السلام عليكم
نخش في الموضوع على طول أنا أبي أفهم ليش إدارة الهلال ما تقدر جمهورها
ليش كل هالمرمطة! ما هو معناته انه عندك جمهور كبيييير معناته عادي تمرمطه و تنكد عليه لان في الاخير هدفك الاول والاخير تعبئة المدرجات بغض النظر كيف؟
تجربتي في الحصول على تذكرة مباراة العين في الامارات!
صراحة تمرمطت انا واللي معي وخربت سفرتنا في ملاحقة المديد وغيره!
يعني انا واصل لدبي قبل المباراة باربع ايام ومثل ما انتم عارفين الهلال بعادته السيئة يروح يشتري التذاكر كلها!
طبعا قبل اربع ايام كان ما احد يوزع تذاكر الا واحد خوي للامير عبدالله بن سعد اسمه ابو عبيد طبعا هذا ما كان معه الا ٤٠٠ تذكرة وذال ام العالم فيها ولا يعطي الا بشغل واسطات وضبطني اضبطك! ولا له مكان محدد ولا وقت محدد.
قبل المباراة بيوم ومع وصول بعثة الهلال رحت للعين وكان وقتها حصة تدريبية مغلقة في الملعب ودرت حوالي الملعب الى ان لقيت مجموعة هلاليين عند احد بوابات الملعب فجلست معهم وفجأة مر علينا فهد المديد وكنت اول من شافه وطالبناه بالتذاكر فقال ابشرو ولطعنا ساعة وبعدين طلع بعدد قليل ما يكفي نص الموجودين! ولم أخذ تذكرة
لم أيأس ذهبت الى الفندق وازعجناهم وهم يتعشون وطلع لنا فهد المفرج وقال اطلعو وبنجيب لكم
طلعنا برا ولطعونا قرابة ٣ ساعات الى ان جاءت التذاكر من فهد المديد ويوزع فقط تذكرة واحدة لكل شخص وفيه ناس ما خذت مع ذلك!
في هالمباراة الجايه (النهائى) الهلال يكرر عدم احترامه وتقديره للجماهير
- بقرار مجانية التذاكر
- توزيع التذاكر عند البوابات الساعة ٣:٣٠ بعد تفتيش العساكر (قصدهم ما يبون احد ياخذ تذكرة ولا يدخل الملعب)
طبعا هالقرار السيء بينتج عنه عدة عوامل سلبية:
- حضور عينة كبير من غير مشجعي الهلال (بعضهم جمهور مسيار، بعضهم يحب يحضر اي تجمعات زي كذا "لاسباب مختلفة")
هالعينة هي نفسها اللي عندما هزم الهلال مع
اولسان رددت
"العالمية صعبة قوية" فاتحداك تلقى هلالي حقيقي يردد هالعبارة، ممكن يقولها هلالي حديث العهد بالتشجيع ولا يعرف تاريخ الهلال وان الهلال سبق ان ترشح للعب كأس العالم وان عالمية النصر ترشيح!
- جمهور الهلال راح يضطر يجي بدري في عز الظهر لكي يساند فريقه وبهالطريقة اكيد راح يكون هناك زحمة وانتظار طويييل لدخول الملعب
بهالطريقة كيف تتوقع من الجمهور انه يساند الفريق طوال المباراة الى اخر دقيقة، وراح يكون مضغوط لانه عانى للحضور ولاقدر الله الهلال جاء عليه هدف او لم يسجل راح الجمهور يسكت وبعضهم راح يخرج مثل ما حدث في مباراة
ذوب اهان
والعصبية راح تزيد لانه تمرمط وفي الاخير ما فيه مستوى.
( المفترض انك تقعد وتساند فريق وتشجعه حتى لو خسر خاصة ان كان مقدم اداء جيد)
لكن ما تلوم جماهيرنا مع هالتعقيدات في الحضور!
الحلول
بالنسبة للمباريات الخارجية وبحكم ان هناك ناس راح يعانون سفر ومصاريف للحضور فهؤلاء الحل يكون هناك موقع بسيط او رابط يستقبل طلبات الحضور والحصول على تذكرة
طبعا يكون الادخال الاسم ورقم بطاقة الاحوال لتفادي حصول شخص على اكثر من تذكرة
قبل المباراة بثلاثة ايام يكون هناك شخص تابع لادارة الهلال يكون موجود (مثلا في فندق) ويكون متواجد في فترة زمنية محددة (مثلا من ٥ الى ٩ مساءاً) ومعلنه مسبقا باسبوع
تجيه الجماهير اللي ارسلت طلب وتبرز الهوية الوطنية السعودية وتستلم تذاكرها وطبعا ما تكون مجانية عشان الشخص اللي بيشتري يكون جاد في الحضور ولتفادي تخريب جمهور المسيار
بالنسبة للمباريات المحلية يتم بيع التذاكر بمبلغ اكثر من ٢٠ ريال لان هالمباريات عليها طلب كبير وفرصة ان الهلال يتربح منها ماديا فتكون التذكرة تقريبا ٦٠ ريال ويتم بيعها قبل المباراة باربع ايام
طبعا ايجابيات هالخطوة:
- مكسب للهلال ماديا
- عدم مرمطة الجمهور وتفادي الازدحام عند البوابات والتعب بالحضور مبكراً لان الجماهير بتكون خايفة تخلص التذاكر
- تفادي حضور جمهور المسيار لانك لو قلت له ب ٦٠ ريال بتروح لادارة الهلال ما راح يدفعها واللي بيدفعها منهم قلة قليلة جدا
- تشجيع منقطع النظير طوال احداث المباراة لان المشجع بيحضر من ٥ او ٦ بدلا من ١ او ٢ ظهرا وما زال في نشاطه
سلبيات الخطوة:
- ناس راح تقص تذاكر ولا راح تحضر هذي حلها بسيط بالتنسيق مع ادارة الملعب وصلة اذا شافو قبل المباراة بربع ساعة فيه مقاعد فاضية يتم ادخال جزء بسيط من الجماهير اللي ما عندها تذاكر لملاء المقاعد الشاغرة ومن ثم اغلاق البوابات
في الاخير توجد مشكلة وهي خارج اطار مسؤولية ادارة الهلال وهي دخول ناس بدون تذاكر وهذي دائما تصير فبعض الاحيان تجي قبل المباراة بساعة ولا يدخلونك لان المقاعد ممتلئة وانت معك تذكرة
نتمنى حل المشكلة
هذا اللي كان في البال والصراحة ادارة الهلال طفشوني في العين وعارف انهم بيطفشوني يوم السبت
وبودي اقول لادارة الهلال جماهيرية الزعيم نعمة فحافظوا عليها وقدروها ليس بالكلام ولكن بالفعل ملينا من كثرة الكلام وعدم وجود شيء في الواقع
نتمنى لما يجي شخص زي الامير الوليد بن طلال او الامير عبدالله بن سعد ويقول بشتري تذاكر قولوا له ما قصرت. خيرك واجد بس هالمباريات ما تحتاج تشتريها طول الله عمرك، خله يشتريها في المباريات اللي فيها قلة حضور في الدوري او في مراحل المجموعات في دوري ابطال آسيا
وشكرا لكم
26Likes
ادارة الهلال الفاشلة في توزيع التذاكر! ليش تمرمط جمهورك ولا تقدره؟ 
نبي نظام ترا فيه ناس عندها امراض وفيه اطفال ماله داعي تدافع واقتحام
الوضع العادي
