[ALIGN=CENTER]السلام عليكم ورحمة الله وبركاته

اسعد الله ايامكم وملأها بالخير والمسرات والغفران


اول شي احب اقولكم هذا الموضوع سلسلة من مواضيع حبيت اكتب عنها

1-
]تدخل على اخوياك في استراحه وتلقاهم يلعبون بلوت تدخل وتقول دقو الولد همن يدقون الولد وتطلع انت تقابل ابو خالد انسان حار يحب يفتعل المشاكل عند اتفه شي بسبب انه يواجه ضغوط في بيتهم من اهله ويعامل مثل طفل مع ان عمره 24 سنه تقعد وتلعب وتقابله وتلاحظ ان مجريات اللعب تمشي لصالحكم همن فجأة رصو الثانين وجاهم اربعميه تردفها سرا والثاني جاه مية عشرات بعدين يبدا الشتم واللعان والكلام في االاهل ويا ولد ..... ويا ابن .......... ويا ملعون السقاف ومن ذا الحتسي همن تضف شماغك لانك مليتا من الكلام هذا وتلاقاهم يقولون وين ابو حمد بدري؟ تقولهم ابروح والله عندي اشغال
يقولون اي اشغال تبي تروح للنت صح ؟ اقولهم ايه ابروح للنت على الاقل ما القى فيه كلام يسد نفس الجايع ( يعني للدرجه ذي صارو الناس يتهاونون بسب الاهل وتلعين بعض؟

الحيااة حلوة بس نفهمها

2-

]تدخل استراحة شباب وانت مثقل بالذنوب والغريبة انك توصل للبيت وانت تقريباً تفقد كل الذنوب وتمتلك زود حسنات تبي تقولون ليه اقولكم لانك ما يمديك تطلع مع الباب الا تسمع الحش والسب والتهكم والضحك وهذا يدل على ضعف شخصياتهم وعدم مقدرة مواجهة الشخص هذا لانهم ما تجرأو يتكلمون قدامه (أيحب احدكم ان يأكل لحم اخيه ميتاً فكرهتموه)

