رحلة سياحية في عالم الناس 2 - نادي الهلال السعودي - شبكة الزعيم

ابوسليمان · #1 18/09/2003, 07:29 PM

[ALIGN=CENTER]
السلام عليكم ورحمة الله وبركاته
نرجع لكم في الحلقة الثانية من هذه الرحلة

رحلات برية

============

اذكر يوم من الأيام ذهبت انا والأخ رمضان الجميل (( الله يرحمه ويغفر له ))
للرياض وتعزبنا عند ابو فواز (( عبدالله الدعيع )) الله يذكره بالخير
سيروا على عبدالله شله من أهل الرياض
ولزموا على العشاء ,, رفضنا بادي الأمر ، بس قاموا يحلفون ويلزمون
وافق ابو فواز وقالوا بالثمامه نبيه بالمخيم
من المغرب انا ورمضان جاهزين للروحه مانبي نتاخر على الربع
جاء عبدالله وغير ملابسه وعقب صلاة العشاء وماسكين الدايري
وصلن للمخيم على الوصف ,, زينا ميلت العقال @@ لاعندهم خيمة
10 × 5 والماطور يلجلج ونصوت يالربع ياولد
به سياراة وبه الله يكرمكم نعولهم قلنا مايسمعن خل نقلط عند الباب
ونصوت !!!بس ما حولنا أحد
قال ابو فواز ادخلوا يجون الحين ’’
دخلنا ولا اربع متقابلين يلعبون بلوت
والخامس ماسك قير البلاس والمركا وراء ظهره ,,
السلام عليكم
هلا
قال الي به دم اجلسوا الحين يجيكم فلان
ونتطالع انا وربعي
وش بهم ماقاموا يسلمون !!!
جلسنا حول المشب ,, بس ماعلى النار أدلال !!
قلت لرمضان ,, أخاف غلطانين هذه خيمة عوايل !!
لأن الي دخلنا عليهم لبسين بناطلين والشعر مغطي شنق وجيههم
جاب الله الهندي لابيده ثلاجة شاهي
ويصب لنا ،، تقهوينا
وهذولاك على جلستهم ،، الله العالم ماحد يشتري
مانسمع لهم صوت ‘‘ أخبر البلووووووت حلاته
الصجه ’’ بس هذولاء الله العالم مركبين كاتم
والماخوذ ابو قير ملقينا قفاه ويبربس

جاء خوينا السلام
عليكم السلام
لابس بدله
وراكم مالبستوا تكميله !!!!
تكميله !!! الحين ملزم على العشاء !! وتكميله
الي ماطار طيره
راح ساعة وساعتين ومغير ثلاجة الشاهي !! لا وجب لنا مكسرات
حسبي الله عليه !! نفخ بطونا
ويقوم يجرجرنا
اربط ثوب خل نلعب كره
وانا تسبدي حايمه
قاموا اهل البلوت مع راعي القير ومع المعزب وكم واحد
يلعبون
وتركونا
ابوفواز الله يذكره بالخير ’’ كنه الحين
صوت للهندي وقام يسولف لنا
قال اغديه اشوى من ربعه

جت الساعة 12
جانا النوم وراح وحنا نحتري عشاهم
المراد جبوا العشاء
تفضلوا
ويقمزون المؤدبين
من الأدب عندي قلت قلطه ثانيه
قال يارجال ماهنا قلطه غير هذه
الله يجيركم يوم اقبلنا على العشاء
لا والله رز فوقه 3 دجاج وشطه
اويلي!!!
وكل شوي وش رايكم بالمندي
عندنا درام مندي

ياعبيد !!!

$$$$$$$$$$$$$$$$$$$
والثانية
لي خال كبير بالعمر فوق الستين
وبدوي ماشاف من الديار غير حايل
وباقي وقته بالبر مع حلاله
سيرة عليه وقلت يا يبه ماودك تخاوينن
قال وين ؟
قلت قريب ,, للأردن ولسورياء
الربيع واجد
ماوافق بس اقنعته
وطلعت له جواز
ومسكنا طريق العلا ـ تبوك
لين الحدود بين الأردن وسوريا
درعا
دخلت أخلص جوازاتنا
الله يجيركم اثري جاه اللي معلق دلته بظهره
ويحقن الشايب القهوه الي مخرعه بسكر
اقبلت عليه
قال خلصت ؟
قلت الله الله
أعطيت المقهوي فلوس
قال المقهوي
باقي
وزدته
قال خالي الله يسلمه
وشنوح عطيته قروش
قلت هذا رزقه
قال والعجب يطير من عيونه
قهوتهم بفلوس
قلت ايه بس امش
قال الحين احسبه مضيفننا
ومن زين القهوه اللي به سكر
والله ياوليدي ماطبه الهيل

