يتسائل الكثير من الأعضاء عن تلك الغرفه اللتي يشاهدونها في آخر المنتدى ويحيط بها الغموض من كل جانب وتكون أقرب مسافه بين أي عضو وهذه الغرفه مالايقل عن ( فرسخ ) , نظرا للرهبه اللتي تعكسها الأجواء المحيطه بها ,,,
جميع أعضاءالمنتدى يعرفون ( تقريبا ) أن هذه الغرفه الغامضه مخصصه فقط للمشرفين ولأعضاء مجلس الإداره وبالطبع لرئيس هذا المجلس ... ورغم ذلك تجدهم يتسائلون عن طبيعه المقالات الموجوده بها وعن حديث المدراء والمشرفين عندما تضمهم جوانب هذه الغرفه المثيره !! ,,,
وللإجابه على جميع هذه التساؤلات المحيره كتبت هذا الموضوع لإشباع فضول البعض ولوضع النقاط على الحروف بالنسبه للبعض الآخر ,,,
طبعا من ضمن هذه التساؤلات ..... حال المشرفين والمدراء وطبيعة تعاملهم مع بعضهم البعض وهل هذا التعامل هو نفسه مانشاهده في بقية المنتديات المفتوحه للجميع ؟؟ ,,,
أحوال المشرفين ,,,
سنبدأ أولا بسفر المرزوقي مشرف المنتدى العام اللذي كتب هذا الموضوع في منتداه ,,,
سفر المرزوقي :
يدخل سفر المنتدى في بداية دوام كل يوم وماعليه إلا طاقيه شابكها في آخر الرويس ( تصغير راس ) <=== بدا يجحد اللغه العربيه ,,,
وسبحان اللي خلقه مايعرف يمشي بشويش دايم صافط طبلونه .... وطبعا مايحتاج أقولكم إنه شايل في إيده كيس مليان جزر لمزرعة الأرانب الموجوده في مكان مجهول من غرفة الإداره عجزت معه كل المحاولات في التعرف عليه ,,,
بعد مايدخل ويوقع حضوره يغيب فتره داخل غرفة الإداره ويطلع وبيده أرنب أو أرنبين حسب الحاجه وحسب كثافة الإستخدام في هذا اليوم ... وطبعا عارفين إن أحجامها تختلف ... بعض الأحيان تكون صغيره وعاديه وبعض الأحيان يكون الأرنب حجم عائلي ,,,
يداوم سفر للمنتدى على ( حرّاثه) خاصه بالمزعه اللي مايزرع فيها إلا جزر ,,,
طلال ( مشرف منتدى الجمهور الهلالي ) :
طلال يداوم في المنتدى وهو قاشع راسه وفي بعض الأيام واللي توافق مناسبات خاصه يكون لابس العمّه الحجازيه المشهوره وشايل في إيده عصا المزمار .... وعصا المزمار للي مايعرفها هي العصا اللي تكون في يد الأشخاص اللي يلعبون أو يمارسون الرقصه الشعبيه الحجازيه ( رقصة المزمار ) ,,,
بعد ماينزل طلال أخبار الزعيم يدخل لغرفة الإداره ويوقع توقيع الحضور يبدا يدور في المنتديات ( يلفلف ) على أمل الحصول على فريسه.... والفريسه هنا أحد المواضيع الخارجه عن سياسة المنتدى ,,,
يداوم طلال للمنتدى على كرسيدا موديل 80 ومركّب لها جنوط كروم أغلى من قيمة السياره ,,,
الأسطوره ( مشرف منتدى الجمهور الهلالي ) :
يكون دوام الأسطوره غالبا كمناوب ( ضابط خفر ) أي أنه يدوام في الأوقات اللتي تخلو من بقية المشرفين وهي اللتي توافق الفترات المسائيه وبالتحديد من بعد منتصف الليل ,,,
بعد توقيع الحضور .... يقوم الأسطوره بأخذ المسجل الوحيد الموجود في غرفة الإداره ( ابو عشره ريال ) في طريقه الى المنتدى وبعد مايفتح صفحات المواضيع الموجوده في منتدى الجمهور يقوم بتشغيل المسجل بعد أن يضع فيه شريط لفيروز أو أم كلثوم ( تخبرون آخر الليل والأخ بعد مقطعته الرومانسيه ) ,,,
طبعا الأسطوره يداوم دائما بكامل أناقته يعني كاشخ وعلى سنقة عشره وكأني به ذاهب ألى الفيصليه في مساء يوم مشرق <=== كيف يكون المساء مشرق ؟!؟ ,,,
طبعا , ويمكن البعض منك عارف الكلام هذا..... الأسطوره مايحب يجلس على ( زوالي )<==== وفي روايه زوليّات غرفة الإداره خوفا من إتساخ ملابسه فلذلك تجده لا يدخل الغرفه إلا وفي يده سجاده أو قطعة قماش نظيفه لكي يجلس عليها أثناء الإجتماعات اللتي تحدث في غرفة الإداره ,,,
