==شبــــــــاب السعوديــــة ==
بسم الله والصلاة والسلام على رسول الله ... اما بعد


بتحريض من بنات أفكاري وشباب أفكاري وخال أفكاري وعائلة أفكاري الكريمة يتشرفون بدعوتكم لتناول طعام العشاء <<<< لحد يصدق انه في عشاء .. هذا كمين لأستدراجكم لقراءة الموضوع!! ايش اسوي عجزت فيكم .. شعب يلهث خلف العشاء ..

ماعلينا..

موضوعي هذا كالعادة موضوع شيق وحساس ويمس شريحة كبيرة من شبابنا .. ويعتبر نتاج خبرة طويلة امضيتها في التنقل بين مكة-جدة والعودة في نفس الأتجاه ..

ويلقي الضوء على عدة أصناف وأطباق مختلفة من شباب السعودية التقيت بهم في أسفاري المتعددة وسنحت لي الفرصة للتعرف عليهم والتعامل معهم عن قرب << شايفين مايفجعو ..

فأهلا وسهلا بكم في هذه الجولة السياحية في ربوع شباب بلادي .. والتي استهلها بشباب مكة .. لانها ديرتي وأهلي .....Enjoy

- شباب مكة : معروفين بالمشاكل والمضاربات ..ومن شروط المضاربه لديهم أنه يكون لديك ساطور أو سكين .. وياويلك اذا دخلت حارة وعملت مشكله مع اي واحد منهم .. صدقني وقتها راح ينزل لك منتخب كاااامل زي منتخب نيجيريا كذا وعاد مااحرق عليكم الباقي .
بس للأمانة فهم شبااااب دمهم خفيف مبسوطين دائماً .. مايعترفو بكلمة مااقدر.. يعني لو قلت لاي واحد منهم هيا بنا نمرح .. يقولك اوف كوررس وفي رواية "قداااام"

ومفردهم مكاوي وجمع المذكر السالم مكاويين .. وعلى راي المثل "تيتي تيتي .. زي ماروحتي زي ما جيتي اكس فل كامل !!"

وفيه مثل اعجبني يقول "اذا معاك ساندوتشه .. لاتروح المطعم" << انتبه بعدين يدحكوووو عليك .

ومن العبارات الشائعة لديهم مثل .. "ودين صلاة امي" .. "ياواد سيب الهيامه" .. "استنا شويه دحينا اهرجوووو" " مكة حقنااااا"

ويا حبهم للفلسفه .. في كل شي عارفين ..وما فيه احد تسآله ويقولك ما اعرف.

اهتمامات البعض منهم منصبه على كرة القدم << مع انه ماادري فين يلعبوها كل الدنيا عندهما جبال.. الترفيع بدباب جي تي .. تشفيط غراء.. او احتساء كاس من الكالونيا.. وبعضهم لحبه للمنتجات الوطنية قام بإستخدام الخل او زيت الفرامل لزوم المزاج والروقااااااان .

نصحية مكاوية: لاتترك سيارتك مفتوحه اذا نزلت عند السوبر ماركت.. هذه النصيحة برعاية اسواق بن داود!!

- شباب الطائف : عاد انتو ترعرعت بينكم .. سهل التعرف عليهم بدون الحاجه إلى معامل مخبرية او تشريح .. راح تعرفهم من طريقة لبسهم للطاقيه ... من شروط اختيار الطاقية المناسبة أن يكون إرتفاعها 150سنتيمتر وعرضها 5 سنتيمتر .. لما تمشي بينهم تحس انك ماشي بين ناطحات سحاب مو بشر ويرتدون طواقي..

مشاء الله عليهم دائماً تجد فيهم النشاااط والحيويه لدرجة انهم مايناموا في الليل وعندهم شي واحد مشهووور الا وهو الحبوب ومن اشهر انواع الحبوب لديهم نوع يسمى (الشبح) حتى أن احد الشعراء تغزل في حبوب الشبح وانشد قائلاً :

بلادي بلادي بـلادي المـرح ...
وفيها حبوباً تسمى الشبح...
تلجلج تلجلج تجيب الفرح...


