مدينتي تسمى نجران وفي رواية مقطوعة السند (مصنع الرجال) ..
ما حصل لي الشرف أنولد فيها لأني من مواليد الدمام التي تسمى في رواية أخرى مقطوعة السند (مصنع المطانيخ) ..
وكذلك لم أعش فيها وإنما عشت في الرياض التي تسمى في رواية متصلة السند (مصنع الشبوك)

وهكذا هي دورة حياتي عشتها ما بين رجولة وطناخة وتشبيك (وجه يقول صم)
الزبدة اسمحوا لي أحدثكم عن نجران تكفون طلبتكم لا تردوني !



تقع نجران جنوب السعودية على حدود اليمن .. يعني إذا عندك أعداء وودك تتخلص منهم راسلني وبدز لك حوثي والا حوثيين يأدون المهمة

عدد سكان نجران حسب آخر إحصائية من كيسي 800 ألف شنب وشنبة !
المذاهب الرسمية فيها: إسماعيلية شيعية - سلفية سنية ..

أما عدد مدنها ومحافظاتها فهي: شرورة - الخرخير (كانت تابعة للدمام ثم تحولت بقدرة قادر لنجران) - خباش - يدمة - ثار - بدر الجنوب - حبونا !



تتميز نجران بتضاريسها الجبلية, وأذكر يوم كنت صغير كنت أتزحلق بجبل وأحط تحتي كرتونة, ولما تقطعت الكرتونة رميتها وقلت بتزحلق بسروالي -كنت حمار- ! المهم تزحلقت ووالله ما وصلت القاع إلا ومؤخرتي ورجولي تقوطر دم أما سروالي فعجزت ألقط ما تبقى منه! كان موقف لا أنساه كرهت الجبال بسببه

بس على العموم كانت نجران زمان حلوة والحياة فيها بسيطة ..
كان أكثر ما يميزها زمان البداوة الأصيلة .. لو يشوفك أبوك لابس بدلة رياضية عطاك بخشم البندق رصاصتين تحت رجلك تحذيرية

لكن للأسف .. العولمة وصلتنا ودخلنا الحضارة من أوسخ أبوابها !




ايه ايه ماكدونالدز فتح فرع عندنا والعياذ بالله !!
لا وهرفي وكودو فاتحين قبله !
والمصيبة إن عندنا الحين هايبر بندة !
تخيلوا كل هالأشياء تجي مرة واحدة؟

الصراحة تعرضت نجران لغزو ثقافي أثّر على سكانها بشكل سلبي !
كانت نجران كل أبوها تقفل الساعة 8 بالليل, أما اليوم ما يرجع الواحد لبيته إلا بعد 2 بالليل !

تبون أسولف لكم عن الجيران؟
كانوا الجيران يعرفون أحوال بعض ويزورون بعض ويهدون لبعض .. أما الحين فأغلب الناس ما تدري عن جارها إذا نام متعشي أو جوعان!
أحس وأنا أكتب فيني عبرة بكاء وودي بحضن دافي يحتويني


بالنسبة للأجواء الرمضانية ما فيها شي مميز غير إننا نفطر بعد ما يأذن المغرب
وفيها لعبة كرة طائرة وكرة قدم, بس أنا معتزل اللعب ومعتكف باستراحتنا لذلك ما أعتقد راح أضيف شي مميز ..




من أشهر الأكلات الشعبية بنجران وجبة تسمى ( الرقش ) وهي عبارة عن طعام يؤكل !




بالنسبة للأماكن السياحية أشهرها الأخدود اللي ذكر في القرآن !
بصراحة ما فيه أي اهتمام من وزارة السياحة, تقريباً آثاره بدأت بالزوال وما عاد فيه شي مميز غير بقايا عظام الدجاج اللي ترمى بعد وجبة الغداء !!




ومن الأماكن السياحية اللي تستحق الزيارة سد نجران بعد نزول المطر !
منظر مهيب وجميل ..




