وماهو العقل بنظرك اوزيل ؟

انا استغرب من بعض الجماهير المطالبه بعدم تجديد الاعب طيب عطني البديل
البديل نستطيع ان نحظره وهل البديل بسرعه يتأقلم او بحاجه لاخر الموسم لكي يعتاد على اجوائنا واخيرا وليس اخرا المدرب من يقرر بقاءه اورحيله
اشكرك طرحك جميل ومميز واختلاف الرأي لايفسد من الود قضيه

لاعب ممتاز في الحركة وازعاج المدافعين فقط

ولكن في التهديف يبغى له كثيييييير

اذا في احسن نجيبه اذا مافي نبقى عليه

اسيا يبغالها مهاجم خورافي و اتمنى دروقبا يجي
الكوري لاعب ممتاز بس مشكلته انه مثل اي مهاجم يعني طريقة لعبه نفس ياسر

يععطيكك آلععآففيهه آولآآ
--
ههرممآش لآآ يروـحح
--
آلكووري لكك عليهه لكنن ممعع يآسسر رآـحح تشوفف آبدآعع

بما إنه بمكان اللاعب الآسيوي أقول نصبر عليه وعندي إحساس إنه سيكون له شأن
بالمتبقي من الآسيوية فلو قابلنا نادي كوري والا ياباني سيكون كورينا عارف لطرقهم باللعب
اثقلوا على الكوري وعقده 4 سنوات مع الهلال نصبر عليه على الأقل لمنتصف الموسم القادم
وبعدها نشوف له حل لو ما ظهر بالمستوى الذي يتوقعه غالبية الهلاليين .
وعندكم مراكز 3 لاعبين نحتاج 1 دفاع و1 محور دفاعي و1 مهاجم أو صانع لعب ممتاز
إذا عاد ياسر .

لا أؤيد الاستغناء عن الكوري .

إقتباس الرسالة الأصلية كتبت بواسطة عبدالحكيم العتيبي _ قبل اسبوعين راسلني احد ابناء العمومه نصراوي وقالي سنحصل على كاس الابطال ونخرجكم من اسيا ضحكت وارسلت له قلت بالعافيه وان شاءالله تمثلونا في اسيا خير تمثيل ,, بعد المبارة ارسلتله وقلت له خيرها بغيرها ,,, ارسلي بعدها قال ستطلعون من دور الثمانيه من بني ياس ضحكت كثير وارسلتله بعد السبعه مارد ولكن استشهدت من ذلك ان عقلية المشجع النصراوي لاتقل عن عقل ابن لايتجاوز الخامسة من عمره - اخيرا وليس آخرا مبروك للهلال وللاتحاد وللاهلي وايضا للاتفاق مبروك فعلا للوطن الغالي اجازة موفقه للجميع وزوجات وافراح بحول الله للجميع لاتنسوني من دعائكم الصادق اخوكم ابو يزيد

اضم صوتي الى صوتك الكوري لازم يمشي فااااااااااااااشل

أشكرك على موضوعك ..
ولكن تسمح لي اتناقش معك بخصوص الكوري واثبت لك إن طلبك إلغاه عقده كان من نظرة ( طابت النفس منه ومانبيه لو ايش) ومن منظور عاطفي موب فني ابد .. وحتى جملتك في الكوري " لا نريد ولا نؤيد بقاءه مهما كان" يثبت لي إنك مع كامل الإحترام حكمت عليه بالفشل وماشي بنظام " عنز ولو طارت "
وهذي النظره العاطفيه ما ألومك عليها .. كلنا نبي الهلال فيه نجوم من طراز عالي .. لكن اتمنى نحكم العقل شوي

أول شي .. خلنا نقيم مستوى اللاعب .. خلال الموسم الماضي
1- اللاعب بدا بداية قوية في معسكر بداية الموسم وكانت حساسيته للتهديف مرتفعه ماشاء الله ( بحكم إنه كان متواصل اللعب في الدوري الكوري وجانا حامي ) .. حتى المدرب دول كان يشركه بشكل اساسي بداية الموسم وكان فعال وسجل اهداف .. احلاها كان هدفه الاول في الاهلي إلي فاز فيها الهلال برباعيه..وبعدها اصيب ,, ومتأكد لولا الإصابه كان استمر اساسي وابدع وامتع واندمج مع المجموعه من بدري

2- اللاعب ما اخذ فرصته كامله ومع ذلك معدله التهديفي ممتاز جداً وياليت الاعضاء اصحاب الاحصائيات يجيبون لنا كم مباراة لعب فيها الكوري وكم دقيقه لعب وبتعرف إن معدله التهديفي عالي مقارنة بالدقايق إلي لعب بها

نجي للرد على كلامك بالنسبه للي قلته في الكوري ..
جب لي احصائيات واثبت لي بالأمثله إن اللاعب ماينفع واتناقش معك فيها .. لأن إلي لاحظته في كلامك إنه إنشائي فقط .. وبالعكس انا عندي امثله تثبت لك إن كلامك فيه مجحف وسلبته ميزات يتميز بها عن غيره

أولها .. كلامك إن اللاعب غير مهاري والفرص تجيه على طبق من ذهب ويسجلها ..مردود عليك مع احترامي لك ..

خلنا نجي نستعرض مهارات اللاعب..
أ- لاعب سريع ما شاء الله وهذي ميزه نادر ما نشوفها في الدوري السعودي ومهارة السرعه بحد ذاتها كفيلة بإني افضل هذا اللاعب على أي لاعب جديد ..وشفنا كيف اللاعب ما شاء الله في اكثر من مباراة يكسر حاجز التسلل بسرعته ..