يداوم الأسطوره على فياغرا موديل 2001 مستلفها من حدا خوياه ,,,
أبو ناصر ( مشرف منتدى الجمهور الهلالي ) :
أبو ناصر هذا حالته حاله .... ولشرح حالته أثناء دوامه في منتدى الرياضه يجب علينا الرجوع بعيدا للوراء وبالتحديد لمرحلة طفولته ,,,
أبو ناصر عندما كان صغيرا كان لايخرج للشارع إلا وثيابه في كامل ( إتساخها ) خوفا من بقية زملائه اللذين إذا صادف وكان لابس ثيابا نظيفه يقولون له : ( أحلى يانظيف ) ومنذ تلك الفتره أصبح يتعقد من لبس الملابس النظيفه فعندما يجبر على لبسها تجده قبل أن يذهب لزملائه يقوم بالتمردغ على ارض الشارع حتى تتسخ ملابسه وحتى يسلم من تعليق زملائه ,,,
هذه الحاله القديمه في ذاكرة أبو ناصر إنعكست على حاضره فهو لايداوم في المنتدى حاليا إلا بالفنيله العلاقي وسروال السنه ,,,
ابو ناصر وزي ماالجميع تقريبا عارف قلبه أبيض وكبير ووسيع صدر ,,,
<=== يبي يسكته علشان لايقوم عليه ,,,
وهذا يعني أنه من أقل المشرفين ملاحظات وتدقيق في خلق الله المساكين ... اللي هم حنا , بقية الأعضاء ,,,
يداوم أبو ناصر للمنتدى على كابرس 79 وتارك اللكزس عند البيت ,,,
الأولاني ( مشرف منتدى الرياضه العالميه ) :
الأولاني هو من أقل المشرفين حضورا ودائما مايغيب أو يتأخر عن توقيع الحضور في غرفة الإداره .... وتجده دائما مايتعلل بإنقطاع إشتراكه في الإنترنت , مع أنه غالبا مايلاحظ وهو في غرف المايكروسفت تشات سابقا و MIRC حاليا حسب مصادر موثوقه ,,,
يحضر الأولاني للتوقيع في غرفة الإداره ( إذا تعطف وتكرم بالحضور ) وهو ( داق بنت البكّار ) وفاتح الصدر والزبيريه تسحب ويسمع صوتها اللي في آخر المنتدى ,,,
طبعا بحكم إشرافه على منتدى الرياضه العالميه وإطلاعه بأخر الأخبار العالميه .... فإنه يقوم بإعطاء بقية المشرفين المعلومات اللتي يطلبونها مما جعل كلام الأولاني دائما موضع ثقه ودائما مطلوب أثناء إجتماعات غرفة الإداره الخاصه ,,,
وبعد أن يزود المشرفين والمدراء بآخر الأخبار يذهب الى منتداه منتدى الرياضه العالميه يهش ذبّان وإذا لقى أحد هناك لعب معه ( حبشه ) ,,,
منتدى الرياضه العالميه هو الأفضل في كل زمان ومكان ,,,
<=== خايف لايلغي كفالته ويسفّره ,,,
يداوم الأولاني للمنتدى على ونيت غماره موديل 85 مظلل وماعنده شريط في المسجل إلا واحد مايشغل غيره لمزعل فرحان ,,,
أحوال المدراء العامين لشبكة الزعيم ومنتدياتها ,,,
الإعصار :
دخول الإعصار الى غرفة الإداره دخول غريب .... فمن يعرف الإعصار في السابق لا يتوقع أن هذا اللذي يدخل لغرفة الإداره هو الإعصار مدير التطوير والمتابعه في شبكة الزعيم ,,,
حجم الإعصار يتغير الى الضعف تقريبا وفي بعض الأحيان يصل إلى الضعفين !! ,,,
قد يتبادر الى أذهانكم هذا التساؤل .... مالذي يجعل الإعصار بهذا الحجم الضخم عند دخوله لغرفة الإداره ؟؟ ,,,
الجواب بسيط .... فالإعصار يكون محملا بعدد لانهائي من الأوراق الصغيره واللتي تحمل في داخلها أسماء المشتركين الجدد وعناوين إيميلاتهم مما يجعل ( مخابيه ) <=== وفي روايه( جيوبه ) ممتلئه بهذه الأوراق اللتي تسبب زياده خياليه في حجم الإعصار الحقيقي واللذي هو في الأصل أكثر أناقه من هذا الحجم بكثير <=== هذا الكلام لزوم الشغل ,,,
طبعا بعد أن يعقب على الحضور والغياب وبعد أن يكون قد أخذ دشا باردا من سلمان على الصباح يبدأ في أخذ جوله تفقديه على أرجاء المنتدى ( بتقولون لقافه أقولكم غلطانين لأن هذي يسمونها حرص على نجاح ورقي المنتدى ) ,,,
