شبــــابــنــا الاحــلى .. وبنــاتنـــا الاجــــمل - نادي الهلال السعودي - شبكة الزعيم

فيصل · #1 24/03/2004, 11:57 AM

[ALIGN=CENTER]

مرحبا بكل اللي دخلوا يقرون وش فيه وسط هالموضوع

انا عارف ان نصكم ان كان موب اكثركم منهبلين يوم قروء الموضوع

لان يعرفون ان صاحب الموضوع <<< اللي هو انا

ضايع مع اللبنانيات
وخصوصا الشيفه اليسا

<<< سبحان مغير الاحول

>>>> كني اسمع عشر طعش واحد يصفقون اعمارهم كفوف يقولون حنا بحلم ولا وش
ولا خمس طعش واحد يفركون عيونهم يقولون ذا ماغيره فيصل

انا فيصل ابن هذا البلد المعطاء <<< يبي وظيفه

اعترف باأني كان هناك تراباً مرشوشاً على اعيني وكنت لااعرف الجمال الحقيقي
كما هو حال شباب هالايام وللاسف

كنا اتوقع ان الجمال هو مكياج يلطخ ووجيهاً مافيها مطبات ولاحفريات

وجسم تقول قلم رصاص توه مبري

8
8
بالله وش تبي اكثر من كذا

بس انا لما فكرت وفكرت واجداً << اخت كثيراً

عرفت ان الجمال الحقيقي هو جمال الروح

<<< اول مره اصير عاقل

8
8
8
8
كل هذي مقدمه للموضوع اللي ابتكلم عنه

وش رايكم تقطعون الخط وتروقون على الموضوع

بسم الله نبدء بالموضوع

انا اشوف هالايام ان بعض شبابنا طايرين بالعجه باللبنانيات والامريكيات
ولايهونون بناتنا اللي طايرين بتوم كروز وميشيل <<< حق ميشو شو

يعني الحين ليش هم اتجهوا لصوب << (( متعوب عليها

)) ذيك الدير
ليش مايعجبون فيني <<< من زينك ياشيخ

بصراحه يعني كل ماشفت موضوع لقيت واحد يقول اجمل بنت هي اليسا

<<< تخسي والله لو يشوفها بدون مكياج ولا عمليات تجميل كان اغمى عليه من شينها
وبعد لو تشوف بنتنا توم كروز قبل مايدخل غرفه الحلاقه كان عرفت ان اشين واحد
بديرتها احسن منه بالف مره

مشكلتنا حنا <<< يعني كل ابونا

اننا نطير بالعجه لما نشوف بياض ولا عيون وساع
مثل عيون باسكال مشعلاني

<<< انا اشك عيونها ممططينها ثنين ليين صارت سذا
ولا مافيه عيون كبر عيونها <<< راحت فيها بكره يمكن تسمعون خبر انها صارت عمياء

مواضيعنا او ردودنا نلقى حرب من الشباب على البنات والعكس <<< عجاز

نلقى الواحد يذب على الثانيه يقول لها انتي
شينه ووجهك كله خشم .. وعيونها صغار كنها مصاقيل

واهم شي يذكرونه ان ركبهها سود

<<< هذي ترفع ظغط البنات من جد وانا بعد ترفع ظغطي <<< مع الخيل ياشقراء

لا بجد الحين وش دراك ان ركبها سود انت وخشك يالتمساح ياشيخ والله اشك ان ركبها انظف من وجهك

<<<< بيتصفق من التماسيح

عاد بناتنا تلقاها انواع الصلخ على العيال وخذ ياشّب عليهم
انت وبراطمك ذا السود ... ولا شنبك اللي غاط في خشتك

واهم شي اللي يرفع ظغط الشباب اذا قالت له البنت رح انت وكرشتك اللي سابقتك

<<< يااختي يقدر يسوي رجيم وينحف لاتضيقين صدره

<<<< اشوا اني معصقل ;) <<< بس ماعليه يجيني من الذب دايم يقولون رح
ياشيخ كثر من ملابسك لايطيرك الهواء

بس لو جينا للجد مال الواحد الا ولد ديرته او بنت ديرته وكل هالكلام اللي فوق مزح بمزح
ولا كل واحد ضايع مع الثاني ;)

خلوني ابدء بنا كشباب <<< شباب ولا هلال

<<< ياقدمك

والله يافيه ناس مزايين من جد يخلونك تسعبل حتى لو انك من جنسهم
يعني عليهم طول وبياض وعيون وشي خيالي
والله اشياء ماتلقونها في رجاجيل الدير الثانيه

