مدخل :
يمر العمر والسنين والشهور والأيام *** ويبقى حبيبي مثل ماهو " خبل "
_______________________________________
اسعد الله ايامكم يا تماسيح , شلونكم عساكم طيبين ..؟
بالبداية أحب أشكر وجه اللي " اللي هو عباره عن خرطوش ماء في الغالب يكون لونه أخضر ويهرب مويه "
ههههههههههههههههههههه
عموماً ... حاب أشكر الغالي " ماجد مقبل " على بثارته وثقل طينته , مزعجني كل يوم يبيني أنزل موضوع
ومن صباح الله خير مستقبلني بالانصنصير , وألين أقبل علي وانا اللي سويت نفسي نشيط وطلعت من الدرج " خبل مو صاحي , طالع الدور التاسع بالدرج "
وبسبته جاني الروماتيزم وآلام المفاصل ..
وهالموضوع بأسرده علشان يفكني من شره .. " هااااهـ انبسطت يا مجوودي .؟ .. يالله قوم فرفش أنت وصلعتك تقول مدرس خصوصي "
-------------------------------------------------------------------------
الموضوع :
فيه من الجد , وفيه من الخيال , بس بصراحه أي شيء يخطر ببالك أنه خيال صدقني عندنا يالسعوديين نقلبه جد .
بتقولون لي كيـــــف .؟؟؟؟

طيب شوي شوي لحد يدف خلوني أشرح لكم ..
*
*
*
*
*
مرحبا بكم في رحلة الخطوط الجوية العربية السعودية الرحلة رقم SV1045 والمتجهه بمشيئة الله إلى دبي عبر بوابة رقم 34
_________________________________________________________________
وانا بالمطار جالس لحالي فاتح اللابتوب وداخل الايميل وأقرأ الرسايل وأحلى جو على أحلى هدوء , بسم الله وألا طالع لي ماجد مقبل بالماسنجر

ماجد : جموووسي
أنا : يالييييل مطولك .. هااااهـ
ماجد : أكيد بتنزل موضوع
أنا : ايه ايه يصير خير
ماجد : أكيييييييد .؟
أنا : لحوووووول .. ياخي خلاص بأنزل موضوع
ماجد : طيب متى .؟
أنا : ياخي مافي موضوع براسي . خلني أرجع من السفر ويصير خير
ماجد : ليش ما قلت لي علشان اسافر معك
أنا : وانا مهبوول آخذك معي .. لا واللي يرحم والديك خلك مع أقمشتك
ماجد : طيب وين بتروح .؟
أنا : بروح دبي
ماجد : طيب بالله جب لي وجبة من البيك
أنا : مهبووول أنت .؟ أنت تفكر بعقلك .؟
ماجد : ياخي والله مشتهييه
أنا : وخر وخر لأطلع لك من الكيبورد وأتفاهم معك .. الظاهر أنت طايح على راسك .. وش جاب البيك بدبي .؟!!!
( بالزر اليمين - حظر جهة الاتصال )

----------------------
المهم , وانا جالس مستمتع بالهدوء , واناظر الساعه وألا باقي دقيزتين على ركوب الطياره ..
وبسم الله ما أمداه يعلن عن موعد ركوب الطياره , توه بقول كلمة اعلان , وألا العالم صياح وازعاج وزحمة عند البوابة , وكل واحد يدف الثاني , واللي شايل ولده فوق راسه وعاض على ثوبه وركض عالبوابة
بصراحة انا كأن واحد مازعني بوووز على خشتي واحوليت .. اشوف الواحد عشره ...
هذا وهو لسه ما كمّل باقي الاعلان ..
لا حول ولا قوة إلا بالله .. ايش اللي صار .. قبل شوي حلوين وش زيننا ..
عموماُ ما طاح ألا انبطح .. تعوذت من ابليس وبقيت مثل ما انا جالس قريب من د.كيف وضفيت عفشي على اقل من مهلي , وقمت اتمشى بروقاااان , ودخلت من البوابة ولما وصلت لمدخل الطياره
وقفت اناظر الشعب وش وضعهم , الكل جالس بمكانه .. طيب ليش هالمسخره اللي صارت والاقلاع باقي عليه اكثر من نص ساعه
كل هالشفاحه علشان طياره .؟؟ والا ما صدقوا على الله يطلعون من الديره .؟؟