ويتصف شباب الطائف بأنه البعض منهم عدواني.. واذا مثلاً صادف انه عينك جات في عينه .. راح يتمدد صدره ويشمر عن ساعديه ويقولك : خير!! ايش فيك تطالع ؟؟

وعليهم محشاااااات رهيبه لاتفوتكم.. وكل كوم والسواقه عندهم كوم .. تحس انهم جالسين يلعبو (درايفر)
القيادة فن وذوق وأخلاق << لكن عندهم القيادة لا فن ولا ذوق ولا أخلاق ولا للمخدرات << وجع ايش ذا كله لاااا .. اجل كلكم راسبين !!

اهتمامات او احلام البعض منهم: تقضيم حبوب .. وبعدين تمسك معاهم على بلوووت سبحان الله يستفيدو منها في حاجه مفيدة!!.. والا لفلفه في الشوارع .. او التخرج من الثانوية العامة بتقدير جيد ويشتري دباب اربع كفرات ويشتغل عليه << ما الؤمهم نظراً لتدني سعر صرف الدولار مقابل (صرف عشرة ريال ياشباب)!!

او تشتري قراندي موديل 88 وتسدح خشمها بالارض وهاتك تلميع في الكفرات والصدام ..بزيت فرامل <<< من جد مستلجين !! ومن ثم التوجه الى منتزه الرداف ويجب أن يكون بحوزتك شريط لمزعل فرحان او فهد بن سعيد ويكون مسرررررع<<(ارجع وحط شده على حرف الراء).. وبكذا تكون حققت قانون طوني في علم السلطنه والطرب!!

نصيحة: إذا كنت مدرس في الطائف فخليك أخلاق واعطي درجات ..اشبها من جيبك والا والله تنجلد في الصرفه!!


شباب الحويه ( منطقة في الطائف)

يقال قديماً في المثل .. الحوية حبه لك وحبه ليه!!

يختلفواً اختلاف جذري عن شباب الطائف .. لما تسآل الواحد منهم انته من فين مايقول من الطائف .. لا على طول الحويه !! مشاء الله صارت مدينة ..

مواصفاتهم الشماغ يجب أن يكون على الكتف والطاقيه متقدمه ومغطيه على نص الجبهه .. والسجاره في يدك .. طبعاً لازم تمسك السجارة بحركة رومنسيه .. كآنك ماتبغاها !!

وسيارتهم معروفه يموتووو في الديدسون .. الجيب الشراع .. وابو صفيره.. كابرس موديل 80 وانته نازل .. واخيراً كامري على قول المثل (خذلك كامري .. وطيع أوامري )..

عقلية البعض منهم صعبه ..

تلبس نظارة شمسيه .. فأنت خكري

تلبس جزمه وانتو بكرامه فآنت خكري

تحط عطر .. يو ار فري فري فري خكري

تكلم بنات <<<< damn.. you're 5ekree

تسمع مصري والا غربي .. اعقب ياالخكري

تلبس غتره بيضاء .. خكري <<< مافيه خيارات !!

تشرب ميراندا.. شاني يعني ماتبغى البيبسي .. فآنت خكري مشاء الله مقسمين المشروبات خكري وغير خكري .... كحول وخالي من الكحول ..

مره كنا جالسين نلعب بلوت .. شويه كذا احس انه الوضع تغير لاحظت انه الحماس زاد فيهم والكل صار وده يشوت الثاني .. وانا زي الاهبل بينهم الاااا في الاخير اكتشفت انهم ماخذين ابيض (شبح) وجع ايش ذا وانا مش داري بس والله هذي نذاله ياشباب ولا حتى احد منهم عزم علي ..

مره كفشت واحد يتسمع على اغنية "يامصطفى .. يامصطفى" وعلى طول وانا مغمض بلغت عنه عند العيال .. وصارت فضيحه .. توبه توبه معاد اتعودها ياشباب !!

هواياتهم :

المتاجره بالابيض اذا فتشت بعضهم لازم تحصل لايقل عن شد ابيض !! - صيد الجرابيع - تحميل ركاب الطائف -الرياض ,, الطائف -جدة <<< ياويلكم اذا صار فيه ضرائب على إستخدام الطرق ... الاستماع الى بشير شنان و عزازي وكل العائلة الكريمه .. النظر يمين ويسار عند اشارات المرور في السيارات!!

نصيحة : عزيزي الآب عزيزتي الأم .. اذا لاحظتي انه شفايف ابنك جافه وعيونه مفرصعه .. وقلق و يبغى يسوي اي حاجه ويتكلم في مواضيع لاول مره يتكلم فيها .. ويشرب حاجات حلوه .. ويبتعد عن النعناع واللبن والآكل .. فاعلمي انه ابنك مستلج !!

