-اذا شفت واحد فاتح قزازة سيارته ورمى له علبه ببسي ولا كيس او قطيفه دخان فابصم بالعشره انه سعودي

-اذا شفت واحد ثاني فاتح القزازه ومطلع صوت زي كذا (خخخخختووووف) ورامين له شي كنه حصاة خضرا فابصم بالعشره انه انا

-اذا شفت واحد يزووووورق ويخيط بين السيارات في طريق الملك فهد ومعه كامري ولاكوريلا فابصم بالعشره انه ابو الذهب ولا الحاتمي

-اذا شفت واحد عند اشاره وقاعد يلعب ويبعبص في خشمه فلا تضايقه وتزعجه بالبواري عشان يمشي!. خله يخلص المهمه اللي هو جالس ياديها بقمه التركيز

-اذا شفت واحد ثاني معه ميركوري 97 عند نفس الاشاره ماسك الجوال وقاعد يقرقر ويتميلح مع خويته او شغالتهم فاعرف انه راح ياكل خااابوور بالفاتوره وبيشحذ عن مسجد

-اذا شفت واحد طاق الكشخه ولابس شماغ اخر موديل وطاق النشى والجزمه الرسميه وجوال في اليمين وجوال ثاني في اليسار والطيب اللي يشق الخشم وقاعد يتمشى باسواق المملكه او الفيصليه ...فلا تظلمه وتقول انه جاي يغازل!

-اذا شفت واحد خال( اسمراني ) طاقن الكبوريا وطاق له ذاك البنطلون اللي يدخل معه خمستن زيه وباقي له حبه وينفصخ! وذيك الفنيله اللي مشخمطن عليها بالانقليزي تقل جدار حمام مسجد ولا تسأل عن الالوان الفسفوريه في اللبس من ربطات وقلايد وغيرها ..فلا تظلمه وتقول انه مهوب مملوح !!

-اذا شفت واحد ابيضاني ونعومه والدلع يقطر منه تقطر مثل العسل (ودك تجيب الغضاره وتخلي هالدلع يقطر فيها عشان اشربه بعدين واصير مملوح زيه) و الشعر مفرود وملمع بالجل ماغير ينسفه بيده شوي يسار وشوي يمين ياقلبيـــــــــيـه..! ولابسن له جنز ضييييييييق مثل جنز شكيره اللي تقعد ساعه على بال ماينلبس ..فلا احد يظلمه وتقول انه مهوب ولد !!

-اذا شفت احد شين وطاقن له صاع قبح من سوق الحمام والطيور ووجهه على طول مكشر ومعفط (كنه شامن له ريحه فطيس) وطاقن له بنت البكار ,,والثوب والشماغ والعيون بغبارهم من طلعة البر الاسبوع الماضيه ماغيرهم,, والزقاره ماتتعدى البرطم الايسر ,,والزبيريه متسحكة وخالصه مدخل فيها ربع رجله والباقي برا ..فلا تظلمه وتقول انه مهوب شقردي !

-اذا شفت بنت طاقه البرقع الى نصف الخد وفي روايه طاقه اللثام وحاطتن الكحل على هالعيون الزرق_بسبب العدسات- وكريم الاساس وتوابعه من المكياج المسمى بمكياج السوق على هاك الخد .. و العبايه المخصر الفرنسيه على الكتف ومعها وحده بنفس المواصفات نازلين من ليموزين كامري 2004 هندي -شعره مليان زيت خروع -عند عماير السيركون بالعليا..فلا تظلمونهم وتقولون انهم يبون الشباب يغازلونهم !!

- اذا شفت بنت -بنفس المواصفات اعلاه-راكبه مع السواق الاندونيسي بقراطيسه في فورد كرفان اخضر موديل 2004 ومعها جوال ابو كمرا مشتريه لها واحد من الامارات ..والجوال مايتعدى اذنها وقاعده كل شوي تهتز من الضحك وانت كل ماوقفتكم اشاره في التخصصي تاشر لها وتتميلح عندها ولا عطتك وجه ولا عبرتك فلا تظلمها وتقول انها قاعده تكلم خويها!!

[ALIGN=CENTER]شعر من قريحتى
تنتظر الدعم والتشجيع من عندكم

كم كنت اتعطش ياجحيحة للقائكي
وقيـل لي انك في الحمـام تتجملي
عصافير بطني لم تتحمل كلماتهمو
ونزل على قلبي شخرخير الضفادعي
فقلت ياقدمي خذيني بسرعتن لجحيحتي
حـتى ولـو مع مواسـير البلاعتي
قالت قدمي في غضبن اها بس!
مالقيت الا مع البـلاعتي يالمخيسي [/ALIGN]