تجربتي لعملية الليزر كل شي قبل و بعد التفاصيل كامله., حيااااكم
*
السلام عليكم و رحمة الله و بركاته
يا مررررحبا كلـ (ن) باسمه
موضوعي اليوم عن تجربتي الفذّهـ في عملية الليزر
كيف جزمت و ليش و متى و وش تغير و الاثار على النظر ..,؟؟
طبعا تعمدت اني ما اتكلم الا بعد ثلاث شهور ,, لأني الدكتور قالي لا تكلمني الا بعد ثلاث شهور و فعلا تغير جذريا بعد ثلاث شهور .!
كلامي راح يكون على المراحل اللي مريت فيها لذلك يمكن اكتب عن وجهة تظر اخرى في مرحلة غير .
بداية بتكلم عن ما قبل العملية ,,
كانت الحيرة عندي وين اسوي العملية و هل هي سهلة والا صعبة ؟؟ و تفرق من دكتور لآخر والا لا ؟
اول شي فتحت اليوتيوب وكتبت ( عملية ليزر ) و ليتي ما شفته
قلت لالالالالا و حسيت بألم و انا مالي دخل و وشلون يلعبون بعين كذا و ان اخطأ والا علّق الجهاز و الا فقع عيني < بعذري عيون مهب لعبة
المهم شفت هالمقطع
بعدها سألت اللي مسوينها و قلت لهم اللي شفت و قالوا ما عليك توكل على الله .
بعدها جزمت اني اسويها (( صراحه النظارهـ غثا ))
سألت عن دكاترهـ كثير , و عن مستوصفات خااصه .. حتى ان بعضهم وصاني على دكاترهـ بالاردن
المهم بعد ما جزمت و تأكد اني خلاص ابسوي العملية ,, سألت القريبين مني اللي مسوينها و صار اختياري بين دكتورين
طبعا كلهم وهم الافضل موجودين بالرياض
الاول ,, الدكتور يوسف المقبل
الثاني ,, عثمان العمر ( مركز الحكماء الطبي )
و للأمانه كل الاثنين كل واحد احسن من الثاني ,, لكن خالتي يا حبنيله مسويه العملية عند ( عثمان العمر ) ,, و بعد ما تمقلت بخشته و شفت مقاطعه ( مقابلة بالقناة الاولى ) جزمت اسوي عندهـ .
لذلك حرصت باختيار الطبيب المناسب لأني لا اريدلأي يــــد ان تعبث بعيناي < يا الهي اليخاندروا
و المهم و انا اللي التقط هاتفي النقال و ادق عليهم ( اذكر بأول شهر شعبان ) ,, و ترد على تلك الفتاهـ قالت الدكتور (( مهوب بوووهـ هالشهر )) اي انه ليس موجود .. ومو جاي الا برمضان ..,
و استفسرت عن كل شي براسي < الفاضي و صراحه ما قصرت كل شي عطتني اياهـ ( مثلا ان نتائج العملية بعد ثلاث شهور و هل فيه الم او لا و كم مدة العملية ) و بعدها علطول قالت تبي احجز لك موعد برمضان اخوي < بيمسكوني قبل اطير يا حبنيلي
سعر العملية ( 8000 ) ريااال
قلت متى لو ابحجز قالت يصير موعدكـ بـ 3 رمضان .. قلت خلاص برجع اكلمكم ,, مكالمتي كانت العصر .
استخرت و خلاص قلت بقرر قراري الاخير و توكلت على الله و اتصلت العشاء و اخذت موعد .. صار بـيوم 7 او قريب من هاليوم ما اذكر بالضبط << عالم سرا عميان ما شاء الله
المهم قالوا لي تبي فحص و العملية بعده بيوم او يومين والا علطووووول ,, قلت لا علطول , يوم الفحص هو يوم العملية .
يوم العملية ... كان بتاريخ 30 / 7 / 2012
الساعه 10.30
و تمشي الايام و تمشي , و يجي اليوم المرتقب و يدقون علي قبل بيوم قالوا استعد بكرا موعدك < ياربيييه
صراحه انا ما رحت الا وانا جاازم ولا عندي نية أهون ( حتى الـ 8000 ) بمخباتي يعني جازم اقوى شي .