صح ان بعض الشباب ثقيل دمه ووجه بايخ بس عاد نلقى فيه اشياء ثانيه حلوه
يمكن يصير يعرف يشخص شخصيه الكوبراء <<< اهم شخصيه عند الشاب السعودي

صح ان رجاجيلنا قراوي وشاطفين التقّدم ولكن ياحبي لهم كلامهم عسل على القلب
يازينهم ليين قالوا وشلونتش وش اخبارتس ..تبين اوديتس لااي سوق اليوم <<< ماتسمع الا انواع التصفير

يعني نلخص شخصيتنا كشباب او رجاجيل او شياب

في
1/الجمال <<< قولوا ماشاء الله ;)
2/الاخلاق <<< مع الجنس الناعم فقط ..!!

3/الكـّرم <<< انا اشهد اننا في الكرم لامنافس لنا
4/الغيره <<< عاد هذي اهم شي فينا

8
8
8
بالله يابنات وش تبون اكثر من كذا بالله

يعني لو كل هالمواصفات في زوجك والله ياانك تحسدين عليها
ليش نشوفكم تلتفتون على شباب الفضائيات وتقهرون رجاجيلكم

خلي عيونتس في زوجك واتركي عنك الدشوش

عاد الحين للجنس الناعم .. الجنس اللطيف
<<< يحس ان الشباب يقولون بدري مابغيت تجي لمهم

بناتنا احلى بنات ولا عزاء لااصحاب الدشوش والسفريات

يااخي يازينهم زيناه بناتنا كلهم حلى ورقه وجمال <<< يارب اغفر لي

لا جد بناتنا وربي حلوات وحليوات <<< يعني موب لازم كلهم يطلعون زيون

بالله سؤال للشباب الجنس الخشن ليش انت ضايع مع نانسي
او نجوى وهالايام ضايعين مع ميرا وبهاء ؟؟
انا ابجاوب عن نفسي لاني كنت ضايع

بصراحه كانوا يشدوني ببياضهم الخرافي يعني من شده البياض
احس اني ابشوف عرقوهم

بس لو جينا للجد نلقاهم حاطين كراتين ميك اب << وش رايكم اعرف حركات المكاييج

ولو جينا للوجه سابقاً تلقاه انواع التعرفط والتصفط << وجع ذا موب وجه ذا كرشه

بس بعد عمليات الشد والتجميل تلقى وجهها تساوى

عاد اكثر مايشد الشباب لبس هالبنيات اللي بالدير الثانيه << بنات اوربا واللبنانيات

لبسهم اهم شي يشد نظر الشاب عندنا تلقاه مايدقق الا في اللبس وبس
وانا مع الشباب لان مثل هاللبس يشدك وربي غصب عنك

يعني الحين ليين جتك ولبست الشنقيط << جنز ضيق بس على روايه جدتي اسمه شنقيط

غصب عليك بتحس انها زينه وملكه جمال بس لو تلبس قميص من ابو 10 ريال عرفت انك
كنت ضايع وماتعرف وش الجمال الحقيقي

انا اقدر احلف واحلف ان بناتنا لو كانوا يفتشون كان ماراحوا شبابنا لم بنات الفضائيات
وكان مانشوف الا انواع السعابيل

والله ياعندنا بنات احسن واحسن واحسن مليون مره من اليسا وطقتها
بس حنا يالشباب مانقدر نشوف لان بناتنا يتغطون وماتشوف الا زوال اسود
ولكن لو بغيت اسأل امك ولااخواتك <<< لاتسال الا كانك تبي تزوج ولا غيره لاتسال
عن مواصفات البنت لان هالشي حرام

وان كانك تبي تشوف الزين شف امك واخواتك وعماتك وخالتك <<< وان كانهم شيون عاد وش اسوي لنسلكم ذا اللي كله شين

المشكله ان دايم الشباب يقولون ان بناتنا جمالهم من العدسات والرموش الصناعيه
والمكياج والديرما <<< للعجز بس

المشكله انهم مايدرون ان جمال بنات الفضائيات كله من عمليات التجميل من نفخ الشفايف ولاتصغيرها << ماطلعت شفه ذي

