السلام عليكم ورحمة الله وبركاته ..
أولا أعرف كل شخص بيقول الكرة لا تعترف إلا بالأهداف وانا اتفق معك 100% . لكن نكون واقعيين الهلال كان افضل بمراحل وأضاع الكثير من الفرص وضغط على الفريق الاسترالي (ولاحظ المباراة كانت على أرض الفريق الخصم) وهذي ماتحصل دائما, أقصد من المتعارف عليه الفريق اذا لعب على ارض الخصم يكون متحفظ اكثر. وهنا ارجع واقول نعم الفريق الاسترالي سجل وفاز وهذا المطلوب بس اللي اقصده من كلامي أن الأفضلية للهلال راح تكون دافع ايجابي له ان شاء الله في الإياب وما تخلينا نتشائم بضياع اللقب.
استغرب من بعض الأعضاء للأسف يتذكرون سيناريو ذوبهان واوسلان وهذا قياس خاطئ. كل مباراة لها ظروفها وتختلف وكل موسم له ظروفه بس للأسف لانهم متشائمون مع احترامي لهم فيربطون تشاؤمهم بالخسائر وإلا أقدر اذكرهم ان الهلال اذا حضرت الروح وقبل كذا توفيق الله يضرب بقوة والدليل خمسة الاتحاد والسد و اربعة النصر العام الماضي وثلاثية العين السنه هذي , ولاننسى ان الاياب راح يكون في الاستاد اللي مساحته اكبر من ملعب سيدني
وممكن كبر مساحة الملعب يصب في مصلحة الهلال ويكشف عيوب الفريق الاسترالي.
شي ثاني ترى خسارة 0-1 ماهي نتيجة صعبه ومستحيلة حسستوني ان الهلال خسران في الذهاب اربعة والا خمسة . للعلم اندية كثيرة خسرت بالاربعة والخمسة ورجعت في الاياب ونذكر ميلان-ديبورتيفو لاكورونا في دوري الابطال 2003. الاتحاد اظن نهائي 2005 .
لا أحد يفهم أني أستهين بالفريق الاسترالي بالعكس الفريق الاسترالي ماوصل للنهائي عبث وفريق قوي ويملك نفس حظوظ الهلال للفوز باللقب لكن كلامنا مبني على مباراة الذهاب وشفنا كيف الهلال ضيع فرص بالجملة ومحققة, ويمكن يقول شخص ان الفريق الاسترالي سجل وفاز اقولك نعم سجل لكن ارجع للهدف تعرف انه محض صدفة وأنا أعتبره أنه هدية مجانية من دفاع الهلال والحمد لله على كل حال.
بخصوص المدرب واستغرب الحملة عليه وتحميله المسؤولية . بصراحه المدرب عمله جبار وتكتيكه ممتاز بس الفريق اذا خسر معروف تظهر العيوب وصدقوني لو فاز الهلال كان مدحناه ووصلناه للسماء . والا فريقه ما قصر لعب وضيع فرص كثيرة والا عمليا النتيجة ممكن تكون 2 او 3 للهلال . وما هو ذنبه انه يدخل مرمى الهلال هدف (ساذج بمعنى الكلمة) ببركات الدفاع الفاهي.
ماندري يمكن تكون هزيمة الذهاب خيرة للهلال في الإياب. أعني نسمع كثير ان صاحب الفرصتين يخسر وبصراحه شفناها على ارض الواقع, لان اللاعبين يدخلون الملعب وفي بالهم فرصتين ويكونون مريحين على أمل النتيجتين, لكن صاحب الفرصة الواحدة يدخل للفوز ولا غير الفوز ويكون هدفه واضح.
أعرف الكلام يطول وكلن يغني على ليلاه بس الأمور بإذن الله تسير في اتجاه الهلال بس علينا ننتظر ونتفائل ونعرف ونتأكد أنه ماراح يحصل غير اللي كاتبه الله لنا.
اللي اقوله بس الفريق مستواه ممتاز وراح يلعب على ارضه وبين جمهوره والنتيجة خسران 1 يعني في المتناول ان شاء الله اننا نعوض. وفوق هذا وقبل كل شي احنا متوكلين على رب العالمين وباذن الله مايخيب ظننا وتفاؤلنا لاننا متوكلين على الله.
خاتمة اخيرة: نعم بطولة مهمة ومباراة للتاريخ . بس لاتنسوا ترى كورة يعني لا نكبر الموضوع. لاني للأسف شفت حماس زايد من بعض الجماهير والله يهدينا واياهم نلتمس لهم العذر المباراة اعصاب بس مواضيع مثل نصلي الفجر عشان يفوز الهلال . احنا نصلي الفجر استجابة لأمر الله ورسوله ولانها سبب في توفيقنا في الدنيا والاخرة . وما يمنع اننا ندعي بالتوفيق للزعيم ... تحياتي

بالتوفيق للهلال

و يعطيك العافيه على الموضوع و ان شاء الله الهلال بيفوز و يبدع بالنهائي

يعطيك العافية
ومتفائلين بالسابعة
إذا حضرت الروح والتركيز
فلن تخرج الكأس من الرياض

الله يعطيك العافية وبالتوفيق للزعيم

ان شاء الله تكون من نصيب الزعيم بس نعيد ونقول الله يكفينا شر اخطاء المدافعين الفااادحة واقصد هنا الزوري واااه من الزوري