يداوم الإعصار للمنتدى مع راعي ليموزين هندي متقاول معه كل يوم لأنه مايعرف يسوق ,,,
سـلـمـان 99999 :
سلمان يدخل غرفة الإداره وهو ( مختب ) تشوفه وهو داخل للغرفه والشماغ يطير ويوقع .... طبعا سلمان في صبيحة كل يوم <=== يمديكم على الكلام هذا , أدري بتقولون لا , تلقاه شايل في إيده كل الجرايد والمجلات الرياضيه علشان يقرا المقالات اللي كتبت عن الهلال أو عن أحد نجومه ورموزه ..... إلا جريدة الخزامي تلقاه حاطها في كيس لحالها ومقفل عليها زين ولابس ( جونتي ) في الأيد اللي شايلها فيها,,,
سلمان مايحب يلقى مواضيع في المنتدى تمس أحد الرموز الهلاليه ( كما هو حالنا جميعا ) ومايحب يلقى المواضيع أو الردود اللي فيها خروج عن الأدب والذوق العام من وجهة نظره وتلقاه يدخل على الموضوع ويحوس مرير راعيه واللي ردوا عليه ,,,
<==== الى الحين مانسى موضوعه اللي حاسه له سلمان عن العضو اللي تتمنى مقابلته ,,,
يداوم سلمان للمنتدى على ميني فان ( باص صغير ) يالله يالله يشيل كل الجرايد اللي معه ,,,
كـوكـتـيل :
بحكم طبيعة إختصاص كوكتيل في الأمور الفنيه فهو يداوم بالأوفرهول الخاص بالفنيين .... وهو اللباس المكون من قطعه واحده بسحاب ومخصّر من الوسط ( أحلى يامخصّر ) ,,,
ولا تخلو يداه من شيئين مهمين .... عدة الشغل واللتي تحتوي على الأدوات الضروريه لإصلاح أي عطل طاريء في المنتدى , وحزمة كراث من النوع الفاخر ( لزوم التخزين ) ,,,
في المرات القليله اللي يدخل فيها كوكتيل لغرفة الإداره تشوف فيها وضع غريب وتنحاس الأمور وتنقلب فوق تحت ,,,
فهو لايختلط كثيرا ببقية المشرفين والمدراء فمابالك ببقية أعضاء المنتدى .... وهذه أحد أسباب قلة مشاركاته في المنتدى واللتي يبدوا أن مشاغله الكثيره قد حرمتنا من إبداعاته ,,,
<=== يبي يرقّعله ,,,
يداوم كوكتيل للمنتدى على دباب هوندا ( 70 ) مايلبقه إلا بغرفة الإداره ووسط قاعة الإجتماعات .... عناد واللي براسه شيء يطلعه
1- يجب عقد إجتماع دوري عقب صلاة العصر من كل يوم للبحث في موضوع آخر الأعضاء ( المشيوتين ) قصدي المنظمّين للمنتدى ,,,
2- يمنع منع باتا على أعضاء المنتدى إحضار أي مأكولات من خارج المنتدى للحفاظ على نظافة المنتدى ( وعلشان نترزق الله بهالكفتيريا اللي حاطينها ) ,,,
3- نظرا لكثرة الشكاوي من عدم وجود مكيفات هواء ونظرا لأن الصيف قادم والحر ذبح نص الأعضاء وبالذات البنات فقد قررنا شراء عدد واحد مكيف صحراوي ووضعه في غرفة الإداره <=== أجل وش تحسبون نبي نشتريه علشانكم أنتم يالشيون ,,,
4- منعا للأختلاط بين الشباب والبنات ( انت معي ياسلمان ) فقد قررنا وضع منتدى خاص للبنات يقشّمون فيه حب <=== وفي روايه فصفص ويقحنون من الشواهي ويقلبونها سواليف وفلة حجاج ,,,
5- يعين مراقب وحارس للمنتدى السابق ذكره ( عاد أنتم وذوقكم شوفو من بيكون ) ,,,
6- على آخر الموجودين في غرفة الإداره غسل بيالات الشاهي وتنظيف الطفايات وكنس الغرفه وإطفاء المراوح قبل خروجه ( الى الحين ماجا المكيف الصحراوي ) <=== قعدبها الأولاني أبو بطنين مايقوم من الصفره إلا آخر واحد ,,,
هذه هي معظم الأحداث اليوميه اللتي تحدث في غرفة الإداره نقلها لكم من هناك ابراهيم كينق لايف على وزن لاري كينق لايف <=== يحسب لايف تكملة إسمه ,,,
@@@ يحتاج أداوم بكره ولا القى ملفّي عند الباب ؟ ,,,
للجميع تحياتي ,,,
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــ [عدلت بواسطة ابراهيم النجيدي التاريخ:08-05-2001 الساعة: 06:20 PM]
ههههههههههههههههههههههه.......
