مباره النهائي منقوله على ...... <<< ايه هين اشوفها - نادي الهلال السعودي - شبكة الزعيم

بـبـاي · #1 08/04/2003, 01:23 AM

السلام عليكم يالهلاليه

ماقول الا ياشين التلفزيون شيناه ..........
الحين مافيه احد يقولي المباره بتنقل على ANA / MBC في امريكا
ولا في احد يقولي ان المباره منقوله عالـ دبي الرياضيه <<<< والله وماقالت ينقلونها

ولا فيه احد وده يقولي ان التلفزيون السعودي قرر تبديل بث القناه الاولى بالقناه الرياضيه <<< هذي غاسلن يدي بديزل يسوونها

وش السوات ياعالم ...... الحين مو معقول مباره جماهيريه نهائيه هلاليه اهلاويه سعوديه ولا احد يأكد ان الام بي سي راح تنقلها ....
حنا مانبي تنقل اي مباره بس يكفي تنقل النهائي بصر المربع .... بس النهائي ... مو معقول من زمان الواحد ماشاف مباره للهلال .... ماغير شغل الكمبيوتر والعب بلوت واقعد تسمع المباره عالبالتوك

.....

تصدقون ان في بالي اني اشيل الستالايت العربي لاني ركبته انا ورفيتزي وماستفدنا منه

... ماغير مانشوف الا الاخبار اللي ماتسر

واحب اسالكم وش السالفه والوعود اللي وعدتونا انكم تكلمون المسوولين في التلفزيون السعودي (( حفظه الله من اي مكروه

)) انهم يشيلون هالقناه الاولى اللي مسويه زحمه في الستالايت ويبثون بدالها يالثانيه يالرياضيه

..... والا نسيتونا

..... ترا والله مالنا الا الله وانتم ياشبكه الزعيم .... والا ترانا ضايعين

الواحد وده يشترك في هالقنوات الاوربيتيه والارتيه بس الطفران طفران

الحين حبيبنا الغالي نقوشي والمتحدث الرسمي وناقل الاخبار اللي تمنيت ولو مره يقول المباره راح تنقل على الام بي سي اللي مااشين من القناه الاولى الا الام بي سي .... نقوشي ماوده يقول ان القناه راح تنقلها ؟؟؟؟ ياليت .... كان يصير اكثر غلاوه مثل ماهو غالي

انا داري اني لو تكلمت او ماتكلمت ماراح يصير شي .... والقناه الاولى راح تضل في الستالايت وجودها مثل عدمها بل عدمها ابرك من وجودها المــــــمـــــــل

على العموم اتمنى تتواجدون في استاد الملك فهد الدولي وتحضرون المباره لاني والله لو اني بالسعوديه "شف لاحظ بالسعوديه يعني موب في الرياض بعد " راح احضر المباره حتى لو اني ساكن في عرعر

.......

اتمنى منكم ياهل الرياض بالخصوص تخلون التلفزيون على جنب وتخلونه للطفارى ولبعيدين الدار وتتواجدون في الملعب وتازرون فريقكم نادي الهلال السعودي ...... لانه بحاجت تواجتكم في ارض الملعب ..... ولا تنسون ان المباره الاربعاء يعني مالكم عذر يالدوافير

........

انشاء الله مبرووووك من الحين والكاس هلالي

كايدهم · #2 08/04/2003, 01:32 AM

يازين الحضور بالملعب وتشوف اللاعبين قدامك

وياشين اللي مايقدر يشوف النهـائي واعصابه على جمر

..

.. و فيه شبكة الزعيم شف المباراة فيها ... ولاحق على خير اذا تبيها مسجله نرسلها لك ..

تحياتي

بـبـاي · #3 08/04/2003, 01:55 AM

انتبه بس تنصك بعين وانا اخوك هههههه

ايه الله لنا ومالنا غير البالتوك

canada2002 · #4 08/04/2003, 05:30 AM

قطعت قلب تشكيلي أبكيلك والله العظيم اني قاعد ادووووور واسئل كل الشركاااات الي في كنداااااا احاول اجد حل ولاكن كلهم يقووولون ضف وجهك....

والله حاااس فيك حبيبي بس ان شاء الله بنشوفهااااااا بنشوفهاااا واباركلك بالكاس

بس حبيبي واحد بلغني يقووول اننا ممكن نشوووف الشوووط الاول على السعوديه الاولى بس الشوووط الثاني مثلك خااابر ....