وتمشينا واستانس
وقال قصيده ما أعرف منه الا مطلعه
يقول
سارح القلب سارح مع سمير المسارح
000000000000ليتها من عربنا ليتها شمريه

88888888888888888888888

الثالثة
طالع انا وزميلي من الإمرات
(( زميلي هو الدوسري من فضل الله صداقتنا من الدراسة
في الأبتدائية الى الأن )
وناوين الكويت
به واحد من زملائنا مطيري بالكويت ولزم علينا نسير عليه
مسكنا طريق سلوى - الحساء - الدمام - ابو حدرية
السفانية
بين ابو حدرية والسفانية استهلت السماء
واعطتنا بأزرق الماء
مطر وبارقه واقف بالسماء
وكل ما قربنا للخفجي تزود
وقفنا نرتاح قبل الخفي 60 ك تقريبآ
عند محطة البانزين الثانية
جلسنا بالقوه ،،، شاهي وسوالف ونتفرج على المطر
قلنا لين تهدى ونتوكل على الله
شوين وجاء واحد من بنيخي (جماعة ) الدوسري
لا لهم مخيم مع ربعه
والرجال لزم علينا وحلف مانروح بالمطر
قال الصباح رباح ,, الحين امرحوا وعينوا خير
روحنا معه للمخيم
قلطنا لبه شباب من خوياه
لاوالله حنا متلطمين والدوسري بلا لطمه يروع
وشلون وهو متلطم
تروعوا !! ياحليلهم وراحوا للخيمه الثانية
بسلامتهم
به قهوه أقول للمعزب
راسي صدع يبي القهوه
قام يضحك
وش بك
قال تعال اوريك
قمنا معه
ودنا لخيمه ثانية يسمونه مطبخ
ويوم دخلت لا والله بنده ماهي مطبخ
حتى التونه الحاره جايبينه معهم
وماكرونيا ... قال تبي كبتشينوا!!!
قلت عزوتي
وش اللي جابكم للبر
تلفزيون وفديو ومسجل وبلاستيشن
البيت أبرك لكم
وطلعنا وأشوف هاك الصندقه بين الخيام
وقلت هذه غرفت الماطور
قام يضحك
قال هذا التواليت (( الله يكرمكم ))
ياحيي تواليت عقب ماهو حمام وبالبر
قلت معكم عوايل
قال لا لنا
قلت الله يوسعه لكم
رجعنا لخيمتنا الأول
و أشوفهم فاصلين هالخيمه بستاره
والله انه احلا من ثوبي!!!
وانا ادخل راسي ابي اشوف من الشفايه
وأتريه غرفت النووووووووم
ياحياتي ياسوسو
قلت بخاطري خل ادور ازين الفرش وابي انام به
ويوم دخلت لاالنور الأحمر والدوشق طبي
والبطانيه غاطين والمخاد ريش وكل واحد حاط جنبه
كرتون وفوقه منشفه وصاف
معجون اسنان
فرشات
صابون لكس
عطر
قلت للخوي الدوسري
خل نمرح بفرشهم ,,,
ونمنا && وبنا عاده زينه
لاحسينا بالدفى طلعت السمفونيات هههههههههه
قمنا الصبح مع الطيور
وندور شي دافي نشربه
دخلت المطبخ لا والله تقل عزبة هنود
متنثرين الله يجيركم بالمطبخ وكل اثنين بفروه
والله ونضبط الشاهي
ونروح للديحاني بالكويت
يوم غسل تسبودنا هو وربعه
دلال وعلم أرجال

===================

والله السوالف واجد بس خلو بعضه بالجاي ان شاءالله

وبأختم الموضوع بالقصيدة لرمز من رموز أجدادنا
محمد بن فهيد من عتيبة (( الله يرحمه ))

يازيد أنا ودي تسوي سواتي
00000 هذه سواة معرب الجد يازيد
يازيد لمرو هل الموجفاتي
00000 أقحص لهم عجل بالاوماي يازيد
يازيد أنا يابوك لذة حياتي
00000 شوف النشامى لا لفونا تقل عيد
كلن عرفنا حضرها والبداتي
00000 من كثر مامروا أحدور ومسانيد
أول نباشرهم بزود تهلاتي
00000 ومبهرات في يدين الأواليد
والشطة أقفت مثل فصخ العباتي
00000 وساحة خواطرهم بكثر التناشيد
عقبه أصحون معتبينه ملاتي
0000 وحيل سمان وله من السمن تزويد[/ALIGN]

البارق · #2 19/09/2003, 02:21 AM

[ALIGN=CENTER]هلا وغلا بك .. ومليون مسهلا بأبو سليمان ..

