(( اختلفت أشياء كثيرة منذ ذلك الوقت ,, أسماء غابت ,, أسماء ظهرت ,, قناعات ثبتت ,, وقناعات اختلفت ,, أحببت أن أعيد موضوعا كتبته في فترة فراغ إداري عانى منه الهلال ورغم أن أمورا كثيرة قد تغيرت ,, إلا أن هناك مالم يتغير ))

(( لاأدري لماذا أعيد هذا الموضوع ؟!! ))

(( هل هو الحنين للزمن الجميل ؟!! ذلك الذي أججه شمال يمين في مقاله " نكهة الزعيم " ؟!! ))

(( المهم ,, هاأنا أعيد الحلقات الثلاث في موضوع واحد ))

[ALIGN=CENTER]@@ المشهد الأول ( مفسر الأحلام ) @@ [/ALIGN]

- ألوووو !!

- نعم تفضل !!

- السلام عليكم ياشيخ .

- أهلا وعليكم السلام ورحمة الله وبركاته .

- ياشيخ أنا حلمت حلم غريب ومستحي أقوله

- وشوله متصل أجل أنت ووجهك ؟!!

- خلاص ياشيخ لاتعصب أبقوله بس لاتشره ترى من حر ماأوجس صرت أحلم هالحلوم

- اخلص علينا ولايكثر ( قرقك )

- ياشيخ أنا ذيك الليلة ( قعدت ) ( أهوجس ) بحال الهلال اللي كل سنة أردى من اللي قبلها وشفت مباراة السوبر اللي ضاعت قدام عيوننا وهي من أسهل البطولات قياسا على مستوى الفريق الكوري وخصوصا في مباراة الإياب !!

- أقول ورى ماتعطيني التشكيلة على دربك وتحلل المباراة ياشتالي ؟!!!

_ ياشيخ وراك معصب ؟!!

_ بلى فريقك مايواجه هالأيام وأنت قاعد تحلم لي فيه أنت ووجهك !!!

_ طيب ياشيخ على العموم أنا حبيت أمهد للموضوع يمكن تستفيد من التمهيد في تفسير الأحلام .

_ ومن قال لك إني أفسر الأحلام ؟!!

_ مانتب أنت اللي يفسر الأحلام بالتلفزيون ويقول للي ماتزوجت سيرزقك الله زوجا !! ويقول للي متزوجة سيرزقك الله ولدا ؟!!

- وجعععععععع !!

- أفااااااااا !!

أجل من معي ؟!!

- معك أبو لما

- وش أبو لما ؟!!

- أبو لما ( عاشق النزهان )

- اييييييييييييييه والله والنعم

- والنعم بحالك ... على العموم تراني مانيب شين بتفسير الأحلام !! يعني أطقطق بس المهم تصير الأحلام ملونة

- أبشرك ملونة

- عطنا حلمك

- هذا طال عمرك يوم إني انغثيت من حال الهلال قدام سامسونج لابارك الله بهم ولا بثلاجاتهم قمت ونمت وأشوف لك بالمنام أبو ذكرى وفاهم جدا وأبو هيا وأبو بدر وسور الصين وجدار الطين وأبو نواف وسلمان 99999 وكوكتيل والإعصار وأبو ناصر وبعض شباب المنتدى متجمعين بمقهى وأنواع المعسل بس بصراحة ما( دققت ) من اللي كان فيهم ماسك ( لي ) الشيشة !!! بس شفت أبو ذكرى يصب شاهي لفاهم جدا كنوع من الوفاء والتقدير

- طيب وش مجمعهم بالمقهى ؟!!!

- أقول ياأبو لما !! ورى ماتجي تحلم بدالي ؟!!

- وراك عصبت الله يهديك ؟!!!

- لاتقاطعني وخلني أكمل لك الحلم !!

- طيب <=== أبو لما وده يستعد على جبهة هاللي قباله بس يحتريه يكمل الحلم

- المهم سلمت عليهم وردوا السلام بدون نفس وكان شكلهم داخلين مهاوشة مع بعض !!

بصراحة أنا كنت متعجب من اجتماعهم فما قدرت أمسك نفسي وقررت أسألهم عن سبب هالاجتماع !!!