ولا من تفخ الخشم ولاتنسيمه << طالعه كوره

ولا من شد الوجه

يااخي انا ابصم بالعشره ان شبابنا ذا اللي يكتبون بالمنتديات
ان بناتنا اشين بناتوان بنات الفضائيات
احسن بنات انهم نصابين 100%
بس هو يكذب كذا يبي يرفع ظغط البنات وحرقهم ويحطمهم

ولا هو ضايع معهم ويتمنى انهم يتزوج منهم اليوم قبل بكره
<<< انا اول واحد يحب يرفع ظغط البنات بس ماابي اتزوج

بمعني اننا نلخص شخصيات بناتنا او حريمنا او عجزنا

في مايلي
1/ الجمال <<< رباني ;)
2/ العفه والحشمه <<< والله ماتلقاها الا في بناتنا

3/الاخلاق والدين <<< يازين اخلاقهم زيناه

4/ الطبخ <<< يمدحون الو محل فطاير توصلون للبيت

لا جد يازين طبخ بناتنا بس المشكله امهاتنا مايعطونهم فرصه

<< لقيت لكم تصريفه يالبنات ;)
8
8
8
انت وياه يالتماسيح بالله احد يلقى مثل هالمواصفات
ويروح لربع حليمه بولند وطقتها

والله يكفي ويكفي ويكفى عفه وحشمة بناتنا

والله ياأننا محسودين عليها بشكل ماتتخيلونه

مايستفاد من هذا الموضوع اللي ماادري وش يبي

1/ ان شبابنا الاحلى

وبناتنا الاجمل

ولاعزاء لشباب وبنات الفضائيات

2/ ترى انا كاتب الموضوع وانا بكامل قواى العقليه والجسميه

3/ الموضوع قابل للنقاش سواءً نقاش بدون ضحك او بضحك

<<< الله من زين الاسلوب

4/لازم نفتخر بجمالنا ولا ترى بيروحون فيها الجيل القادم وياخوفي عليهم من الانتحار

5/ كل واحد يدخل الموضوع يرد .. بس يعلمني انه قرء الموضوع

اخوكم شاب من السعوديه
فيصل <<< بس تراه شين

[/ALIGN]

saudi2002 · #2 24/03/2004, 02:54 PM

كل اللي كتبته صحيح

وانا راد زي ماوصيتني بس عشان قريت الموضوع

كـادي · #3 24/03/2004, 02:57 PM

^

^

^

بما إن اليوم الإربعاء

====> فرحه تقول بأولى إبتدائي

لذالك ابقراء موضوعك وارجع عاد متى الله وأعلم

أمواج الزعيم · #4 24/03/2004, 03:14 PM

فيصل تئبرني على هالموضوع الحلو يسلموووووووو كتييييير

صدق انا وانت احلى من توم كروز وطقته بس خل البنات يفهمون

على الاقل احنا ما نعرف نزيف ونحط خرابيط على وجيهنا مثلهم علشان كذا يمكن ما نعجبهم

الحاتمي · #5 24/03/2004, 03:17 PM

الـحـاتـمــي ..

مــر مـــن هــــنــــا ...

ويـقـول

صح لسانك ) فيصلووه !! <<< ضارب شوط ,, يحسبها قصيدة !

كيفي كويتية · #6 24/03/2004, 08:08 PM

[ALIGN=CENTER]انا بعد قريت موضوعك

بس برد بعدين

عندي عذر طبي يمنعني من الرد الحين

7
7
7
7
7
7
7
7
7

ضرسي يعورني

[/ALIGN]

الأزرق العالي · #7 25/03/2004, 02:42 AM

[ALIGN=CENTER]تعبت و أنا أقرأ

..

موضوع مُـــعـــبّــر و هـــادف يا ( فيصل ) بطريقة ( هزلية )

متميزة ..

<== رسمي

..

تحياتي ..[/ALIGN]

فيصل · #8 26/03/2004, 02:45 AM

[ALIGN=CENTER]
saudi2002

إقتباس


	كل اللي كتبته صحيح وانا راد زي ماوصيتني بس عشان قريت الموضوع

شاطر حبيبي

بس يااخي كان علقت على الموضوع

<<< تحطم يقول ياليتني ماكتبت النقطه الااخيره

كـادي

إقتباس


	بما إن اليوم الإربعاء ====> فرحه تقول بأولى إبتدائي لذالك ابقراء موضوعك وارجع عاد متى الله وأعلم

يعني ننتظرك الاربعاء الجاي عشان تردين

ننتظرك يابنت الابتدائي

وللبقيه عوده

[/ALIGN]

