[ .. احتاج لـ انتخابكم.. صوتوا لي .. ] - نادي الهلال السعودي - شبكة الزعيم

فيصل · #1 04/02/2005, 09:08 AM

[align=center]مساء الخير لكل من تتصفح اعينه
هذا الموضوع المتواضع ..

8
8
احس اني صدق واحد داخل انتخابات
طالع كلامي كشخـه

الكـل سمع بالانتخابات البلديه اللي صايره بالرياض
مدري عـاد عن المناطق الثانيه كان فيها انتخابات مثلنا ولا لا

عـاد انا واعوذ من كلمه انا اول ماسمعت انتخابات والعالم ترشح نفسها
يكون عضو في المجلس البلدي قلت وانا وش ناقصني مااصير مثلهم ..!

قمت في صباح يوم باكر وشخصت بسروال وفنيله جفينشي جديده
< سمعت ان ماركه جفنشي عالميه وقلت ابلعب عليكم يمكن تصدقون انها تخيط فنايل وسراويل

لبست الثوب والبشت والنظارات الشمسيه وركبت السياره
ودعست لوزارة البلديه لتقديم اوراقي المتواضعه < ياشين اللي يعلق على كلمه

خشيت الوزاره سلمت على كل المتواجدين في الصاله الكبرى لتقديم الاوراق
للي يبي يصيـر عضو مثلي ..

لقيت سراوات وزحمه وغثى فماحبيت ازاحم العالم قلت خلني ادور كرسي فاضي
لين يخلصون هالعالم وانا ابنتظر< قمه التواضع مني صح

التفت يمين ويسار وسمعت واحد يزاعق يقول يالحبيب يالحبيب
تعال فيه كرسي فاضي ترى موب تواضع منه انه ينادي
لكن هو ماوثق انه بيصير وعشان شكلي كان جنتل حاول يتمصلح من الحين
<< الله ابو الثقه ياشيخ

جلست جنبه وبالاصح بين ثنين يعني كلهم يعرفون بعض قعدنا نسولف
عن الانتخابات وهالعالم اللي جايه كل واحد يبي يصير عضـو
هل يستحقون فعلاً منصب عضو في مجلس بلديه ؟
فقام كل واحد يقول لا يهبون لاعندهم لاشاهدات ولاخبره
قلت طيب أنتم وش شهادتكم قام الاول وعطاني ملفه شفوا وش يصير ..؟

ااضغط هنـا لمشاهده صور من تقديم الطلب

الاسم ناصر بن سعد بن جازع السبيعي
العمر 47
الحالة الاجتماعية متزوج
المؤهل العلمي إبتدائية
العمل الحالي مرافق صاحب السمو الملكي الأمير / عبدالرحمن بن عبدالعزيز آل سعود
الخبرات العملية عملت معقب ومحامي وصاحب مكتب عقار وخدمات عامة وتعقيب على جميع الدوائر الحكومية والمؤسسات والشركات وتواسلت على أيتام وأرامل
علاقتي واهتمامي بالعمل البلدي لي علاقات كيرة واهتمام وسبق أن تبرعت بحوالة 300 نخلة للبلديات وشاركت في أسبوع الشجرة بعمالة ومعدات وتبرعت عدة مرات بمبلغ من المال
أرغب من خلال عضويتي للمجلس البلدي أن أخدم الحي وأقدم نواقصه من ماء وكهرباء وترصيف وسفلتة وتشجير وإنارة وجمع تبرعات من المواطنين لخدمة حيهم ومساعدة البلدية والأمانة

:: التعليق ::

والنعم في الرجال وفي السبعان كلهم

عمره مره اقول خبره ومره اقول كبيـر لكن اخر كلام اقول الاعمـار بيد الله
المؤهل العلمي .. !!