[ALIGN=CENTER]@@ المشهد الثاني ( مصير الهلال في المقهى ) @@ [/ALIGN]

- أخبار الشباب ؟!!!

- أبو ذكرى : ياخي فاضين حنا للشباب عسانا نفضى للهلال !! <=== صعوبة الفهم بعض المرات مشكلة رغم محاولات فاهم جدا للتعديل لكن !!

- لا ياأبو ذكرى قصدي أخبار الشباب !! يعني أخباركم أنتم !!

- أبو هيا : والله الأخبار ماتسر !!

- فاهم جدا : اي والله إن الدعوة مدلهمة وإن حنا منصهرين في بوتقة الظروف المستعصية التي استبدت واستشرت ومنعت أفيح الفرح من أن يتفوح !!!

( أبو لما يقطع سردي للحلم للمرة الثانية ويقول باندهاش ....)

- وش به ؟!! عسى ماشر فاهم جدا ( يحتسي ) كذا ؟!! وراه مايحتسي عربي هو ووجهه

- ياأبو لما إن قاطعتني ثانية ترى مانيب مكمل لك الحلم !! وبعدين فاهم جدا حر بطريقة كلامه وماهوب ذنبه إنك أنت وأبو ذكرى ثروتكم اللغوية ضحلة !!

- طيب كمل حلمك !!

- طيب .
[ALIGN=CENTER]( عودة إلى المقهى )[/ALIGN]


- أبو بدر : الحين أنت وش صيدك ( قصدك ) يوم إنك تسأل عن أخبار الشباب وتجحدنا أنا وسور الصين ؟!! ماملينا عينك ؟!!

- هلا والله بأبو بدر والله طال عمرك حاسبك مع الشباب أنت وسور الصين بس ( تسن ) ماودكم !! عموما مالنا غناة عنكم وعن شوفتكم ومعرفة أخباركم

المهم ياشباب بصراحة اجتماعكم هنا غريب !!

- أبو ذكرى :ايه الله يذكره بالخير الغريب !! <== والله البلشة هو وصعوبة فهمه

- أبو ذكرى الله لايهينك سند على الجدار ولاأسمع صوتك لين تضبط وزنية تفكيرك !!

ياشباب الزبدة .... وش مجمعكم ؟!!!!

- أبو نواف : يعني ماتدري ياالغريب ؟!!!

- وش أدري عنه ؟!!

- أبو نواف : أنت الظاهر من أعرست وأنت ماتقرأ إلا سيدتي والمجلة وجاحد الرياض والجزيرة والزعيم !!!

- والله تقدر تقول !! وراه وش صار ؟!!

- أبو نواف : والله اللي صار ياالغريب مايصدق !!

- وشو ؟!!

-أبو نواف : الهلال استقال رئيسه وأعلنوا أعضاء شرفه الاستغناء عن النادي ومالقوله رئيس وسلموه للرئاسة وأعلنت الرئاسة عن طلب رئيس وأعضاء شرف وماجا أحد !!! حتى مرجان عرضوا عليه الرئاسة واشترط مقدم عقد هو ووجهه ؟!!

- أفااااااااااااااااا !!!

طيب وبعدين وش صار ؟!!!

يعني الهلال بدون أعضاء شرف ؟!!

- سلمان 99999 : لاياعزيزي أبشرك الدقيقة 35 من يوم الأربعاء الماضي اتفقنا حنا ياللي تشوف إننا نمسك النادي كأعضاء شرف !!

- وشلون يعني ؟!! يعني أبو ذكرى عضو شرف هلالي ؟!!

- أبو ذكرى : ايه وراه ؟!! مامليت عينك ؟!!

( يتدخل فاهم جدا وأقنعني بيني وبينه إنهم حاطين أبو ذكرى معهم من باب إنه تلزق فيهم وارحموه )

- طيب ياشباب ممتاز !!

- سور الصين : وش اللي ممتاز ؟!!

- ممتاز إنكم صرتوا أعضاء شرف الهلال لأنكم عارفين مشاكل الهلال وأكيد بتحلونها !!!