فيصل · #9 27/03/2004, 11:39 AM

[ALIGN=CENTER]
أمواج الزعيم

إقتباس


	فيصل تئبرني على هالموضوع الحلو يسلموووووووو كتييييير صدق انا وانت احلى من توم كروز وطقته بس خل البنات يفهمون على الاقل احنا ما نعرف نزيف ونحط خرابيط على وجيهنا مثلهم علشان كذا يمكن ما نعجبهم

ياعمري انت ياللبناني ;)
انا معترف اني شين

وانت شكلك زين بس مغرور بس ترى لك حق تغتر

تحياتي لك يامزيون

الحاتمي

هلا حتومتي

صح بدنك يالغالي .. ويازين من شاف هاليوزر بالموضوع;)

كيفي كويتية

إقتباس


	انا بعد قريت موضوعك بس برد بعدين عندي عذر طبي يمنعني من الرد الحين ضرسي يعورني

زين انك قريتيه

.. وانتظر ردك بس شكل ضرسك ماطاب

<<< مسوي ضايق صدره

انتظرك وانا ماطاب بسلامتك .. اهم ماعلينا ضروسك;)

الأزرق العالي

إقتباس


	تعبت و أنا أقرأ .. موضوع مُـــعـــبّــر و هـــادف يا ( فيصل ) بطريقة ( هزلية ) متميزة .. <== رسمي .. تحياتي ..

هلا بك الازرق المرتفع

لك حق تتعب وانا اخوك بس ترى هذا المختصر

وتسلم لي على هالشهاده ياحلو <<< صفقني كانك حلو

تحياتي للجميع

[/ALIGN]

كيفي كويتية · #10 27/03/2004, 04:31 PM

[ALIGN=CENTER]

سوري عالتأخير .. بصراحه نسيت عن موضوعك

اما عن الضرس

فالله يعينني على استخدام المسكنات لان الالم لن يزول الا اذا سويت جراحه عشان يشيلونه

لانه اصلا ما بعد طلع لانه مغرز

وانا رافضه انهم يشيلونه :p لاني ما صدقت على الله ان ضرس العقل بيطلع عشان اركد واصير تكانة

المهم شنهو موضوعك تراني نسيته

بس اذكر ان فيه توم كروز وجواد العلي واليسا وما ادري عاد جبت طاري نانسي ولا لا

عموما .. مالت عليهم كلهم وعلى اللي يتابعهم ويحبهم

تحياتي لك

[/ALIGN]

جريح الشمال · #11 27/03/2004, 06:51 PM

إقتباس


	إقتباس من مشاركة أمواج الزعيم فيصل تئبرني على هالموضوع الحلو يسلموووووووو كتييييير صدق انا وانت احلى من توم كروز وطقته بس خل البنات يفهمون على الاقل احنا ما نعرف نزيف ونحط خرابيط على وجيهنا مثلهم علشان كذا يمكن ما نعجبهم

قرقاص · #12 27/03/2004, 07:11 PM

إقتباس


	مايستفاد من هذا الموضوع اللي ماادري وش يبي 1/ ان شبابنا الاحلى وبناتنا الاجمل ولاعزاء لشباب وبنات الفضائيات 2/ ترى انا كاتب الموضوع وانا بكامل قواى العقليه والجسميه 3/ الموضوع قابل للنقاش سواءً نقاش بدون ضحك او بضحك <<< الله من زين الاسلوب 4/لازم نفتخر بجمالنا ولا ترى بيروحون فيها الجيل القادم وياخوفي عليهم من الانتحار 5/ كل واحد يدخل الموضوع يرد .. بس يعلمني انه قرء الموضوع

لو حطيت هالخلاصه مهوب ازين<<<<< واحد عاجز يقرا كل اللي مكتوب فوق

وانا اشهد انك صادق ياشيخ فيصل <<<< يحسب نفسه في مسلسل بدوي

Abu saad 66 · #13 27/03/2004, 08:55 PM

فيصل هي حاجتين

اما انك خطبت ..

او انك ناوي تخطب ..

والظاهر انهم سائلينك عن يوزرك في منتدى الزعيم وشو ..

اعترف اخلص وانا ادلك على طريقه توديك في ستين داهيه .