الخبرات العملية .. مالون بالاسـود يجعلني لاأعلق اكثـر

هل فعـلا يستحق ان يرشح نفسه ان يكون عضو في المجلس البلدي ..؟

الشخص الثاني قدم ملفه وكان كالتالي

ااضغط هنـا لمشاهده صور من تقديم الطلب

الاسم عقيل سميان سواد الشمري
العمر 1368هـ
الحالة الاجتماعية متزوج
المؤهل العليم ابتدائي
العمل الحالي متسبب
الخبرات العملية تجارب الحياة للانسان
علاقتي واهتمامي بالعمل البلدي الواقع للانسان وماله وما عليه
أرغب من خلال عضويتي للمجلس البلدي أن ااكون احد اعضاء العمل البلدي والمواطن

:: التعليق ::

ونعم في اخوالي واهل شمـر كلهم ..

العمر على ماحسبت طلع طاق الـ 60 وانا اقول مابقى في العمر كثر مامضى

والله يوفقه بزواجه

المؤهل ... لاتعليق !!
الخبرات العمليه تجبرك على الصمت مع ابتسامه ودمعه تنزل على الجبين

هل فعـلا يستحق ان يرشح نفسه ان يكون عضو في المجلس البلدي ..؟
.
.
.

عـاد بعدها شافوني اضحك عليهم يوم حقدوا قالوا طيب
انت ورنا ملفك .. فعـاد للاسف مامعي صوره للملف لكن ابعرض لكم موجز عني

الاسم فيصل
العمر 21 ربيعـاً
الحالة الاجتماعية اعزب ولاافكر بالزواج بتاتا

المؤهل العليم ثانوي وادرس الجامعه وسأدرس الماجستير والدكتوراه
العمل الحالي طالب بجامعه الملك سعود
الخبرات العملية خبره في عالم التكنولوجيا وفاهم الحياه 100% < قل قسم

علاقتي واهتمامي بالعمل البلدي ان اجعل بلادنا راقي من حيث البيئه
ان لاأجعـل شارعا واحد فيه صعنوناً او حفرتاً ان لاأجل التراب يزحف على الاسفلت
ان لاأجعل المياة تملئ الشوارع حتى لو اظطرت يوماً لشفطها لعيونكم < قمه التواضع صح

:: التعليق ::

الاسم وستين ومليون وعشر طعش الف مليون ونعم < يريش بعمره

العمر شاب تعدى مرحله المراهقه والطفوله وهذا مانطمح له من شاب يبنى لنا مستقبلاً زاهر
الحاله الاجتماعيه .. اعزب احسن عشان مايغثنا ويصير ينتبه لشغله موب مره
يقول ولدي تعبان ولاحرمتي بتولد ولا ابودي حرمتي لاأهلها بديرتهم

المؤهل العلمي ولااحلى منه خصوصا انه بيكمل الجامعه ويقول اباخذ الماجستير والدكتوارة
العمل الحالي طالب حلو يعني بيتخرج ويلقى له وظيفه احسن من اللي فوق واحد معقب والثاني متسبب

الخبرات العلميه .. في القرن العشرين اكثر مايهمنا هو علم التنكلوجيا لذا رائعه خبراته

علاقته واهتماته TOP وش نبي حنا اكثر من مانشوف حفريات ولابربسه مياه ولاتربات

:: القــرار في ايديكم ::

8
8
8
من ترون انه يستحق ان يجلس على هالكرسي ..؟
من ترون انه سيخدم البلد وسيطور المملكه ؟
ابتعدوا عن المجاملات والصداقات ورشحوني

؟

8
8
8
هذي بطاقه كل واحد ياخذ منها نسخه
عشان اي واحد يبي يزور مخيمنـا الواقع على مخرج 15 بالمربع 9
الواقع شمال غرب او جنوب شرق الرياض

ويسرنا ان ندعوكم لزياره مخيمنا حيث نقدم فعاليات للشيبان والمراهقين والبزران
وحتى النساء والبنات ..
نقدم للشيبان جلسه رديه فريده من نوعها حيث تم استدعاء الردي العالمي منحات
ونقدم للمراهقين شوط من التفحيط للسائق الاشهر على العالم كايد العـاشر