ذكرتي بزمان أول أيامكنت عميد المنتديات ;)

..

وش هالنشاط والحيوية ما شاء الله .. شكلك أنت اللي سارق كبدة الحاشي اللي يدورها جاج

..

كني أشوفك قدامي يا ابو سليمان وأنت تكتب هالموضوع .. العقال ما رده إلا الأذن تحلف إنك بالنفود

نجي للموضوع ..

## الموقف الأول ..

إقتباس


	ابوفواز الله يذكره بالخير ’’ كنه الحين صوت للهندي وقام يسولف لنا قال اغديه اشوى من ربعه

وأنا ما شفتهم ..صادق والله ابو فواز

..

إقتباس


	لا والله رز فوقه 3 دجاج وشطه اويلي!!!

يمكن الجود من ( الماجود )..

## الموقف الثاني ..

إقتباس


	والثانية لي خال كبير بالعمر فوق الستين وبدوي ماشاف من الديار غير حايل وباقي وقته بالبر مع حلاله

الله يطول بعمره ..
بس ليش ما عزمته توريــه البحر ..

إقتباس


	قلت قريب ,, للأدرن ولسورياء الربيع واجد

أجل الربيع واجد ..

أجل ليش ما أخذ حلاله معه هناك ماهوب أزين للحلال .. على الأقل المرعى متوفر

..

إقتباس


	وشنوح عطيته قروش

للي ما معه لغة : وشنوح يعني ليش

..

أجل ما توقع إن القهوة بفلوس ..

صدق والله المثل اللي يقول : على نياتكم ترزقون .. أو بالعامي .. النية مطية ..

وكذلك كلن يرى الناس بعين طبعة ..

فاللي طبعه طبع زين يحسب الناس كلهم كذا .. والعكس صحيح

..

فهو مع علومة وحياته ما توقع (( مجرد توقع )) إن القهوة بفلوس ..!! وكذلك استعاب خلوها من الهيل .. يا بعد حيي والله الحايلاوي ..

أذكر قصة مشابهة .. وهي إن واحد مثل هالحالة .. ما عمره شاف مكان فيه (( بقالة )) أو محلات !!.. ما يتقضى الا من اللي يبسطون بديره حولهم ما ادري بكم كيلو ( سوق جمعة أو خميس.. )

المهم الرجال (( شاااايب )) ولا طلع لا بطاقة ولا شيء .. أشار عليه بعض الشباب المتعلمين إنه يروح يطلع بطاقة أحوال (( لأنه ناوي يعرس من برا

)) المهم راح وقدم وصارت معاملته فيالرياض ولازم يروح لها بنفسه ..

راح الرجال للرياض .. أذكر إنه يعلمنا بسالفته .. ويقول (( تصدقون إن بالرياض الماء بقروش

)) وهو زعلان .. طبعا يقصد موية الصحة .. أثر الجال لاقي له واحد واخذ منه ماء وكان يبي يمشي

..

## الموقف الثالث ...

إقتباس


	تروعوا !! ياحليلهم وراحوا للخيمه الثانية

يا اخوي اكيد بيتروعون .. وش هو له متلطم ..؟؟؟؟

إقتباس


	ودنا لخيمه ثانية يسمونه مطبخ ويوم دخلت لا والله بنده ماهي مطبخ حتى التونه الحاره جايبينه معهم وماكرونيا

يا اخي ناس تبي تربط بين الحاضر والماضي

إقتباس


	قلت عزوتي وش اللي جابكم للبر تلفزيون وفديو ومسجل وبلاستيشن البيت أبرك لكم

يا اخي ما فيها شيء .. ناس يحبون الترفيه حتى وهم بالبر ..!!

وإلا لازم الواحد تشقق يديه ووجهه يصير كله ( مشق

) عشان يقولون طالع للبر ..

إقتباس


	قام يضحك قال هذا التواليت (( الله يكرمكم )) ياحيي تواليت عقب ماهو حمام وبالبر

وش فيها

..
ترى ماهوب لازم الواحد ( ينلعن أبو خامسه ) عشان يصير طالع للبر ..

