اسمح لي اختلف معك أخوي الغالي أبو غالية ..
ربط انحدار اللاعب السعودي بتواجد اللاعب الأجنبي نغالط فيه أنفسنا ..
اللاعب السعودي انخفض مستواه من بداية الألفية .. صحيح طلع لنا بعض اللاعبين المواهب .. وفادهم الاتحكاك بأساطير التسعينات كثير .. مع توالي السنوات صار مستوى اللاعب السعودي من سيء إلى أسوأ ..
وهذا ماله علاقة نهائياً بتواجد الأجانب و لا له علاقة نهائياً بإعطاء اللاعب فرصة يلعب أساسي ..
اللاعب الموهوب لو هو بين عشرة أجانب و رديف الرديف يبي يطلع لا تشيل همه ..
المشكلة للأسف تعدت الرياضة .. المشكلة بالمجتمع ككل و بكافة المجالات ..
ماقبل عصر الانترنت كانت الناس فعلاً تمارس هوايتها الحقيقية بعيد عن الركض خلف الشهرة ..
اللي كان براسه كورة تلقاه مايلعب غير الكورة الليل و النهار ..
واللي براسه سيارات تلقاه مايطقطق إلا بهالسيارات ليل نهار ..
و كل شخص بمجاله .. وكل شخص معطي موهبته حقها بالممارسة و التعب و التطوير ..
مع تسليط الإعلام على اللاعبين بشكل خاص .. و ارتفاع العقود .. صارت الدعوى مطرسة وواسطات و حب خشوم ..
فصارت الأكاديميات و الفئات السنية مليانة مبزرة أقارب اللاعبين و أعضاء الشرف ومن يعز عليهم ..
بدون حتى تكلّف من إدارة النادي إنها تغرس كشافين مواهب بكل مدرسة و كل حي و كل دورة حواري ..
وتطلع لك جواهر و مواهب من ملاعب الإنجلية الصناعية و الملاعب الترابية و صغار بالسن ..
وشف كل لاعب تشوفه الحين يلعب بالمنتخب و إلا مشهور و أتحدى لو ماله قريب بأحد الأندية ..
وكأن الدعوة صارت توريث .. بحكم إن الكورة فيها ملايين و شهرة لا تستغرب يصير فيها فساد و سمسرة ..
اللاعب الأجنبي الموسم الماضي طوّر من مستوى الدوري و هذا اللي نبيه حنا ..
نبي دوري قوي .. و اللاعب الموهوب راح يطلع طال الزمن وإلا قصر ..
مع تنافسية الدوري و نديّته و وجود لاعبين أجانب بمستويات عالية .. راح ينعكس هالاحتكاك على اللاعب السعودي بالخير بإذن الله ..
و لو فكرت فيها هي نفس المعادلة ..
أنت تبي اللاعب السعودي يحترف برا علشان يحتك بلاعبين أفضل منه و ينافس لاعبين أفضل منه.. الآن هذا اللي حاصل ..
كأن الهلال فريق برازيلي أو أجنبي .. وفيه 3 محترفين سعوديين
وكأن النصر منتخب أفريقي .. وفيه 3 محترفين سعوديين ..
وقس عليها باقي الأندية ..
دوري الدرجة الأولى يرحب باللاعبين السعوديين الطموحين و المواهب ..
اعتبر دوري الدرجة الأولى هو الدوري السعودي السابق .. و هذا فرقهم تلعب بلاعبين سعوديين ومن يوم الدنيا دنيا و هم داجين ..
مختصر الكلام .. يوم إني كثرت الكلام
المشكلة مهب بالأجنبي .. المشكلة ماعندنا مواهب حقيقية ..
لأن الموهبة تبي تشوفها بعينك من أول مباراة و من أول لمسة .. تبي تشوف لاعب خارق للعادة ..
أما اللاعب اللي تحس إنه عنده لمسات بس يبي له وقت .. صدقني هذا عبدالعزيز الدوسري ثاني
.. لو تعطيه فرصة من هنا لعيد الضحية الجاي مهب منفجر ابداع ..
بالأخير ..
أحد يذكر أول مباراة للثنيان؟ .. أو مباراة للغشيان؟.. أول مباراة لسامي؟ .. أول مباراة للتمياط؟ .. أو مباراة للجمعان؟ .. أول مباراة للشلهوب؟ .. وغيرهم من أساطير الهلال ..
أذا فيه واحد بكم يذكر .. راح يفهم وش أنا قاعد أقول ..