و جاء يوم العملية و انا اروح مركزهم واروح للاستقبال < اكيد اجل بقعد بالمواقف
طبعا ما رحت لحالي ماخذ معي اثنين خبركم تشجيع و حماس < و عشان ما أهون و أهج
و اعطيهم اسمي و الموعد , و تجي ذيك الفلبينيه اللي يالله تشوفه و تقولي (( كم )) < يعني تعال بالانجليزي بس ما عرف اكتبه مشوااار اترجم بقوقل come
و اجي عند أول نقطه وهي فحص النظر حق حروف E ,, انا ضاق صدري يوم شفته قلت وش ذا الخياس فحصهم ما يحمس
المهم و اخلص و يكتبون معلومات عن نظري المخيس و قالوا ارجع للانتظار .. و بعدهـ دخلت على واحد ثاني فحص متطور اكثر و فحصني مع كل جهه و كل شوي يعيد ,, والله خفت يسطرن و اشوا و تقضي امور الفحص ..
المهم جت وحده و قالت ( كم ) و انا اللي اكم معه و نروح لموظفه قالت جاازم على العمليه .. قلت ايه توكلنا على الله ,, واروح للاستقبال و يخصمون 300 من الـمبلغ كامل ...
و بعده رحت للدكتور ( شهقت و قلت اخيرا ) ,, لكن طلع تقل قراي ( شيخ قران ) لأنه يحط المراجعين بغرفه و كل شوي يدخل على واحد و يقوله كلمتين و يمشي
وعلمني وش المشكله , واني احتاج عملية ليزر .
طبعا اي استفسار صراحه ما يقصر , لكن انا احب اللي يقعد و يسولف معي
المهم و يعطيني حبه قال خذها الحين و رح معي الفلبينه ( طبعا ما يحتاج اقول و ش قالت )
و تروح تحت للادارة و ياخذون مني المبلغ كاامل , بعده طلعت لغرفه لبسوني حق العمليات و خشيت جو العملية ..
المشكله معي واحد قمطه عمره الظاهر 30 لكنه خاايف و يقول لي سنتين احاول اجزم
قلت والله لو انه قلب مفتوح تراها عيون < والله هذا البلا انها عيون ...
المهم سواليف و ضحك مع اللي فيه و مع ربعي ... < سطر ماله داعي
و بعده جت فلبينيه و قالت .... ؟؟ < وش قالت هههههههههههههههه
و نروح انا و هالرجال اللي بيسوي العملية , طبعا لحالنا خلاص .. و تركمون لبسنا احذيه من عندهم و دخلنا بانتظار داخل العمليات ..
وكان فيه واحد من داااخل ,, وهنا المصيبه !!!!
اللي معي طارت عيونه قلت وش فيك ..؟؟ قالي كذا (( يا ولد يا ولد شم ريحة حسحسه )) هههههههههههههههههههههههههههههههههههههههه
الصراحه صادق , لكن قلت له بنعرف السالفه اذا دخل قال شكلي بهون
(( ريحة الحسحسه اللي يقول الاخ , هي من حرق الليزر ))
المهم جاء دوره هو قبلي , قالي يالله نستودعك الله و قعد يوصي .. قلت رح تراك اشغلت روحك قبل تشغلن
المهم طلع خوينا وهو ( يون ) و يعرج < ماله دخل هههههههههههههههههههه !
و جاء دوري
و قالي الدكتور امتد عافاك الله على السرير و افتح عيونكـ ولا ترمش بنحط قطره ( بنج ) .
و حط القطرهـ و صبر شوي وسوا لي نفس اللي بالمقطع بالضبط .
و الحمد لله لا الم ولا خوف ولا شي , بالعكس سهله اكثر مما توقعت ,, ولا تاخذ وقت زي ما شفتوا .
و بعدها قمت و طلعت من الغرفه , و رحت لطبيبه عطتني القطرات و شرحت لي طريقة القطير و كم الفترات و كذا .
بعدها مشينا و عطوني موعد بعد اسبوع عشان يشيلون ( عدسة حماية ) .
طبعا خلصت العملية الساعة 12.30 تقريبا , لأن كانت زحمة و حوسة ذاك اليوم والا المفروض اني طالع بدري .
