الهلالي ابو سارة يعود لكم من جديد ..

السلام عليكم اجمعين ..

أجل تصميم .. هااه !!

ياحبني لكم.. يعني مابعد عرفتوا ابو سارة الى الحين ؟!

تمقلوا زين .. بالله هالوجه ، وجه تصاميم !!

حده يفتح صفحة موضوع جديد واحيان ما يعرف !!

يازينكم بس وانتم جايين مدرعمين ..

عاد مادامكم جيتوا .. فـ هلا والله وغلا ..

ابيكم بـ ( هيد وورد )) كلمة راس يعني ..

بيني وبينكم كلام .. والكلام للجميع بس تكفون لايدري احد اوكي حبايبي ..!!

أول شيء .. صبحكم الله بالخير .. يمكن الوقت عندكم الحين قبل العصر ..

لكن عشان (توني) قايم من النوم ،، وبتوقيت استراحتنا .. الوقت الآن الصباح الباكر .. لا وعندنا مطر وبردي (( شاربين توت الظاهر!! ))

صباح الخير والورد صباحكم بريحة الكادي اللي اسمع به ولا قد شفته..

صباحكم بتغريد الخيول المستنفره وشقشقة العصافير المهاجرة خلف هونج كونج (( ياهووه يانزار ))

المهم خلونا من الهرطقه والكلام الفاضي وخشوا معي بسرعة 120 ريختر على كلام الجد !!

جماعة الخير .. نبي 70 الف يترسون الاستاد .. (( وش السالفه ))!!

أدري خرشتكم ..

لكن ترى مصخت ..

اعنبوا بليسكم يابني هلال.. تراكم أكثر من يأجوج وماجوج (( خربها أبو سارة )) !!!!!!

:

:

:

**هذي مباراة مو زي اي مباراه .. الحاجه فيها ماسه للجمهور الكثيف قبل صانع الألعاب والاجانب وهلم جراا ...

الهلال لما يسافر المغرب .. راح يواجه ستين ألف مغربي هناك ..

بلاش نضحك العالم علينا.. ونشوف المدرج مافيه الا كم واحد مع بياع البيبسي !!

بلاش نحسس اللاعبين انهم لحالهم وسط هالمعمعه .. ثم نجي بكل بجاحه ونحاسبهم بالأخير!!



** فريق الوداد هذا مرعب نوعاً ما ..

يلعب كورة هجوميه بحته .. سواءاً بارضه او خارجها ..

هذا الفريق اللي تأسس ايام العشرينات في القرن الماضي ..

لما مالقوا له اسم .. واحتاروا .. كان وقتها نازل اول فلم لأم كلثوم بعنوان ( وداد ) ..

ولما أعجبهم في المغرب اطلقوا على ناديهم هالاسم ..

وفعلاً يشترك مع ام كلثوم في مسألة الطرب.. لأنه يلعب كورة هجوميه ..

بس فيه عيب واحد ..

دفاعه مو ذاك الزود .. يعني الله بالخير ..

دفاعه كأنه باب بنده (( ابوك يالتشبيه )) .. لا منك اقبلت عليه انفتح ..

ليت المسيو باكيتا يركز على هالنقطه .. (( والله يابو سارة وصرت مساعد مدرب )) !!

** عندهم مدافع ملتحي .. رجله الله لايهينه كأنها ( مرزبه ) الله لايضره باسمه ..

عليه أهداف بالفاولات .. مدري وشلون تجي.. يعني تخيلوا ..

كورة عند الكورنر .. يجي أخونا في الله .. واصل عند المصورين ماخذ عزم ..

ويمغطها الينها متعلقه في الشبكه .. أحرج ريفلينو ..

ليت مدافعينا ومحاورنا يبعدون نهائياُ عن ارتكاب فاولات قريبه.. ثم يحطونها في ظهر ابو عتب..

بس هو .. كبير في العمر .. والجيزاني حق الأهلي اللي مايملك مهارات .. لعب فيه ..

هو (( شويت )) ايه .. لكن ثغره دفاعيه وبطيئ جداً .. يذكرني بسيفو اللي حالياً محترف مصارعه!!



** كثر الكلام على اجانب الهلال ,.. وتسمحون لي أدلي بدلوي مادام كل واحد أدلى بدلوه.. وكل واحد حر في دلوه .. دلو ..؟ قصدي حلو؟؟

تفاريس .. مدافع ممتاز جداً جداً ... أصنفه على حسب دلوي اللي أنا طبعاً حر فيه .. من ضمن افضل

عشرة أجانب في آخر عشر سنين.