اللهم احفظ شباب الحويه ..



ولكن برضه احبكم ياعيال الطايف..

شباب جــدة: اهلا وسهلاً .. بما أني عايش بينكم فما راح اوفيكم حقكم من الحش .. قصدي الحديث عنكم ..
منتشر بين البعض منهم الكذب بصورة كبيرة ومخيفه .. حدثني احد الزملاء قائلاً اسكت ياعاشق امس رقمت خمسة بنااااات وراء بعض !! قلت له : اجننت يا خدمي .. والله لو انك الحين في شيكاغو ماسويتها .. ابوووووك يا ريكي مارتن!!

وآخر جاءني مستنجداً : الحقني .. الحقني ياعااااشق << طبعاً انا كنت تعبان وقتها فأرسلت السواق يلحقه .. يقول شايف الجرح اللي في رقبتي قلت ياحرااااام من ايش هذا .. رد قائلاً وكله فخر وفي عينيه الخجل .. هذي وحده جالسه تبوووسني لحد ماطلع الدم !! اوووووف عندنا مصاصات دماء .. قاااال المشكله موووو هذي .. المشكله اني راح اقابل خويتي الثانية الان وراح تشوف آثار البوووووووووس .. شوف لي حل الله يستر عليك.. نظرت اليه وكلي استهتار واحتقار<< زي نظرت شارون لياسر عرفات كذا..وقلت : والله لو ماتنقلع عني وتروح تتروش قالك شوف لي حل .. اصلاً انته فيك دم حتى ينمص .. وانته رايح زي الشابوره كذا ..

وغيرها الكثير ..

ويجيد شباب جدة فن التعامل بلغة الأصابع ومن اشهر أنواع الاصابع لديهم اصابع الحشيش الغنية بالمعادن الطبيعية وكذلك اصابع يدي بس الى الأن مانزلت للأسواق بخليها مع العيد!!

ويشكل الحشيش احد اهم الجوانب الترفيهيه في حياتهم .. بالاضافة الى المشروبات الروحية << ياروحي ياشيخ !! مثل : البيبسي << ياكثر المدمنيين عليه .. البلاك .. البيره مع البندول << ياشباب خطيره جداً على الكبد لا احد يجربها رجاءاً .. العرق (سديكي بالفلبيني) << صناعه محليه ذات جوده عاليه وبسعر مغري .. وغيرها الكثير ..

كذلك الــgirlfriends .. لازم تكون مشبك بنات او تعرف بنات والا راح تعتبر شاب متخلف وعقليتك لا تتواكب وتتماشى مع متطلبات العصر والامم المتحدة..

وينتشر بينهم الخدم في كل بقعه في كل شبر في كل حفرة في كل شارع في كل شاليه ... وبعدين معاكم انتو في كل محل !!

و اذونااااااا الخدم بتقليعاتهم الغريبه .. زي اللي كاتب على سيارته Eminem او Nana <<< ليه انا اسم امي ماكتبته على سيارتي !!

وبالقوة يبغو يقلدو تكارين امريكا .. صار السلام عندهم whassup brother!! <<< وياالله لما يجي عندك ويقولك هيه .. تحس انه يتفل عليك !!

وفيه بعض الشباب حاط على صدره 10 كيلو سلاسل << على باله راح يطلع صداااام جيمس .. وبعضهم يلبس اقمصه عليها شعارات واحرف غريبه وهوا والله مو داري ايش معناها JBP -Jewish best people

اعوذ بالله من جد شباب مهدد بالانحراف


اما اهتماماتهم : لف سجاير – الفشخره الكذابه – الطفش .. كل مااجلس مع احد منهم قال طفشااااان – تشجيع الاتحاد – سرقة الايميلات– الكذب – المصلحه ... يعني اذا ماكان معاك فلوس .. والا ما عندك شقة خاصة فيك والا منته مستأجر كبينه فمحد راح يعطيك وجه – مطاردة البنات << اما ذي النقطة فهم مبدعين فيها عمى في شكلهم يشموا ريحة البنت مع السواق من على بعد 40 كيلومتر...