ب- لاعب مراوغ و(مهاري) والأمثله كثيره وواضحه .. تشوفها في بعض اهدافه.. مثل هدفه في الأهلي بالدور الاول .. وهدفه الملغي في مباراة الغرافه الأخيره .. وفرصه إلي كان يحاول فيها في مباراة الغرافة

ج- لاعب جيد جداً في ضربات الرأس وعنده اهداف كثيره مسجلها براسه طوال الموسم ( دورت اهدافه الكامله مع الهلال في اليوتيوب ولا حصلتها وهي اكبر اثبات له ) .. وغير كذا اللاعب عنده قوة تسديد جيده جداً ويحتاج التركيز بس واتوقع لما ياخذ الثقه بتشوف اهداف صاروخيه له .. وتقدر تتابع اهدافه في الدوري الكوري .. تراه يسدد فاولات .. للمعلومية بس ..

د-تمركز ممتاز ورائع وردة فعل جيده جداً .. والمثال .. أهدافه الثلاث الأولى في مباراة الهلال الأخيره وكذا هدف شفته له مسجله هذا إلي يخلي اغلب الجماهير تبخسه حقه وحق اكثر اللاعبين إلي عندهم ميزة التمركز الجيد بحجة إن أغلب اهدافهم سهله وتجيهم على طبق من ذهب ومثل هالمهاجمين .. ناصر الشمراني وعيسى المحياني ..
ملاحظة .. لاحظ هدفه الثالث وهدف الهلال الرابع في المباراة الأخيرة وقلي بصراحه .. فيه لاعب سعودي ممكن يسجل هالهدف باستثناء ناصر الشمراني ؟

هـ -تحرك بدون كوره و الضغط على المدافعين إذا كانوا حاملين للكوره والمثال هدفه الملغي في الغرافة ولاحظ كيف ضغط على المدافع إلي كان اقرب للكوره واخذ الكوره منه ومر من المدافع الثاني بمهارة وسددها قوية في العارضه ( هالهجمة تجمع لك بين مهارة الضغط على حامل الكوره والمراوغه والسرعه وقوة التسديد )

و- اللاعب عنده ميزه ما لاحظها كثير من الجماهير وهي صناعة الفرص .. والمثال صناعته لهدف الفريدي في الغرافة بطريقة فيها قتالية .. وصناعته لهدف سالم الدوسري في المباراة الأخيرة

ز- مهارة دقة التمرير عند اللاعب ممتازه بشكل عام .. وهذا يدعم ميزة إن اللاعب يتميز بصناعة اللعب وصناعة الأهداف للاعبين الثانيين ..

ترى جبت لك اغلب الأمثلة من المباريات الأخيرة إلي هي قريبه لذاكرتي وذاكرة اغلب الجماهير ومثل ما ذكرت .. دورت اهدافه الكامله في اليوتيوب ولا حصلتها .. مع إني شفتها قبل يومين

واسطوانة إضاعة الفرص إلي نسمعها من الجماهير .. انا اشوف إن سببها إن اللاعب توه ما تأقلم مع المجموعه وناقصه الفرصه الكامله علشان ياخذ الثقة في نفسه وينفجر مثل ماشفنا في مباراة بني ياس .. إلي ابيك تتابعها وتشوف إن اللاعب سجل نسبه كبيره من الفرصه إلي جاته واضاع فرصه أقل من إلي سجلها ..

وبعدين ما ننسى العوامل الثانيه بجانب الإصابه إلي اثرت على اللاعب وكانت كفيلة بأن ابداعاته تتأخر مثل الجانب النفسي ..

وكلنا نعرف إن اللاعب يعرف كوري بس ولا يتكلم انجليزي ولا عنده مترجم .. يعني تحسه مثل الأطرم بين اللاعبين ويتواصل مع اللاعبين والمدرب بالإشارة .. وفوق هذا كله ماجابوا له مترجم ..والآن يدرس انجليزي على ما اعتقد علشان يقدر يتواصل مع الناس بطريقه افضل

واذكر كان فيه خبر إنه يبي يجيب اهله وفي هذيك المده الادارة توها ماتحركت .. ومدري جابت اهله او لا

طبعاً هذا كله بغض النظر عن الجانب الفني وعدم اعطائه الفرصه باللعب لما تعافى لانه سبب فني من المدرب ..

بعد كل هالكلام .. ويوم بدينا نشوف اللاعب بدا يتصاعد مستواه بشكل تدريجي .. يجي بعض الجماهير ويطالب بإلغاء عقده .. شي مايدخل العقل مع احترامي ...

بعدين ترى موب شي سهل ابد إنك تلقى اجنبي آسيوي مميز .. والمميزين متواجدين في شرق اسيا .. كوريا الجنوبيه واليابان .. واستراليا .. ومن المعروف إن هالنوعية من اللاعبين ما يتأقلمون بسرعه لاختلاف الاجواء كلياً ثقافياً وجغرافياً .. يعني يبي لهم وقت علشان ما يبدون يندمجون

وإذا تبي تلغي عقد الكوري وتجيب غيره من شرق اسيا ( كأنك يا ابو زيد لأن راح ندخل مرحلة .. عطوا اللاعب فرصه توه جديد ... وإلخ )

واللاعبين العرب مايملكون المميزات إلي يمتلكها هاللاعب مع كامل الإحترام . .وأقرب لاعب ممكن اقارنه بالكوري واحس فيه تشابه بالأسلوب هو الحوسني .. واشوف إن الكوري يتفوق على الحوسني بالسرعه وصناعة اللعب وأهداف الرأس..

يعني باختصار اتركوا العاطفه وحكموا العقل ..

تقبل تحياتي .. وردي هذا شكلي بحطه موضوع لوحده هههههههههههههههههه