الحيااة حلوة بس نفهمها


3-
في الحقيقه انتقلت انتداب من عملي في احدى مدن مملكتنا العزيزة اللي تمتاز بقدر من الجهل في الدنيا بقدر ما تمتاز بمعرفه في الدين تبي تقولون شلون اقولكم شلون يعني وقت صلاة الفجر تلقى الكل يتلفت يبي يشوف منهو اللي ما حظر يصلي الفجر ولا فيه امل يرحمونه مهما كان عذره فأنا بحكم اني عزوبي والمسجد جنبي فيه ناس زي كذا يمر علي يومين ما اطب مسجد الحارة لصلاة الفجر في الويكند لاني اصير سهران يافي الاستراحة ولا نايم فيها عادي استراحتنا وقاط فيها يعني المسأله فري فجيت هذاك اليوم ودخلت اصلي الظهر ما دريت الا يوم جاني المذن ويتكلم كانه يكلم واحد يشتغل عنده قالي وينك لك يومين منتب تجي تصلي يا السِفلة قلت افا يا خال مالك لوا بس تخبر نايم في الاستراحه قالي تنام في الاستراحه وتخلي صلاة الجماعة قلت اني مصلي في المسجد حق الاستراحه اللي جنبنا قالي تسذب انت مرتد ( كذا قالها لي اللي يبي يصدق يصدق واللي ما يبي بصره لا يصدق) قلت له ليه مرتد؟ قالي بلاك تخلي صلاة الجماعه قلت ان كاني اصلي فهو لي وانت قمتا بواجبك واناكاني مرتد فاذبحني وسو للي تبي يا خال مهوب عشانك امام مسجد تبي تملك الحارة وتبي تمشي كلمتك عليهم وبعدين وش دخلك اصلي ما اصلي وش انت؟ ربي؟ ابوي ؟ امي؟ اخوي ؟ اختي ؟ رفيقي ؟ يعني لا تطولها وانت عارف وش ابرد عليك به قالي طيب وانا عمك احرص على الصلاة مع الجماعه الله يجزاك خير قلت ابشر ولا يهمك ( شوفو الفصل هذا وش يبي يسوي )
جاني المذن هذاك اليوم لم الشقه وطق علي الباب ودخلته للشقه واول ما دخل شاف الدخان والحركات والبلاوي والدش والمجلات وقالي وش ذا وانا عمك ما ترضاهم يقولون منحرف قلت ما كلن يرا الناس بعين طبعه وش علي من الناس انا انا جاي ادرس واخلص انتدابي وارجع لاهلي قالي طيب المهم سويت له شاهي و قهوة وقعدنا نتقهوى يوم انه بدا يخربط وينصح على اشيا ءما تسوى اخذر من الانترنيت تراها وانا عمك خراب البيت من ذا الحتسي وانا اقوله ابشر المهم قعد عندي يجي ساعه ونص وهو نصايح يوم ذاك قالي وانا عمك وش رايك تطلع من الشقه ولد اخوي يبي يسكن فيها بلاه عزوبي مثلك ونبيه يصير جنب بيتنا قلت له طيب ما عندي مشكله بس عطني كم يوم ورجعو لي اجاري اللي ما دفعته الا قبل اسبوع قالي لا وانا عمك اجارك خذه من راعي المكتبانحن نبي الشقه وبس قلت طيب اصبرو علي لين ينتهي العقد واطلع يا خال اللي يسمعك يقول ابموت لو اطلع من ذا الحارة قالي وش قصدك قلت اقصد انك طولتها وهي قصيره عطيناك وجه خلاص لا تطولها قلت لك اذا قضى اجاري طلعت وللاسف ما طلع زي ما كنت اتمنى راح لراعي مكتب العقار وقاله اني مركب دش ومدري وشو واني ادخن واسمع اغاني الله يهديني ويعصمني عنهن.
قال راعي الاجار بحكم انه من ربعه اوريك فيه الماخوذ وجاني راعي المكتب الصبح الساعه 10 يوم الخميس وطق الباب وقمت وانا نصي نوم وفتحت له قلت له اقلط قالي طيب يوم قلط ويبدا يقولي انه يبي ينهي عقدي بلاني مركب دش ومدري وشو قلت له شف انكان ابو سليمان قايلك عن ذا كله انا ابقولك كلمه وحدة بس اول شي العقد ما ذكرنا فيه ما اركب دش وتذكر يوم اجي استاجر قايلك تراني ابركب دش وقلتا لي ما عليك من احد سو اللي تبي ثاني شي العقد ما تقوى تنهيه لاني موقع معك عقد اقدر اجدده اذا بغيت انا ثالث شي ما قلتا لي يوم اجيك استاجر انك ما تبي واحد يدخن ويسمع اغاني بالعكس رحبتا بي وهليتا بي وتقول وين نلقى مثلك ( والله باغي اشك انه يبي ينشبني في بنته من كثر المدح ) واني من عائله معروفه واني اجودي ولا كل ذا الكلام راح وكلام الليل يمحوه النهار يوم قالك ابو فلان كذا؟ قالي لا مهوب كذا بس انت زودها وانحن نبي نسامحك قلت وراك توك تسامحني يوم وريتك صورة العقد اللي موقعه انا واياك؟ ومن ساعتها والمذن مستقعد لي في كل شي اذا شافني قام يناظرني نظرات ازدراء ويحاول باي وسيلة يضايقني الي درجة انه قد قطع اسلاك تلفوني ودايم يسد على سيارتي بواسطه سيارته وداييم يقول للهنود اللي يغسلون السيارات لا يغسلون سيارات ويقول للحقين البقاله لا تعطونه اللي هو يبيه بس محد يسمع له الا فئة قليلة
عشان كذا ابقولكم كلمتين بعد انتم ( اذا اكرمتا الكريم ملكته ... واذا اكرمتا اللئيم تمردا ) خصوصاً اذا عرفتو انه مشتكي على المذن الاول عشان يصير هو المذن ويسكن ولده اللي توه متزوج في بيت المذن اللي جنب المسجد مع انه انسان يملك ملايين في البنك الله يزيده ويبارك له فيها.

