السلام عليكم ورحمة الله.

حياكم الله ياشباب والله من زمان عنكم من أيام عيد الفطر وأنتم مالكم شوفات بس هذي الدنيا تفرق وتجمع.

رحت ورجعت ومابين روحتي ورجعتي إلا ثلاث أشهر ونصف وثلاث ساعات وربع رحت والهلال توه قاضي على بطولة بالضربة القاضية ومابين روحتي ورجعتي إلا ويقضي الهلال على بطولة النخبة بالضربة القاضية بعد ;) وفي الطريق لتملك بطولة وهي ولي العهد وبطولة أخرى هي الدوري وبطولة أخرى هي كأس مبارك (مدري وشي ذي بس أقراها في الجرايد)وبطولة اخرى هي كاسش العالم (لاتنسون ترا الهلال ينافس على الكاس مهوب مشاركة علشان كاس اللعب النظيف).

***بطولة النخبة***

**هي أطعم بطولة للهلال هالموسم علشانها جمعت بين ثلاث أشياء حلوه هي :
1-فوز الهلال بالبطولة بطريقة متلوية.
2-أن بطولة النخبة أول مرة تطب العريجا.
3-أن الله اظهر الحق على حساب الباطل وانتقم لذلك الهلال ينظلم في كل مباراة في هذه البطولة قدام الجيش يوسف تنشقل رجله والحكم يناظر بس علشانها من يوسف (ميل جبسون حق السعودية)نقول يمكن ممثل فيها الحكم أقرب وقدام النصر ذكرت لعبت طب الجمل (هذا واحد يمسك معه كوره ويقعد يطق اللي يلعبون اللين يقضيهم عاد إذا لمسها واحد براسه يطبب واحد من اللي طلعوا يجي واحد من اللي ينلحقون ويرفع الكوره بيده على راس خويه ويطقها خويه يعني يطبون كلهم ويهبلون باللي يلحقهم مثل حركات النصر ارفعلي بيدك واعيشك براسي)ايه نرجع للموضوع ومع لعب طق الجمل وهدفهم التسلل بتقولون مهوب تسلل بس بقانون الحكم المفروض يكون تسلل لسبب واحد وهو
انه في هجمه من هجمات الهلال كانت الكوره رايحه للباب وسامي عند الركنية متسلل حسبها الحكم تسلل وهدف النصر الكورة كانت رايحه للباب وعامود الكهرب رينالدو واقف في نصه وهو متسلل وعقب كذا يقول مافيه تسلل يعني حرام علينا حلال على غيرنا) بس وش نقول حبيبين.


** في هالبطولة أنا مافرحت علشان الهلال خذها بس فرحت بالالتيما خلودي اللي رجع للعبه ورجع لنا أيام زماااااان عساه يدوم إن شا الله على هالمستوى.

**يا شباب تصدقون فيه ناس يفرحون إذا انهزم النصر وتلقاهم من بكرا يروحون يشرون كل الجرايد ويقعدون يضحكون على سواليف عبدالرحمن بن سعود وابنه المصون (على وزن حرمه المصون ) يلعن ام السواليف أنواع التصاريف تجي وإذا شمو ريحت فصل من الادارة على طول ينفون سواليفهم لا ومن زين الطبايع يقولون فبركات صحفيه وهي مسجلة عل مسجلات بس ما أقول إلا الله يخلف بس أزين شي أن روني مسجل قل البطولة بأيام قليلة ويوم قال له صحفي طيب فلهو مسجل بعد البطولة بيوم قال ما اشتكى أحد على النصر يعني الأخوان راضين أنهم ياخذون البطولة بالغش بس لاحد يدري ذكرونا بأيام الإختبارات غش وسو اللي تبي ومحد داري عنك.

**أنا قاهرني شي واحد الجمعان يوقف علشانه سو شي يسئ لسمعة الكرة السعودية قلنا موافقين عقبها بإسبوع واحد مضاربة بين خوجلي والداوود وقالوا هذي محليه يعني مافيها إساءة قلنا صح (غصب من ورا خشومنا) ثم جت النخبة ويدخل وهو ماخذ مقلب في عمره مسوي wcw يدخل كذا ويحيي الجماهير يروح يسلم عليهم ويلمس يدينهم ويجيك جونيور يدخل مع الجهة الثانية ونفس الحركة ويقلبون الملعب لحلبة مصارعة وخذ طق وطقيق والحكم ساكت والاتحاد السعودي ساكت ليش يعني الداوود وجونيور مهوب يمثلون السعودية ولا الداوود وجونيور عندهم واسطات ايييييه الجمعان يوقف والداوود جالس يلعب إلا اللحين .