المهم عطاني الدكتور حبه ( نفس الحبة الاولى ) اخذها مع السحور .
شي مهم وهو النظارة الشمسيه بعد العملية مباشرة , ...
بعد العملية ...
بعد السحور اول يوم للعملية , حسيت بالم شديد ( صداع ) لكن الدكتور قايل لي خذ بندول عند الضروره , و فعلا اخذته و خف الصداع الحمد لله .
من تول يوم لين اول موعد نفس النظام ,, تقطير منتظم وما اطلع بالشمس ابدا ,, حتى داخل البيت البس النظاره الشمسيه .
البعض يقول تبالغ , لكن فكرتي اني اريح العين لأنها تعتبر مثل عين الطفل اي شي يأثر عليها .
(( طبعا الكمبيوتر ممنوع مررره , والايفون < لا تحرص ))
المهم جاء اول موعد ( موعد فك العدسات ) , وشاف الدكتور عيوني و ضحك و نط بوجهي قال وين العدسات !! انا وخشتي مدري وين مطيحهن صراحه غريبه قلت يمكن وانا اتوضأ , او وانا نايم
وبعدها اخذت موعد بعد شهر ,, طبعا كل هالفتره مافيه جديد فقط تغيير في نظام التقطير .
خلال هالشهر فعلا حسيت بتغيير وان الرؤية صارت افضل .
لكن اول اسبوع كان عندي انحراف بالرؤية ( يعني اشوف الشي اثنين )
خاصه قراءة الجوال والالكترونيات غالبا , لكن اللوحات و الرؤية عموما تعتبر جيدهـ .
رحت لثاني موعد بعد شهر , طبعا شي روتيني بس عشان يشوف الدكتور و يتأمد اذا فيه شي والا لا .
بعده اخذت موعد بعد شهرين .
طبعا خلال هالفترة النظر يتحسن للافضل ,,
قبل الموعد الثاني صار عندي انحراف شديد بديت كل شي اشوفه اثنين
* ملاحظه ما اشوف الشي اثنين جنب بعض لا فوق بعض
و رحت للموعد وقلت للدكتور قالي طبيعي , انا قايلك لا تكلمني الا بعد ثلاث شهور .
و اخذت موعد بعد شهر و نص تقريبا ,, و رحت للموعد و فحصت النظر بحرف E و طلع 6/6 الحمد لله
فعلا صدق كلامه بعد العملية بثلاث شهور يكون التغيير الفعلي .
و بعدها بشهر هذاي قاعدن احاتسيكم
* ملاحظات من وجة نظري ..
- لا تسوي العملية الا وانت ماخذ اجازة .. افضل لك عشان تكون مريّح عيونك للاخر و لا تتعب بأوقات التقطير ( ماله داعي تقطر وانت بوسط محاضرة والا بالدوام )
- لا تستعجل على النتائج .
- تأكد انك فعلا تحتاج للعملية و ناقش الدكتور بكل شي .
- لازم تعرف انك بعد العملية عيونك ضعيفه واي شي يأثر عليها .
- من التوصيات , البخار و الدخان ( النار ) يفضل الابتعاد عنها لمدة 4 شهور .
- القطرات القطرات القطرات القطرات و اعيد القطرات هي اللي ساعدتني بعد توفيق الله لأني منتظم بها و الحمد لله ( شي مدته ثلاث شهور ) وشي للحين مستمر عليه .
و بس
وتراي ما كتبت الموضوع الا لأني فعلا حاس بالوضع قبل و ان الواحد يحتار بهالعملية و يبحث عن اجوبة كثيرة .
واي استفسار انا حااضر لكم
واللي يروح بسويها عند العمر , يعلمني عشان اخليه يكتب اسمي انه انا اللي وصيته و يمكن يعطوني جائزه ( انا كتبت خالتي يا حبنيله )
< تقاسموها
( اللي وده يغير اسم العضوية وش يسوي ؟؟ من عنده الدبره ؟ )
الحمدلله على السلااامه
ياخي مدري ليه يقمص قلبي كل ماقالت الفلبينيه ( كم ) هههههههههه
حسيت بحالتك لاني احتمال اسويها ومحتااااااااااااااا ( الالف من هنا للسعوديه ) ااااار
وشسمه ذا .. وعاد لو اني قررت راح اسويها هنا بايرلندا والعمليه ب ٥٠٠٠ ريال على الرغم من الغلاء اللي عايشين فيه.