نصيحة : لاتذهب هذا المساء من البيت اذا فاز الاتحاد ... صدقني راح تكره حياتك !! فالخدم من كل حدب وصوب ..

شباب بحره : كل الترفية .. كل الإثارة .. كل الأكشن .. كل الأسلحة لدى شباب بحره <<< طيب ياشوتايم .

البعض منهم اذا طفش مره قام بعملية قنص لعيال الحارة بالرشاش .. وإذا كان مزكم ومريض يتسلا مع اهله بالرشاش في البيت ..

ولاحظت في الاونة الاخيرة انحراف بدرجة 360 حسب مقياس (روح اختار) في تصرف بعض الشباب اللي صاروا يستمعوا لاغاني مايكل .. "أبك .. ياويلي علااااااااااك يا ميكل بن جكسون" << الله يرحم اياااام عيسى الاحسائي وحجاب .

وحتى كبار السن عندهم مصرقعين ..مره جلست مع شايب مغمور وبدا يسرد علي مقتطفات من مغامراته وفروسيته في الماضي ..واللي قاهرني انه كل شويه يسب فينا ياشباب اليوم واثناء سرده لاحدى المغامرات الشيقه.. قمت بمقاطعته قائلاً : اخس ياجيمس بوند .. رد علي بغضب قائلاً : اعقب يابزر النيدووووو .. عوذه .. عوذه منكم يابزارين اليوم !!
ثم سألته ماهو رأيك ياعم في قيادة المرآه للسيارة ؟ في محاولة خبيثه مني لتهدأت الوضع ..لاني عارف انه راح يلعن ابو جدي .. عشان كذا قمت بالاستعانة بالعنصر النسائي في سؤالي..لزوم الإغراء .. ايش تعرفوا انتو !!
اجاب قائلاً : تخسي ثم تخسي ثم تعقب .. الحريم مالهن الا مطابخهن !! وبعدما حسيت انه الوضع تفجر قلت : ياعم ما كأنه العشاء تأخر؟؟ << ايوووووه خلك مؤدب ومالك ومال الخوض في السياسة..

نصيحة : اثناء تجولك في ربوع بحره خليك مؤدب وعلى وجهك علامات الحزن والآسى.. لانك لو ابتسمت راح يتم تفسير الابتسامة إلى ابتسامة غير مشروعة ..وهذي كارثة بحد ذاتها!!


شباب المدينة: مدري ليه شايفين نفسهم .. يتكلم شويه وبعدين يقول اناااا من المدينة ... على عيني وراسي من المدينة بس اعصابك !!
وعندهم قهوة مشهوره اسمها ابو .. والله نسيت .. المهم انها ابو حاجه لو ضربتك فيها لنسدحت صريعاً ..
ولكن صدقني راح تحب المدينة بغض النظر عن شبابها لانها مدينة الرسول صلى الله عليه وسلم ..

نصيحة : بطلووو غزل....

شباب ينبع : يوووووووووه بصراحه تخاف منهم .. فعندهم ثقافة شباب الطائف ومكة وجدة بالاضافة الى ثقافتهم الخاصة والتي تعتبر غريبه .. فإذا كنت ماشي على رجلك في ينبع << ( تلفها في خمسة دقائق !! ) فراح تجد انه الكل يضرب لك بوري هاه مشواااااار وانا مطنش واعمل نفسي اني ابكم !! ابغاهم يريحوني وينقلعوا ..

نصيحة : انته مهدد بالطفش والأنحرااااف .. واحسن حاجه اشتري بلاي ستيشن واجلس في البيت .. ولاتفكر تطلع مره!!

شباب الرياض : رأس مالهم الشماغ والعقال .. دائماً لابسينها .. مشاء الله عليهم مشخصين في كل وقت وفي كل مكان << صار نسكافيه!! .. تجدهم مشخصين عند الأكل .. عند النوم .. عند الحلاق ..عند الاشارة تكون الساعة..... هاهاااااااي ..
وبعضهم اذا شال الشماغ عن راسه راح تشوف جزر اندونيسيا في راسه<<< بالله بغينا تذكره ذهاب وعوده !!

واصحاب مصانع الاشمغة مستغلين مدى تعلق الشباب بالاشمغه وحبهم لها.. وكل شهر نازل شكل جديد .. مساكين الواحد ما يلحق يتهنى ويفرح بالشماغ اللي اشتراه ..