أيضاً غابة سقام (تم تغيير اسمها إلى منتزه الملك فهد) << أحس إني يوم بأدخل المجلس العام وبحصله مجلس الملك عبدالعزيز العام ما خلوا لنا شي أطال الله في أعمارهم
المهم هالغابة جميلة وهي أكبر غابة صناعية في الشرق الأوسط حسب ما وصلني من كيسي!
وأبرز ما يميزها الأشجار السامقة والمراجيح وسيارات الآيسكريم !



إلى هنا وصلنا إلى نهاية جولتنا والمعذرة على القصور في التقرير,
فالغرض كان المشاركة ولو بشكل سريع وبسيط تقديراً لعمل مشرفي واستشاريي المجلس ..
وأتمنى نشوف مشاركات بقية الأعضاء

حياك الله يا ابو خالد

ستكون لي عودة .. فموضوعك لا يليق به ان نكتفي بالقول تقرير مميز ويعطيك العافية

طبعا في البداية ومن زود الحماس .. كدت ان انقل الموضوع الى قسم المنقولات بالخطأ بدل من التثبيت .. ولكن الله لطف

راقت لي البداية التعريفية على شاكلة كتب التاريخ التي تتحدث عن العظماء الذين ولدوا في صنعاء وترعرعوا في موزمبيق وتزوجوا في روسيا .. وكم أنت عظيم يا ابن نجران ( كم في رواية معلق الجزيرة الرياضية الذي نسيت اسمه ! )

إقتباس تقع نجران جنوب السعودية على حدود اليمن .. يعني إذا عندك أعداء وودك تتخلص منهم راسلني وبدز لك حوثي والا حوثيين يأدون المهمة

واذا عدوك حوثي .. كيف تفتك من شره ؟!

إقتباس وأذكر يوم كنت صغير كنت أتزحلق بجبل وأحط تحتي كرتونة, ولما تقطعت الكرتونة رميتها وقلت بتزحلق بسروالي

في المرات القادمة استخدم صناديق البيبسي



انسيابية على الصخور
قدرة في التحكم من مقبض الصندوق
طبقة عازلة تمنع تشقق السروال




ما شاء الله .. طفل بطبقات .. مثل دعاية كفرات ميشلان

إقتباس ايه ايه ماكدونالدز فتح فرع عندنا والعياذ بالله !! لا وهرفي وكودو فاتحين قبله ! والمصيبة إن عندنا الحين هايبر بندة ! تخيلوا كل هالأشياء تجي مرة واحدة؟

ما هذه الجرأة في الباطل .. وصل بكم الحال ان يفتتح ماكدونالدز وتوابعه !
كان استعنتم بـ هارديز وكارفور كبديل اسلامي

إقتباس أحس وأنا أكتب فيني عبرة بكاء وودي بحضن دافي يحتويني

غالي والطلب رخيص يا ابو خالد

هبلك هذا الحضن يحتويك حتى العظم







فتة لحم بالمرق

إقتباس بصراحة ما فيه أي اهتمام من وزارة السياحة, تقريباً آثاره بدأت بالزوال وما عاد فيه شي مميز غير بقايا عظام الدجاج اللي ترمى بعد وجبة الغداء !!

اذا لم يستحق مكان كهذا العناية والرعاية من وزارة السياحة او اضعف الايمان من وزارة الثقافة باعتباره صرح تاريخي .. فبماذا سوف يهتمون ؟!