طيب اللي ما يعرف للبر .. وش يسوي يقعد بالبيت ..!! لا شوي شوي حتى يتعلم

..

إقتباس


	و أشوفهم فاصلين هالخيمه بستاره والله انه احلا من ثوبي!!!

الله يرج شيطانك..

إقتباس


	قمنا الصبح مع الطيور وندور شي دافي نشربه دخلت المطبخ لا والله تقل عزبة هنود متنثرين الله يجيركم بالمطبخ وكل اثنين بفروه

الحين إلى فرشهم آخذينها .. لا والشباب راعين عطور وانتم عطرتوها

ولا تبيهم ينحاشون للمطبخ

..

<---- شكلي أبنجلد من الرد هذا

..

[HR]

أخيرا اختتمها بهذه الأبيات التي أوردت :

يازيد أنا ودي تسوي سواتي
00000 هذه سواة معرب الجد يازيد
يازيد لمرو هل الموجفاتي
00000 أقحص لهم عجل بالاوماي يازيد
يازيد أنا يابوك لذة حياتي
00000 شوف النشامى لا لفونا تقل عيد
كلن عرفنا حضرها والبداتي
00000 من كثر مامروا أحدور ومسانيد
أول نباشرهم بزود تهلاتي
00000 ومبهرات في يدين الأواليد
والشطة أقفت مثل فصخ العباتي
00000 وساحة خواطرهم بكثر التناشيد
عقبه أصحون معتبينه ملاتي
0000 وحيل سمان وله من السمن تزويد

الله يغفر له ويرحمه ، وجميع المسليمن ، نعم هذه الرجولة الحقيقية .. وهذا اللي تلفيه صدق

..

بس عاد بدون إسراف أو تبذير ..

ألف شكر لك يا ابو سليمان على هالموضوع .. والله الله من هالمواضيع يالغالي ..

وتقبل تحياتي ،،،[/ALIGN]

الفيروسه الزرقاء · #3 19/09/2003, 10:28 AM

[ALIGN=CENTER]

إقتباس


	السلام عليكم ورحمة الله وبركاته

وعليكم السلام ورحمة الله وبركاته

إقتباس


	جاء عبدالله وغير ملابسه وعقب صلاة العشاء وماسكين الدايري

اخبره الدائري

إقتباس


	تفضلوا ويقمزون المؤدبين من الأدب عندي قلت قلطه ثانيه قال يارجال ماهنا قلطه غير هذه الله يجيركم يوم اقبلنا على العشاء لا والله رز فوقه 3 دجاج وشطه اويلي!!! وكل شوي وش رايكم بالمندي عندنا درام مندي

احمد ربك ياخي ... لو اني منهم كان جبت لكم مشويات وإلا اي شيء من الوجبات السريعة لانكم في برا ... مو في استراحه

إقتباس


	لي خال كبير بالعمر فوق الستين وبدوي ماشاف من الديار غير حايل وباقي وقته بالبر مع حلاله

الله يخليه لك ويطول لك في عمره

إقتباس


	ودنا لخيمه ثانية يسمونه مطبخ ويوم دخلت لا والله بنده ماهي مطبخ حتى التونه الحاره جايبينه معهم وماكرونيا ... قال تبي كبتشينوا!!! قلت عزوتي وش اللي جابكم للبر تلفزيون وفديو ومسجل وبلاستيشن البيت أبرك لكم

كانهم احنا لاطلعنا للبر .... بس احنا عوايل

اقول ابو سليمان .... شلون يسوون رغوة الكابتشينو لازم بالخلاط

==>> كلن على همه سرا وانا على همي سريت

إقتباس


	ياحياتي ياسوسو

منهي سوسو

إقتباس


	ويوم دخلت لاالنور الأحمر والدوشق طبي والبطانيه غاطين والمخاد ريش وكل واحد حاط جنبه كرتون وفوقه منشفه وصاف معجون اسنان فرشات صابون لكس عطر

اخس اخس والله حركاااااااات ... من قدددكم

إقتباس


	والله السوالف واجد بس خلو بعضه بالجاي ان شاءالله

وانا اختك سولف علينا .... ترى ماورانا شيء

إقتباس


	وبأختم الموضوع بالقصيدة لرمز من رموز أجدادنا محمد بن فهيد من عتيبة (( الله يرحمه ))

الله يغفر له ويرحمه ويدخل فسيح جناته

على العموم يامال العافيه اخوي على هالموضوع الرائع ... صحيح ان اغلب الكلمات ماقدرت افهمها بس مو مشكله

تحياتي لك ،،،

اختك / الفيروسه [/ALIGN]

abu_riman · #4 19/09/2003, 02:32 PM

يا مال العافية ..

