وجدت هذا الموضوع في احدى منتديات الهلال ( شبكة الهلال ) وتأثرت بكلام هذا الهلالي اللي يقول عن نفسه انه شايب وعمره 57 سنه !!!

اترككم لتقرأوا كلامه !!! وتعرفوا ماذا يعنى الهلال !!!!!!!!!!!
ولأنه هلالي مخلص وخبير فيجب علينا ان نسمع ماذا يقول !!! اترككم مع المقال !!




يقول ابو فيصل :

الجميع يجب عليه القراءة حتى لو ماشارك
.........
بسم الله الرحمن الرحيم..
وش اخباركم اول شي انا رجال عمري بال57 سنه وابيكم تاخذون هالكلام على اني هلالي كبير يعاتبكم ياشباب الهلال الي انتم العمد عليكم يالجمهور فتكفون اقروا هالي انا كاتب لانه مهم جدا جداا
الصراحة ياجماعة الخير ان الجماهير الهلالية رافعين ضغطنا هاليومين
وماعندهم غير مقابل هالكمبيوتر 24 ساعه وبمنتديات الزعيم او الهلال او الثنيان او غيره

وسمعنا ان عدد اعضاء منتديات شبكة الهلال اواكبر 3 شبكات هلالية وصل لـ150 الف مشترك

وبنسبة تواجد يومي 70 الف عضو وهذي إحصائية قريته امس بالبريد وانا بالمكتب.. لكن ماأعلم عن مدى صحتها

لكن الزبـــــدة الحيــن هالمية وخمسين الف الي قاعد يشتم لاعب والي قاعد يطالب بلاعب
والي ماشالله صاير مابه احد مثله يفهم كوورة وخذ ياسب وشتم باللاعب الفلاني ضيع جول
اللاعب الفلاني سبب مهزلة الهلال..وخذ من كثرة هالكلام

شوفوا تقولون لي منتدى أراء اقولكم على عيني وعلى راسي

لاني من الناس الي افتخر بالي يصير بمنتديات الزعيم وشبكة الهلال وغيرهن من المواقع الهلالية

عموما انا ابسال هالمية الف وخمسين الي بالمنتديات وش يبوون ؟؟؟

كل واحد يكتب لك يوميا اكثر من 10 مواضيع وكلها سب وشتم بلاعب ولا بمدرب

وش فايدتهم ذولا باللهي؟؟

اذا كانوا بالمنتديات 150 الف كم عددهم بالملعب؟؟؟

نعنبو شيطانكم اكبر مباراة للهلال هالسنة حضرها جمهور ماتعدى 8 الاف مشجع؟؟؟

وش بلاكم ياجماهير الهلال وش صار بكم؟؟ نعنبو شيطانكم عمري 57 سنه والله ماقد فاتتن مباراة للهلال بالملعب حتى والله المباريات القريبة من الرياض مثل الشرقيه ولا القصيم والله اني اخاويهم؟؟ ياعيال مهب ذا حال الهلال ابداااا ولا هب ذا تصرف الجماهير عندنـــا

وش القصة ياجماعة الخير وشلون تقعدون بالساعات قدام الانترنت وتعجزون عن ساعتين بالملعب تفدون به الازرق والله العلي العظيم ياجماعة الخير ان الهلال يستاهل نفداه بعيوننا وارواحنا وعيالنا

وش صار بكم يالشباب الهلالين انتم يالي بعمر الزهور انتم الي بكم والله العظيم لو لعب الهلال بفانيل بدون لاعبين والله نفوز لو نلعب قدام ريال مدريد

وش بكم ياجماعة الخير وين غيرتكم الهلالية وين حبكم للهلال انا معكم ان الهلال مستواه اقل من العادي هالسنة ولاعبين اقل من المستوى العادي لكن ياجماعة الخير حنا نشجع لاعبين ولا فريق؟؟

ياعيالي والله العظيم اني اذكر قبل كم شهر بمدرجات الناادي اني شايف رجال بعمري انه يصيح بسبب مستوى الفريق وعكس التيار سبحان الله شاب عمره 19 سنه ماسك ((تتنه)) وقاعد يوزع نكت على الجمهور؟؟

وشلون انقلبت الايه حنا قبل 30 سنه يوم حنا بعز شبابنا نصيح لو يتعادل الهلال لو يسافر لكل مكان كنا معه وحنا (( ادج منكم ماليا )) وش بلاكم يالهلاليين وانا مايرفع ضغطي الا لاجاني بزر من الي يعتقدون انهم يشجعونه هلال وقعد يسب ويشتم اللاعب الفلاني وش تشتم له عساك للبلا نعنبو ابليسكم هذولا يلبسون فنايل هلال وش بكم انتم ماتعرفووون وش معنى هلال هلااااااال هلااااااااال