الله يعطيك الف عافية يا ابو خالد

وخواتم مباركة ان شاء الله

شكرا جزيلا لك هذه المشاركة الجميلة والمبادرة الكريمة .. وحقيقة شكرا ان منحتنا فرصة لتجديد معرفتنا بنجران واهلها الكرام .. بعد مضي زمن طويل من موضوعك حول رحلتك الى الأخدود ( اذا لم تخني الذاكرة ) ،،،

في حفظ الله ورعايته ،،،

كنت وأنا صغير أسمع مثل "أشد حياء من العذراء في خدرها" !
الحين أنا أحس نفس إحساسها كأني عذراء في خدرها وبيطب عليها زوجها بليلة الدخلة !
مستحي منكم مدري كيف أرد عليكم كأني ما أعرفكم, عدا السلتوح فيصل الحربي هذا أشوفه أكثر من ما أشوف حرمتي

المهم استفتحنا بالله وخاب كل جبار عنيد

إقتباس الرسالة الأصلية كتبت بواسطة هلالي من ارض اليمن طبعا في البداية ومن زود الحماس .. كدت ان انقل الموضوع الى قسم المنقولات بالخطأ بدل من التثبيت .. ولكن الله لطف

ههههههههههههههههههههههـ
مقدر شعورك لأني أمر بنفس الحالة أتلخبط إذا كان الموضوع يتعلق بمزة
الحين بس عرفت غلاتي عندك يا عاشقني

إقتباس الرسالة الأصلية كتبت بواسطة هلالي من ارض اليمن راقت لي البداية التعريفية على شاكلة كتب التاريخ التي تتحدث عن العظماء الذين ولدوا في صنعاء وترعرعوا في موزمبيق وتزوجوا في روسيا .. وكم أنت عظيم يا ابن نجران

الله يحفظك ويطول عمرك أخجلتني
أنا عظيم بس مشكلتي التواضع هو اللي ما خلاني أظهر كل مواهبي المدفونة

إقتباس الرسالة الأصلية كتبت بواسطة هلالي من ارض اليمن واذا عدوك حوثي .. كيف تفتك من شره ؟!

دز رسالة للشيخ حميد الأحمر عبر سبأ فون وهو يتكفل بالباقي

إقتباس الرسالة الأصلية كتبت بواسطة هلالي من ارض اليمن ما هذه الجرأة في الباطل .. وصل بكم الحال ان يفتتح ماكدونالدز وتوابعه ! كان استعنتم بـ هارديز وكارفور كبديل اسلامي

بغيت أكتب بعد بيتزا هت .. بس خفت من عيون القصمان
نجران بازت يا رقالة

إقتباس الرسالة الأصلية كتبت بواسطة هلالي من ارض اليمن اذا لم يستحق مكان كهذا العناية والرعاية من وزارة السياحة او اضعف الايمان من وزارة الثقافة باعتباره صرح تاريخي .. فبماذا سوف يهتمون ؟!

مهتمين بمتحف جنب الأخدود, حاطين جنبية (خنجر أو سكينة للناطقين باللغة الدلوعية) وقروش من العهد العباسي والأموي ومزعجين أمنا فيها!


شكراً أبوعبدالرحمن على المرور المميز وخذ هذا القلب معك

اهلا وسهلا بالشايب ابو خالد ض1

معلومات قيمة واول مرة اعرف معلومات عن نجران !!
كنت اظن انها اسم ع الخريطة فقط ولايوجد بها سكان ؟ ض1

بالحقيقة موضوع قيم عرفنا ع احد المدن المجهولة مع ان مافيه ذيك المعلومات ض1
بس بارك الله فيك وفالك الفوز و1

شكراً ابو خالد .. وشكراً للاستشاريين ومشرفيين المجلس و1

دمتم بحفظ الرحمن

مدخل وجمع جميل بالوصف والتعليق

شكرًا لك على هذه النافذة والجولة الممتعة

تحياتي وسلامي لنجران وأهلها

إقتباس الرسالة الأصلية كتبت بواسطة محبة الرحمن اهلا وسهلا بالشايب ابو خالد ض1 معلومات قيمة واول مرة اعرف معلومات عن نجران !! كنت اظن انها اسم ع الخريطة فقط ولايوجد بها سكان ؟ ض1 بالحقيقة موضوع قيم عرفنا ع احد المدن المجهولة مع ان مافيه ذيك المعلومات ض1 بس بارك الله فيك وفالك الفوز و1 شكراً ابو خالد .. وشكراً للاستشاريين ومشرفيين المجلس و1 دمتم بحفظ الرحمن

أهلاً وسهلاً بالبزر محبة الرحمن
نجران مصنع الرجال وما تنلامين إذا ما عرفتي شي عنها لأنك أنثى ( أو على الأقل محسوبة على صنف الإناث)
حياك الله سعدت بمرورك وكم أتمنى أعرف وش كان يوزرك قبل ما يصير عليك الحادث وتغيرينه !