تصدق ابو سليمان طول الموضوع و انا اتذكر آخر مرة كشت فيها أنا ماخذ معي فرشة أسنان ؟؟

الموضوع زين و ازين منه القصيدة الله يزين معاني راعيه ..

الأزرق العالي · #5 19/09/2003, 03:21 PM

[ALIGN=CENTER]

إقتباس


	السلام عليكم ورحمة الله وبركاته

[/ALIGN]

[ALIGN=CENTER]و عليكم السلام و رحمة الله و بركاته ..

[/ALIGN]

[ALIGN=CENTER]

إقتباس


	اذكر يوم من الأيام ذهبت انا والأخ رمضان الجميل (( الله يرحمه ويغفر له )) للرياض وتعزبنا عند ابو فواز (( عبدالله الدعيع )) الله يذكره بالخير

[/ALIGN]

[ALIGN=CENTER]بداية .. أقول : رحمك الله يا ((رمضان الجميل)) .. و الله يذكرك بالخير يا ((عبدالله الدعيع)) ..[/ALIGN]

[ALIGN=CENTER]هالحين وش عرّف الأعضاء بـ((تعزبنا)) ..؟!!

يعني ممكن مأخوذة من ((العزوبية)) .. << وش رايك يالبارق ..!!

قل ((نهجنا)) لأبو فواز ..!! << عز الله اللي عرفت أشرح ..!!

[/ALIGN]

[ALIGN=CENTER]

إقتباس


	ميلت العقال

[/ALIGN]

[ALIGN=CENTER]هذي ما يحتاج ..!!

[/ALIGN]

[ALIGN=CENTER]ما سمعت بالشعار:

((حايل .. و العقال مايل))..؟!!

[/ALIGN]

[ALIGN=CENTER]

إقتباس


	به سياراة وبه الله يكرمكم نعولهم

[/ALIGN]

[ALIGN=CENTER]و في ((رواية أخرى)): فيه ..!!

[/ALIGN]

[ALIGN=CENTER]

إقتباس


	قال الي به دم اجلسوا الحين يجيكم فلان

[/ALIGN]

[ALIGN=CENTER]يعني هذا أحسنهم ..!!

لا ((به رجاء)) ..!!

[/ALIGN]

[ALIGN=CENTER]

إقتباس


	جلسنا حول المشب ,, بس ماعلى النار أدلال !!

[/ALIGN]

[ALIGN=CENTER]المكتوب باين من عنوانه ..!!

من يوم دريت إنهم ما قاموا يسلمون .. و أنا ((غاسل يدي)) ..!!

[/ALIGN]

[ALIGN=CENTER]

إقتباس


	لأن الي دخلنا عليهم لبسين بناطلين والشعر مغطي شنق وجيههم

[/ALIGN]

[ALIGN=CENTER]

[/ALIGN]

[ALIGN=CENTER]أما ((شنق)) ..!!

طلع ((غباااار)) مع هالكلمة يا ((أبو سليمان)) ..!!

ملاحظة:

((شنق)) تعني ((ناحية

)) باللغة ((الشمالية)) ..!!

[/ALIGN]

[ALIGN=CENTER]

إقتباس


	والماخوذ ابو قير ملقينا قفاه ويبربس

[/ALIGN]

[ALIGN=CENTER]

[/ALIGN]

[ALIGN=CENTER]حلوة الماخوذ ..!!

الماخوذ يعني ((المدعو)) ..!! <<< صاير مترجم اليوم ..!!

[/ALIGN]

[ALIGN=CENTER]

إقتباس


	وراكم مالبستوا تكميله !!!! تكميله !!! الحين ملزم على العشاء !! وتكميله

[/ALIGN]

[ALIGN=CENTER]مالكم حق ..!!

كان ملبسين أبو فواز ((فنيلة الحراسة الرمادية))..!!

[/ALIGN]

[ALIGN=CENTER]

إقتباس


	الي ماطار طيره

[/ALIGN]

[ALIGN=CENTER]تعبير عن الإستياء ..!!

[/ALIGN]

[ALIGN=CENTER]

إقتباس


	من الأدب عندي قلت قلطه ثانيه قال يارجال ماهنا قلطه غير هذه

[/ALIGN]

[ALIGN=CENTER]أدب عند هالأشكال ..؟!!