مو مهم .. رحت لمقعدي وجلست قريب من الشبّاك .. وربي قردني بواحدن جمبي الظاهر ان ما خاب ضني فيه مرض ( الفوبيا )
جلست وربطت الحزام وفتحت الآي باد وشبكت السماعات وجلست أتفرج على مسرحية ( ابو سارهـ بالعمار ) محملها قبل الرحلة بيوم .. مضبط وضعي بالكامل
وانا اتفرج ومبسووط واضحك ع الخبل طارق العلي والا اللي بجمبي يناظرني وهو يضحك .!!!!
الحمد لله والشكر .. وش فيه هالآدمي .. لايكون بس يحسبني مجنون وانا اضحك ع المسرحية ..
وقفت الفيديو وشلت السماعات من اذني وألتفت عليه ..
انا : سم يالغالي .. كنت تكلمني .؟
اخينا فالله : لا يالحبيب بس المسرحية هذي انا شايفها قبل .
انا : صحيح .؟ ماشاء الله عليك .. الله يوفقك ان شاء الله
اخينا فالله : شفت هذاك الخبل اللي يقول طائر النورس
انا : أي خبل .؟ وش تقصد مو فاهمك
اخينا فالله : اللي بالمسرحية
انا : اقول ورا ما تتلايط وتفكني من شرك .؟ ياخوي استح على وجهك .. على بالي عندك سالفه .. رح شف لك شغله والا ارقد جعلها نومة أهل الكهف
اخينا فالله : وش فيك زعلت .؟!!
انا : خلاص لا تفتح فمك .. خل هالرحلة تعدي على خير وانثبر مكانك

وانا اللي احط السماعات مره ثانيه بأذني واسفهه ...
وبعد 10 دقايق تقريباً بدأ الطاقم اللي بالطياره يوزعون وجبة العشاء على الركاب .. انا بيني وبينكم كنت لاهي بالمسرحية وما دريت ألا اللي بجمبي حافر 2سم على كتفي بأصبعه
انا : سم يالحبيب .؟ تراك حفرت بير بكتفي
اخينا فالله : لا بس كنت بأقولك ان المضيفه تقولك وش تبي تآكل ..
انا : يس مس .. وت دو يو هاف .؟ <-- بالانجليزي طبعاً
المضيفه : اي هاف تشكن ميل اند بيف ميل .. وت يو لايك
انا : بليز قيف مي تشكن ميل وذ ابل جوس
اخينا فالله : وانا وانا بليز قيف مي مثل اللي طلبه ..
انا : هههههههههههههه سديت نفسي عن الاكل الله يآخذ عمرك ... بليز قيف هم ماي اوردر .. اي آم نوت انقري .. هي از سد نفسي
وبعدها اناظر الساعه والا الحمد لله باقي ع الوصول 40 دقيقه تقريباً .. والوضع حتى الان بالطياره معقوول ..
وما دريت وألا اللي بجمبي يأشر لي بأصابعه بوجهي .. جعل اصابعه الكسر ..

انا : سم يا عزيزي .. والله انك اشغلتني
اخينا فالله : لا بس المضيفه رجعت مره ثانيه
انا : يس ميس
المضيفه : وت يو نيد درينك .. كوفي اور تي
انا : اف يو هاف جوس اي نيد ابل جوس , بيكوز اي ام نوت درينك كوفي اند تي إن ذا نايت
المضيفه : يس سير اي هاف .. اي ويل قيف يو افتر 5 مينت
اخينا فالله : وش طلبت يالحبيب
انا : عصير يا استاذي .. اذا تبي شاهي او قهوه قل لها علشان تصب لك
اخينا فالله : لا لا ابي عصير مثلك
انا : اكسيوز مي .. هي نيد جوس .. بت اي دونت نو وت هي لايك
المضيفه : اي هاف ستريبري جوس اند اورنج جوس اند ابل جوس اند ..
اخينا فالله مقاطع المضيفه : يس يس .. ابي كيوي
المضيفه : سووري .؟؟؟ اي ك نت اندر ستاند
انا : ياخوي تراك فشلتنا ... من جاب لك طاري الكيوي يابو دمجه .؟ واللي يرحم والديك اطلع من حياتي

المهم طلبت المشرف اللي بالرحله وشرحت له وضعي والحمد لله نقلني لمقعد ثاني ...
وجلست باقي الرحله مستمتع بهالمسرحيه ألين وصلنا مطار دبي
وبسم الله الطياره توها منزله بووزهاا مابعد هبطت ..
اللي قام يآخذ شناطه من الادراج العلويه , واللي رايح يسابق على الباب من يطلع أول
والله شعب منتهي للآخر ..
عموما كالعاده .. انتظرت آخر واحد ألين خفت الزحمه وقمت وتوكلت على الله نازل من الطياره
طبعاً الكل عارف أن مطار دبي ماشاء الله من كبره حاطين مسارات الكترونيه بالممرات علشان الواحد ما يتعب من المشي
وانا امشي عالمسار والا العالم ركض عالمسارات .. وانا اتحمد ربي على نعمة العقل ..
نزلت للجوازات .. ولما خلصت منهم مشيت على مسار الشنط اللي قريب من السوق الكويس اللي تلاقي الشعب السعودي معهم عربيات ومافيه ألا شيل بهالكراتين
وتقول كأنها مقاضي , كل واحد معه ورقة كاتب فيها وش بيآخذ ..
اخذت شنطتي ورحت للصرافة اللي بزاوية السوق لا أكثر ولا اقل .. حولت 5000 ريال سعودي إلى 4800 درهم اماراتي
وبعد ما صرفت وخلصت توكلت على الله طالع من المطار .. وانا اللي اخذت تكسي ووجهة على الفندق
وأول ما وصلت الفندق نزلت من التاكسي وأخذت أغراضي من شنطة السيارة ودخلت عالفندق عند الاستقبال
وسألت عن واحد اسمه جورج لاني منسق معاه الحجز واستقبلني أحلى استقبال وطلب مني الجواز او بطاقة الاحوال علشان يصورها
طبعاً انا طالع بدون جواز , معي البطاقة الجديده ومرتاح .
وادور البوك وادور البوك .. لاحول ولا قوة الا بالله ... وين راح البوك ..
توني قبل شوي محاسب التكسي ب45 درهم .. وين راح ..
واتذكر أني لما جيت آخذ اغراضي من شنطة التاكسي كان البوك بيدي وحطيته بشنطة السياره علشان آخذ اغراضي .. وأثري نسيته
طيب ياجورج وش السوات .؟؟ اكلم السفاره السعوديه وألا وش اسوي ..
الرجال ما قصر .. اعطاني رقم إدارة التاكسي في دبي وكلمتهم ..