ونقدم للبزران فقره سيقوم بها طاقم اسره المجد

ونقدم للنسـاء عمل حناء مجاني لليدين والرجلين بعد
ونقدم للبنات دوره مجانيه في كيفيه عمل جديله للشعر
8
8
8
لسنا نبحث عن الشهره .. بقدر بحثنا عن رؤويه هال(

)على محياكم

:: قبل ماتمشي اقرء وامش ::

1/ قد اكون كتبت الموضوع بشكل ساخر لكن هدفي من الموضوع
هل بالفعل وصلنـا الى مرحله ان نقوم بعمل انتخابات ؟
2/ هل بالفعل كل من رشح نفسه يستحق ان يكون عضواُ واذا كان ردكم بلا
فلماذا من الاول يسمحون ويسجلون اسمه من ضمن اللي يبونا ننتخبهم

!!
3/ سمعنـا ان البطاقات تباع بالالوف .. يعني الشغله اللي فلوسه واجد بيفوز ؟
4/وسمعنا بعد ان القبيله صارت تدخل في الموضوع وان كل واحد يرشح ولد قبيلته
واحد من اللي مرشحين انفسهم يكون عضو في المجلس البلدي راح فيهـا

لاتنسون .. صوتوا لي

[align=left]مصدر الصور والبيانات للشخصين المنتخبين انفسهم
من موقع امانه الرياض[/align]

[/align]

بنت الزعيم العيناوي · #2 04/02/2005, 02:06 PM

هههههههههههههههههههههههههههههههههههههههههههههههههه
تسلم مره اخوي على الموضوع

مع اني ولا عمري شفت انتخابات لا بلديه ولا وزاره
يعني ما عندنا في الامارات..

بس موضوعك شدني كثييييير
تسلم مره ثانيه
ومشكووووووووووورين
احتراماتي ...
بنت الزعيم العيناوي

زهرة الزعيم · #3 04/02/2005, 05:03 PM

أخوي فيـصل

/ قد اكون كتبت الموضوع بشكل ساخر لكن هدفي من الموضوع
هل بالفعل وصلنـا الى مرحله ان نقوم بعمل انتخابات ؟

((ولو انه ساخر ))لكن موضوعك حلو

الإنتخابات البلديه رجتنا في كل مكان..

((كل ما افتح بريدي القا صورة شايب مرشح نفسه ويبي نصوت له))

لكن شغلة الإنتخاب مش غلط..

2/ هل بالفعل كل من رشح نفسه يستحق ان يكون عضواُ واذا كان ردكم بلا
فلماذا من الاول يسمحون ويسجلون اسمه من ضمن اللي يبونا ننتخبهم !!

هنا الغلط ..المفروض مو اى احد يرشح نفسه ..منصب رئيس البلديه مو سهل

{مثلا..في إنتخابات الغرفه التجاريه ما يدخل فيها إلا شخص له خبره طويله في مجال التجاره ..مو اى احد..}

....

((..ما شاء الله عليك.. فاهم الحياه100% ..إن شاء الله تفوز..

بس ها ..الله الله بالشوارع والحفريات أهتم فيها الله يخليك ..سياراتنا خربت من هالشوارع التعبانه))

تحياتي للجميع

المشجع الكبير · #4 04/02/2005, 08:09 PM

يالاخو اذا جيت الرياض ابي اصوت لك بس كم تدفع

والشروط التاليه فيلا بحي الروضه ;)
وسيارة فخمه <<<< للرزه

اذا ماعليك كلافه وسلامتك

كيفي كويتية · #5 04/02/2005, 09:56 PM

إقتباس


	وسأدرس الماجستير والدكتوراه

طيب قل ان شاءالله

إقتباس


	ونقدم للنسـاء عمل حناء مجاني لليدين والرجلين بعد

حنا .. ووووووووع :sad: ريحته تلوع جبدي

الحديث في الانتخابات يطول

لكن حبيت اقولك شي

ترى تصير في الكويت انتخابات فرعيه لكل قبيلة والحكومة تدري بس ساكتة عنهم

يعني في الانتخابات الفرعية تلقى المنتمين للقبيلة يختارون مرشحين اثنين بس من المتقدمين وبعد ماتطلع النتايج ويعرفون المرشحين تلقى افراد القبيلة كلهم يدعمونهم في انتخابات مجلس الامة