يا رجال الحق على ((المفاطيح)) ..!!

[/ALIGN]

[ALIGN=CENTER]

إقتباس


	لا والله رز فوقه 3 دجاج وشطه

[/ALIGN]

[ALIGN=CENTER]شفت الكرم ..؟!!

حاطين ((شطة )).!!

*****[/ALIGN]

[ALIGN=CENTER]

إقتباس


	لي خال كبير بالعمر فوق الستين

[/ALIGN]

[ALIGN=CENTER]الله يخليه لكم ..

[/ALIGN]

[ALIGN=CENTER]

إقتباس


	الربيع واجد

[/ALIGN]

[ALIGN=CENTER]الربيع ..؟!!

[/ALIGN]

[ALIGN=CENTER]

إقتباس


	وشنوح عطيته قروش

[/ALIGN]

[ALIGN=CENTER]يعني ((ماذا دهاك)) ..؟!!

[/ALIGN]

[ALIGN=CENTER]

إقتباس


	قال الحين احسبه مضيفننا ومن زين القهوه اللي به سكر والله ياوليدي ماطبه الهيل

[/ALIGN]

[ALIGN=CENTER]يعني هو و قهوته على باله ((دغيم الظلماوي))..؟!!

*****[/ALIGN]

[ALIGN=CENTER]

إقتباس


	لاوالله حنا متلطمين والدوسري بلا لطمه يروع وشلون وهو متلطم

[/ALIGN]

[ALIGN=CENTER]

[/ALIGN]

إقتباس


	[ALIGN=CENTER]و أشوفهم فاصلين هالخيمه بستاره والله انه احلا من ثوبي!!![/ALIGN]

[ALIGN=CENTER]

[/ALIGN]

[ALIGN=CENTER]الله يقطع بليسك ..!!

[/ALIGN]

[ALIGN=CENTER]

إقتباس


	وانا ادخل راسي ابي اشوف من الشفايه

[/ALIGN]

[ALIGN=CENTER]

[/ALIGN]

[ALIGN=CENTER]و الله إني مت من الضحك على هالكلمة ..!!

أجل ((شفايه)) ..؟!!

و الله إنك ((أصلي)) يا أبو سليمان ..!!

اذا ما ((تشفينا)) ما نرتاح ..!!

للمعلومية: ((الشفايه)) تعني ((الفضول)) ..!!

[/ALIGN]

[ALIGN=CENTER]

إقتباس


	لاحسينا بالدفى طلعت السمفونيات

[/ALIGN]

[ALIGN=CENTER]

[/ALIGN]

[ALIGN=CENTER]*****[/ALIGN]
[ALIGN=CENTER]

إقتباس


	والله السوالف واجد بس خلو بعضه بالجاي ان شاءالله

[/ALIGN]

[ALIGN=CENTER]ايه ..ننتظر((جزء ثالث))..

[/ALIGN]

[ALIGN=CENTER]

إقتباس


	وبأختم الموضوع بالقصيدة لرمز من رموز أجدادنا محمد بن فهيد من عتيبة (( الله يرحمه ))

[/ALIGN]

[ALIGN=CENTER]الله يرحمه ..

خوووووش قصيدة ..

ونستنا الله يونسك بالعافية يا ((أبو سليمان)) ..

تحياتي ..[/ALIGN]

ابوسليمان · #6 19/09/2003, 10:26 PM

[ALIGN=CENTER]هلا اخوي البارق

إقتباس


	شكلك أنت اللي سارق كبدة الحاشي اللي يدورها جاج

لايدري ابو الملاقيط

إقتباس


	العقال ما رده إلا الأذن تحلف إنك بالنفود

ههههههههههههههههه
ازين من الي لبسه للعقال مثل المصريين لا سوو نفسهم خليجيين

إقتباس


	يمكن الجود من ( الماجود )