[ALIGN=CENTER]@@ المشهد الثالث (توزيع الأدوار ) !!!@@ [/ALIGN]


- طبعا ياأبو لما الشباب اتفقوا إنهم يغطون الفراغ الإداري بالنادي ؟

- أبو لما : وشوله يغطونه ؟!!!

- علشان مايبرد !!! ياأبو لما أنا قايل لك من زمان لاتجلس واجد مع أبو ذكرى بس ماسمعت كلامي وهذي آخرتها !!!

-أبو لما : معليش أنا كنت أقصد وشلون يغطونه ؟!!!

- أنت لو تخليني أكمل حلمي كان عرفت وشلون بيغطونه !!

- طيب ياخوي كمل !!


[ALIGN=CENTER]( عودة إلى المقهى ) [/ALIGN]


- ياسور الصين أنت من ضمن الكتاب اللي تميزوا بعرض أخطاء الإدارة واكتشافها والتعرض لها دائما !!

- سور الصين : ؟!!

- بالعكس مافيها شيء بس الحين محتاجينك أنت وغيرك نبي نعرف وش هالأخطاء ونعالجها قد مانقدر

- أبو بدر : أول شيء لازم يشيلون المصيبيح !!!

- أبشرك يسلم عليك المصيبيح ويقول لك استلم الله لايهينك !!

- أبو بدر : وش أستلم ؟

- استلم مكان المصيبيح علشان تصحح أخطائه اللي بسببها ماجبنا إلا تسع بطولات بسنتين !!

- أبو بدر : وش أخطاؤوووه ؟!!

- أفااااااااااا بدينا؟!!ad:

-أبو هيا : ياجماعة أهم شيء الحين نترتب ونوزع أدوارنا .

- الإعصار : وش رايكم نحط قرعة واللي تطلع له يصير رئيس ؟!!

- سلمان 99999 : أول اختيار !!!

- ومن اللي يبي يجيب الكورة ؟!!!

- الإعصار : وش كورته ؟!!!

- ماأدري عنك أنت وخويك سلمان !!! وش قرعته الله يصلحكم ؟!! قاعدين نلعب بحارة ؟!!!

فاهم جدا : أنا أرى أن نلم ماتشتت منا وألا ينفض هذا الجمع إلا على رأي حاذق حتى ننفض الغبار عن رؤى ألبابنا فالغيوم تنذر بالبلل وشمسيتنا معفوطة لاتقينا من المطر وقد اقترب الخطر والمسافر بلا زاد يعاني من وعثاء السفر !!!

- ياأبو لما ياويلك كانك سألتني وش يقول فاهم جدا لأني ماأدري وش هو يقول !!!

- أبو لما : لاماعليك فهمت هالمرة وش يقول !!

- وش فهمت ؟!!

-أبو لما :ا تبي تمطر !!!

- ياشينك ياأبو لما إلى منك صرت تفهم أكثر من اللازم !!!

- أبو هيا:الله ياجماعة كانكم سمحتولي وزعت الأدوار !!

- أبو نواف :والله ياأبوهياشوف إنك مناسب لتوزيع الأدوار !!

- سور الصين : ليش مناسب ؟!! وش قصدك ؟

- أبو نواف: ماقصدي شي !! تدري ماهوب مناسب ؟!!!

- سور الصين : ليش ماهوب مناسب ؟!!

- أبو نواف : ياسور الصين أنت وش رايك ؟!!

- سور الصين : موافق

- أبو هيا : أنا أشوف إن أبو ذكرى يصير الرئيس والعوام هو النائب !!!

( فاهم جدا فز من جلسته وخربت الشخصية وصار وجهه أحمر )

- فاهم جدا : عسى مانتب مصخن ياأبو هيا ؟!!!

- أبو هيا : والله فيه شوي صخنة بس ليش تسأل ؟!! كل ذا حرص على صحتي ؟!!



- فاهم جدا : وش علي من صحك ؟!!! أبو ذكرى ماغيره يصير رئيس علي آخر عمري ؟!!


( أبو هيا يمسك فاهم جدا على جنب ويدور هذا الحوار )

- أبو هيا : يافاهم أنا مااخترت أبو ذكرى إلا لأسباب مهمة !!

- فاهم جدا : وش هي أسبابه !!