إقتباس الرسالة الأصلية كتبت بواسطة @@almoreb@@ الله يسامحك شهيتني بفتة اللحم .. ألييييييييييييييييييمة !! شفت موضوعك قبل الفطور وقفلته لاني بغيت أدعي عليك !! بغض النظر عن كمية الغبار في موضوعك .. لكن نجران تزال مدينه جميلة ورائعه وينقصها اهتمام حالها حال كل المدن العربية .. أجل مكان مثل الاخدود بقلب منتزه !! على الله بس !! نجران لا تزال تحتفظ ببداوتها وتراثها وعراقتها .. واتوقع انها ستكون اخر مدن المملكة تمدنا !! تصدق ياخي مو لايق عليك تكون من نجران .... ياخي أحس لازم تكون من لاس فيجاس أو شرم الشيخ أو البحرين خواتم مباركة

هههههههههههههههههههههههههه
أجمل ما في تعليقك إني أكون من لاس فيغاس
أنا محد يقدرني حق قدري إلا أعضاء المنتدى
نرجع لنجران بعد هالتميلح ونقول: نجران تطورت كثير وصار عندنا حلاق سوري, بعد ما كان راعي البقالة هو اللي يحلق لعيالنا بمكينة حلاقة ( يوم تشوفهم تقول كتيبة عسكرية كلهم محلقين رقم 2)
الله يسقي أيام المكيفات الصحراوية, الحين لاعبة المكيفات المركزية فينا لعب مرة نتغطى بالبطانية ومرة نرميها
وش بعد باقي من ماضينا التعيس؟! إيه كنا نلعب كورة بطقم من ماركة الدفة نلعب بثيابنا البيضاء أو الملونة والعصبة (الشماغ أو الغترة ملفوفة) على الراس وبعضنا يدقها لطمة أما الحين تغير الوضع طقوم رياضية وشورتات ودورات رياضية على مستوى عالي !
أقول خلني أسكت لا أكمل وأعلمك وين كنا نقضي الحاجة الصغرى والكبرى! والا تدري خلني أعلمك
كنا وحنا صغار إذا نبي نقضي الحاجة الصغرى عادي تحت أي شجرة بشكل سريع ونتيمم بالتراب (اللي هو بالأصل مليان نجاسة من ناس قبلنا) !
أما إذا كانت الحاجة كبرى .. فكان الوضع يتطلب حارس أمين يراقب الوضع وينبه المارين بأن هناك شخص يقضي حاجته وراء الشجرة أو الحجر ويتم ختم العملية بالتيمم بأي حجر وحتى لو كان خشن ههههههههه خلني أسكت والله يا إنه كان ماضي تعيس
مشكور على مرورك يا دك أحمد

إقتباس الرسالة الأصلية كتبت بواسطة خالد الهلالي 15 مدخل وجمع جميل بالوصف والتعليق شكرًا لك على هذه النافذة والجولة الممتعة تحياتي وسلامي لنجران وأهلها

حياك وبياك يا سمي فلذة كبدي
الشكر لك طال عمرك على تشريفي بمرورك وردك ..
سلمك الله وحفظك يا غالي

إقتباس الرسالة الأصلية كتبت بواسطة FAISAL AL7RBY ههههههههههههههه ياحلاوتك ياسطة بصراحه مواضيع ابو خالد دائما تروق لي .. هذا الرجل يتمتع بـ حس فكاهي جميل في المواضيع استغرب حتى الان ما صار من نجوم الكيك او حتى انتج برنامج يوتيوبي ناجح و ينافس لايكثر و ايش اللي و التمساح . بس والله اقرب شخصية لـ ابو خالد هي شخصية التمساح . احس فيه تشابه بين ابو خالد و التمساح اليوتيوبي وايضا ويروق لي اكثر عندما اشاهد ابا عبدالرحمن يعقب على مواضيع ابو خالد . ياسسلام حيبئى الموضوع اخر حلاوة #بـامية

حلو مرا......................