مابه شك يالبارق
بس يومه يلزم وشوله
مجمع نصف الرياض على بنات المذن

إقتباس


	بس ليش ما عزمته توريــه البحر

لا ابشرك سوينا بحر بحايل
وسميناه بحيره

إقتباس


	أجل ليش ما أخذ حلاله معه هناك ماهوب أزين للحلال .. على الأقل المرعى متوفر

لا شرينا له كم راس هناك وقام يرعى بمعرفته

إقتباس


	أجل ما توقع إن القهوة بفلوس

يحسب انهم سمعوا بابن مهيد والا الضلماوي
بس ما بالخب احد

إقتباس


	أذكر قصة مشابهة .. وهي إن واحد مثل هالحالة .. ما عمره شاف مكان فيه (( بقالة )) أو محلات !!.. ما يتقضى الا من اللي يبسطون بديره حولهم ما ادري بكم كيلو ( سوق جمعة أو خميس.. ) المهم الرجال (( شاااايب )) ولا طلع لا بطاقة ولا شيء .. أشار عليه بعض الشباب المتعلمين إنه يروح يطلع بطاقة أحوال (( لأنه ناوي يعرس من برا )) المهم راح وقدم وصارت معاملته فيالرياض ولازم يروح لها بنفسه .. راح الرجال للرياض .. أذكر إنه يعلمنا بسالفته .. ويقول (( تصدقون إن بالرياض الماء بقروش )) وهو زعلان .. طبعا يقصد موية الصحة .. أثر الجال لاقي له واحد واخذ منه ماء وكان يبي يمشي ..

هههههههههههههههه
الله يرج عدوك يالبارق
هذا انت يوم عينوك بالرياض
وحطيته بظهر الشايب المسكين

ولي رجعه مع ردودكم[/ALIGN]

ابو الذهب · #7 19/09/2003, 10:52 PM

إقتباس


	دخلت أخلص جوازاتنا الله يجيركم اثري جاه اللي معلق دلته بظهره ويحقن الشايب القهوه الي مخرعه بسكر اقبلت عليه قال خلصت ؟ قلت الله الله أعطيت المقهوي فلوس قال المقهوي باقي وزدته قال خالي الله يسلمه وشنوح عطيته قروش قلت هذا رزقه قال والعجب يطير من عيونه قهوتهم بفلوس قلت ايه بس امش قال الحين احسبه مضيفننا ومن زين القهوه اللي به سكر والله ياوليدي ماطبه الهيل وتمشينا واستانس وقال قصيده ما أعرف منه الا مطلعه يقول سارح القلب سارح مع سمير المسارح 000000000000ليتها من عربنا ليتها شمريه

هلا ابو سليمان

ياحليل خالك اجل يحسبه مضايفكم

كخخخخخخخ ويبى قهوتنا اللى هو خابر مبهره بالهيل

بس والله ياابوسليمان انك ذكرتنا بايام راحت وخصوصا طلعات البر وسعت الصدر :sad:
يامال العافيه ياابوسليمان

ابوسليمان · #8 20/09/2003, 06:45 PM

[ALIGN=CENTER]هلابك يالزرقاء
وشاكر مرورك

هلا وغلا بابو ريمان

إقتباس


	الموضوع زين و ازين منه القصيدة الله يزين معاني راعيه

وحضورك زين الموضوع اكثر ياغالي

ولي رجعه بإذن الله[/ALIGN]

ابوسليمان · #9 20/09/2003, 09:08 PM

[ALIGN=CENTER]الأزرق العالي
هلابك يابعدي

إقتباس


	أما ((شنق)) ..!! طلع ((غباااار)) مع هالكلمة يا ((أبو سليمان)) ..!!

هب يالألماني

غبار!!!!!!! متى علمك به!!!!!!!!!

إقتباس


	صاير مترجم اليوم

مترجم :p
الله العالم انك من اللغف

وخذيت دوره بالرياض

وصرت تترجم

ابو الذهب

إقتباس


	يامال العافيه ياابوسليمان

الله يعافك ويسلمك
بس وين ابو الملاقيط

[/ALIGN]

الحاتمي · #10 20/09/2003, 10:02 PM

الـحـاتـمـي ........

مــر مـــن هـــنـــــا .....

ويـقـول : وسعت صدورنا بهالسوالف يابو سليمان ... نبي كل اسبوع ( ترشقنا ) بسالفة من

هالسوالف .....;)

ابوسليمان · #11 21/09/2003, 09:26 PM

ابوسليمان اقبل من هنا
ويقول ياهلابك يالحاتمي

J.A.J · #12 21/09/2003, 09:29 PM

إقتباس


	قلت لرمضان ,, أخاف غلطانين هذه خيمة عوايل !! لأن الي دخلنا عليهم لبسين بناطلين والشعر مغطي شنق وجيههم

[ALIGN=CENTER]أفــــــــــــــــــــــــــــــــا ... ياعيب الشوم ابوسليمان هيدول نسوان ولاءءء

[/ALIGN]