- أبو هيا : رؤساء الهلال ( من تالي ) لهم صفات ماتنطبق إلا على أبو ذكرى !!

- فاهم :وش هي ؟!!

-أبو هيا : يعني أنت عارف إن أبو ذكرى راعي " كشتات " يعني غير متواجد بالنادي ومثل ماكان سعود بن تركي بجنيف لايرد على أعضاء الشرف يبي يصير أبو ذكرى فوق طعس وماياصله الجوال !!

- فاهم : طيب هذا كان عيب سعود بن تركي !!!

- أبو هيا : لا !! بس حنا نبي نستغل غياب أبو ذكرى ونتحكم بالنادي ولا تنسى إن أبو ذكرى حبيب ويمدينا نمشيه على كيفنا!!

- فاهم جدا ( بصوت عالي ) : أنا ماعلي منكم !!! إذا صار أبو ذكرى رئيس أبوقف الدعم لين يتغير الرئيس أو تتغير سياسته !!!

- أبو ناصر : عسى ماشر يافاهم ؟!! الرجال ماأمداه يشتغل علشان يغير سياسته !!!

- أبو بدر : وبعدين بالله عليك يافاهم أبو ذكرى وجهه وجه واحد له سياسة ؟!!

فاهم : طيب أنا وش أصير ؟!!

-سلمان 99999 : وش رايك تمسك مكان أمين عام النادي !!

- فاهم : وذا وش شغلته ؟!!!

- والله يافاهم هالمنصب إلى الحين ماأحد يعرف وش شغلته بس شكل متطلبات الوظيفة سهله !!

- فاهم : يعني وش أسوي ؟!!!

- أبو بدر : أول شيء لازم تجلس على الكرسي واجد لأن الرؤساء يروحون ويحون وأنت قاعد !! من قدك ؟!!

- سور الصين : ثاني شي لازم تنفي خمس وعشرين ساعة باليوم !!

- جدار الطين : يعني لو يقولون لك اسمك فاهم جدا قل لا لم يحدث هذا !!!

- كوكتيل : ياجماعة الحين أنتم مختارين أبو ذكرى رئيس وأشوفه مسند على الجدار ولايتكلم !!!

- أبو هيا : ماقلت لكم إن عنده كل مواصفات رئيس الهلال !!

- أبو ناصر : وش دخل سكوت أبو ذكرى بمواصفات رئيس الهلال !!!

- أبو هيا : يعني يوم اخترناه رئيس وبغيناه يتكلم ويعطينا وجه سكت ولاعاد صار له ( حس ) !!!!

- أبو ذكرى : أنا معكم ياجماعة بس جالس أفكر من وين أجيب بشت ؟!!!

- أبو هيا : شفت يافاهم هذي هي كل سياسة أبو ذكرى !!!

- جدار الطين : طيب ياجماعة من يبي يمسك محل المصيبيح ؟!!

- والله أنا رشحت أبو بدر ولاهيب شينة ياأبو طلال تمسك مكان الأحمد

- الإعصار : طيب من هو رئيس أعضاء الشرف ؟!!

- سلمان : أنا أشوف أبو هيا راكب عليه هالمنصب !!

- أبو هيا : والله ياجماعة ماهوب الظاهر !!!

- أبو بدر : وراوه ياأبو هيا يعني إنك أصغر من أنا وسور الصين ؟!!!

- أبو هيا : لاياأبو بدر بس أنا بصراحة مطفر هاليومين و رئيس أعضاء الشرف المفروض إنه يصير قدوة لأعضاء الشرف الباقين ويكون أولهم وأكثرهم بالدعم وماتصير شغلته بس يصرح بالليل ويعتذر بالنهار ولا فيه أمل يطلع منه ريال !!!

- والله إنك صادق ياأبو هيا بس من ترشح يقوم بهالدور !!!!!


[ALIGN=CENTER]@@ المشهد الرابع ( المشكلة ) @@ [/ALIGN]


- أبو هيا : والله يالغريب ولاهيب مهونة للباقين أرشح لمنصب رئيس أعضاء الشرف أقرب واحد تلقونه ويوافق لأن هالمنصب الظاهر إنه ماله سنع !!!!

