08/05/2001, 10:16 AM
|
| زعيــم مميــز | | تاريخ التسجيل: 04/09/2000 المكان: الـريـاض - الـبـديـعـة
مشاركات: 1,721
| |
مساء الخير وتغريد الطير ...
هذي الله يسلمكم قصة واصلة لي على الأيميل مدري بالزبط وين مصدرها والله اعلم شكلها قديمة قد أنحطت في منتدى بس الصراحة أعجبتني ولعل وعسى يستفيد منها الأعضاء لي هنا...=)
=====================================================
هذي الله يسلمكم قصه واقعيه من خيالي الفتاك....
اييه من زود الهم اللي فيني مالي غيركم اقرق لكم همومي ..(كنكم
صدقتو؟؟خابرتكم مخفات)انا الله يسلمكم ويحييكم يقولون اني بنت بين ستة
عيال ..طقتني الهموم وشيب ذ الرويس وانا توني في عز شبابي ..تجيكم قصتي
:..
انا يا حصيصه يا محاتسيتكم تربيت بين كومة عيال جعلهم اللي منيب
قايله ..لا اخت ولاش..المهم بينما انا جالستن ذيك المره من المراريت
اقشم حب ومادتن ذا الرجل اللي كنها مشاالله سيخ شاورما (خخخخخخخ تف
لا اله الا الله) واذا باخوي الكبير طابن علي ..قال بحاتسيتس(بحاكيك)في
موضوع خطيير ..قلت الله واكبر يا ابن لادن اللي يسمعك هات هاها وش
عندك..قال شوفي تراك يا حصيصه محسوبتن علينا بنت فيذا العيله وانتي
ماهناش ..وانا اللي اسوي استداره بهلوانيه واقشم حبتين فصفص في وجهه
واقول: افا ياذا العلم ..قال اها عاد الى متى بشوفك جالستن تحت الجدار
تحترين عيال الجيران يصطحون الكوره ثم تشقينها وتنطلينها في الشارع من
زود النجاسه؟؟..الى متى وانتي نافشتن ذا الكشه تقل قطوتن طابتن في غسال
موتر؟؟ ..ترا ذا الحكي مدسوس من خيالي الى ام كشه بس لا تعلمونها..الى
متى وذا الريحه المصصصصصنقه اللي ذبحت فيراننا وفيران الحاره؟؟....الى متى
تراكظين ورا الصوارير بكنادرنا وتقطعين زبيرياتنا؟؟...مطفوق الحكي ذا
مو لك ابد ابد..الى متا وملافظك كنها ملافظ اكبر عربجي في
الديره؟؟...وانا اخوتس منتيب معرسه كذا اهجدي واركدي تراتس حرمتن
تاااامه ...قلت بس بس بس يكفي تجريح بانوثتي يكفي (هو مير فيه انوثه
من اساسه عشان يجرحها) ظف وجهك منيب سامعه شي ...ظف خشيشته الاخ
وانقلع خابر انه مافيني رجا ولا امل ...هو طلع من هنا وانا اللي
اقمز من هنا للسطح اكمل ممارسة هواياتي ..اجمع ذا الحصيان وانسدح على
سطح الملحق افلق عيال الشارع والقطاوه(ليتهم ذابيني انتفض في فلسطين
تسان زد حررتهم)..التفت!! وما اشوف الا ذاك اللي يطل من دريشة بيتهم
يزاعق .......وبعد برهات دريت انه يحاتسيني انا..قلت خير ظايعن لك في
وجهي شي ؟؟ ظف وجججججهك..قال الا انت اللي ظف وجهك..!!!!هاااااو
وراه يحسبني ولد؟؟ انا اوريه ...قلت اها عاد بس لا يكثر لا اسفك بذا
الحصاة ..لا ابوك لا ابو اللي جابوك تفو عليك (اكتشفت من خلال المعاشره
اليوميه مع عيال عيلتنا عشان اطلع بذا الموضوع ان اسلوبهم مااش
ميييييح)..قال امممممش تسفني انا الا انا اللي اسنعك واسنع ابوك وابو
اللي جابوك..قلت هه هه ان تسانك ولد ابوك قابلني في براحة المسجد خل
اكففففخك (اسلوب انثوي بحت)......فجاه!!!!!.....اسمع شي يقول لا لا يا
حصيصه انتي بنت ..حصيصه لا تسير هذي ملافظك..حصيصه انتبهي انتبهي ..قل
لاء لاء لاء خلااااااص ارحموني (فلم هندي تحملو شوي)..مهوب ذمبي اني
عايشتن بين عيال من وين تبون اجيب لكم انوثتن منه؟؟ هاه علموني وانا
اللي ما عرفت من اخواني غير لعب الكوره والبلوت وتطعيسن معهم في
ربوع الثمامه؟؟؟؟؟؟...وانا اللي اذب الحصى اللي معي واعظ طرف دراعتي
واقمز من سطح الملحق( الله واكبر قرندايزر على غفله)..والتفت الا ذيك
القطيوه تاكل ظبان جايبهم لي اخوي محيميد ..واتقوم عندي النخوه
والشهامه وانهار ..واركض لرشاش اخوي وافقع مصارينها بنت اللذينا
اخسا عليها من قطوه تاكل اصدقائي اللي مالي الا الله ثم هم ..وهي اللي
تطيح مغشين عليها من هول ما جرى لهاوترافس وترافس وتصايح مياااااو
ميو ميو ..حومت تسبدي واقوم ارفسها ذيك الرفسه قلت اها عاد موتي
وانتي ساكته لاتزعجينا ولا اسمع لتس حتس تفهمين والا
لا؟؟؟........واناظرها بقوه ابيها تفهم ..قوية الوجه ما سكتت ..قلت
طاااااايب دواتس عندي..وامسكها مع ذنبها واقول بها واقول بها
واصطحها عند الجيران ..وانفظ يدياتي ثمن رحت اخمد (شغل صعايده مهوب
شغل اوادم)...
يوم اصبحنا والبس هديمااتي واطلع مع الباب ...الا وش
اشوف؟؟!!........... شابون وسيمون طالعون من باب البيت اللي
قدامنا .. وما احس الا ذا القلب قام يردح
دردب ..دردب ..دردب..والعرقان تصببببببصب .........واتلفلف زين
بعبايتي لا يطلع مني شي ولاش ..واقمز اركب في غمارة ددسنا المصون واروح
للجامعه(راعية تعلوم منيب سهله)..وكل ما طلعت الصبحيه اشوف ولد
جيراننا ولاهوب يم احد شايل كتبه وطاق ذا النظارات اللي يارب لك الحمد
تقل بلكه وماشي في طريقه ..شابون مؤدبون ماشا الله عليهي...لكن انا
سرت افكر..لحد متى انا بستمر كذا؟؟؟..وارجع البيت واركض واركض
واركض ..وادخل غرفتي واصبخ الباب واحد راسي عليه واصيح.......لا لا
يا حصيصه لازم تتغيرين لازم لازم..مستحيل تستمرين كذا على ذا
الوضع..اصحي اصحي..لاء لاء لاء ..لازم اصير انسانه ثانيه معترف فيها من
وزارة حمولتي اني انثى ...اللي كبري اللي مخطوبه واللي معرسه ..وانا
مغير ادربي ذا الدمجه وادابك ورا قطاوه وصوارير........وانا اللي
امسح دمعتي باقرب شرابن منطول على الارض وادق على نوير رفيقتي ..قلت
نوير انا قررت اعتزل الفن واسير بنت صدقيه ...شلون بس
علميني؟؟؟.....قالت ذي ولله الساعت المباركه اجل لا تشيلين هم يا
حصيصه ...واطير انا ونوير للسوق ونشتري ذا الكنادر السنعه شي صنادل
وشي كعوب واشكال والوان وفساتين وتنانير وبناطيل وبرمودات
وحركات ..ونظف انا وياها من ذا الميك اب(ميك اب=مكياج=milk)..ونروح
للكوافيره وترتب شوشتي وتصلح حواجبني وتزيني ..وارجع لبيتنا واجلس في
صالتنا متكتفه وحاطتن رجل على رجل...(يااااااي مرررره ياااااااي
حبيت نفسي كذا) ...المهم ويدخل واحدن من اخواني ثم فجاه يرجع ويصد
قال احم احم ياولد تغطو ...قلت تعال تعال هذي انا حصوصه ....قال
مشا الله حصيصه صارت حصوصه لا يجي علم ..ويخر اخوي ساجدا ويقول يارب لك
الحمد اللي استجبت دعوتي في توالي الليول والله وصار لنا اخت مشا
الله ..عاد انا استحيت ورحت ..وكالعاده كل يوم اظف عفشي واروح
للجامعه في الددسن الفتاك المتعفط..لكن الغريب ان ولد جيراننا الاحظه
بدا يقزقز مدري وشعنده ذا المختزي ..وش يناظر نعم نعم خير ...وذات
يوم (ما استحمل ذا اللغه الفصحى انا ووجهي)..جاني اخوي قال يا
حصوصتنا ولد جيراننا جاني يطلبتس مني وهو والله رجالن سنافي وسنع هاه
وشقلتي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!
عاد انا قامت الخديدات تلون ازرق واخظر واصفر الين استقرت على الاحمر
ومغير اكل ذا الظفور..قلت اللي تشوفه يخوي(وحده ما صدقت على
الله)..واركض واركض من زود الحيا وانا اللي ازلق ذيك الزلقه واتكرفس
لكن يهون في سبيل العرس ومن الفرحه قمت نفظت عمري ورحت غرفتي..قلت
اخييييييرا ...واصبح الحلم واقع..وتزوجت ولد جيراننا ..ونسيت الماضي
الاليم وحياة المصبنه..وبديت حياه جديده وعشنا في تبات ونبات وخلفنا
انا وياه صبيان وبنات ...وتوته توته خلصت الحتوته.............
----------------------------------------------------------
تحياتي & اشواقي;) |
الوضع العادي