بس بصراحه والحق يقال

لحد الان ما شفنا من ابناء القبايل الا كل علم طيب

ناس جامعيين وفاهمين وبعضهم دكاترة

مشكور عالموضوع وتحياتي

الحاتمي · #6 05/02/2005, 12:22 AM

الـحـاتـمــي ..

مــر مـــن هـــنـــــا ...

ويـقـول : الحين صارت المسألة إدفع و تأخذ الصوت !!

عموما /

إذا كان عشاكم بالمخيم ( بوفيه ) ترانا بنجي يافيصل

سهل · #7 05/02/2005, 02:13 AM

الحين المرشحين يعدونك بأشياء وهم ما يملكون صلاحيات

انا ارشح صفوق والباقين حيلهم بينهم

بس بعد هالموضوع شكلي برشحك

الوفـــــا · #8 05/02/2005, 06:45 AM

هلا اخوي

يعطيك الف الف عافيه على الموضوع ( المتواضع )
<-------------------<< انتقلت لها عدو التواضع

وكلامك سليم ميه بالميه ..

مجتمعنا لم يصل بعد الى مرحله الانتخابات ..

لان اصحاب الخبرات العلميه ..

لا يتجاوز عددهم 40 % من الشعب السعودي

يعني ها الاربيعين بالميه عينوهم كلهم في المجلس البلدي ..

أفضل من انكم تجرون انتخابات ..

ويكون نصف المرشحين من العاميه ..

هذا رأيي .. ولكل منا رأي ..

وانا هنا ارشح فيصل ..

مع ان البنات مالهم حق يرشحون

يعطيك العافيه فيصل على الموضوع الحساس والرائع ..

احترامي وتقديري

الوفــــا

الهلالي دائماً · #9 05/02/2005, 09:51 PM

وش دعوه فيصل ^^^ ما يبيلها كلام ^^ تستاهل الترشيح على هذه السيرة العطرة

ومن الحين هذا صوتي ........ألك ..........

ومشكور على برنامجك الانتخابي الرااااااااائع <<<< معجب بقوة

يعطيك العافية مرشحي العظيم

فيصل

فيصل · #10 06/02/2005, 08:32 AM

بــاك ..

بنت الزعيم العيناوي

هلا وغلا باأهل الامارات كلهم
بس ترى الزعيم الهلال ليش تسرقين لقبنـا ..

< ترى امزح قسم بالله

واحسن لكم فكه ديرتكم والله ماتحتاج انتخابات ولا شئ
وربي انتم محسودين على اللي فيه ..
الله يمتعكم بالعافيه والصحه ويديم لكم العز والتطور في بلادكم ..

تحيـاتي

===============================

زهرة الزعيم

إقتباس


	((ولو انه ساخر ))لكن موضوعك حلو الإنتخابات البلديه رجتنا في كل مكان.. ((كل ما افتح بريدي القا صورة شايب مرشح نفسه ويبي نصوت له))

كان على الدعـايه فجد اقلقونا ..
كل ماطلعت لقيت انواع الاوراق على باب بيتنا ولايهون موتري صرت مااعرفه من كثر الاوراق<< الله من النصب

إقتباس


	لكن شغلة الإنتخاب مش غلط..

