السلام عليكم ورحمة الله وبركاته


اول شي هاردلكم الهزيمه وإن كانت من الفتح على قولة البعض

لكن يبقى الفتح فريق كبير وفريق متمكن عنده لاعبين مميزين ويستحقون الفوز , في ظل المستوى الهزيل اللي ظهر على زعيمنا


اما بخصوص النقد ,

يعلم الله اني استغرب من بعض الجمهور هنا بالمنتدى بالذات ناهيك عن اللي يحضرون في المدرجات ويشتمون الاعبين في حال ضاعت هجمه او غيرها الى درجة شتم والديهم .!!!

بعض الجمهور اللي هنا في المنتدى ... تلقاه سلمك الله طايح مدح في لاعب وترفيع وخذ كلام معسووول وتغزل في فنيات هالاعب ...

واخرهم سالم الدوسري .. ياكم موضوع تكلم عنه وعن لعبه وفنياته
وياسرع ماقلب نص الجمهور عليه وانه مايعرف يلعب وفاشل واطردوه من النادي و و و و .... الى اخره


طيب تدري وش ظروف الاعب ؟
ممكن عنده شي مشوش تفكيره ... ممكن متضايق من شي .

الاعب بشر يا اخوان ويمر بظروف ما احد يدري عنها


بتقولون ان الفريق اليوم كله ماقدم شي يعني كل الاعبين عندهم ظروف .؟


ليه لا ... ممكن كلهم ماهم راضي عن شي في النادي .. مثل المدرب او محصلين معامله غير مرضيه لهم واثرت عليهم


لاتنسون ان سامي الجابر رحل عن النادي وترك فراغ كبير .. مستحيل انه يتعوض
سامي كان اقرب شخص من الاعبين والكل لاحظ ايام اشرف على تدريب الفريق الموسم الماضي بعد تسريح المدرب كيف الاعبين قدموا مستويات حلوه


ياشباب الاعبين يقرون المواضيع ويتأثرون فيها فصدقوني لو ضغطنا على لاعب بالمواضيع وانتقدناه نقد جارح مثل اللي حاصل بالمنتدى الان ... راح نخسرهم


ياسر القحطاني لحق على معناة كبيره ومع الوقت اختفت المواضيع فكان فرصة النقد اللي يراد به الخير للاعب وبعدها شفنا تجاوب من ياسر وبدا يرجع لمستواه شوي شوي


فخلونا نكون عون للاعبين ولا نصير فرعون عليهم ....
بعد كل مباراه كل واحد فينا يستلم له لاعب وينشر غسيله


اتمنى اني وصلت اللي بقلبي ويعلم الله اني اتكلم وانا منقهر من الهزيمه لاكن متفائل في الزعيم انه راح يرجع ومتفائل بكلام الاعبين بعد المباراه دامهم عارفين خطاهم ويقرون فيه فهذا بداية العلاج





دمتم بود