اللي يتحمّل خساير الهلال أولاً و أخيراً اللاعبين ثم المدرّب ..
خالد شراحيلي على سبيل المثال .. أتحدّى واحد يرجع لجميع مباريات الهلال اللي خسر فيها ويشوف الأهداف اللي دخلت شلون ..
حارس مايصد إلا الكور اللي لو أحط برميل غاز و فاضي بعد كان صدها .. كل الكور اللي صدها كانت باتجاهه ..
أترك لك حريّة الإبحار في ذاكرتك بس هالموسم وشف كم هدف دخل بشكل غبي عليه .. كور سهلة لو أرجّع خالد الدايل يحرس صدها وهو بهالعمر ..
أما سلمان الفرج فقصّة ثانية .. من نجم الهلال الأول إلى ممطرس الهلال الأول .. استهبال بمنطقة المحور وتمريرات خطأ و استعراض في غير محلّه ضيّعت ملامح سلمان .. لاعب صار نقص .. ما أدري فيه تعليمات له بالاحتفاظ بالكورة والتنكيت في هالمنطقة .. لكن يازين عزيز و رادوي .. يقطع الكورة و يمرر بنص ثانية .. عارفين إن المحور مابه استلكاع ..
دونيس سبق وذكرت عنده قناعات توجع البطن .. بس مدرّب من أفضل مدربي الدوري عندنا .. مشكلته ابتلاه الله بلاعبين يحوقون شغله بأخطاء مايرتكبها واحد برابع/ج في دوري مدرسة .. و فرص بالكوم يضيعهن لاعبينه وكأنه محلوف عليهم مايسجلون ..
عبدالعزيز الدوسري, خالد شراحيلي هذولا منتهين .. و أنا ملّيت يطلع لاعب نص سنة يبدع و نصبر عليه لين يعتزل ننتظر يرجع لمستواه ..
ماراح يرجع اللاعب لمستواه .. لو بيرجع كان رجع ياسر اللي كان نجم آسيا الأول .. كان رجع معاذ اللي كان حريقة في خط الهجوم
مابالك بلاعب أبدع مباراتين يوم عمره 19 سنة وكلهن بالأولمبي .. خلاص مابه طب .. جرّب غيره .. عندك 30 لاعب ينتظرون فرصة و صغار بالسن .. والله أبرك أجرّب لي واحد منهم على إني أصبر على واحد خسّرني مباريات ..
جرّب الواكد كحارس مرمى .. الولد بطل و شفناه يوم يروح إعارة ..
جرّب السواط .. كلنا شفنا مستواه مع الأولمبي .. وشفنا لمساته ضد بايرن ميونخ وثقته بنفسه ..
جرّب الكعبي أساسي وهجوم .. لا تذبحه بالجناح .. الكعبي هدّاف و صغير بالسن و قابل للتطوير .. لا تعطيه الفرصة لاصار عمره 30