الحيااة حلوة بس نفهمها


4-
تدخل السوق تبي تشتري اي شي تلقا شياب اول ما يذن يطمرون للمسجد ويصلون ويدعون الله وانواع الخشوع لدرجه انك تقول للحين وفيه سلفيّين وتلقاه يدعي ويصيح و دايم ما على لسانه الا كلام حلو همن تدخل عليه في المحل وتلقاه يكلم واحد على انفراد وتسمعه يقوله ابسلفك مليون وتردها عقب سنه ونص بفايدة 40 % سامع وانا ابوك يقوله هذاك يا عمي البنك ما يسوي كذا قال بعد البنك ما يعطيك قورشك في نفس اليوم وانت ما قدمتا له ضمانات تسوى الا بيت في الحي الفلاني ومزرعه في الديرة الفلانية عقبها يقول شورك وهدايه الله ويطلع هذا الواحد ووجهه اسود من كثر الغبنة وتدخل انت وريحتك تتن وتقوله يا خال عندك الشي الفلاني يقولك انقلع يا الخبيث منيب ابيع ناس تدخن!! يعني تو ترابي بفلوسك واللحين منتب بايع واحد يدخن !! (مع العلم اني ما اقصد ديرة معينه او مكان معين )
(هذا مثل اللي يقول حلال علينا حرام عليكم )

الحيااة حلوة بس نفهمها

5-
تجي في يوم من الايام وتوك مستأجر استراحه جديدة وتلاحظ ان جنب الاستراحة عماره توها تبنى و تمشي الايام ورا الايام اللين جاك هذاك اليوم رب اسرة باين عليه علامة الوقار والحبابة يقولك لو سمحتو يااخواني ابي احط عندكم شوي بلاط وبلوك واسمنت في الاستراحة وانا صاحب الفله اللي جنبكم توها تبنى لاني ابسافر انا وعيال ولا عندي حارس واخاف ينسرق وش رايكم طبعاً بكل اخلاق وانحراج توافق وتخليه يحطها عندك وتنحرم من مساحة كبيرة من الاستراحه وغرفه وش كبرها كانت مكان القعده حاطين فيها الاسمنت عشان المطر ما يجيه بعد فترة جاء لمك وقال ابي امد من عندكم مويه من الخزان قلنا ما عندنا الا حلالك سو الي تبي بدون ما تشاورنا قال الله يجزاكم خير ومن ذا الكلام صرنا نلاحظ ان استهلاك المويه زاد اكثر بثلاث مرات عن استخدمنا منول قلنا الجااار جار لو جار بعد كذا تلفون وبعد كذا ابيكم تنتبهون لسيارة البلوك تبي تجي بكره العصر وودي يكون اذا فيه احد موجود ينتبه لها ويخليه يصف البلوك في المكان الفلاني بعد هذا كله بغيت اعرض عليه اني اشرف على فلته ببلاش وامسك المقاولة تسليم مفتاح من كثر ما خذ مننا المهم في يوم من الايام والفله على اخر شي فيها الا وهي العفش خلاص يبي يجيبون عفشهم ويسكنون ما درينا الا بالجار هذا جاي وهو يبتسم ابتسامة ثعلب وقال اعلمو انكم عزيزن علي بس هذا قرار الامارة قرار اخلاء الاستراحه لانها استراحة عزاب وبيتهم فيه عوايل من كثر القهر اللي جاني بغيت اقبره في المجلس بس فكه الله المهم ارتفعت اصواتنا ومن هذا الكلام قال هذا القرار وان ما طلعتو بالطيب طلعناكم بالغصب طبعاً الاستراحه ملك لخال احد الشباب وفهمنا خاله السالفه وانقهر خاله وقال قايلكم لا تسوون الخير في الاشكال ذي ولا تسمعون اعرفه واخبره كان جار لي بس انا اوريكم فيه هذي باقي قروش اجاركم اللي منتوب مكملينه لانه طلعكم وانا اوريكم فيه بعد كذا جا خال خوينا واسمه عبد الله وعبد الله هذا راعي صيد وعنده كلاب وصقور وبلاوي للصيد قام وحط في الاستراحه كلاب الصيد حقته وحط فيها صقوره وحط فيها عشة حمام ودجاج وصار يجي هو واهله لمها كل يومين تقريباً وصار الجار الخاين ماله حجه انهم عزاب لانهم ازعجوه بنباح الكلاب والريحة الصادرة من الدجاج والحمام والصقور والريش .
(على ما قال المثل خلك على قدرك لا يجيك اللي اقرد منه)

