السلام عليكم ورحمة وبركاته


ملاحظة : الأسم (دوري الشفا) استعارة من صديق عزيز .

%%%%%%%%%%%%%%

آخر اخبار دوري الشفا:

في آخر الإجتماعات اللي صارت في الصندقة الخاصة بأعضاء لجنة الرحمة المتفرعة من اتحاد كل من لسانوه ايلوه ووفقا لخطط علمية مدروسة ، ومما لاشك فيه ان اللجنة قررت مايلي :

* منح الحكمين جوزيف ابو طار واسماعيل الأصلع اجازة مدة ستة أشهر مدفوعة الراتب كمكافأة لتطبيق تعليمات اللجنة والإتحاد .

* تثبيت نتايج المسرحيات اللي صارت في آخر اسبوع من فعاليات مربع الشينكو .

* الموافقة على الإقتراح المقدم بتغيير شعار الدوري الى الشعار التالي : أشر لي بالراية ... ياهوووه ، وحسبها تسلل .

* رفض الإقتراح المقدم بإلغاء مربع الشينكو والرد عليه بقولة: حنا أبخص من البرازيل .... اصلا وش عرّف البرازيل للكورة؟؟

* توجيه خطاب شكر لرئيس نادي (خذوهم بالصوت) بسبب ذكره الغالي ابن الغالي في كل مناسبة .

* التوصية بأن تستمر المهازل في النهائي لأن الطرف الثاني عنده نهائي مرشح انه يحصل عليه ، وبالتالي نسكّت الفريق صاحب الشأن بهالبطولة لأنهم من زمان ماخذوا بطولة المساكين ، ومنها علشان نفتك من ألسنتهم .

* توجيه خطاب تهديد (بدلا عن المؤازرة) للنادي اللي بيلعب بعد شهرين وقفلة ان شاء الله في دورة حواري في أسبانيا ، يذكر فيه: حصلتوا على بطولات الى قبل ولا تقعدون تزعجونا ، بطولة نشرهها لأشقائكم مهيب ضارتكم .


هذا وقد انتهى الإجتماع ، وعلى المتضرر اللجوء الى الله (حسبنا الله ونعم الوكيل) .


%%%%%%%%%%%%%%%

خاص بأشقائناالنصراويين:

الف الف مبروك التأهل ، ونجاح طريقة من حصل شيء يستاهله (بغض النظر عن طريقة حصوله على هالشيء) ، ولا يهمونكم اللي يقولون انكم تأهلتوا بطريقة غير شريفة ..... اهم شيء انكم تأهلتوا

وصدقوني اني سألت أكثر من هلالي هالسؤال:

لو حجركم النصر خمس سنين وهو يحقق بطولات من أمامكم ، وانتم نسيتوا شكل البطولات ..... تنبسطون اذا فزتوا بطريقة غير شريفة والا لا؟

وجاوب قلّة منهم (مشكلة الأغلبية انهم أخلاق ) : بلا شريفة بلا هم ، واذا حجرونا خمس سنوات مانبي بطولات ... أهم شيء نطلعهم من أي بطولة بأي طريقة كانت‍‍‍ّ‍‍‍!!!

%%%%%%%%%%%%%%%

خاص بالهلاليين:

للمرة الألف: حسبنا الله ونعم الوكيل ، والخيرة في ما اختاره الله ..... ولا ننسى ان هالبطولة ماكتبت لنا ، واللي مايكتب عسر .

وأهم شي نركز على المهازل (خاصة الإدارية) اللي تصير في فريقنا ، ونحاول نعالجها قبل تتسبب في تفريق أعضاء الشرف المميزين والمعروفين بدعمهم للنادي من يوم عرفنا هالنادي ، لأسباب شخصية لا تخدم الفريق في أي شيء .

ولا ننسى وشلون كان يتعامل الأمير بندر بن محمد (لا أقصد المقارنة أبدا) مع أعضاء الشرف ، وشلون كان كاسبهم كلهم بأسلوبه وتعامله الراقي . يعني بالعربي: وشلون كان معطيهم اللي يبون ، وماخذ منهم اللي يبيه النادي .

ولازم نوصل لإدارة الأمير سعود بن تركي صوتنا عن عدم رضانا (بالنسبة للغير راضين) عن الوضع الحالي لأهم أعضاء الشرف الهلاليين ، قبل لا يكرهون النادي ويبتعدون عنه .

ونفس الوضع بالنسبة للجان بطولة القارات للأندية اللي سمعنا عنها ولا شفناها ، ونفس الشيء بالنسبة للمدرب (المغمور) ، ونفس الشيء بالنسبة لخانة الظهير الأيسر .

وبهالمناسبة اقترح تقديم عريضة من قبل جماهير الزعيم في أهم المنتديات مثل (منتدىالإقلاع ، منتدى سبورات ، منتدى الزعيم) ، يتم فيها طرح الآراء والمقترحات (دون الإساءة لأي شخص او الإلتفات للخلف) ورؤية الجمهور الهلالي المثقف رياضيا ولله الحمد ، عن مايجب عمله بالنسبة لبطولة كأس القارات للأندية ...... خلونا نترك الكسل ونطرح آرائنا وأفكارنا ، وان شاء الله سنجد من يوصلها الى الإدارة الحالية ، ولو ماينفذ منها الا شيء بسيط .... أهم شيء اننا نحركهم على الأقل ونوصل صوتنا لهم .

وأقترح ان يتم ذلك من خلال مواضيع خاصة في المنتديات المذكورة خلال أسبوعين بالكثير ، ويتم رفع العريضة بعد تنقيحها الى إدارة نادينا<------ نعم نادينا يعني ملكنا مهوب ملك فرد معين .