وعندهم قمة الترفيه والترويح عن النفس أنك تطلع القهوة مع اصحابك وتجلسون تتفرجون على الدش .. والمكيف شغال وابن امه يفتح فمه !!

لكن للأمانة ماعندهم لاحشيش ولا حبوب .. لانهم كذا بالفطره مرتفعين .. بس انته قول السعوديه فازت .. وتعال شوف الجنااااان .. والا قم بتمرير عبايه مخصره من عندهم يؤؤؤؤؤؤ ويش ذااااا الزين والحلااااا..

اهتماماتهم .. مشاهدة افلاااام التفحيط ... دخول الشات ثم كتابة عبارات غريبه زي (لؤؤؤؤؤؤؤؤؤؤؤل) << انا ودي اعرف ماهو موقع الهمزة من الاعراب في الكلمة السابقة ..سؤال عليه درجتين!!

التسجيل في المنتديات بأسماء معبره .. ( ضفدع مضيع نظارته,, ضب اطخم ,, دولاب المطبخ .... )

الترقيم وتطفيش البنات .. مطاردة الضبان وتعذيبها ..

نصيحه : لاتلعب معهم إورقه (بلوت) ماعندهم تفاهم .. شويه ويضربوني عشاني سرحت شويه عن اللعب ..هذا ظلم يا شباب !!.

شباب القصيم : بسهوله راح تجدهم وتتعرف عليهم من ملابس بعضهم .. قميص نوم وفوقه طاقيه .. والمشكله يطلع فيها ويروح كل محل .. المسجد , السوق , الملاهي , الماسنجر ..

وفيه بعضهم مرررره ماتقدر تاخذ وتعطي معاهم شايفين انفسهم .. ومره لاغين المنطقة الغربيه من قاموسهم !!
حجاااااازي وجع فجعتن !!

وتقول العرب قديماً قصمنجي .. على وزن افرنجي .. وكذلك قصمنجيه .. على وزن ملوخيه آسف كنت اقصد افرنجيه .. ايش اعمل جيعان !!

امنية: ودي اتعلم اللهجة القصمنجيه واتكبر على الشبااب !!

شباب الدمام : رهيبيين وتحف في نفس الوقت.. بس كرهونا في مطعم الطازج كل مره وعازمينا فيه .. ياشباب استحووو غيرو المطعم ..
وماعندهم سيره الا سوق الراااشد <<< ياشيخ الله يستر على شارع الحنان بينبع اللي كله هنود و3 من الفلبين وواحد سعودي << اللي هو انا مضيع !!

اهتماماتهم : يجيد البعض منهم التحدث باللغة الروسية والاوكرانية والاشتراكية وجميع دول الاتحاد السوفيتي السابقة بطلاقة << هذي والله اخرة التسدح في فنادق البحرين.

حسد شباب جدة بس ودي اعرف عليه ايش تحسدونا على الغجر والا الكورنيش والا الزحمة والا الحفر بالشوارع والا الخدم اللي عندنا .. احنا المفروض نحسدكم على الهدوء على الكورنيش على المطار اللي عندكم <<< انا مو ذابحني الا المطار ما ودك الا تنام على ارضية الصالات .. والا اجمع عيال الحارة واطلقهم في صالات المطار للعب الكورة بدل ما يكسروا سيارتنا ..

يعني الواحد في الدمام اذا عصى ربه وطلع بنت معاه .. محد يدري فيه بينه وبين نفسه لا من شاف ولا من دري ..وتحصله خايفه لا ينكشف .. لكن عندنا ينزل له اعلان في الجريدة ويتصل على اصحابه كلهم ويتلقى التهاني والتبريكات .. فرجاءاً ياشباب لاتحسدونا على تفاهات واشياء مافيها مجال للحسد .. وريحونا من كلمة ياحظكم ياشباب جدة!!

نصيحة: مافيه نصيحة ياشباب لانها مشفره مع باقة الاوائل.. ماعاد فيه شي ببلاااش !!



شباب الباحة : ونعم الشباب .. ولكن يلاحظ عليهم كثرة الحسد ونقل الكلام !!..
" سعييييييييد اظهر له كاااامري جديده وفيها بيجر ياخه <<< يقصد جرس السرعة!! واليوم الثاني المسكين سعيييد يسوي حادث بالكامري ويصدم في بيته!!"