**يوم راحت بعثة النصر ومالقينا فيها عبدالرحمن بن سعود الأب الروحي على قولتهم قلنا إن شا الله مافيه تصاريح تسئ للكرة السعودية وفي لمح بصر لقينا واحد اشين منه في التصاريح الي هو نجله ممدوح بن عبدالرحمن لا والله ان ذاك ازين منه ذاك يلمح مهوب زي ذا طقها في وجيههم (مرتشي)يلعن أم القوة ياشيخ صدق من قال (عنز بدو وطاحت في مريس;))

نقاط مترقعة:
**عبدالرحمن البيشي من أول مباراة لعبها قدام الهلال جاني واحد من اخوياي وقال لي البيشي أزين من الشلهوب قلت هههههه حلوه الذبه (على نياتي) ومادريت إلى والولد يتكلم جد قلت له من باب الدعابة فيصل سيف أزين من ابو اثنين قال وذي فيها شك أنا صراحه ماكان في يدي شي وإلا كان تلقون بكرا في الأخبار صدر من وزارة الداخلية البيان التالي ............... وذلك أثر خلاف حل بينهما(افهموها;)).
يا نصراويين البيشي إلى اللحين مابعد قدم شي حلو ماغير شافوا ذا الشعيرات اللي فارقها فوق راسه قالوا هذا فيه من ريحت الشايع (هذا حدهم) والله ياجماعه ما يعرف يلعب بالنسبة للاعبين الاندية الثانية أما بالنسبة ليزيد وهادي تراه فنان.
قالوا يعرف يتمركز ويعرف يتمركز ويعرف يتمركز (ثلاث نفس الشي يحسبونا مخفات زي جماهيرهم)الرجال مايعرف إلا يتبطح في الملعب (ياي تأثر من طقت الشريدة)

**النزهان يلموني فيك بس والله أنك شنب وبس والله انه يلعب لعب رجاجيل والله معد نبي عبدالغني في العالمية عندنا كارلوس بس لو يستمر على هذا المستوى أن يطلع في المنتخب وأم الخير عبدالغني قاعد يصيح على الإحتياط إلى الأمام يابو نزهان ولا تنظر لتفاهات بعض الجماهير الهلالية.

**حسين عبدالنبي (رافضي مافيها كلام) لاعب مكسب حقيقي للزعيم والله انه فنان وبعض جماهير الهلال الله يهديهم مايشعونه علشانه رافضي يا أخي لاتشعه بس تراك تشجع النصراني الكاتو وروني وتوليو يعني يا اتركهم كلهم يا شجعهم كلهم مهوب إذا مابغيت لاعب قلت يالرافضي . أيه تراه فنان واتمنى أنه مايحفظ عدد مقاعد الاحتياط ولونها ومن اللي مليصها (بالعربي مايعتزل وهو احتياط)

**عيد العنزي نجم هلالي واعد ومع ذلك ماشفنا الجرايد يشجعونه وإلا التشجيع لـ(دلوعة امه البيشي) أتمنى أن الظروف تحدنا على لعبه (من غير إصابات) وإن شا الله مع روحت اللاعبين للمنتخب نشوفه.

**الشلهوب نواف سلطان السعيد ومحمد القحطاني وعبدالله المطرف وأحمد المطرف كل هذولي ولا فيه قاعده زرقاء وين بتلقون ازين من ذولي فيه تسلم لنا يا فهد المصيبيح والله يوفقك في الهلال وغيره بس يرحم امك لا تسمع سواليف متخلفين الصحافة.

**يوسف الثنيان ياحليلك ويا زين لعبك والله لو نلقا في السعودية منك 11 كان صرنا أزين منتخب في العالم بس تراك لسا شباب وتراك تقدر تلعب موسم ثاني مع الزعيم ياليت تدرس الموضوع وتقعد عندنا ولا تروح.
يا جماهير الهلال إلحقوا على الفن قبل لا يرح ترا كلها موسم وإلا اثنين وبيروح المعجزة ابو يعقوب علشان كذا لاتفوتون ولا مباراة له عن الملعب.

**بمناسبة كوني أحد جماهير الهلال ابغى أقترح اقتراح لرئاسة الهلال اللي هو
ورا ما يفتح مدرسة لتبني المواهب الزرقاء وتكون بين الـ10 سنوات أو أكثر أو أقل بقليل ويستفاد من اللاعبين المنتهبن أو المعتزلين في تدريبهم مثل مبارك عبدالكريم-حسين البيشي - عبدالرحمن التخيفي - سعد مبارك عبدالله الدعيع -يوسف الثنيان بعد عمر طويل إن شا الله ويكون لكل مركز مدربين أو أكثر مثل في الهجوم يكون اثنين والوسط كذلك والدفاع كذلك والحراسة أيضا أرجوا أن تدرس الإدارة هذا الإقتراح.

يالله ما أطول عليكم إلى اللقاء (وين طلعنا وداعاً ماركو)