الحيااة حلوة بس نفهمها

5-
شاب في سن المرهقه عمره 16 سنه يمتلك سياره من طراز 12 سلندر وقوة 400 حصان متهور في قيادته يسرع داخل المدينه يقطع الاشارة كانه ما شافها ويجي شاب جامعي عمره 24 سنه معه سيارة قيمتها اقل من اربعة الاف ريال واعي ومدرك لخطر السيارة يسوق بتعقل ومدرك لاخطار السيارة وابوه متوفي ومقطوع من شجرة تقريباً ومعارفه محدودين وكلهم مثله ومثل وضعه تقريباً
يجي المراهق هذا ويقطع الاشارة وهو مسرع ويصدمه الجامعي ويتوفي الولد المراهق و يجي الشاب الثاني شلل رباعي من قوة الاصطدام.
يجي ابو الولد هذا ويحاول فيها يمين ويسار ويقلب الخطأ على راعي السيارة الثانيه مع ان فيه شهود شافو الحادث والغيت شهادتهم لانهم غير كفء للشهادة لانهم شهدو على الولد المراهق بعدها تتحمل ام الشاب هذا الديه وقيمه السيارة و ولدها مشلول وابو المراهق يصيح في العزاء ويقول ولدي في عمر الزهور جاه هاك المطفوق و خلاه يموت !!
(اللي ماله واسطه نخله ماسطة)


الحيااة حلوة بس نفهمها

6-
تدخل على مجموعة شباب من ربعك اللي قد درسو معك وحبيتا تعيد معهم ايامك الخوالي ايام الدراسه في الثثنويه والحركات في ملحقكم تلقاهم مشخصين كانهم يبي يعرسون وتلقا جوالاتهم ما تطفي ابد من كثر اتصالاتهم على الجنس النعم وكل شوي واحد يقولك فيه احد برا ابطلع اكلم والثاني بالله جب لي شاحن المهم تقترح عليهم يطفون جوالاتهم وتسولفون وتضحكون وتتقهوون بدال الازعاج ذا ويوافقونك ويسوون كل هذا تبدا حديثك ايه اذكر في الشرقيه سوينا كذا وفي الصمان كشتنا كشتة العام يحبها قلبكم تلاحظ ان وجيههم تغيرت . يمسكون محور الحديث ويبدون يسولوفون ويتفاخرون واحد يقول ما قد عمري صليت غير الجمعه والثاني يقول تصدق اني مشبك 14 بنت والرابع يقول تصدق اني اقوى اشرب بطلين عرق ولا افقد ( يعني ولا اسكر) ويناظرونك وانت مندهش وتلاحظهم يسالونك تكلم بنات تقول لا تقولهم طيب تشرب برا السعوديه تقول لا ما اشرب يقولون لك طيب وراك كذا ياخوي متخلف الصلاة لازم في وقتها وكل شي اطرب عمرك !! تتعجب من كلامهم وتقولهم هاه جازمين نطلع نصيد اخر الويكند ذا يوم الخميس والجمعه العيال يمدحون القميري في شعيب الذياب حول حايل ؟ تلاحظ وجيههم تغيرت بقوة وتنرفزو وطلعو من مجلسكم وهم يقولون لك انت قروي ولا تمثل دور قروي؟؟؟ ترد عليهم وتقول اذا كانت القراوى اني احافظ على نفسي وعلى شبابي وعلى عمري من جهنم ومن كلام الناس ومن الخرابيط اللي ما تنفع الا انا قرويين مهوب قروي واحد ومخلين المدنية لكم يا المتحضرين .
نفس النوعيات هذي واجهتها بس بشكل يختلف تقريباً الا وهو انهم كانو يسموني راعي التتن بلاني ادخن وهم لا (الله يصلحني واخياني المسلمين ويعصمنا عنه ) وكانو يقولون ياخوي ما تستحي تدخن ما تستحي تشوف وجهك وانت تشب الزقارة شلون ما تستحي وطبعاً كل هذا باستهزاء يقولونه عشان يرفعون ضغطي ، رديت عليهم وقلت اسمع با فلان انت راعي كااس وانت معه يا فلان كل اجازة ولا ويكند تقعدون تلتحون من ذا العرق ما تستحون ربي يعطيكم عقول وتضيعونها تصير انت والبهيمة سواسيه؟ وانت يا فلان تعال انت راعي مغازل ما تستحي ولا تخاف انك تقابل وحده مهيب محرم لك؟ ترضى احد يسوي باخواتك كذا طيب قالي اخواتي متربيات قلت اجل التربية راحت لخواتك ومرت من عندك ولا وقفت عندك يا المتربي ولو خواتك متربيات ترضى احد يسوي بهم كذا؟ قالي لا قلت اجل ولا واحد منكم يحتسي كلمة زود يا السمّلق، على الاقل انا اذا حاولت اضر احد ما يتضرر الا صدي من الزقارة وتموتني انا لحالي وما طاح من النجوم خف من السماء بس انتم وش نقول انتم اللي تخربون المجتمع فلان يسكر والثاني راعي بنات وزنى على اقل شي الدخان مهوب من الكبائر ولا يضر الا اللي يدخن بس ، وتعال انت يا فلان انت صح انك منتب راعي تتن ولا انتب راعي شراب ولا انتب راعي مغاول بس لا تنسى انك عاق لوالديك صح ولا لا وتتفاخر بكذا انك اليوم هاوشتا ابوك ولّعنته وسويتا له اشياء شيبت به وهو توه ابو 40 سنة واللي يشوفه يقول عمره 70 سنه من كثر ما دمرتا صحته بالعقوق صح ولا لا .
(يوم ذاك وقفو كلهم مشدهوين وهم يقولون يا شيخ رح مهما كان الدخان مرفوض في المجتمع قلت ايه مرفوض عند الناس اللي مثلكم اللي تشوفه شي كبير ولا تشوف الناس الثانيه وش تسوي وتعرف انه شي صار عادي)


