الفرق الصغيرة مثل الفتح و غيرها لقمة عيشهم تعطيل المتصدر .. مهما كان المتصدر ..
المتصدر دايم يحط على راسه جائزة و مبلغ مالي للي يعطله ..
وعلشان هالشيء تلقى الفرق الصغيرة تلعب بروح و تشكيلة دفاعية و تضييع وقت ..
أهم شيء يتعادل أو يكسب بهدف من كورة مرتدة أو هفوة دفاعية ..
مثل هالمباريات هي مباريات لاعب الخبرة .. أما اللاعب المربوش اللي كل مامرّت دقيقة لخبط نفسه و لخبط أخوياه ..
دايم الشلهوب هو الحل .. لأنه لاعب من يوم هو صغير وهو أفضل لاعب هلالي ضد الفرق المتكتلة دفاعياً .. لاعب يمرر لك كور ذهب
مايسترو في الوسط ماشاء الله على أبو البندري ..
لكنه يختفي في المباريات المفتوحة واللي فيها جهد و ركض ومراكض بسبب العمر .. ويصلح في هالنوع من المباريات بآخر الدقايق
تواجد الشلهوب من بداية الشوط الثاني مطلب مهم قدام الفرق اللي مثل الفتح في المباريات الجاية ..
لأن مثل ماهو واضح .. الشلهوب براس ربشة و استهتار الفرج و نرفزة العابد و مطرسة باقي اللاعبين ..
ليو .. بيجلطني اللاعب .. واللي بيتسبب بأمراض مزمنة لي هو و الفرج ..
ما أدري كيف أوصف فشل هالصفقة .. فلا هو متحرّك ولا مقاتل .. و خوّاف لأبعد حد مستحيل يتداخل مع المدافعين على كورة ..
مابيك تسجل ياخي .. أبيك تحسسني إنك متحمّس و تقاتل لعيون الجمهور ..
خربين ما سجل اليوم بس دخل دخلات انتحارية تبين إن هاللاعب ماخدمه الحظ فقط .. و لا قصر ..
الفرج ماشفت شخص يعطّل الهجمة .. و يقتل طموخ اخوياه بهجمة مرتدة مثله ..
لاعب يمسك الكورة يلف على نفسه ثم يثبت الكورة و يدوّر واحد على الطرف علشان يرسل الكورة له طويلة ! .. تشافي مهب الفرج
مستحيل يلعب على اللمسة الوحدة و الون تو ..
عنده حركتين بس .. يرجعها للخلف أو يوزعها كورة طويلة من جهة لجهة .. طبعاً بعد ما كل الناس تدري وش بيسوي !
وعندكم المباريات الجاية .. شوفوا لعبه و احكموا .. مانيب قايل ارجعوا للمباراة .. ماحد له خلق يعيد المطرسة اللي صارت ..
ميليسي .. اليوم قدم مباراة حلوة .. تسليم و استلام صحيح .. وقتالية .. اللاعب بدت تغيّر قناعاتي فيه ..
مع إني مازلت أشوف مركزه يقدر يسده لاعب سعودي باقتدار ..
لكنه أفضل ممرر بالهلال حالياً .. لاعب يلعب السهل وبدقة عالية ..
ياسر .. بكل الأحوال أفضل من ليو .. لو أعطيه بطانية و مفرش و أقوله نم داخل الثمانطعش راح يسجل لي في كل مباراة يلعبها ..
الشهراني .. لاعب طايح مستواه .. بس وهو مستواه طايح أفضل من نص اللاعبين .. لاعب يبرد القلب .. لياقياً و دفاعياً ..
أما هجومياً .. الشهراني يحتاج لنقله للظهير الأيمن لأن خطورته و عرضيات أكبر كظهير أيمن ..
لأنه من نقل للجهة اليسرى فقد نصف خطورته الهجومية ..
إدواردو .. طاقة مهدرة .. لاعب يعتبر من أفضل اللاعبين اللي يلعبون خلف المهاجمين أو مهاجم ثاني ..
لاعب يدخل العمق و يسجل لك .. رأسيات و تسديدات .. و الأهم تمركز ..
يجي المدرب يحطه جناح .. !