. قصدي ستين مدري وشو

هـلالـي أصـيـل · #14 28/03/2004, 02:24 AM

اهم شيء يلفت النظر في مايستفاد
ان شبابنا الاحلى وبناتنا الاجمل ولاعزاء لشباب وبنات الفضائيات2/ ترى انا كاتب الموضوع وانا بكامل قواى العقليه والجسميه

شكلك يوم تكتب هالموضوع وانت منسم بجميع قواك العقليه

بس بقولك شغله صغيره صغنونه ( قعنبه مره )

الا وهي ان بنات الفضائيات لو يشوفهم اي شخص بدون مكياج وبدون اضاءه

راح يتفاجأ في كثير منهم

المكياج يحتاج للمسات

مو اي بنت تحط كيلوا مكياج تصير ملكات جمال البكلات والتنطيلات = تنطيل العالم

فيصل · #15 29/03/2004, 05:46 AM

[ALIGN=CENTER]
كيفي كويتيه مره ثانيه

إقتباس


	سوري عالتأخير .. بصراحه نسيت عن موضوعك

لاعادي متعود .. وترى عوار الضرس ينسي كل شي ;)

إقتباس


	اما عن الضرس فالله يعينني على استخدام المسكنات لان الالم لن يزول الا اذا سويت جراحه عشان يشيلونه لانه اصلا ما بعد طلع لانه مغرز وانا رافضه انهم يشيلونه لاني ما صدقت على الله ان ضرس العقل بيطلع عشان اركد واصير تكانة

ههههههههههههههههههههههههههههههههه
ياحليلك توك بتصيرين عاقله

انا طلع لي وكسرته <<=== لاحظي وش سويت به

واحاول اطلع واحد جديد بس مانفع

ودي اعقل بس مهنا ضرس

الا ماودك تسلفين ضرسك

إقتباس


	المهم شنهو موضوعك تراني نسيته بس اذكر ان فيه توم كروز وجواد العلي واليسا وما ادري عاد جبت طاري نانسي ولا لا

امحق وهذي وانت حاجزه وقاريته
ماتدرين وش الموضوع

الا من وين جبتي جواد وانا ماكتبته

ونانسي جمالها رباني بدون مكياج ولاشي

<< === هون

إقتباس


	عموما .. مالت عليهم كلهم وعلى اللي يتابعهم ويحبهم تحياتي لك

ايوه والله مالت عليهم

تخياتي الك

جريح الشمال

ثانكس على الاقتباس

قرقاص

إقتباس


	لو حطيت هالخلاصه مهوب ازين<<<<< واحد عاجز يقرا كل اللي مكتوب فوق

ههههههههههههههههههههههه الله يرجك

يااخي موب كل واحد سوداني مثلك

إقتباس


	وانا اشهد انك صادق ياشيخ فيصل <<<< يحسب نفسه في مسلسل بدوي

اقلط .. على الطلاق ان تشرب القدوع وتاكل القهوه <<< سوري مسوي فيها بدوي

Abu saad 66

إقتباس


	فيصل هي حاجتين اما انك خطبت .. او انك ناوي تخطب ..

فال الله ولافالك

لاكذا ولاكذا

بس يااخي كان على عيوني غشاوه وراحت

ليش ماتصدقون

إقتباس


	والظاهر انهم سائلينك عن يوزرك في منتدى الزعيم وشو .. اعترف اخلص وانا ادلك على طريقه توديك في ستين داهيه

هاه

<<== توهق

اقول انتظر رسالتي بالخاص عشان اعرف كيف اصرف الجماعه

تحياتي لك

هـلالـي أصـيـل

إقتباس


	فـيـصـل ( الـمـعـصـقـل ) >>>>> يـمـون

احسن منك يالدب الكبير<<< خلاص صرت امون

إقتباس


	شكلك يوم تكتب هالموضوع وانت منسم بجميع قواك العقليه

ههههههههههههههههههههههههههههههههه
كنك تشوف والله

تصدق بغيت اهون عن هالكلام بس قلت فشيله

إقتباس


	بس بقولك شغله صغيره صغنونه ( قعنبه مره ) الا وهي ان بنات الفضائيات لو يشوفهم اي شخص بدون مكياج وبدون اضاءه راح يتفاجأ في كثير منهم

والله صادق
حصل هالشي كثير بالنسبه لي انا
واولهم زينب العسكري

لو تشوفها تقول سبحان مغير الشكل
وجهها تشوفه تقول كنه موطي عليه كفر
وانواع الحفريات والمطبات فيه
بس لما نشوفها بالتلفزيون انواع السعابيل واولنا شيابنا

تحياتي لكم

[/ALIGN]