الحيااة حلوة بس نفهمها


7-
اول ما جيت للديرة اللي انا اسكن فيها مثلي مثل اي واحد تعرفت على شباب خيّر وشباب دشير وكنت احب اجمعهم عندي في الشقه عشان اصير واثق من كل شي يصير تخبرون الدنيا مالها امان وش يضمن لي الشاهي وش يضمن لي العشاء ما ينحط فيه شي يضرني بحكم انهم شباب توني متعرف عليهم ولا اعرف وش طينتهم قعدت معهم على هذا المنوال فترة عقبها ركبت دش رقمي مهنا قناة مهيب فيه وصارو يقعدون عندي لدرجه اني تضايقت يعني توقعو اني اروح ارقد واروح للجامعه وهم للحين موجودين في المجللس يناظرون الدش ويلعبون بلوت عقبها قمت وبعت الدش ولا شفت ولا واحد منهم خصوصاً اني كنت مشترك في الشوتايم والاي ار تي وبعد كذا بفترة قابلتهم في كوفي شوب قالي واحد منهم بتهكم تصدق يا ريان ما عرفت السهر والتتن الا منك وقاعد تلهينا بالدش وانت وضعك بالعمل زين وحنا نرسب بالجامعه ويجينا انذار من العمل ؟
( هذي الفقرة ابيكم انتم تعلقون عليها مهوب انا مع اني احب اقولكم انهم من عرفتهم وهم يدخنون واكرمتهم وسوي لهم كل شي )


الحيااة حلوة بس نفهمها


8-
ثاني العيد تروح لعزيمة مسوينها جماعتكم تروح وتسلم عليهم مع العلم ان مافيه اي احد في سني جاي كلهم لاهين مع الكورة والمباراة هاك اليوم وابوي مسافر هاك الوقت ما بعد جاء من مكة تدخل المجلس وتلقا الشياب صافين في صدر المجلس تبدا تسلم من اليمين وكل واحدن تحب راسه وخشمه ويديه شوي وتحب رجليه من كثر ما تحترمه ويجي وقت العشاء وتاخذ الونيت وتروح تجيب العشاء مع ان مالك دخل في العزيمه كلها الا انها دورية العيد وخالك اللي مسويها وخالك شايب وولده للاسف ما جاء قاعد يناظر مباراة الارسينال ومدري من في الدوري الايطالي مدري الانجليزي يعني انت حسبة ولده اللحين وتروح وتشيل وتحط وتصب القهوة والشاهي و كل من دخل تمسكه تحبيب وتهلهل لين تدخله للمجلس واخر شي تسمع شياب يقولون اللحين فلان وراه تسذا ما شاء الله عليه راعي فزعه يرد عليه الشايب الثاني ويقول ما عليك منه تراه هيسٍ اربد دوك لحيته يحلقها ودوك سوالفه وش طولها واصله شحمة اذنه وتراه بعد راعي تتن و اشوفه دايم رايح للمحل الفلاني في البر الفلاني يروح ويقول انه رايح يصيد ولا ادري وش رايحٍ يسوي بصراحة همن فجأة تسمع الشايب الثاني يقول ايه والله اثره هيسٍ اربد وتسنه داب تبن ما تدري عنه ولا وش وراه . بس في اخر شي يجي خالك الشايب ويحبك بين عيونك ويدعي لك ان الله يوفقك ويزوجك بنت الحلال اللي تحافظ عليك وعلى بيتك عقبها ترتاح وتقول ليه طيب هذولاك قالو عني كذا؟ وش انا مسوي لازم اصير راعي مغازل ولازم اصير راعي شراب ولازم اصير ما اجي لعزايم ولا اصل الرحم ولا اسوي شي مثلي مثل اي واحد في الشارع ما يعرفهم عشان يقتنعون اني للحين وانا رجال عادي مثلي مثل اي شاب ما افرق عنه الا في الكماليات ؟
(وهذي بعد علقو عليها لا تنسون )

