ملّي ناظريك ملّي / ملّي ناظريك ملّي ، ملّي ناظريييك ..
ما أجملها من ليلة في لندن عن ألف ليلة وليلة / عودة جميلة للفريق بغض النظر عن النتيجة ولكن الأداء أهم بكثير ، والله زمان عن هالأداء ياتشلسي وعن اللعب الهجومي اللي فاقدينه من فترة طويلة كل الفريق قدم مباراة رائعة لاميكيل ولا لامبارد ولاغيرهم كانوا سيئين بالعكس الكل كان ممتاز وبلاش خرابيط مالها داعي مايعني إن لاعب اخطأ خطأ إنه كان فاشل في المباراة ، ميكيل كان رائع جدا رابط الدفاع بالهجوم وكان عامل قوة بالفريق صحيح إنه أخطا بتمريرة كلفتنا الهدف الثاني لكن هذا مايعني إنه فاشل ، لامبارد أيضا كان رائع وقائد الهجمات / هازارد وأشلي والنجم أوسكار كلهم كانوا رائعين جدّا والجميع كانوا ممتازين ..
كل هدف لازم يكون فيه خطأ من الدفاع أو غيرهم يعني هالشيء مجبورين نشوفه غالبا ولكن في نفس الوقت شفنا أداء ممتاز بغض النظر عن الأهداف / الهدف الأول فيه سوء تغطية من الدفاع ، الهدف الثاني كان خطأه غير مناسب خصوصا إنه من القائد ، مو معقول أشوف تيري يلعب على كشف التسلل المشكلة انه مانجح فيها كان الأفضل يكون مع المهاجم بالإضافة إلى تقدم لويز الخاطىء وما ألوم ميكيل أبدا بالعكس كان مغطي لكن الغلط كان من المدافعين ..
لانيمار ولا عشرة من أشكاله ، أنت مفخرة وبحقّ وش هالأداء والإمتاع اللي شفناه إستحقيت نجم المباراة بدون جدال ، تكفى يا دي ماتيو بلاش تحطيم مرة ثانية وإعتمد عليه في المباريات الجاية أفضل من مواطنه رامي / ثالث مباراة لك مع الفريق وأول مباراة لك في الشامبينز وتسجل هدفين وقدام مين ؟ قدام اليوفي بطل إيطاليا ، موهبة وبحقّ ..
أحيان ودّي أبوسك ، وأحيان ودّي أفقع وجهك ، مرة تكحلها ومرة تعميها / التشكيلة اللي دخلت بها كان هي أنسب تشكيلة وهذي تحسب لك تكتيكك واللعب اللي إعتمدت عليه برضوا يحسب لك خصوصا أوسكار واللي أخفى خطورة بيرلو تماما ، لكن خروج رامي كان غلط اللاعب قدم مباراة ممتازة خصوصا في قطع الكور وتمنيت إستمراره لنهاية اللقاء كان بيفيدنا أكثر من بيرتراند // أيضاً أوسكار خروجه غريب لعل الخوف من إصابته خلاك تبدله وأنا معك بهالشيء ، لكن في المقابل كان فيه لاعب لازم تطلعه واللي هو توريس ، اللاعب كان ثقيل ، في كم كورة شفتها كانت عند مدافعي اليوفي وتوريس بينه وبين المدافع مترين والرجال واقف ومايتحرك / مو معقول هالشيء يصير أيضا خرّب على الفريق أكثر من فرصة لما تشوف هازارد أو رامي يعطون الكورة لأوسكار يخش غلط وياخذها وتنقطع منه ، كان دخلت موسيس أفضل ، لاعب متحرك وسريع وبيفيد بالمرتدات وكان بإمكاننا نلقط كم هدف ..
صحيح إن أوسكار غطى عليه اليوم لكن ما أخفي دوره اللي قام به في المباراة كان النجم الثاني بالفريق صنع الهدف الأول وكان مصدر قلق للاعبي اليوفي
حُرم من ضربة جزاء واضحة بشاهدة خبراء التحكيم قدم جملة تكتيكة رائعة مع ماتا بس ما كملت / كان محرّك الفريق بشكل كبير ..
ما أخفي حقك في المباراة كنت من أفضل ثلاثة بالفريق أمس ، ثقة وجمال وأداء وكل شيء يكفي صناعتك للهدف الثاني ، ماكذب من قال إنك أفضل ظهير مقدم شغل كبير في المباريات الآخيرة ، جددوا له بأقرب وقت بالعقد اللي يبي .. //
بداية جيدة ، المباراة القادمة أمام فريق مغمور في الدنمارك قادرين على حصد النقاط الثلاث على أمل تعادل اليوفي ..
خارج حوار المباراة : يوم السبت مباراتنا أمام ستوك على أرضية الستامفورد متشوّق كثير على هالمباراة وعلى شوفة [ ماتا - وهازارد - واوسكار ] مع بعض ، الجولة القادمة راح تشهد قمتين [ ارسنال - مان سيتي ] [ ليفربول - مان يونايتد ] وهذي فرصة للفريق أن ينفرد بالصدارة ..
أيضا يوم الثلاثاء القادم أول مواجهة لنا في كاس الرابطة أمام ولفرهامبتون ، وحنا على موعد لمشاهدة لاعبي الفريق اللي ماشفناهم [ روميو - سيزار - موسيس - مارين ] ..