هيـــــــــــمو منتب صاحي شكلك ناوي تنطرد .... لكني معاك يله.. انا اقدر افترق عنك ولو لدقيقه ما فيه امل \\ لا تصدق بس \\ ههههه المهم ان طردزك ترى ما لي دخل ههههههه...
واما الاولاني حركه اخر من يقوم من على السفره اثره دب ههههههه والله طلعت فضايحك يا مشرفنا ههههههههه لا وطلع راعي تشات \\ والله اني شاك فيه من زمان بس ماحد مصدقني لكن الجين خلاص طلعت علومه هو والعراوي حقته...
والا الاسطوره راعي الكشخه والفياغرا حتى لو انها حقت خويه لازم نصكه بعين هههههههه ايه وش وراه متخرج لا ومهندس معماري بعد بس الله يخلف علي..
لكن لما اتخرج ان شتء الله ابصك لك هايلكس موديل 77 ( حركه رقم مميز ههه هذي حدي )
هههههههههههههههههههههههههههه
وش هالفضايح ؟!! .. هماني قايلن لك لاتعلم احد ؟!! <=========== فضح نفسه الضعيّف
ياخوي عجل علينا بالمكيف الصحرواي ... ترى قسمن بالله انشوينا من هـ ( الوجار ) .. الوجار يعني مكان التدفئة بالحطب .. من ايام الشتاء وحنا ما نجتمع الا عنده .. وبتلنا قلنا الين يجي الصحراوي اللي وعدنا به ولد النجيدي
وتراي يوم اني صغير اوصخ ثيابي عشان ما ينضلوني ;) ... انت قل ايه بس
تصدق عاد .. احلى شيء ( الكراث ) لزوم التخزين
اقول لاتجيب طاري ولد التسعات تراه بيجيك فيذا زبيحوس عليك موضوع .. همن عاد ابلش
والا صح منتب لاحقن ترد على موضوعك .. لانك الظاهر بتجيك ( رفسة ) خطافية تنفيك لمدة سنة كاملة الى منتدى ..... ;) الظاهر عرفته .. الله يعينك عليهم
هين ترى تونا حاطين مراسل جديد ... وعلى المرتبة التاسعة .. شغلته يوصل ملفات الأعضاء اللي نوقفهم .. وابشر ابعطيه كروكي بيتكم واخليه يوصله لك ماله داعي نعنيك وتكلف على عمرك بخخخخخخخخخخخ
منتب عاقل يا ولد النجيدي يا أطخم (اكيد عارف قصدي الأسطورة)
بس تدري والله انك صدقت انا آخر من يحضر للمنتدى ولا ما اوقع إلا تحت الخط الأحمر الظاهر سلمان بينسقني
بعيدن ماتجي بنت البكار ومزعل مع كرة عالمية
انا ما اسمع إلا لسيدة الطرب فيروز في الصباح اما في المساء فاستمع لسيدة الطقاقات زبيدة و احيانا حسن بلونه حسب المزاج
كخخخخخخخخخخخخخخخخخخخخخخخخخخخخخخخخخخخخ
بس تصدق انا الحين عرفت من سرق ايميلي واخترق جهازي اثره انت يا انجدي
تبي تعرف الباس وورد علشان تتسدح في غرفة الإداراة بس معصي
برايفت للأسطورة
اذا طلعت يا خوي طف نور الغرفة لأن سلمان ازعجني يقول الكهرب غالي والفاتورة نار واني انا السبب مادرى انه منك يا ولد النعمة متعود ما تطفي لمبات بيتكم
هههههههههه والله رهيبه ....