الحيااة حلوة بس نفهمها


9-
تجيي في يوم من الايام تضطر انك تفتح النت عند واحد من اخوياك عقب ما تفتحه يشوف اللي معك في الماسنجر كل ابوهم ويقول بكل تعجّب معك ست وثلاثين بنت؟! اثرك منتب سهل ياخوي وانا احسبك منول ضعيف. للاسف النوعيات هذي لازم تشّب فيها ببنزين وكبريت لانه يعتقد اي بنت معك في الماسنجر خويتك مهيب اختك مع انه شايف اسلوبي معهم اسلوب واحد يكلم خواته الا انه الي اللحين مهوب مقتنع .
( ياشين اللي كنه عنز بدو طاحت في مريس شبّك له وحده ويحسب الناس كلهم مثله )

الحيااة حلوة بس نفهمها

10-
مرة الحو علي خواتي ادخل معهم محل يبيع ملابس داخليه نسائية وتخبرون مستحي وش يدخلني محل مثل كذا قالو تعال ادخل معنا وتعرف واذا ما عرفت
علمناك ليه دخلت معهم وتوزعو في المحل وانا قاعد منزل راسي في الارض ومولع لي زقارة كودها تكتم نفسي واموت من كثر القهر اللي سمعته واللي اشوفه وعرفت ليه اخواتي الحو علي اني ادخل معهم خلونا نشوف الحوار هذا : (منيب عاقل الكمرة الخفية)
بنت عمرها 20 اتوقع : اقول انت ما عندكم مقاس 37 d
اللبناني اللي يبيع: الا شو هالكلام يخرب زوء هالشغاله ازا كان موجود
البنت : طيب عطني اياه
اللبناني : اصبري حضرتك شوي بس دخيل الله
( اللبناني قاعد يناظر البنت من فوق لتحت تقول جهاز سكنر يبي يطلع صورة ولا مكينه تصوير في خدمة طالب )
اللبناني : انتي راح تلبسي 35E
(شوفو الوقاحة بالله شلون يجادلها في ملابسها الداخليه ويعلمها بمقاسها )
البنت: طيب عطني اياه اجربه اشوف اذا يركب ولا رجعته
اللبناني : الموديلات المتوفرة في الزاوي هّي مودموزيل
( البنت قاعدة تتنقى ملابسها الداخلية وياما طلعت ذا وياما طلعت ذا اخر شي صفت على نوع معيّن)
البنت : هذا مقاسه 36B وانا ابي زي ما قلت 35 E من نفس الوديل
اللبناني : يخرب زوئك مدام هو هاد زوء عالي ما شاء الله
( البنت حسيت انها ابتسمت وودها تضحك بقوة من زود الوناسة لبناني يطري على ذوقها بانه زين ؟)