تحياتي

اخووك المشتب canada 2002

الترنيدو الهلالي · #5 08/04/2003, 05:37 AM

تركز القنوات الفضائية وبالذات الرياضية منها يوم غد الأربعاء كامل جهدها لنقل وتغطية نهائي كأس سمو ولي العهد لكرة القدم بين الهلال والأهلي على استاد الملك فهد بالرياض وذلك بهدف وضع المشاهد أمام الحدث بصورته الحقيقية وكلفت قناة أوربت معلقين للمباراة وحسب رغبة المشاهد لمتابعة صوت معلقه المفضل سواء كان ناصر الأحمد أو نبيل نقشبندي إلى جانب استقطاب عدد من المحللين الرياضيين أمثال عبدالمجيد الشتالي ويوسف سيف والناقد الرياضي أحمد صادق دياب كما ان القناة السعودية الرياضية هي الأخرى أولت لهذا الحدث الرياضي الكبير اهتماماً خاصاً من خلال النقل المباشر وستكون بدايته السبت قبل اللقاء بساعتين إلاّ ربع وسيتخلل ذلك استضافة مدير المنتخب السابق فيصل عبدالهادي أما المحللان الأساسيان اللذان سيتواصلان مع البرنامج حتى نهاية اللقاء فهما الثنائي نجيب الإمام وحامد عبدالله وأكد الزملاء في القناة الرياضية ان الاستديو سيكون أشبه (بالاستديوهين) بهدف إعطاء نهائي الكأس حقه من الاهتمام والتغطية الإعلامية مع تواجد الثلاثي عيسى الجو وخالد البيشي وعبدالعزيز القحطاني في أرض الملعب لإجراء الحوارات مع الإداريين واللاعبين والحكام. في المقابل فإن قناة (ART) الرياضية هي الأخرى ستقوم بتغطية النهائي بأسلوب جديد ومختلف وذلك من خلال استديو تحليلي في القاهرة مع تواجد أكثر من مذيع في مكان الحدث كما ان قناة (MBC) ستقوم بنقل المباراة على الهواء ومباشرة. يذكر ان الزميل محمد البكر الملقب بزعيم المعلقين سيتولى مهمة الوصيف والتعليق على نهائي كأس ولي العهد بالنسبة للتلفزيون السعودي.

جريده الرياض تقول ان الـ MBC تبي تنقل المباراه.
واللي عنده الـ ART يتفرج على عبد الله غيث وهو يمثل ابو لهب

بـبـاي · #6 09/04/2003, 01:21 AM

canada2002 ايه والله ان الواحد مقفله معه .... بس انشاء الله يجيبونها كامله على غصب ون مع اني داري اننا ماهميناهم ولاجابوا خبرنا

الترنيدو الهلالي .... الله يسمع منك وان شاء الله خبر الرياض correct

باي

أبوحمـــ15ـــــــــــد · #7 09/04/2003, 11:39 AM

بباي..

فيه حل ابشر به..

منتديات النمر بتنقل المباراة صوت وصوره...

الرائع102 · #8 09/04/2003, 01:54 PM

اخو بباي عندي ملاحظه:
قل
ما لي الا الله ثم شبكة الزعيم
ولا تقل
ما لي الا الله وشبكة الزعيم
لان العبارة فيها مساواة بين الله وبين خلقه تعالى الله عن ذلك علوا كبيرا

العجوز المعرعره · #9 09/04/2003, 02:54 PM

إقتباس


	..... ترا والله مالنا الا الله وانتم ياشبكه الزعيم ....

اهين بباي ..انشاء الله تقدر تشوف المباراه وتشوف اللي يسرك

.....بس يابباي فيه شئ في

جملتك هذي ..ووقعت في ذنب عظيم...اقراها زين ..ثم عدلها

مشكور

Mr. Away · #10 09/04/2003, 07:00 PM

sorrey guys .... I am Popey but when i read your replies
I wasn't working in my computer so now I am typing this with new reply with new username or nickname that i signed up for days before from another computer that doesn't support arabic language

I did that because i found out that you'er right and It's against our religion .... sorrey about what I said .. .and god bless me
and thanks "hilalieens" for telling me the big mistake i said

asta3'for allah al3theeem

Good Luck for Hilal in the Final

bye

ماجد - شاعر النت · #11 09/04/2003, 07:54 PM

اشكي لك الحال وانا اخوك كلنا في الهوى سوى ما عندنا إلا غصب واحد ودبي الرياضية

والله يكون في العون :sad: