[c]
السلام عليكم ورحمة الله وبركاته
واسعد الله اوقاتكم بكل خير ..

الله يخااااااااارجنا بس ..

& يقول المثل .. ( يامن شرى له من حلاله علة )
يجيك الواحد منا << حنا يالشباب .. في ريعان شبابه ..
وش زينه ووش ملحه << اسم الله علينا من هالعيون >>
وخالي من السكر والضغط << والكحول
وقال : ابي اتزوج !!
(( ياأبن الحلال انت .. انت وش تبي بالغثاء ووجع الراس
.. انثبر .. وخلك عزوبي اصرف لك ))

وتمسك معه ويعاند الا يتزوج !! << جنت على نفسها براقش !!
المهم يبدأ رحلة الالف هم .. بهم ..

ياخذ امه وابوه .. ويالله .. رايحين يخطبون
& يجون عند اهل البنت .. خطيبة الفلس ..
ودجة الضحى .. قصدي زوجة المستقبل
العم على نياته في البداية .. يوزع ابتسامات ..
ويرحب ويهلي .. هذا قبل يدخل يشاور ..
فاتحوه بالموضوع ..
(( ياابو فلان .. حنا يسعدنا ويشرفنا ..
نطلب يد كريمتكم لولدنا )) << ولدهم مرتكز ومشخص
كنه بيجيب كاس العالم ..
الله ياهالغنيمة اللي رايحٍ
تدورها تبي تجيبها .. << ليتهم ارقدوا بس
العم : والله هاذي الساعة المباركة ..
وحنا ماراح نلقى مثل هالولد زوج لبنتنا << هالحين مايلقون مثله .. بكرة تعايره تقول ان خطابها
كانوا طوابير عند بيت ابوها .. وكلهم دكاتره .. وطيارين ..

ويكمل العم :
(( بس مثلكم عارف لازم ناخذ رأي البنت وامها ..
وهذا الاصول والشرع )) << وهو لو تطلب منه
النظرة الشرعية خمك بالدلة
واستأذن يبي يشاور المافيا اللي جوا ..
قصدي البنت وامها ..
ساعه الا العم جاي .. ووجهه تقول
جاي من سفر .. وماسك خط يومين
هاااااااااه بشر !!
( الف مبروك وانا عمك )
خطيب الغفلة مو مصدق يبي يطير من الفرح
<< اركد يالخبل بكرة تشوف بعينك ويطير عقلك موب انت
العم :بس الحريم وانا عمك لهن شروط !!!
> ويطلع من جيبه ورقه وش طولها ..
تقول مسجلين فيها مقاضي رمضان السنه ذي ..
والسنه الجاية < ...
ويعطيها للخبل اللي جاي يخطب ..
خطيب الغفلة يقرأ ..
1- العرس يكون في القصر اللي اعرست
فيه بنت عمها ساره << انا اعرفها هي عشان
اعرف بنت عمها سارة .. وانا ادري وين اعرست !!

2- السكن .. مايكون مع أهلك ولا في الحارة
اللي هم فيها .. واذا كانوا بشمال الرياض
تسكنون بجنوب الرياض
<< الله اكبر .. يعني تتحملون مشاكل وروائح
جنوب الرياض ولا تتحملون قرب اهلي

3- تجيب فرقة الطقاقات اللي طقن بعرس
بنت خالتها شيخه << وهن مايعرفن هالفرقة لو تجي ..
لان الطقاقات نفس الصوت ونفس الاغاني ونفس الون

4- طلبات الذهب والمجوهرات << للبنت وامها وخواتها
وعماتها وخالاتها وللجيران والظاهر الشغالة بعد ..
<< ياعالم تراه ذهب مو مكسرات

وطلباااااااااااات مالها اول ولا آآآآخر ..

& المهم الضعيف انصدم بالامر الواقع ..
وش يسوي الا يتزوج .. راح وتحمل من هالديون والاقساط ..
عشان يجيب الطقاقات اللي جن بعرس شيخه ..



& والليلة العرس .. بالقصر اللي اعرست فيه سارة ..
ومبسوط الولد ناسي الديون والنكد اللي ينتظره ..
وبدأ شهر العسل وفي هالشهر ويمكن
الشهرين اللي بعده .. ياعيني على هالزوجة .. ملاك ..
ومطيعه .. وتقدر ظروف زوجها .. تستقبله بابتسامه ..
وتودعه بابتسامه .. والدلخ رايق ومبسوط ..

& بعد مرور هالفترة .. وبداية الاقساط ..
وبدت الزوجة الملاك بممارسة الدور الطبيعي
للزوجة من وجهة نظر امها .. قصدي من وجهة نظرها ..


مشهد (1)
جاي من الدوام تعبان .. يبي يتغدا وينام ..

مساء الخير حبيبتي ..
انت جيت ؟ << اجل من ذا شبح ؟ ..
يالله عيوني حطي الغداء على بال ماابدل ملابسي
اليوم ماطبخت .. توني صاحية .. جب لنا غداء من المطعم << من زين هالعذر توني صاحية !!
اجل خلاص .. انا بنام مابي غداء << واصله معه


مشهد (2)

اقول ترى بكرة بروح المشغل .. ابي فلوس
المشغل وشو له ؟؟
عشان افصل ثياب للعزيمة ليلة الخميس !!
ليه كل عزيمة لازم تلبسين جديد ؟؟
ايه .. كل اللي عندي شافوهم الحريم !!
(( الله .. يعني اذا شافوه ماعاد تلبسه .. صارت مناديل موب ثياب ))


مشهد (3)

اقول .. انت .. هيييه << خلاص ماعاد تعرف اسمه !!
هلا ..
جب لي شغاله .. كل الحريم عندهن شغالات !!
شغاله وشو له يابنت الحلال ؟؟ انتي توك شابه والحمدلله متعافيه ولا فيك شئ !!
لا بس الحريم يجون العزايم وكل وحده معها شغالتها .. وانقهر ابي شغاله مثلهن !!
(( حشا صارت اكسسوارات موب شغاله ..
عاد انتي وش تسوين بالبيت انتي وهالدمجه ..
الاكل من المطعم .. والغسيل بالمغسلة ..
فالحة بس تقرين مجلة سيدتي :54: )) ..


@@ واذا ماجاب هالطلبات .. يا أما ينام بالمقلط ..
ولا رايح جاي لبيت اهلها .. مرة يوديها زعلانه ..
ومرة يجيبها راضيه بهدية ولا مبلغ وقدرة ... !!



(( خلك تستاهل يالخبل .. من قالك تزوج ..
هاه وش حصلت غير الضغط والسكر ..
عاد كنك متزوج ماادري من )) ..





تحياااتي للجميع ;) ;)



لحظة خلوني اسجل خروج .. انحشششش [/c]