كماتشو ... باين الولد موهوب.. لكن صغير بالعمر .. ومتعود أميمته وربعه .. والغربه تاعبته شوي..

يعني نفسيته مو ذاك اللي انت تبي.. هذا يفسر مستواه اللي مرة فوق ومرة متوسط..

بس عند الفاولات .. تخسي الغربه ..

سلفا.. باختصار .. لا شفته يطامر في الملعب ,, قلت ليش نسقنا عادل حنتوش !! كلهم زي بعض بس ذاك أرخص!!!



** اخونا الغالي تغيب الشمس .. قال : أكبر نعمه علينا بعد الاسلام اننا صرنا هلاليين ..

هبوا فيه بعض الاخوان وفسروا كلامه واجتهدوا ..

وتسمحون أدلي بدلوي ههههههههههههه (( يا ذا الدلو اللي أبلشتكم فيه )) ،،

صدقوني ان تشجيع الارزق عافيه ..

مادام الله بلاكم في هالكورة .. فـ احمدوا ربكم انه ألهمكم تشجيع الهلال ..

يالربع... السلامه مو عافيه ؟؟ والعافيه مو نعمه ؟؟

يعني مالها داعي سكر وضغط وانت في العشرين ..

وعندي سالفه ااذاا وقتكم يسمح .. لأنها طويله حبتين ..

واحد من العيال.. صديقي المقرب .. أحد اعضاء المجلس الدائم في الاستراحه ..

(حلم) مجرد حلم .. أنه أهلاوي .. وكل مباراه بالحلم مهزومين فيها..

قاعد يصيح في الحلم .. جت اميمته الله يمسيها بالخير .. تصحيه الجامعه الساعه سبع ..

وليدي قم .. قم ..

نط في وجهها يقول .. لا اا لا ااا مابي مابي ..

اسم الله عليك وليدي وش فيك ؟؟

فرك عيونه وقال اشوا انه حلم ..

هذا الصديق .. مهما شفت من هلايين متعصبين.. ماراح ياصلون نصف حبه للهلال ..

لو لعب الهلال بالمريخ !! شفتوا المريخ اللي ورى كوكب الزهرة يمين!!

لو راح الهلال هناك .. لحقه فهد .. مايهمه مباراه وديه ولا رسميه ولا اعتزال..

ليت نصير ربعه .. اسمه فهد السبيعي.. وفديت السبعان لعيون ابو فهيد .. ولأجل عين تكرم قبيله.


** يالربع .. ياخوان يالمسلمين لحقوا علينا ..

تكفون .. ياللي لكم أمر ونهي بالموضوع .. فكونا من المزمار !!!!!

يالربع والله جايين نحضر مباراه .. مو جايين نغني (( يا علايه )) ..

على هالحال.. اجيب العود وخويي يجيب الربابه .. والموسيقار اللي معه المزمار ..

ونقلبها ( دحه ) في المدرج !! وفنون شعبيه..

** يقول أحمد شوقي:

قم للمعلم وفه التبجيلا .. كاد المعلم ان يكون رسولا..

ويسمح لي اخوي ورفيق دربي احمد شوقي من باب الميانه اللي بيني وبينه .. أغير بيته ..

قم يامشجع مارس التشجيعا .. كاد المشجع ان يكون هجوما . (( بالله وش احلى بيتي ولا بيته ))!؟!!

** يقولون ادموس ( فلسع ) .. يعني طردوه أهل الاماارت !!

وين اللي طبلوا لأدموس وقالوا عالمي.. وسامي اللي طفشه .. هههههههههه والله حاله !!

وعلى طاري ادموس .. كم وصل سعر البقر !!؟؟!!

وبالله تخيلوا ايامه .. عشان تعرفون أن باكيتا مدرب محسودين عليه ياللي كل ما تعادل الفريق ..

طالبوا بالأقاله .. اللهم لك الحمد



** مايحسب لأدارة ابن مساعد .. بالاضافه لكأس ولي العهد.. هو .. صفقة الخثران ..

والشكر كل الشكر لصالح المحيميد على تكفله بعقده الجديد ..

ويستاهل عبدالعزيز . . فنان .. أخلاق.. هجومي كويس دفاعي ممتاز , حماسي ..

مع احترامي لمضواح والجري وغازي. . هو نمبر ون وتو وثري ..



** للأسف اني ماادخل الشبكات الهلاليه الا كل اسبوع .. تقل أحيان أو تزيد ..

وما دريت ان اخونا ابو ريان تعرض لوعكه الا اليوم ..

سلامات يالغالي.. عساه تكفير .. وحقك علينا الدعاء ونضل مقصرين ..









