سامي عبدالله الجابر

السلام عليكم ورحمة الله وبركاته


بدخل بالموضوع على طول وبتكلم معك بالعاميه

انا واحد من عشاق الكيان الكبير الزعيم ومنقهر من اللي جالس يصير بفريقي وللاسف انت السبب،،انت ياللي بسنين كثيره اسعدتنا وساهمت في بطولات كثيره للزعيم صرت مصدر زعل لأغلب عشاق كيان الزعيم اللي مايرضيهم للحال اللي وصلنا له،،صحيح أول سنه تدريب وثاني الدوري ووصلتنا لنهائي الكأس اللي خسرناه لكن هذا ماهو طموحنا

بنهائي الكأس للأسف ومع ضياع فريقنا من نص الشوط الاول والكل توقع انه تتغير طريقة اللعب ولكن للاسف أخرجت مصدر الضعف العابد ودخلت عبدالعزيز الدوسري اللي يقدم أسوئ مستوياته هالموسم ومايحتاج أشرح لك أنه يفترض تدخل ياسر عشان يفك عن ناصر ونيفيز المكبل غير انك لعبت مع النصر الدور الاول ولعبوا بمحورين والثالث عوض خميس شغلته بس نيفيز وفازوا علينا بهالتكتيك وللاسف الدوسري بعد مادخل صار عاله اكثر من العابد،،واستمروا لاعبينا بالعرضيات السقيمه واللي يقابلها محمد عيد وعمر هوساوي طوال القامه بالتشتيت وبرضوه مايحتاج اقولك انه يفترض بعد الكم الكبير من العرضيات الضايعه تصيح على الاعبين وانهم يشتغلون على العمق،،وطار الكأس والسبب انت

مباراة الشباب اللي يفترض من البدايه تلعب بمهاجمين اثنين صريحين لانه ماعندنا استعداد نضيع نقطه من كل المباريات اللي باقيه بالدوري وللاسف كثفت الوسط واللي قابلك مدرب الشباب بنفس طريقة مدرب النصر ولعب بثلاث محاور وقفل عليك وانتهى الشوط الاول بهجمه او هجمتين فقط للهلال وشبه خطره،،توقعتك في بداية الشوط الثاني تسحب عزيز الدوسري وتدخل ياسر القحطاني ولكن للاسف انتظرت الى مابعد الدقيقه 70 والفريق لايزال ضايع ومع ذلك تدخل الفرج !! وبعدها تخربها زود وتدخل يوسف السالم !! اللي يشوف هالتغييرات يقول متصدرين الدوري ومحتاجين نقطه وحده بس وناخذ الدوري،،وصار اللي خايفين منه وخسرنا بعد 90 دقيقه ماشفنا الا 5 هجمات ممكن نقول خطيره

يابوعبدالله اللي جالس يصير منك ماهو طبيعي خاصه وانك خبير وعندك قدره تقراء المباريات
ياسامي اغلب الهلاليين استبشر خير بعد توليك تدريب الزعيم لكن للاسف المباريات الاخيره فريقنا ضايع

تعذرنا ان كل الفرق تلعب مباريات نهائي قدام الهلال ويقفلون لكن للاسف بعد مباراة النصر بالنهائي والشباب أكتشفت ان فريقنا بدون هويه وفنايل تتحرك بس


تكفى يالذيب لاتخيب ظننا فيك اكثر من كذا وانت اللي اخترت الاعبين الاجانب وخترت مساعدينك واخترت كل شي،،يعني مالك عذر

ماعاد بقى لنا الا آسيا تكفى برّد خواطرنا فيها ومابي اسمع منك بس كلام بالمؤتمرات الصحفيه



متأكد أن كل هالكلام اللي قلته فوق مايخفى عليك وهذا اللي مهبل فينا،،لكن لازال عندنا أمل أننا نشوف لمسات الذيب اللي ماعمره خيب ظننا


وآسف يابوعبدالله على الإطاله وصدقني كل اللي كتبته مامسحت منه ولاكلمه وقلت كل اللي بخاطري ولاني مراجع الكلام مره ثانيه واشوف وش انا كتبت وكل اللي بسويه بسوي كلك على نشر الموضوع.

تقبل تحيات شخص يعشق تاريخك ويعشق كل ماقدمته للزعيم