- وشلون ياأبو هيا ماله سنع ؟!!! طيب أعضاء الشرف وش يجمعهم ويقربهم من بعض ؟!!! ماهيب ذي شغلة رئيس أعضاء الشرف ؟!!

- أبو هيا : والله توي أدري منك !!! أنا أحسب شغلته إنه يصرح وكل تصريح غير الثاني !!!

- أبو بدر : طيب ياجماعة الحين قلنا الرئيس هو أبو ذكرى والنائب العوام وأمين النادي فاهم جدا ومدير الكرة أنا !! صح ؟!!

-صح !!

- أبو بدر : طيب وباقي أعضاء مجلس الإدارة ؟!!

- سور الصين : ياحليلك ياأبو بدر !!

- أبو بدر : وراوه ياحليلي ؟!!

- سور الصين : بسم الله علي وراك ( تسنك ) شرخ ؟!!! قصدي ياحليلك يوم إنك شايل هم باقي أعضاء مجلس الإدارة ؟!!

- أبو بدر : وش اللي يضحك ؟!!

- جدار الطين : ياأبو بدر سور الصين قصده إن هالموضوع حرام ينطرح !!! يعني أسألك بالله عمرك عرفت أسامي أعضاء مجلس الإدارة ؟!!!! أو عمرك عرفت وش شغلتهم !!!

- سلمان : حرام عليك ياسور الصين تراهم يكرفون !!!

- سور الصين : وش يكرفون فيه ؟!!!

- سلمان : مايكفي إنهم يضربون بعيالهم مشاوير ويتسبحون بالمسبح بلاش وإلا كان مسبح النادي قاعد ماأحد يتسبح به !!!! وعيالهم يجيبون أخوياهم يلعبون بالنادي ويسوون حركة بالنادي تعكس مكانته وقيمته في المجتمع !!!

- أبو ناصر : لامن جد وش شغلة أعضاء مجلس الإدارة ؟!!!

- أبو هيا : ياخي الله يجزاهم خير شغلتهم يكملون النصاب اللي تفرضه اللوائح ومقابل هالشي يترززون بالجرايد لاجت بطولة !!

- أبو نواف : طيب أجل ياجماعة من بكرة نروح للنادي ونبدا شغلنا .

- الإعصار : ياجماعة نسيتوا شيء مهم !!!

- تكفى ياأبو محمد لاتقول اللي أظن إنك تبي تقوله !!!

- الإعصار : وش أبقول ؟!!

- الفلوووووووووووووووووووووووووس !!!!!!

( تدخل موسيقى على الحلم .... طن طن طن طن )

- أبو بدر : ولايهمكم ياشباب !!!

- أبو هيا : وشلون ولايهمنا ؟!!!!

- أبو بدر : ترى الله مع الجماعة وأهم شيء حب الهلال والإخلاص والتفاني وأنت أكثر واحد ياأبو هيا سمعت إن مبارك عبدالكريم بايع منجرته وصارف منها على النادي !!!

- سلمان : يعني تهقى ياأبو بدر نبي نمشي أمور النادي بدون دعم أحد !!!

- أبو بدر : بإذن الله .

( يدخل الهندي على الشباب بالمقهى ويطلب منهم الحساب )

-أبو ذكرى : كم حسابك ياصديق ؟!!!!

- الهندي : هازا 3 جراك 2 معسل و3 كوكتيل !!!

- أبو ذكرى : أنت تبي تضحك علينا ماعندنا إلا كوكتيل واحد ( المشكلة حتى يوم حطوه رئيس ماحاول يضبط تفكيره ) !!!!


- الهندي : هازا حساب كلوه 40 ريال !!

- أبو ذكرى : يالله ياأعضاء الشرف قطتكم !!

- أبو نواف : أنا تذكرت موعد مهم ولازم أمشي بسرعة !!

- سلمان : خذني معك ياأبو نواف !!

- أبو هيا : اصبر ياسلمان الظاهر إني ساد على سيارتك خل أطلعهالك أمشي مرة وحدة !!

- الهندي : ياأبو زكرى فين هساب ؟!!