واذا مثلا ً عطست فالخبر راح ينتشر في كل مكان والله فلان عطس ويمكن يطلعو عليك اشاعة انك مصاب بحمى الوادي المتفقع !!

نصيحه : في كلمة جميله لازم تستخدموها اذا شفتو اي حاجه اعجبتكم "مشاء الله تبارك الله"!!


شباب جيزان : ما ام خبر قماعه ؟؟ يعني (whassup yo) مدري كيف ابدا معاكم لكن دعوني احاول ...

عينات كثيره من شباب جيزان خاويتهم وعشت معاهم.. كنا اذا طلعنا نتعشاء سوا وبعد مانطلب ونأكل ونجي عند النقطة الحساسة الا وهي الحساب تعال شوف الاعذار .. والله نسيت ام محفظه !! والله مابش صرف !!

في بعضهم اعوذ بالله فيه لؤم وخبث ويبيع صاحبه عشان فلوس او عشان مصالحه..

وفيه فئه مشوهه صورة شباب جيزان بصورة كبيره لدرجة انه يسرق فلوس من محفظة صاحبه اللي ساكن معاه ..

هواياتهم : تخزززين قات .. يشاهد مباراة لازم قات .. جلسه وسهر وفيها ضحك لازم قات .. لعب ورقه لازم قات .. السفر لازم قااات.. تقابل ام بونيه لازم قات ..
من جد كيف نعيش بلا قات << زي دعاية "كيف نعيش .. بلا كابريس!!"

واللي شدني انه لديهم انواع مختلفه من القات مثل : القات الحرامي القات جي ال اكس - قات عيد العمال - قات العودة إلمدارس- قات الهكرز العربي - قات اعقلها وتوكل << لدعم الحملة الوطنية للتآمين !! - قات وفنيله علاقي وفوطه << صار فلم مصري !! القات مدري ايه انواع كثيره مشاء الله ..

والكثير منهم يعتبرو محترفين في لعبة "الكيرم" طلعوني من اول ماتش ..

ولكن بيظل فيه هناك شباب من جيزان فيهم الكرم والصدق والطيبه .. ولكن العينات السابقة بتغطي عليهم وتعطي صورة سيئه عن البقية..

نصحية: الوصول إلى هذه النصيحة غير مسموح به .. الرجاء منك أنك تأخذ لفه وتحط ملفك عندنا .. وهذا وجهي لواتصلنا عليك..

الخاتمة :

من الكلام السابق والاصناف المتعدده التي ذكرتها راح يتبادر للقارئ اني متعمد الإساءه لشباب بلدي .. ولكن أنا ذكرت بعض العينات والتصرفات التي لانستطيع أن ننكر وجودها في مجتمعنا, وقطعاً لم اعمم هذه التصرفات على بقية الشباب لتأكدي بأنه هناك الكثير من الشباب فيهم الاستقامة والصلاح وجميع الصفات الحسنه.. ولكن احياناً يتم الحكم على سائر الشباب بتصرف مجموعة بسيطه ترتكب الاخطاء ومن ثم يتم اصدار الحكم بأن شباب السعوديه فيهم وفيهم .. ولكن هذه هي طبيعة البشر .

فمثلاً لو جاءنا شخص من المريخ (مثلا) وكان محترم و متدين وكريم .. الخ من الصفات الحميدة .. وتعاملنا معه ولمسنا فيه هذه الصفات الحميدة .. بعدها راح تكون الفكرة لدينا والتي تكونت من خلال تعاملنا معه بأنه شباب المريخ فيهم الخير والصلاح ... لو تلاحظو انه احنا تعاملنا مع شخص واحد وما نعرف صفات البقية منهم ولكن اصدرنا الحكم عليهم بالصلاح بتصرف شخص واحد منهم..

اللي ابغى اقوله انه كل واحد منا دائماً في حياته وتعامله مع الاخرين بيكون سفير للمجتمع الذي ينتمي له .. فلو كل واحد منا احسن التعامل مع الآخرين و تمسك بدينه دائماً لاعطى صورة مشرفه لمنطقته والذي بدوره ينعكس على السعودية بشكل عام..

وسامحوني اذا اخطيت علاااااااكم

وسلامتكم منقول

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه هههههههههههههههههههههه
لي عوده مطوله يخرب بيتك انت وذا ...
اما ضب اطخم .......خخخاي