بسم الله الرحمن الرحيم ..

سلام من الله عليكم ورحمة منه وبركاته .. كيفكم وشو اخباركم .. حابب أبربر على رؤوسكم شوي وأطلع .. اللي عنده وقت يكمل واللي ما عنده وقت يكمل شغله

1- الطقاقات نعنبوا ابليسهن !!

الحين الواحد يبي يعرس ويطلق العزوبية في هذه السنة باذن الله وأهله يدورون طقاقة سنعه صوتها كأنه عبدالله بلخير .. عشان تحرك البنات اللي بالفرح وتقولهم ((طيااره .. طيااره .. سياراااه )) << ودي اعرف وش يحسون فيه البنات وهم رافعين يدهم ويحلقون في الجو ... المهم ما علينا

الحين ورا أسعار الطقاقات غالية كذا .. لو أشتري لي كامري 2000 مستعملة نظيف أحسن لي .. أقل وحده وأبشع وحده تلاقي سعرها ب 5 الاف .. والحلوين يكونوا من 12 الف فما فوق .. ليش كذا .. والله عيب يا معشر الطقاقات .. ... ساندوا الشباب عشان يتزوجون .. شوفو أبو مقبل للحين ما تزوج عشانكم


2- mbc3 هل هي حرب شخصية بينهم وبين مشايخ أم هي بالفعل قناة واطيه !!

أولا شوفوا هذا الفيديو ..



بصراحة مصيبة والله .. خلوكم من حربهم مع العريفي وشلته وانسوهم تماما ... وش رايكم باللي شفتوه بالفيديو ؟!!
نعنبوا ابليسكم يا ام بي سي .. والله في لقطات غطيت عيني منها خجلا وعفة .. قبلات على بوسات على أحضان على تعري على شذوذ على طووووووووط .. ما ابي أكمل عشان لا أنحضر ... لا بجد بجد وش ذا .. ايام زمان كنا نشوف كابتن ماجد ورابح والنمر المقنع وهايدي وعدنان ولينا وفولترون وسالي وليدي .. وكنا ياحليلنا مبسوطين .. ولا شفنا هايدي وبيتر يرتعون سوا نستحي .. بصراحة ما رأيته في هذا الفيديو مصيبة .. يجب على كل بيت أن يحذف كل هذه القنوات وأن يوفر للأطفال بدائل ممتعة ومسليه أكثر .. يعني أنا أشوف أطفال الألمان يقضون معظم وقتهم في الملاعب الرملية وفي الحضانات اللي تعلمهم أمور تفيدهم مستقبلا وتؤسسهم بشكل ممتاز .. فليش ما نخصص في كل منزل غرفة تعليم ومهارات وتسلية للأطفال .. نحط في الزاوية ملعب رملي ونخلي ه الطفل يتمردغ في الرمل الين يبلع العافية .. وعاد الله يعين ماري على التكنيس والتنظيف ... لازم حل والله ... أفيدونا !!


3- لماذا نقصت الهمم والعزائم ؟!!

بعد 18 يوم عندي اختبار ل3 مواد مجتمعة وفيني قعود همة مو طبيعي وحاسس اني ما راح أقدر أذاكر ه المواد .. قعدت أهوجس في الليل .. الحين ايام الثانوية كنا نذاكر قبل الاختبارات باسبوعين ونختم 14 مادة من الجلده للجلده .. والمعلمين ابناء اللذينا ما يحذفون لنا ولا تعريف واحد .. ومع ذلك كنا نحفظ ونفهم كل شئ وننجح .. بل نتفوق وما يردنا الا 95 % << طبعا 95 % ايام الوزاره ما يجيبها أطلق شنب في الجيل الحالي أبو 99.99 % .... فما السبب ؟!! ساعات أقول والله يا احمد شكل المناظر اللي تشوفها كل يوم هي سبب ضعف الذاكرة مثل ما قال الشافعي .. شكوت الا وكيع سوء حفظي فأرشدني الى ترك المعاصي وأخبرني بأن العلم نور ونور الله لا يهدى لعاصي ... يمكن ذا سبب ... لكن وش بقية الاسباب ولو عندكم حلول أفيدونا !!


4- وراه المجلس نايم !!؟ << خف علينا يا داوود الشريان

الحين ليش ما كل واحد فيكم ينزل موضوع ويفضفض ويحيي المجلس شوي .. يعني شنبات ومخضرمي المجلس الشياب راحوا .. البركة فيكم يا شبابنا .. حركوا المجلس شوي .. فضفضوا .. اتركوا عنكم تويتر والفيس .. ترى قديمك نديمك لو الجديد أغناك .. لا لا الموضوع يبغاله حل جذري .. اعملوا موضوع شتشته طيب .. موضوع كزبرة جرجير بقدونس أي شئ


5- وبعدين معك يا بشار المجرم !!

أتعبت سوريا وأتعبتنا أيها الجبان .. أزهقت أرواحا طالما أحببناها .. وأهلكت أرضا طالما عشقناها .. وأبدت نسلا طالما تعالجنا وتعلمنا على يديه .. فالله أسأل أن يرينا فيك وزمرتك وكل من يشد على يديك عجائب قدرته وعظيم نقمته وجميع سخطه .. أرهقتني أحداث سوريا والمجازر لديهم .. حق على كل واحد منا أن يبذل لهم ما يستطيع حتى ولو بدعوة واحده في جوف الليل ..


6- الفشخره ... إلى متى ؟!!

قبل كم يوم سمعنا ان نجل أمير قطر اشترى سيارة ب 2.2 مليون جنيه استرليني .. يعني 12 مليون ريال سعودي .. نعنبوا ابليسك في عالم تموت وعالم بردانه ومو قادره تحصل شئ تلبسه وانت مشتري لي سيارة مرصعة بألماس !! الى متى هذا البذخ يا حكامنا والشعب جائع وفقير وليس لديه ما يكفيه .. والله لا يقبل بهذا عاقل !! لو رسلت بالمبلغ هذا بطانيات وطعام لمخيم الزعتري في الاردن لكسبت أجر الاف الأسر المسلمة !! لكن سبحان الله يهدي من يشاء !!

7 - الرقم ذا عجيب غريب !!؟

كل شئ اعجازي في الكون مكون من الرقم 7 .. السماوات الأرض ايام الاسبوع عجائب الدنيا أشواط الكعبة والسعي ألوان قوس الرحمن ايات الفاتحة عدد البحار عدد الجمرات قارات العالم ... الخ ... وهذا غير اني مولود في يوم 7 ... ولمحبي الكيمياء المستويات المدارية للالكترون سبعة .. الضوء المرئي 7 ألوان والغير مرئي 7 اشعاعات .. سبحان الله !!

المهم كفاية لعب وبرجع أذاكر .. دعواتكم