السلام عليكم ورحمة الله وبركاته

كيف حالكم يااعضاء وزوار الشبكة عساكم كلكم بخير

ياناس انا كل يوم براسي اكتب موضوع وخصوصا اني انا من الناس اللي مايسكت سالفة ورا سالفة وع اي كلمة تطلع براسي سالفة لدرجة ممكن تشكون اني كذاب

عكس واحد من اخوياي الله يهديه اغلب وقته ساكت واذا تكلم تهاوشت معه

لان افكاري معاكسة لافكاره ومستحيل احد منا يتقبل افكار الثاني كعادة الشعب السعودي الموقر اللي مايعترف بالاختلاف وجهات النظر لايفسد للود قضية

طبعا هذا اعتراف مني انه شيء شين اني مااتقبل افكار اللي قدامي ان كانت ماتروق لي ع الاقل لو اجامله واعطيه جوه مو لازم اقوم اناقشه واهاوشه بافكاره

بس قلبي مايطاوعني اشوفه ع خطا واسكت


بس ياناس انا معي بلاك بيري من اول ايام طيحة البلاك بيري السعودية قبل حوالي السنتين وكنت عند اخوياي اذا ضحكت ع نكتة وهم مايدرون وش فيني ودهم يكفخوني ع جوي التعبان

بس سبحان الله مررت الايام وكلهم الحين معهم بلاك بيريات <<<<<هذا جمع بلاك بيري

المهم الحمدلله انا للحين ماوصلت مرحلة اني لاصرت مع خويي او طالع مع ربعي اسحب ع مندوبهم واقعد اسولف ع البي بي لا كل شي له وقته

الحين يطقني الطفش ويرتفع ضغطي بصمت لاصرت طالع مع واحد وطاقها حنك من اليوم معه بالاخير ماهوب معي

لدرجة مررة قاعد اسولف مع واحد ومتحمس بسالفتي من زود الحماس قاعد احرك يديني واضحك بالاخير رافع راسه وقال لي تراني منيب معك وش تقول

طبعا مايحتاج تشوفون خشتي ذيك اللحظة حسيت اني مالي داعي بالحياة

البي بي حلو عرفنا ع ناس طيبين مانستغني عنهم وهم اللي مخلينا متمسكين فيه للحين بس بنفس الوقت لايصير 24 ساعة انت عليه عط كلش حقه

فكرت اكشخ واشتري ايفون بس تذكرت اخوي لمن يجيني عقب شهرين يقول لي نكتة كنا نتدوالها قبل شهرين الين طاح سوقها والمشكلة يضحك عليها وهي عندي قديمة ماعاد قام احد يرسلها بالبلاك بيري وطبعا هذا حال اغلب اللي معهم ايفونات تلقى نكتهم واستهبالهم وكلش قديم مدري احس الروابط حقت الصور اللي تجيهم منتهية صلاحياتها او انحذفت من موقع الرفع

بس تبون الصراحة اشتقت لجمعات وطلعات اول لما تطلع مع اخوياك وكلهم منتبهين لك ويسولفون معك الحين اغلب السوالف ع البي البي واذا تجمعت مع اخوياك كل شوي واحد مطلع جواله ويسولف شوي

ماعاد مثل اول

والله اوقات ماالوم ابوي اذا قال يازين ايام اول مع انها ايام فقر بس حلووة

انا اللي توي بالربيع حق عمري واشتقت لايام اول قبل سنتين يوم كان همي انجح او اجيب معدل بالثانوية او مااحمل مادة

الحين اعوذ بالله هم الوظيفة هم لايطاق

ايه ع طارري الوظيفة ابشركم قدمت ع العسكرية اللي كانت اخر امالي

ومن كثر ماقدمت وانكرشت صرت بالتقديم الاخير خايف ارسب بالعيون ثم بالسمع مع ان كلش سليم

ثم يوم نجحت فيها كلها باقي الله يكرمكم التحاليل هي الوحيدة اللي ماعرفت نتيجتها لانها تتاخر النتيجة وخايف ارسب واخوياي يقولون ياولد انت ماتشرب ولا تتعاطى وش خايف منه امورك سليم ومازلت خايف لين مادقوا علي قالوا تعال جب اوراقك الاصلية

عااااد الحين قدمت اوراقي ورفعوها وزارة الدفاع وانتظر قراري من شهر كل يوم انتظر اتصالهم او ع الاقل ابي اشوف وش صار علي ومو عارف كيف اتواصل معهم

دعواتكم لي يااخواني يطلع قراري واتوظف

عاااد يااخواني واخواتي اعذروني ع الاطالة بس حبيت اسولف معكم شوي ولا تحرموني ردودكم

مع السلامة


اخوكم علاوي الخرج