الله يوسع صدرك بالعافيه اخوي ابراهيم النجيدي ...
بس سالفة المشرف الي يتمردغ بالشارع هذي يبيلها وقفه طويله ...
ولا المدير اللي معه كراث ههههههههههه ....
لكن اللي مستغربته كيف مشرف منتدى رياضي ومايقوم من السفره الا آخر واحد !! ...
ترى امزح معكم رجاءا لا تزعلون مني ...
مشكور على هذالموضوع الممتع ...
أطيب تمنياتي للجميع ...
هههههههها
اخوي ابراهيم والله من زمان ماضحكت وانا اقرأ موضوع مثل ما ضحكت وانا أقرأ موضوعك .. وصدقني ضحكت بصوت عالي جدا جدا ..
وتبي الجد جزء كبير من كلامك واقع وبصراحة انت تخوف لا تكون بس تدخل الادارة وانت متلثم ..
ومسألة الأوراق تراها شي واقع وصدقني لو اوريك كتب الجامعة تلقاها كلها ايميلات لزملاء يبغون يسجلون
عموما اشكرك على هالموضوع من كل قلبي ولو انك مردغت سمعتنا وطلعت الفضايح وخصوصا سالفة السيارات
هلا و الله اخوي ابراهيم :
بيني و بينك موضوع مهبول مرة و ضحكني مرة .
اقول تراك صديقي ( اخاف تحش فيني صح ) و لو تحش فيني لاجيب خبراء في الحش و النصب ( تبع شركتي الي ما تاسست ) و اجلس احش فيك ليل نهار ( والله استهبل ).
و احلى شي الاولاني يحش ذبان في منتداه و اذا لقى واحد يلعب معه حبشه ( ما دامه على قولتك دب ابي العب معه حبشه علشان اصدق اني سريع )
بس عاد ولا يهمك كلها 10 مواضيع ماتستاهل تزعلين عليها
مشكوره على ردك ,,,
تحياتي لك ,,,
أخوي الغالي الإعصار ,,,
طمنت قلبي الله يطمن قلبك .... مادام الدعوى كذا أجل أنتظر الجزء الثاني تبي تكون الفضايح أكبر ,,,
<=== ماينعطى وجه ,,,
وإذا كنت ناوي توريني أي أوراق أو معلومات عن المنتدى .... فأنا حبيب وأجودي ولا أخالف ولا عندي مانع أبد أشوفها ,,,
سادّه ذوقوا شيء من اللي شفناه قبل وبعد التسجيل .... والله ياحنا تمرمطنا مرمطه مايعلم بها إلا الله ,,,
مشكور على ردك ,,,
تحياتي لك ,,,
أخوي الغالي الغانم ,,,
بالنسبه لملاحظاتك فهي كالتالي :
1- في مره كنت داخل فيها للمنتدى شفت الأولاني على مدخل المنتدى يغسل ونيته بعلبة بيبسي ورافع صوت المسجل وسمعت أغنية مزعل فرحان ( دموع حمرا) .... والظاهر إنها هي الأغنيه اللي ماعنده غيرها ,,,
2- الإعصار الله يسلمك كان أول يلبس نظارات .... اما الحين مايمشي إلا بدربيل ويالله يالله يشوف .... يارب لك الحمد والشكر على النعمه ,,,
3- أغنية سفر المفضله والله العالم إنها ( هيت مي بيبي ون مور تايم ) لبرتني سبيرز <==== تطورت منفوحه ,,,
وبالنسبه لإقتراحك خلاص انا موافق وبنسوي ( لسته ) نحط فيها الأعضاء اللي وقع عليهم الإختيار ... وراح تكون بالشكل هذا :
1- الغانم
2- ....
3- ....
والباقين عاد اللي أنت تختارهم ,,,
مشكور على ردك ,,,
تحياتي لك ,,,
أخوي الغالي fahoode ( فهودي ) ,,,
ياحي الله صديقي فهودي .... نرجع للسته مره ثانيه :
1- الغانم
2- fahoode
فيه أحد ثاني يبي يصير صديقي ؟؟
مشكور على ردك ,,,
تحياتي لك ,,,
أخوي الغالي سداح ,,,
الله يهديك هذي حقائق ونقل مباشر من موقع الحدث ... ماعندنا مسرحيات ,,,
,,,
,,,
,,,
,,,
,,,
بخخخخخخخخخخخخخخخخخخخخ 
قلنا ما يخالف عنده واسطه 
,,,
الوضع العادي