اكيد مش غلط ..
لن ماوصلنا لفهم 100% وش معنى الانتخابات ..
وتبقى هذي تجربه وان شاء الله تكون مفيده ونستفيد منها في القادم

إقتباس


	هنا الغلط ..المفروض مو اى احد يرشح نفسه ..منصب رئيس البلديه مو سهل {مثلا..في إنتخابات الغرفه التجاريه ما يدخل فيها إلا شخص له خبره طويله في مجال التجاره ..مو اى احد..}

كلام سليـم ..
لكن الترشيح صار مغـاير بين العوايل

إقتباس


	((..ما شاء الله عليك.. فاهم الحياه100% ..إن شاء الله تفوز.. بس ها ..الله الله بالشوارع والحفريات أهتم فيها الله يخليك ..سياراتنا خربت من هالشوارع التعبانه))

ماعليك لو تبين اصرف لكم سيارتين بدال الوحده بس لاتنسين تخلين اهلك كلهم يصووتون لي

تحيـاتي

===============================

المشجع الكبير

إقتباس


	يالاخو اذا جيت الرياض ابي اصوت لك بس كم تدفع والشروط التاليه فيلا بحي الروضه وسيارة فخمه <<<< للرزه اذا ماعليك كلافه وسلامتك

انا اشتغل بذمه

لكن كانك صامل تعال للمخيم ونتفاهم

انت صـوت بس وابشر بعزك

===============================

كيفي كويتية

ياهلا وغلا بمن شاف هاليوزر
كيف حالج ياغاليه .. وش اخبارج < نفس اللهجه وش ورايك ;)

إقتباس


	طيب قل ان شاءالله

بأذن الله الواحد الاحـد . راح اخلص الجامعه والحقها بالماجستير والدكتوراه < يصير خير

إقتباس


	حنا .. ووووووووع ريحته تلوع جبدي

خبرك عتيق .. حنا حنانا بدون ريحه ولا لون < اجل كيف بيطلع حنا

إقتباس


	الحديث في الانتخابات يطول لكن حبيت اقولك شي ترى تصير في الكويت انتخابات فرعيه لكل قبيلة والحكومة تدري بس ساكتة عنهم يعني في الانتخابات الفرعية تلقى المنتمين للقبيلة يختارون مرشحين اثنين بس من المتقدمين وبعد ماتطلع النتايج ويعرفون المرشحين تلقى افراد القبيلة كلهم يدعمونهم في انتخابات مجلس الامة بس بصراحه والحق يقال لحد الان ما شفنا من ابناء القبايل الا كل علم طيب ناس جامعيين وفاهمين وبعضهم دكاترة

فكرتكم حلوه وعـاديه لو طبقت عنـدنا ..

يعني مااشوف انهـا تخالف الانظمه ولا القوانين ..
يعني يحاولون اهل هالقبايل يصفون على شخص واحد عشان تكون اصواتهم موحده مو مشتته
وهالشئ فكـرته روعه

..

تحيـاتي

===============================

الحاتمي

ياهلا وغلا بك ياغالي
وحيى الله هاليوزر وراعيه

وماعليك نحط لك بوفيه انت تامر امر بس لاتنسى تجيب اصوات اهلك معك

.
.
.
.
للبقيـة عوده قريبــأ ..

Pasta · #11 06/02/2005, 05:24 PM

والله يالانتخابات صارت نكته يتداولها الجميع ؛ انا قلتها مالي ووجع الراس وخلينا الانتخابات لأهلها ؛ يسلمو على الموضوع

اسيرة الهلال · #12 06/02/2005, 07:02 PM

يعطيك العافيه دختور فيصل << بعطيك دفعه معنويه

بصراحه مؤهلاتك وبرنامجك الانتخابي مقنع عشان كذا بصير مفتاحك الانتخابي
وبخلي كل ابو عيال حمولتنا يصوتون لك

مع اني قبل كنت في صف المرشح طـويرش

بس غيرت ((رايي))<< مدري شلون تكتب

المــهم الى الامام سررررررررررر يادختووور

البارق · #13 07/02/2005, 12:49 AM

ما شاء الله عليك يا فيصل على هالمؤهلات والخطط ..

والله من جد الجرايد هالأيام تسد النفس من حقين الترشيحات ..

عاد يمدحوان فيها الخيان والعشيات والحركات .. يعني لو الواحد يدور عليهم على الأقل بيلقى كل يوم له عشاء ..

لا وينوع بعد ..