انتهى الحوار

تخيلو واحد سعودي او واحد من اهل البلد ما سوا الشي هذا لا تخيلو انه قال عندنا بضاعة توها نازله اصبري اوريك اياها اختي ولا جادلها في مقاسها ولا شي خلاها على راحتها ولا اذاها بشي ابد.
تخيلو وش تبي تسوي اول شي تبي تصكه بشنطتها اللي كلها اشرطة راشد الماجد و اشرطة راشد الفارس ورابح صقر وفيها قارورة عطر حجم عائلي وفيها عدة تجميل كاملة ( انا مدري وشوله ياخذونها معهم للسوق بعض البنت الله يهديهم ويستر عليهم) .
غير انها تبي تجيب الهيئة وتبي تقول انه كان يغازلها
غير انه مسكين يبي ينفصل من العمل هذا ويبي يلقى عقاب في القسم يخلي البزر يشيب
مع ان قصده شريف ولا قصد شي غلط ولا عشانه سعودي اشهبٍ الهبٍ اطوقٍ ادغمٍ ولا قال مودموزيل؟
( حلال عليهم حرام علينا ولو اننا ما اخطينا)

الحيااة حلوة بس نفهمها


11-
الساعه 11 في الليل وتبي تروح تتمشى بالموتر شوي بين المزارع وتغير جو وتشغل شريط حمد الطيّار وتسمع اغنية يا سلام ويا سلااام الله يا حمامٍ جر اللحاني صابني من بد خلق الله يا ليت ما شفته ولا جاااني .
فجأة ركب خويك وسمع الاغنيه وامطرك بوابل من الاستهزاء يا العربجي يا خريج السجون احد يسمع ذا الاغاني ياخوي شكلك منتب عايش في السعودية شكلك عايش في البر عند خيمه وبعارين اغنيه عمرها 30 سنه للحين تسمعها؟ طبعاً تتقبل الكلام هذا من صديقك لانه بس يبي ينرفزك بلاه يحبك وهو صديقك واكثر من صديق بعدين يقول وقف جنب موتري نجيب شريط نسمعه زين يروح يجيب شريط وتشغله على اساس انه على اقل شي لعبد الكريم عبد القادر او لفيروز يعني شي زين للحين يسمى فن وغناء يطرب الواحد

بعد برهة تسمع صوت ما تدري هو رجال ولا حرمه يقول : حطيتك في بالي واصبحت محبوبي واشغلت بك حالي ........ الخ

عندهااا مالك الا تقول يصبّحك بالخير يا فيروز شوفي وش وصلنا له من الفن اللي مدري وش يبي اغاني تموت القلوب ولا وين اللي يسمع الجميري وهو يقول شوّيخ من اهل مكناس وسط الاسواق يغني وش علي انا من الناس وش على الناس مني
ولا فهد بن سعيد وهو يطربك باشهر اغنيه حالياً ولا فيه احد ما يعرفها خلاص من حبكم يا زين عزلنا معاد لي في هواكم شف او رادة

ولا عوض دوخي وهو يمّول في اغنية يوم الخميس اللذي فات رحنا نتمشى حولي
ولا عبد الله فضالة وهو يقول لولا النسيم لذكراكم يؤرقني لكنت محترقاً من حر انفاسي
ولا ابو حمد وهو يغني انا وقلبي على الهجران عزمنا طرد المقفي حشى مهوب لنا عادة

( ليت الايام ترجع ويصيرون مطربين ذا الوقت اغانيهم على اسطوانات مثل الاولين بدون صور وبدون فلاتر تصفي الصوت وبدون امكانيات صوتيه مثل اليوم هل يا ترى اشرطتهم بيمشي سوقها مثل اللحين مع ان فنانين اول على الرغم من ضعف امكانياتهم ولا يوجد عندهم فلاتر صوت ولا شي واغلب اغانيهم جلسات يعني مهنا فرقه محدده كل يوم عازف عود جديد وكل يوم مروس جديد الا انهم تسمع صوت يطربك مهوب صوت اشبه بنعاق الغربان)

الحيااة حلوة بس نفهمها



بعضكم يبي يقول اني ابالغ في كلامي اللي فوق بس والله العظيم هذي اشياء شفتها وعايشتها وسمعتها واللي سمعتها سامعها من نااس موثوقه ما تقول كلمة تكذب لو على قص ارقابها


واللحين مالي الا اقولكم فمان الله على امل اللقاء [/ALIGN]

أسير....

الحياة حلوة بس نفهما ، عجبتني قصة محل الملابس الداخلية

<<<<< داج ، من جد والله وين الرقابة عنك اخوي اسير تناقضات في الحياة

احببت ايصالها لنا بطريقة جميلة اشكرك اخوي اسير على جهودك في طرح المواضيع

تقبل خالص تحياتي وشكري لك .....

الــــعـــــفـــــو