- أبو ذكرى : يالله ياجمااااااااااااعععععع!!!!!!! أفااااااااااااااا !!!!! وين الشباب تو كانوا هنا ؟!!!!

- الهندي : والله إن فيه هقوة إن هازولا ربئك مافيه بعيدين عن أعزاء شرف الهلال !!!

( يسدد أبو ذكرى الحساب كله وهو يتألم وتدخل موسيقى حزينة على الحلم .... تارارررا !! تارارررا !!! تارررارا )



[ALIGN=CENTER]@ المشهد الخامس ( الهلال بإدارة الزعماء ) @ [/ALIGN]


( المشهد داخل النادي )

( فاهم جدا " مجلعد " لمكتب الرئيس أبو ذكرى ويفتح الباب بقوة )

- أبو ذكرى : خيييييييييييييير إن شاء الله ؟!!!! ماتعرف تطق قبل ماتفتح الباب !!!

- فاهم جدا : أقول انثبر ياأبو ذكرى ولاتقعد تسوي فيها رئيس علي وأنت تدري إني أنا اللي مكتشفك من الحواري وشلون كانت شوشتك ذاك الوقت !!!!

( أبو ذكرى بعد ماتذكر ذيك الأيام تحسف إنه رفع صوته على فاهم جدا )

- أبو ذكرى : آسف ياعم فاهم أحسبك مرجان !!! ترى الشبه موهوب بعيد فتكفى إنك تعذرني !!

- فاهم : الحين تبي تعتذر تشبهني بمرجان !!!! الله يرحم والديك لاعمرك تعتذر من أحد !!!

- أبو ذكرى : طيب يافاهم وش عندك داخل هالدخلة عسى ماشر ؟!!!!

- فاهم جدا : حسبي الله عليك ياأبو ذكرى !!!

- أبو ذكرى : وراك ؟!!! وش صاير ؟!!

- فاهم جدا : نسيتني أعلمك عن أبو بدر المسكين !!!!

- أبو ذكرى : وش فيه ؟!!!

- فاهم جدا : الجمعان هالمخروش حالف حلف إنه يمزع أبو بدر مع بطنه إذا ماخلاه يطلع من المعسكر ؟!!!

- أبو ذكرى : ياخي هالجمعان ترى صبرنا عليه واجد !!!!

- فاهم جدا : غصب عليك تصبر عليه !!!

- أبو ذكرى : ليش ؟!!

- فاهم جدا : لاتنسى إنه صديق سلمان 99999 وهو اللي يباشر علينا إذا بغينا نتغدى مثلوثة وإذا زعلنا الجمعان يبي يزعل سلمان !!!

- أبو ذكرى : والله مشكلة !!!! طيب وش السواة ؟!!!

- فاهم جدا : فيه حلين !!

- أبو ذكرى : وش هالحلين ؟!!!

- فاهم جدا : أنا أقترح إننا نتعامل بصرامة مع الجمعان ونفرض عليه إنه مايقوي مزعته على أبو بدر ؟!!!

- أبو ذكرى : والله من زينك أنت وصرامتك !!! طيب والحل الثاني ؟!!

- فاهم جدا : إن أبو بدر يتنازل ويخلي الجمعان يطلع من المعسكر ويمكن تجي من الله وتصير طيارة البلوي مابها بنزين ويرجع للمعسكر !!!!

- أبو ذكرى : أنا محتاج إني أستشير النائب !!!

- فاهم : نائب الرئيس ؟!!!

- أبو ذكرى : ايه .

- فاهم : ايه صدق من هو نائبك ؟!!!

- أبو ذكرى : أفا ااااااااااااااااا!!!!

- فاهم : وش بك ؟!!!

- أبو ذكرى : الحين أنا معتمد على الله ثم عليك بإنك تذكرني وأثرك ناسي ؟!!!! اتصل على واحد من هالصحفيين يمكن يذكرنا من هو النائب ؟!!!

- فاهم : أنا اللي أذكره إنه بالشرقية !!!

- أبو ذكرى : ايييييييييييييييييييييييييييييييه ذكرته !!

- فاهم : من هو ؟!!!

- أبو ذكرى : البارق 2000 !!!

- فاهم : هذاك كفو أنت ووجهك ؟!!!