بالنسبة لك ابشر من يرشحك لكن عاد على الأقل عشنا .. يعني ما نبي زود فلوس <--- وإلا كنه واثق انه بيعطيه

..

اقول يا فيصل ترى لو شاورما ما نمانع <------ طفران لآخر حد

..

تحياتي لك ،،،

القاضي · #14 07/02/2005, 11:02 PM

جائتني هذه الاستمارات عن طريق بريدي الالكتروني واضعاً مرسلها تعليقاتٍ لا تملك أمامها إلا أن تملىء محيطك ضحكاً.

على كل حال ، فكرة الانتخابات لا تخلو من ثغراتٍ لعلَ أحدها ، وربما أهمها ، الذي ألمحت اليه في ثنايا مقالك و صرّحت به في نهايته. هل تظن بالله عليك أن انساناً مثل جورج بوش يرتقي هرم أقوى دولةٍ في العصر الحديث لولا أن نظام الانتخابات يكفل له ذلك. تأمل مثلاً أن الأصوات لها نفس الوزن و القيمة عند التصويت بغض النظر عن ما يحمله هذا الناخب من دماغ (و لا أقول فكر).

فيصل · #15 08/02/2005, 02:48 AM

سهل

هلا وغلا بك ياغالي
واشتقنا لك يانور عيني

إقتباس


	الحين المرشحين يعدونك بأشياء وهم ما يملكون صلاحيات انا ارشح صفوق والباقين حيلهم بينهم بس بعد هالموضوع شكلي برشحك

شف انا عندي نظريه اقل واحد يقول ابقدم خدمات
هو اكثر واحد بينفع البلد ;)

وتسلم

===============================

الوفا

إقتباس


	يعطيك الف الف عافيه على الموضوع ( المتواضع ) <-------------------<< انتقلت لها عدو التواضع

الله يعافيك وترى هالعدوى زينه ولا لا

إقتباس


	هذا رأيي .. ولكل منا رأي ..

كلامك قد يكون منطقي وقد اختلف معه شوي

لان هالعاميه اللي تبينهم ضمن الانتخاب ماعندك احد واولهم اهلي واخواني
< ليش انت وش عندك

يعني ماعندهم لاخبره في المؤوسسات ولا الوزارات الحكوميه
وان كان عنده مراجعه ولا شئ عطاها معقب ولا شئ

انا ابي واحد يرشح نفسه يكون عنده خبره في المجال نفسه
يعني مهو كل من هب ودب رشح عمره

إقتباس


	وانا هنا ارشح فيصل .. مع ان البنات مالهم حق يرشحون

وش دعــوه .. على مااظن ان لكم حق
لاني اذكـر ان خالتي راحت ترشح واحد من الناس

تحيـاتي

===============================

ماجد مقبل

إقتباس


	ومشكور على برنامجك الانتخابي الرااااااااائع <<<< معجب بقوة يعطيك العافية مرشحي العظيم فيصل

احيك على كلامك الرائع تجاه شخصي المتواضع < لين الحين ماانفكت منه العقده

وان شاء الله يابعدي بتشوف اللي يسرك ;)

===============================

Pasta

ياحليلك شكلك تحب الراحه .,, اشك ان فيك عرق سودانيه

ويسلمو على ردك

===============================

اسيرة الهلال

إقتباس


	يعطيك العافيه دختور فيصل << بعطيك دفعه معنويه

الله يعافيك ,, وعقبال مااصير برفسور

إقتباس


	بصراحه مؤهلاتك وبرنامجك الانتخابي مقنع عشان كذا بصير مفتاحك الانتخابي وبخلي كل ابو عيال حمولتنا يصوتون لك مع اني قبل كنت في صف المرشح طـويرش بس غيرت ((رايي))<< مدري شلون تكتب المــهم الى الامام سررررررررررر يادختووور

كفـو والله يااسيرة الهلال
انا اشهد ان امك جابت بنت اللي هي انتِ

وبالتوفيق لي < صدق انه مرشح نفسه

.
.
.
للبقيــه عــوده