتروح:p لكن قمة الوقاحة والانحطاط لما تشوف بنات منقبات مو لابسين نقاباتهم في مكان فيه رجال

لا ووحده منهم قاطه النقاب والملفع وبنت الحلال فلت الشعر بعد.

رفيجاتها يغنون ويطبلون على الطاولة وهي ترقص

طبعا هذي الاحداث صارت في الكافتيريا..المصيبة ان هندي ستار بكس وراهم بالضبط وقبالهم هندي باسكن روبنز هذا غير مشرفين البوفيه اللي رايحين رادين في الكافتييريا

اللي منرفزني شغلتين..الاولى فيه قسم للمنقبات في الكافتيريا ليش ما ذلفوا هناك!!
وليش الاخت متنقبة ومتحجبة

والله لو تقطينه ابرك

:: من يكون ::

شرايكم فيني:p اعرف ارسم صح؟

المهم من هو صاحبنا اللي تشوفونه:p بعدين اعلمكم انا شلون صرت مبدعة

:: مناهجنا الله بالخير ::

طبعا الصورة اللي تشوفونها من المنهج الاماراتي لصف رابعه ثانوي

المهم جيل رابعه ثانوي الحين عندنا في الكويت درس المنهج الاماراتي من الابتدائي وتدرج فيه الى ان وصل الى الثانوية

انا على ايامي >> احلى يالكبيرة

>>كنت ادرس منهج لونج مان

الزبدة مناهجنا قديمة ومغبرة وما ادري متى بتواكب التطورات

ركزوا في السؤال الثالث والرابع :p ومنا الى الامانة العامة لمجلس التعاون الخليجي

تكفون شوفوا لنا حل

:: احساس ::

~ ول ياوقت ~

ول يــــــا وقـــــتٍ ..
صــــفــــعـــنـــا
وش بــــــعــــــد ..
مــــــوت الــشــعـور
مــا رسـمـتك.. لــي مـسافه
و لا تنفستك حضور و لآبصدقتك ..
إنـــفـــجـــعـــنــا
ول يــــــا وقـــــتٍ ..
صــــفــــعـــنـــا

~ بحور الاماني ~

سافرنا في بحور الأماني
كان الوفا شراع السفينه
وعيوننا تسهر .. تعاني
تبحث عن أنوار المدينه
وتـدرين يا عمري أنا
حـنا انـخلقنا لـلفراق
حـنا تـذوقنا الـفراق
وعـانينا مـر الأشتياق

لصدى الحرمان الله يرحمها

:: كيفي كويتية::

احب هالقصيدة وهي لعلي مساعد:p وبصراحه ما ادري انا قد نزلتها في المنتدى من قبل ولا لأ

>>والله وكبرتي ياكيفي

حرقتي اعصاب اعصابي دخيل الله
جنون وغيره علي هالحال يوميه
لامن زعلتي قلبتي عالمي كله
واعيوب خلق الله اتحطينها فيه؟
ولامن رضيتي تناديني هلا والله
دنياي عقبك علي مساعد رماديه
اكيد بك شي او تشكين من عله
لامستحيل انتي انسانه طبيعيه
ياليلي الليل لاشفتي علي زله..
ساعتهاا اكره حياه الناس مو ليه
طلعتي الشيب براسي قبل حله ..
انا اصبغ الشيب وانتي توك ابنيه
قلبك اعرفه ضعيف يخاف من ضله..
لاكن معي تركبك مليون جنيه
يانااس دربي عجزت القااه وادله..
البنت ماهي طبيعيه خيااليه
لا قلت وشفيه عقلك صابته خله..
قالت وهي تلتفت كيفي كويتيه

:: عاشت القدوة .. مربية الاجيال::

تقولي اختي ان ابلتهم العربي خذتهم من حصة الالعاب وقالت لهم يطلعون ورقة ويكتبون كل اللي تكتبه هي على اللوح

ولما خلصوا وكتبوا قالت لهم ترى الموجه بيجي الحصة الجاية

وكل وحده تحط الورقة في الدرج عشان الموجه ما يشوفها وقالت لهم ابيكم تشاركون من الورقة وابي كل الصف يرفع ايده

تحية تقدير واحترام لهذه المدرسة اللي خايفة على تقديرها:p ومنا الى وزارات التربية بدول الخليج>>شكو الخليج

>> ترى العلة فيكم اولا واخيرا وهذي نتيجة تخباطتكم يامعالي الوزير!!

:: خارج منطقة التغطية::

قبل يوم كنت ناشبة في منتدى المنتخب السعودي كانو المشرفين يرابطون هناك:p ويحذفون ويعدلون اي رد فيه اساءة للكويت

لكن الفترة الاخيرة صرت افضل القراءة على المشاركة بس اشوف الربع طبوا فينا طب

ملاحظة اخيرة: ما ادري فيه احد داعي علي

من يوم الاربعاء وانا كل ماجيت بضغط على زر ارسال الموضوع يطير كل شي

يوم الاربعاء مرة ويوم الخميس واليوم الصبح بعد

تحياتي للجميع بلا استثناء

[/align]