إقتباس الرسالة الأصلية كتبت بواسطة عاشق الموهوب 10 الله عليك يالمشاغب ابدعت بالوصف والتعليق كعادتك نجران ما اعرف عنها شي الا ماذكرته، وهي كباقي المدن تنتظر الاهتمام من الهيئة العامة للسياحة والا هم ما يهتموا بالمدن الا اذا انظمت لقائمة التراث العالمي في منظمة اليونيسكو، كما حدث لاحقا مع مدائن صالح وجدة التاريخية!! اما الفتة كلام ثاني، قعدت دقيقة وانا اتمقل الصحن.. الصوم وما يسوي مدري ليه البعض يحكم على تحضر وتطور المدينة، اذا فتح فيها ماك تراهم بكل مكان يعطيك العافية

أول شي ليش حاط لي قلب أبيض؟ حط ياخي قلب أحمر ما يخققني ويجيب راسي إلا هو
بالنسبة للاهتمام خلهم يهتمون بالمواطنين أول أما المدن يصير خير < الحاير ينادي
أما بالنسبة لماك فهم ما يفتحون فرع لهم إلا بمكان متحضر, وليتك تشوف الزحمة عليه زي زحمة البيك بالغربية!
عموماً تشرفت بمرورك فديت قلبك الأبيض

إقتباس الرسالة الأصلية كتبت بواسطة أوَار حلو مرا......................

ههههههههههههههههههههههـ
طبعكن يالحريم حقودات (هذا على افتراض إنك كبرتي وصرتي حرمة)
بس لعلمك ردي هذاك كتبته على أساس أعدله وأتفرغ له, بس انشغلت عنه يا حقودة

نجراان اهل الخنجر ومصنع الرجاال فعلآ...

بس مااقلت لنا يتكلمون اي لغه ؟؟ ^~*

يوجد عندنا نجرانيين بالكويت اذا تكلموا مع بعض يصعب علينا فهمهم ^~*

ابدعت يالمشاااغب وفااالك الفوز،،،

واعاننا الله ع التصويت..

شكلي بصوت للي يدفع اكثر ^~*

أهلاً بقديم المجلس..

إقتباس هكذا هي دورة حياتي عشتها ما بين رجولة وطناخة وتشبيك (وجه يقول صم)

كل من كتب موضوع قال انولدت في مدينة و ساكن في أخرى..
واضح الهجرات بدت تزيد..

إقتباس تتميز نجران بتضاريسها الجبلية, وأذكر يوم كنت صغير كنت أتزحلق بجبل وأحط تحتي كرتونة, ولما تقطعت الكرتونة رميتها وقلت بتزحلق بسروالي -كنت حمار- ! المهم تزحلقت ووالله ما وصلت القاع إلا ومؤخرتي ورجولي تقوطر دم أما سروالي فعجزت ألقط ما تبقى منه! كان موقف لا أنساه كرهت الجبال بسببه

و أنا أقرأ بس..
وصلني ألم الذكرى الجبلية الشامخة

إقتباس من أشهر الأكلات الشعبية بنجران وجبة تسمى ( الرقش ) وهي عبارة عن طعام يؤكل !

أول مره أسمع عنها...
ننتظر موضوع طبخ بالمقادير و طريقة التحضير ض1


شكراً لطرحك الرائع
موضوع جميل عن مدينة كانت شبه مجهولة بالنسبه لي ض1

التغريب وأنا أخوك وصل فى أى مكان إلا بعض القرى النائية فى مناطق المملكة