[ALIGN=CENTER]ويقمزون المؤدبين
من الأدب عندي قلت قلطه ثانيه
قال يارجال ماهنا قلطه غير هذه
الله يجيركم يوم اقبلنا على العشاء
لا والله رز فوقه 3 دجاج وشطه[/ALIGN]

[ALIGN=CENTER]ههههههه أي قلطة ثانية ياحبيبي ... مابعدها الا ... نواشف رجال

[/ALIGN]

إقتباس


	قلت قريب ,, للأردن ولسورياء الربيع واجد

[ALIGN=CENTER]أي نعم قريب ... كلها حذفت عـــصـــــــــــــــــا

[/ALIGN]

[ALIGN=CENTER]أما الربيع يابعدي ... طول الموسم ربيـــــــــــــــــع;)[/ALIGN]

إقتباس


	وبنا عاده زينه لاحسينا بالدفى طلعت السمفونيات هههههههههه

[ALIGN=CENTER]ههههههههههههه ... أحلى السمفونيات تراها ماتظهر الا بالبر والجو بـــــارد بعد;)[/ALIGN]

[ALIGN=CENTER]ههههههههههه ... ياليت من راح معك أنت وخالك ... لاهاك الربيع [/ALIGN]

[ALIGN=CENTER]بس بشرط بدون سمفونيات

[/ALIGN]

ابوسليمان · #13 23/09/2003, 11:59 AM

هههههههههههههههههه
ياسعد من هو جارك
اما نواشف كان علوووووووووووووووم
ياحبي للخشه يابو عبدالله
ياودي بك وملقاطك
نبي نغزي ربع حولك هههههههههه
اسمع انهم طايحين بالشاني هههههههههه

صدى الامس · #14 23/09/2003, 10:26 PM

هلا والله ابو سليمان ..

إقتباس


	لاعندهم خيمة 10 × 5 والماطور يلجلج

كل هالدنيا وبنات المذن تاليتها :sad: :sad:

إقتباس


	دخلنا ولا اربع متقابلين يلعبون بلوت والخامس ماسك قير البلاس والمركا وراء ظهره ,, السلام عليكم هلا قال الي به دم اجلسوا الحين يجيكم فلان ونتطالع انا وربعي وش بهم ماقاموا يسلمون !!! جلسنا حول المشب ,, بس ماعلى النار أدلال !!

اللي هذا أوله ينعاف تاليه يا بعدي

أجل محد كلف على عمره يقووووم يسلم

إقتباس


	ابوفواز الله يذكره بالخير ’’ كنه الحين صوت للهندي وقام يسولف لنا قال اغديه اشوى من ربعه

عاد تصدق أن بعض الهنوود أبرك من ربعنا ..
هذا هندي يشتغل عند واحد في المزرعة رجال كريم مثل وشروااك .. هالندي تطبع من طبع الرجال صار أول ما يجي أحد من سواقين جماعة عمه قام وعزمه [[ بس على قد حاله

]] وعزم كل الهنود اللي حولهم بالمزارع

.. [[ طبعاً فرق بينه وبين ربعنا .. بس شف وشلون تطبع بطبع عمه ]] ..

إقتباس


	ويوم دخلت لا والله بنده ماهي مطبخ حتى التونه الحاره جايبينه معهم وماكرونيا ... قال تبي كبتشينوا!!!

ههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههه
حسبي الله على عدوك يا ابو سليمان اجل بنده

إقتباس


	لاحسينا بالدفى طلعت السمفونيات هههههههههه

ههههههههههههههههههههههههههههههههههههههههههههههه
هههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههه
الله يرجك عدوك يا ابو سليمان ..

اجل سمفونيااااااااااااااااااااااااااااااااااااااااااات

تحياتي لك ابو سليمان ولا هنت كثر لنا من هالسوالف يا بعدي ;)

ابوسليمان · #15 24/09/2003, 04:46 PM

إقتباس


	صدى الامس هلا والله ابو سليمان ..

هلا وغلا بصدى

إقتباس


	عاد تصدق أن بعض الهنوود أبرك من ربعنا .. هذا هندي يشتغل عند واحد في المزرعة رجال كريم مثل وشروااك .. هالندي تطبع من طبع الرجال صار أول ما يجي أحد من سواقين جماعة عمه قام وعزمه [[ بس على قد حاله ]] وعزم كل الهنود اللي حولهم بالمزارع .. [[ طبعاً فرق بينه وبين ربعنا .. بس شف وشلون تطبع بطبع عمه ]] ..

غابته الغدوه فغاب معه اشياء جميله لنا

تحياتي ياغالي