- أبو ذكرى : المهم مايحتاج بس امش نلحق على أبو بدر قبل تجيه مزعة تخليه يقول بدال ( بوه ) ( بيه )

يعطيك ألف عـــــــــــــــــــافية ,,


الله يديمك لهالمنتدى ولا يحرمنا من إبداعاتك ,,,,

من جد ما كان ودي تنتهي هالـــــــقصة واستمتمع فيها أكثــــــر
كل شي كان حلو فيها و معبر ...


لا جديد , منتهى الروعة .. ألف شكر على إعادة الموضوع

يعطيك الف عاااااافيه

يعطيك الف الف الف عافيه اخوي الغريب وقصه مره حلوه ..


تسلممم اخوي




اخوك




راشد ..

السلام عليكم ورحمة الله وبركاته ...

الله يرجك يا الغريب انت وحلمك... بس أنك كثرت على أبوذكرى وهو ما يستاهل .... ;);)

لي رجعة للموضوع لأني بالشرقية الحين أبساند الهلال من هناك قمة الإنتماء للفريق .. وما عندي وقت افصفص الموضوع ....


على طاري الهلال ومباراته باكر ... تكفون يا جمهور الهلال بالشرقية لا يجلس منكم أحد في بيتهم .... تكفوووووووووووووووووون خلوا نقهر ابو صلعة العجلاني ..... تكفوووون..

إقتباس إقتباس من مشاركة المستحيــل الأزرق يعطيك ألف عـــــــــــــــــــافية ,, الله يديمك لهالمنتدى ولا يحرمنا من إبداعاتك ,,,, من جد ما كان ودي تنتهي هالـــــــقصة واستمتمع فيها أكثــــــر كل شي كان حلو فيها و معبر ... لا جديد , منتهى الروعة .. ألف شكر على إعادة الموضوع

سقى الله تلك الايام ..

تكاثرت الظباء على خراش ### فما يدري خراش ما يصيد

روعـــــــــــــــــــــــة

تشخيص ولا اروع لحال الهلال

إقتباس إقتباس من مشاركة المستحيــل الأزرق يعطيك ألف عـــــــــــــــــــافية ,, الله يديمك لهالمنتدى ولا يحرمنا من إبداعاتك ,,,, من جد ما كان ودي تنتهي هالـــــــقصة واستمتمع فيها أكثــــــر كل شي كان حلو فيها و معبر ... لا جديد , منتهى الروعة .. ألف شكر على إعادة الموضوع

[ALIGN=CENTER];););)[/ALIGN]

ألف شكــــر على اللوحة الإبداعية .. اللي سطرتهـــا أناملك الذهبية

أمتـــــــاااع وأبــــــــدااع .... وفي نفس الوقت وااقع مريــــــــــر جدا جدا


تحيــــــــــــــاتي لك ولأبــــو ذكرى - الله يخليه - والهندي حق المقهى

مقال رائع لكاتب اروع

إقتباس أبو ذكرى : أنا معكم ياجماعة بس جالس أفكر من وين أجيب بشت ؟!!!

كل الشكر لك يالغالي توصيف دقيق لحال الهلال مع اعضاء شرفه

إقتباس إقتباس من مشاركة هلالي يعني هلالي ألف شكــــر على اللوحة الإبداعية .. اللي سطرتهـــا أناملك الذهبية أمتـــــــاااع وأبــــــــدااع .... وفي نفس الوقت وااقع مريــــــــــر جدا جدا تحيــــــــــــــاتي لك ولأبــــو ذكرى - الله يخليه - والهندي حق المقهى

إقتباس إقتباس من مشاركة عبدالله المحيميد مقال رائع لكاتب اروع كل الشكر لك يالغالي توصيف دقيق لحال الهلال مع اعضاء شرفه

إقتباس إقتباس من مشاركة هلالي يعني هلالي ألف شكــــر على اللوحة الإبداعية .. اللي سطرتهـــا أناملك الذهبية أمتـــــــاااع وأبــــــــدااع .... وفي نفس الوقت وااقع مريــــــــــر جدا جدا تحيــــــــــــــاتي لك ولأبــــو ذكرى - الله يخليه - والهندي حق المقهى