نعنبو شياطينكم لاتهمكم أرائكم هالي ماغير قاعدين تأنقونها بهالمنتديات وتسطرونها وكأنها دفتر بنت بالمتوسطه الي يكتب بزهري والي يكتب بالبنفسجي ويحط لي صورة عيون بنت ومادري وشو

هذا هو الهلال بنظركم انك تكتب بالفاااضي لا يابيي انتم الهلال اكبر منا كلنا ترى

وانا اذكر واحد رفيق لي رحمة الله عليه كنت احضر المباريات انا وياه والله ياجماعة الخير انه بسبب حبه للهلال وهو به جلطــة ان عياله مطلعينه من المستشفى علشان يحضر مباراة الهلال والترجي قبل كم سنة باستاد الملك

معقول ياجماعة الخير ان جيل الهلاليين الشباب مابهم ولاء لناديهم معقول هالي يصير

لاحد يقولي التذااكر غاليه اقوله (( تكذب ))

إذا هي غاليه تقعد بالساعات قدام الانترنت وتجي فاتورك اخر الشهر 2000 ريال واسئلون مجرب عندي ولد من قومكم ماغير قاعد بمنتديات الهلال ويشخبـط وعمره ماطب الملعب وانا ابوه شايب الله يحسن لي الختام ماعمري قعدة قدام الكمبيوتر اكثر من 3 ساعات بالشهر وماعمره فاتتن دقيقة وحدة من مباريات الهلال ابسئلكم بالله مهب عيب عليكم انتم كهلاليين الي قاعدين تسوونه لاحد يزعل كلنا هلاليين وكل واحد ياخذ كلام الثاني على انه كلام محب واننا مجتمعين لسبب واحد


انا مابي أطول عليكم بكثرة الكلام لكن يابعد حيي أنتم ياعيالي وياخواني وياعمد الهلال انتم ردائي كل الرجاء انكم تتركون عنكم الترزز بالمنتديات وتنتبهون للنادي تكفوون داخل الملعب اسعدوا اللاعبين بوجودكم والله ماتشوفون الا السعادة والفرح جيبوا لي مباراة خسرها الهلال بالرياض وجماهيره مالية الملعب نعنبو الشيطان قولوا امين ادحروه والتفتوا لمستقبلنا كهلاليين ترى والله الي قاعد يصير مايرضي أحد أبد

وصيتي لكم ياجماعة الهلال ياحبيبيني انكم تحضرون للملعب نبيكم بالمنتدى كل وقت لكن يوم المباراة نبي نشوف المنتديات فاضية نبيكم تملون هالمدرجات نبي الملعب الي يلعب به الهلال مايصير لونه الا ازرق وابيض تكفوووووووون تكفوووووووون انتم ياصغارين السن

اتركوا عنكم التفحيط والدوران بس وقت المباريات الي يلعب به الهلال اتركوا عنكم الاستراحات والشقق وقت المباريات الي يلعب به الهلال اتركوا عنكم الانترنت والبلاي ستيشن لاصار للهلال مباراة وعقب المباراة لاتخلون شي ماتسوونه سوووا كل الي تبوونه فحطوا وتمشوا وسووا كل شيب استانسوا بشبابكم لكن ترى حب الهلال مهب وناسة ابدا ترى حب الهلال واجب على كل مشجع والواحد يبي يتذكر بعدين لاصار عنده عيال وقعد يكلهم عن انجازات الزعيم ولاه يحس انه من الي كانوا مع الفريق وكأنه هو الي رافع الكأس يوم يتذكر انه حضر المباراة وساهم بانتصار الهلال تذكرو كلامي طالبكم ياشباب الهلال طالبكم طلبة رجال كبير لعياله واخوانه وصيتي تكفووووون خذوه بعين الاعتبااار الهلال مشكلته مهب بالارهاق ولا باللاعبين ولا بالمدربين الهلال مشكلته بالجماهير الي قاعده تسب وتشتم وماعمره دخلت ملعب وشجعت ..تكفووون الله الله بحضور مباريات الهلال....

واتمنى بالاخير انكم تسمعون كلامي لاني فرد منكم وانا متاكد اني أقلكم حب للهلال لكن تكفوون ترى حب الهلال واجب مهب تسليه تذكرواا كلامي.....


والله يكتب الي به الخير والصلاح لنادينا الحبيب.........

...................................ابوفيصل



هذا ما قاله ابو فيصل !!!
يعطيك العافيه ابو فيصل !! وهذا هو الاخلاص والا بلاش !!!