بس ياااخي فيه اشيا كثيييره براسي اسئله وشكوك ومدى نجاح العمليه وكيف بتعامل مع الوضع والاضرار الناجمه والتي تطرأ عالعين على المدى البعيييد هل هذا الكلام صدق ولا كلام فاضي ووووووووووو
المهم اني مررره مروق وقلت الحين عمري ٢٤ خلها عقب سنتين افكر فيها صح كذا جلسه بيني وبين نفسي وعاليوتيوب واحاول اتعود على كلمه ( كم ) عشان يصير عندي مناعه .. والامور سهاله ان شالله
اندمجت خخخخ والحمد لله على سلامة عيونك
ذكرتني اول مااكتشفت ضعف نظر عيوني والله بكيت الحمدلله على كل حال وصراحه احسدكم يالرجال ومو حسد زوال أو غيرها نعمه لا والله ودي يكون عندي مثلكم اقضي حاجتي بنفسي وقت الضروره
الحمدلله على السلااامه
ياخي مدري ليه يقمص قلبي كل ماقالت الفلبينيه ( كم ) هههههههههه
حسيت بحالتك لاني احتمال اسويها ومحتااااااااااااااا ( الالف من هنا للسعوديه ) ااااار
وشسمه ذا .. وعاد لو اني قررت راح اسويها هنا بايرلندا والعمليه ب ٥٠٠٠ ريال على الرغم من الغلاء اللي عايشين فيه.
بس ياااخي فيه اشيا كثيييره براسي اسئله وشكوك ومدى نجاح العمليه وكيف بتعامل مع الوضع والاضرار الناجمه والتي تطرأ عالعين على المدى البعيييد هل هذا الكلام صدق ولا كلام فاضي ووووووووووو
المهم اني مررره مروق وقلت الحين عمري ٢٤ خلها عقب سنتين افكر فيها صح كذا جلسه بيني وبين نفسي وعاليوتيوب واحاول اتعود على كلمه ( كم ) عشان يصير عندي مناعه .. والامور سهاله ان شالله
وشكرا على سرد التجربه
سي ياا
ههههههههههههههههههههههه الله يوفقك و يسعدك و ترجع لنا بالسلامة ان شاء الله .
و بالنسبة انك محتار , هي المسألة تبيك تجزم بس .. انا اول ما فكرت فيها ماكنت جازم , حتي اني استخرت و قلت لا لا الخيره اني ما اسويها < لاعب على نفسي
لكن بعد ما سويتها تندمت على الوقت اللي ما سويتها فيه ...
من ناحية الاضرار هي ان شاء الله مافيه اضرار و اللي مسوينها حول العالم 90 مليون على ما اعتقد
اهم نقطة هي انك تشوف دكتور ثقة , لأن بعضهم يشوف انك تحتاجها لكن الافضل ما تسويها لكن يقولك سوها (( يبي يستفيد من دراهمك )) هنا الخطأ , و الشي الثاني انك تعرف و تفحص اكثر من مره و تعرف انت تحتاج ليزر او ليزك وهذا يحدده لك الطبيب .
اما من ناحية الخوف و التردد , صدقني سهلة جداااا و الله بتضحك على همرك من الخوف و التردد اللي كنت فيه .
و اتمنى لك حياة سعيدة يا رجل
إقتباس
الرسالة الأصلية كتبت بواسطة waw500
اندمجت خخخخ والحمد لله على سلامة عيونك
ذكرتني اول مااكتشفت ضعف نظر عيوني والله بكيت الحمدلله على كل حال وصراحه احسدكم يالرجال ومو حسد زوال أو غيرها نعمه لا والله ودي يكون عندي مثلكم اقضي حاجتي بنفسي وقت الضروره
الله يسلمك من كل شر .,
و وقت الضرورة الكل موجود لكم يالبنات لكن حنا اللي وقت الضرورة ان ما دبرنا انفسنا ما لقينا احد
قبل اي شي
الحمدلله على السلامه ي رب
والشي الثاني مشاءالله تبارك الله
الله يحفظ لك عويناتك ي رب
بسراحه حبيت صاحبك اللي يعرج ههههههههه
//
حبيت اسأل وش سويت ليزر او ليزك
وكم كان نظرك "الضعف اقصد" وكم عمرك << من العمر نسبله نجاح العمليه
انا ضعف النظر جهه 2.5 ----- 2
وفيها انحراف ...