***************

همسه رومانسيه:

يقولون محشش فتح الثلاجه .. شاف الجلي يرج .. قال لا تخاف بسم الله عليك.. جاي آخذ ماء ..!!

والنكته الاحلى بنظري ..

هي أن الهريفي (( يقيم )) سامي .. ههههههههههههه

ياربيه .. ذا الهر فيفي أحياناُ يغطي على المحششين وسوالفهم..


** مهما يقولون مهما صار مهما تم .. تبقى الجزيره أول وآخر منبر هلالي ...

تحيه تبدأ بالرئيس العبدي وتنتهي برشيد السليم .. مروراً بالهدلق والسليمان والرشيد والعبودي والعجلان والبقيه ..


** محمد بن فيصل ..

قلت احضروا ..

بس يالغالي؟؟ ياخوك ماطلبت شيء ..

أوعدك تكحل عيونك يوم الاثنين بالمدرج الكثيف .. وتستاهل ..

..


طولت أدري ..

أسهبت ..

لكن الزبده .. الحضور ثم الحضور ,

ورجاءا .لا أحد يسرق التصميم .. أوكي يالله فمان الله ..

اشوفكم في الاستاد..

والله ياخفت على روحي أول ماقريت الموضوع الهلالي أبو ساره فجعتني ههههه
صباحك فل وياسمين على فكره ترى عندنا في الأستراحه الساعه 7 الظهر أحسن منكم هههههههه
لا وعندنا حر وغبار (( وناكل حنيني ونشرب عصير منقى !!)) أعوذ بالله وسع صدرك أدري شحطة وملغت وسع صدرك
يازين توقيعك تراني حاسدك مين يحصله
المهم الحضور أنشاء الله يبي يبيض الوجه وحنا متفائلين وشكراً على مواضيعك الشيقه (ثانكس) يعني شكراً للي مايعرف صيني ...........قايلك وسع صدرك هههههههههه
تحياتي لك

ما شاء الله عليك ابو ساره سواليفك ما تنمل ... وموضوع راااائع الصراحه


وانا بعد صنفني مع خويك السبيعي .. ان شاء الله حاضر حاضر اي مباراة للهلال


والله فشيله من ابو سلطان


وعلى فكره ترا بعدل على التصمييم شوي اذا ما عندك مانع !!

[align=center]

[blink][glow=FFFFFF]هلا111111111111 و غلا111111111111[/glow][/blink]

[blink][glow=FFFFFF]يالله حي الغالي أبو سارة الهلالي ...[/glow][/blink]

والله الواحد يتعب وهو يضحك ...

وعن جد مدري أضحك على نفسي وانا داخل بكل حماس قولتك مدرعم اناظر هالتوقيع ...
وإلا إضحك على كلامك ...

تصدق عاد كنت أتمنى تنزل هالموضوع عقب المباراة علشان الله لايقوله لو تحققت نتيجة غير اللي بالبال يكون هالمقال بمثابة إراحة الأعصاب ...

ياولد إنت شلون تخطر على بالك هالمواضيع ...

[blink][glow=FFFFFF]
إذا كان سامي ملك التسحيب بالمدافعين في ميادين كرة القدم ...

فأنت يابو سارة ملك التسحيب في ميادين الأنترنت والمنتديات ...[/glow][/blink]

بالنسبة لتصميمك الرائع شخصيا أنا اتوقع الاخوان في مجلة صدى الزعيم يختارونه كأفضل تصميم ...

يعطيك الف مليون عافية يالغالي ...

وبإنتظار موضوعك عقب المباراة ...[/align]

يابعدي والله يابو سارة والله ان سوالفك ما تنمل والله انتظر مواضيعك

بس اعجبتني حقت احمد شوقي
هههههههههههههههههههههههههههههههههههههه
ههههههههههههههههههههههههههههههههههههههه



تحياتي هلالي

يامال العافيه يابو ساره الحقيقه انك ظريف مره

السلام عليكم ورحمة الله وبركاته

أقل من 48 ساعه ويلتقي الزعيم الهلالي وشقيقه فريق الواداد المغربي في لقاء مرتقب من ربع

نهائي دوري أبطال العرب غدا على الأستاد الدولي الزعيم وضيفه الوداد في لقاء مشتعل من

أول 5 دقائق حتى آخر 5 دقائق ولكن هناك بعض الأمور التي تساعد الفريق غدا أن شاء الله

أنا لست رئيس نادي ولا مدرب ولا لاعب حتى أقول هذا الكلام ولكم مادفعني لقول هذا الكلام هو

شئ واحد فقط حبي للكيان الأزرق :

