نجران مدينتي !! - نادي الهلال السعودي - شبكة الزعيم

الـمـشـاغـب · #1 15/07/2014, 06:01 AM

مدينتي تسمى نجران وفي رواية مقطوعة السند (مصنع الرجال) ..

ما حصل لي الشرف أنولد فيها لأني من مواليد الدمام التي تسمى في رواية أخرى مقطوعة السند (مصنع المطانيخ) ..
وكذلك لم أعش فيها وإنما عشت في الرياض التي تسمى في رواية متصلة السند (مصنع الشبوك)

وهكذا هي دورة حياتي عشتها ما بين رجولة وطناخة وتشبيك (وجه يقول صم)

الزبدة اسمحوا لي أحدثكم عن نجران تكفون طلبتكم لا تردوني !

تقع نجران جنوب السعودية على حدود اليمن .. يعني إذا عندك أعداء وودك تتخلص منهم راسلني وبدز لك حوثي والا حوثيين يأدون المهمة

عدد سكان نجران حسب آخر إحصائية من كيسي 800 ألف شنب وشنبة !
المذاهب الرسمية فيها: إسماعيلية شيعية - سلفية سنية ..

أما عدد مدنها ومحافظاتها فهي: شرورة - الخرخير (كانت تابعة للدمام ثم تحولت بقدرة قادر لنجران) - خباش - يدمة - ثار - بدر الجنوب - حبونا !

تتميز نجران بتضاريسها الجبلية, وأذكر يوم كنت صغير كنت أتزحلق بجبل وأحط تحتي كرتونة, ولما تقطعت الكرتونة رميتها وقلت بتزحلق بسروالي -كنت حمار- ! المهم تزحلقت ووالله ما وصلت القاع إلا ومؤخرتي ورجولي تقوطر دم أما سروالي فعجزت ألقط ما تبقى منه! كان موقف لا أنساه كرهت الجبال بسببه

بس على العموم كانت نجران زمان حلوة والحياة فيها بسيطة ..
كان أكثر ما يميزها زمان البداوة الأصيلة .. لو يشوفك أبوك لابس بدلة رياضية عطاك بخشم البندق رصاصتين تحت رجلك تحذيرية

لكن للأسف .. العولمة وصلتنا ودخلنا الحضارة من أوسخ أبوابها !

ايه ايه ماكدونالدز فتح فرع عندنا والعياذ بالله !!
لا وهرفي وكودو فاتحين قبله !
والمصيبة إن عندنا الحين هايبر بندة !
تخيلوا كل هالأشياء تجي مرة واحدة؟

الصراحة تعرضت نجران لغزو ثقافي أثّر على سكانها بشكل سلبي !
كانت نجران كل أبوها تقفل الساعة 8 بالليل, أما اليوم ما يرجع الواحد لبيته إلا بعد 2 بالليل !

تبون أسولف لكم عن الجيران؟
كانوا الجيران يعرفون أحوال بعض ويزورون بعض ويهدون لبعض .. أما الحين فأغلب الناس ما تدري عن جارها إذا نام متعشي أو جوعان!
أحس وأنا أكتب فيني عبرة بكاء وودي بحضن دافي يحتويني

بالنسبة للأجواء الرمضانية ما فيها شي مميز غير إننا نفطر بعد ما يأذن المغرب

وفيها لعبة كرة طائرة وكرة قدم, بس أنا معتزل اللعب ومعتكف باستراحتنا لذلك ما أعتقد راح أضيف شي مميز ..

من أشهر الأكلات الشعبية بنجران وجبة تسمى ( الرقش ) وهي عبارة عن طعام يؤكل !

بالنسبة للأماكن السياحية أشهرها الأخدود اللي ذكر في القرآن !
بصراحة ما فيه أي اهتمام من وزارة السياحة, تقريباً آثاره بدأت بالزوال وما عاد فيه شي مميز غير بقايا عظام الدجاج اللي ترمى بعد وجبة الغداء !!

ومن الأماكن السياحية اللي تستحق الزيارة سد نجران بعد نزول المطر !
منظر مهيب وجميل ..

أيضاً غابة سقام (تم تغيير اسمها إلى منتزه الملك فهد) << أحس إني يوم بأدخل المجلس العام وبحصله مجلس الملك عبدالعزيز العام

ما خلوا لنا شي أطال الله في أعمارهم

المهم هالغابة جميلة وهي أكبر غابة صناعية في الشرق الأوسط حسب ما وصلني من كيسي!
وأبرز ما يميزها الأشجار السامقة والمراجيح وسيارات الآيسكريم !

إلى هنا وصلنا إلى نهاية جولتنا والمعذرة على القصور في التقرير,
فالغرض كان المشاركة ولو بشكل سريع وبسيط تقديراً لعمل مشرفي واستشاريي المجلس ..
وأتمنى نشوف مشاركات بقية الأعضاء