والاشكاليه والاهم عندي حساسيه "جفاف العين او احمرار العين "
كنت بسويها وحسب الافاده بتزيد علي ! فـ الان ابجرب
اغدي الطيب تقدم حبتين :P
اذا سابقا عندك حساسيه ياليت تفيدنا
’،
اعتبرني اول ضحايا موضوعك
كنت "ارقل" ودي اسويها وماش
لكن الحين مشاءالله تبارك الله علي الله لايضر"ن"
تحمست وحجزت موعد الله يستر لا اهون
وموعدي بعد 17 يوم تقريبا
انا محتار وخايف كيف يلمس عيني شي غريب وانا اناضر بعد
لاكن عندي سؤال نظرك قبل العمليه كم كان وبعد العملية كم صار
المهم خوينا الي طلع يون ويعرج وش صار علية
الحمدلله على سلامتكك
تجربة جميلة ومفيدة
اخوي عملها والحمدلله تحسن النظر
لاكن الاختلاف انه عملها بيوم ولايوجد تقطير ؟!
ولا انتظر ٣ شهور وهكذا
يعطيكك العافية .. شكرا لكك
دمت يرعاية الرحمن
الله يسلمك و يخليكـ .,
على ما اعتقد ان اخوك سوّاها (( ليزك )) و فعلا الليزر يخالف ما بعد العمليه عن الـ (( ليزر ))
والعفو و شكرا لك على تواجدك .
إقتباس
الرسالة الأصلية كتبت بواسطة مسّتريح البال
شرح وافي ومتكامل اشبع فضولي
عند طرحي للسؤال في الموضوع المخصص لأسئلة الأعضاء لم أتوقع إجابة وافية بهذا القدر
أشكرك ياجميل
دمت 6/6
العفو يا عسل و تحت امرك يا غالي ., واتمنى لك 6/6
إقتباس
الرسالة الأصلية كتبت بواسطة الســفيرة
الحمدلله على سلامتك
انا لي سنين وابي اسويها واخاف
وكلما انتظرت اكثر ارتفع سعر العمليه اكثر ، من فتره كانت حول 6 !
احد عنده معلومات عن مغربي او الكحال بالشرقيه ؟؟
الله يسلمك , بالنسبه للسعر ممكن تحصلين ارخص من كذا في مستوصفات ثانيه ., فيه كثير بـ 6 .
اما بالنسبه للمعلومات فهي للاسف مو عندي .
اتمنى لك التوفيق و السداد .
إقتباس
الرسالة الأصلية كتبت بواسطة الراقي 20
انا محتار وخايف كيف يلمس عيني شي غريب وانا اناضر بعد
لاكن عندي سؤال نظرك قبل العمليه كم كان وبعد العملية كم صار
المهم خوينا الي طلع يون ويعرج وش صار علية
نفس الشعور اللي كنت اتوقعه , لكن سبحان الله العين شيء خاص ,,. فعلا كيف احد يلمس عينك و ما تحس بشيء ! قدرة الخالق سبحانه .
بالنسبه للنظر , كان اليمن و اليسار حول 2.7 تقريبا ..
لكن الحين ياربي لك الحمد على كل نعمه .
وخوينا ابشرك اموره تمام ( ضحك على نفسه ) بعد ما ضبطت اموره
تجربتي لعملية الليزر كل شي قبل و بعد التفاصيل كامله., حيااااكم 
< بيمسكوني قبل اطير يا حبنيلي 
الحمدلله على كل حال وصراحه احسدكم يالرجال ومو حسد زوال أو غيرها نعمه لا والله ودي يكون عندي مثلكم اقضي حاجتي بنفسي وقت الضروره
الوضع العادي