1 : عدم دخول اللاعبين وهم ضامنين النتيجه بحكم أن المباراة في أرضنا وبين جماهيرنا

2 : أخراج المدرب البرازيلي ( باكيتا ) للاعب ( باولو داسيلفا ) من الشوط الأول أذا لم يقدم شئ

وأدخال اللاعب صغيرالسن وكبير الفن ( أحمد الصويلح ) لما يتمتع به من مقومات اللاعبين الهدافين

3 : حضور الجماهير وتلبية رغبة رئيس النادي ( الأمير محمد بن فيصل ) لما يبذله هذا الشخص الرائع

من أجل ظهور الفريق بأفضل صوره وبأذن الله الفريق راح يفوز بكرا أن شاء الله

ولكم جزيل الشكر يا جماهير الهلال

مع تحياتي للجميع ( زعيم شقراوي )

هلا حبايبي ..

الزعيم عبودي .. مشكور على الكورس الصيني ..

خاوني نتعشى في المطعم الصيني.. بس الحساب عليك لأنك تفهم لهم هههههههههههه

يعطيك العافيه

..........


body 9

لا الله يخليك بلاش احراجات .. التصميم هذا بالذات ما ينلمس ..

تحيه ومشكور لتواصلك معي يابعدهم

(__________

ياسيدهم وينك .. وهلالي مشكورين ويعطيكم العافيه.

_______________

ابو شمس ويييين قالبها اراضي ومساحات خخخخخخخخخخ

يالله انتظرك بالذات

تغيب الشمس ( ليش لما اكتب هو أول من يكون على بالي ))

________________________

فهد هلا وغلا ..

الغنيمه ياقلبي ان الواحد يتواصل مع اخوان له مثلكم .,

والله لايجيب القطاعه ..

والتشبيهات والتصاميم هذي حقوقها محفوظه..

اسعتني مداخلتك ..

والملعب بكره نبيه فل على قولتك ان شاء الله.

............





اشوفكم بعدين سلام

اشتقنالك يابو سارة


اهلا بالعودة ومواضيعك الرائعه

[align=center][frame="7 80"]حيالله الهلالي ابو سارة...

ياخي انت والله عليك مواضيع توسع الصدر تطرب الواحد اخ بس يا القهر لو عندنا في المنتدى واحد ثاني مثلك

كان طلعتوا اثنين ابو سارة <<<<<<<<<<<يستخف دمه


على العموم مشكور يا الغالي على موضوعك الراااايق وانشاء الله بكون من اول الحاضرين بكررره


[grade="00BFFF 4169E1 0000FF"]اخوكـ روحي الزعيمـ[/grade][/frame][/align]

هلا وغلا بابو ساره ما شاء الله عليك مواضيعك فيها تشبيهات على الطاير جميله جداً
نشوف موضوعك بعد المباراة ان شاء الله
ـــــــــــــــــــــــــــــــــــــــــــــــــــــــــــــــــ
مع خالص تحياتي لك

هلا وغلا بابو ساره ما شاء الله عليك

ياهلا والله وغلا ومسهلا ومرحبا<<<مابقى شي

يالله إن تحيي أبوساره وشذا التنسيم على الصبح

والله متحمس قلت أبي أشوف التوقيع بس الصراحة

مايعلى عليه بينحط كأفضل توقيع هالموسم

وإن شاء الجمهور بيكونم 70ألف وزود

وسلملي على خويك فهد.....
هذا الهلالي اللي عليه الكلام


وكل الشكر لصالح المحيميد على هذا الدعم
ويستاهل الخثران

وتسلم يالخالدي أبوسارهـــ

ونستنى موضوعك بعد الفوز إن شاء الله

هلالي

زعيم أسيا

روحي الزعيم

ابو طيف الهلالي..

مشكورين وكلامكم تاج على راسي من فوق..

_______________________

اخوي تغيب الشمس ..

صدقني انا متفائل بأذن الله ان بعد المباراة ماراح نحتاج مقالات تهدي الأعصاب ..

متفائل بنتيجه روووعه وحضوور أورع ..

وأذكرك بحول الله ..


____________


ابن آخي ندفد .. هلا وغلا ..

وين هالغيبات ؟؟؟؟؟

وأثني ( روعه اثني) على كلامك ..

فعلاً الشيخ المحيميد يستحق كل الشكر ..

مشكور ياخوك على التواصل المستمر ..


اخوكم الخالدي الهلالي ابو سارة ..

(((( قالت لي قلبك وين..؟؟؟

قلت لها ناسيه ..

قالت لي : وينه ؟؟

قلت: وسط العريجا ..

آآآآآآآه ياحبني لك يالعريجا .. احبها من حب ساكنها ..

الهلال