المكالمة :
طبعاً بعد السلام وبعد ما شرحت له السالفة ..
الموظف : يالغالي ابي منك رقم التاكسي اذا تعرفه
انا : أي رقم يالغالي .؟
الموظف : رقم التاكسي موجود على قزازة الراكب
انا : والله وانا اخوك ما اعرفه
الموظف : طيب تقدر تعطيني أي معلومه عن التاكسي .. اسم السواق او لوحة السيارة أو اي شيء ..
انا : وانا اخوك ماني عارف ألا ان السواق جنسيته مصري .. بس ماعندي أي معلومه غيرها
الموظف : طيب كم كان حسابك و وين كانت وجهتك وبأي وقت .؟
انا : الحساب يالغالي كان 45 درهم , وجاي من المطار على فندق (؟؟؟) الساعه 9:30م تقريباً
الموظف : طيب يالغالي راح نتواصل معك خلال 30 دقيقه بإذن الله
انا : بيض الله جهك , وشاكر لك جهودك .. فمان الله ..

المهم واجلس بالفندق متضايق .. طبعاً دخلوني للغرفه اللي حاجزها لأني اعرف الفندق زين واعتبر زبون عندهم
ومقدرين الوضع اللي انا فيه ..
وما مرت 15 دقيقه والا تلفون الغرفه يرن .. وارفع السماعه وألا الاستقبال يقول فيه مكالمه لك ..

انا : مرحبا
الموظف : الاستاذ ( ؟؟؟؟ )
انا : نعم يالغالي معاك
الموظف : يا استاذي حاب اتأكد من بعض المعلومات منك لو سمحت
انا : تفضل يا غالي
الموظف : ممكن تعطيني شوية معلومات عن المحفظة حقتك
انا : لونها اسود وفيها 3 بطاقات بنكية وبطاقة احوال ورخصة قيادة وبطاقة بودي ماستر وعدة بطاقات بزنس كارد
الموظف : طيب ممكن تفيدني بالمبلغ الكاش اللي كان موجود
انا : كان فيها 4755 درهم اماراتي و 1500 ريال سعودي
الموظف : طيب يالغالي المعلومات متطابقه تماماً ومحفظتك موجوده وراح ارسلها لك مع السائق
انا : الحمد لله , الحمد لله , الله يعطيك العافيه يالغالي .. ماقصرت وشاكر لك وقفتك معاي
الموظف : بس لو تكرمت يالغالي تحاسب السائق اذا وصلك , لأن النظام لازم يفتح العداد
انا : ابشر يالغالي تآمر أمر .. فمان الله .

وفعلاً وصلتني المحفظه مثل ماهي وما نقص منها ولا شيء ..
والله نظام وسياسة قوية جداً حتى في طريقة إدارتهم للتكاسي ..
أهنيكم يالامارات على هذا النظام .

المهم :
وبعد مارجعت المحفظه حمدت ربي ان الموقف صار لي بالامارات مو بأي بلدة ثاني
والحمد لله انها ما صار الموقف لي بالسعودية , والله كان تلاقوني متمرمط مابين احوال مدنية ومرور
وأعلان بالجرايد ومراجعة بنوك .

---------------------------------------------------

حبيت أوصل لكم رسالة بسيطة بواسطة موضوع طريف , وأتمنى أنها تكون وصلتكم الرسالة
وأحب اقولكم اني من بعد هالموقف صرت اسافر ومعي محفظتين .. وحده للبطاقات الرسمية والاغراض الشخصيه وكل الفلوس طبعاً وتكون محفوظه بالفندق , والثانيه هي اللي اطلع فيها وتكون بجيبي وفيها المصروف اليومي بس .

---------------------------------------------------

مخرج :
ليس كرهاً او ضيقاً بعدي عن الشبكة *** إنما ظروف الحياة من أجبرتني على ذلك

وأشكر الأخ / ماجد مقبل على إصراره بطرحي لمشاركة .
وأتمنى أن موضوعي يكون خفيف عليكم وله فايده , وما أكون مثقل عليكم ومقصر

تحياتي واحترامي للجميع .

منور المنتدى


لي عودة بعد ما اوزع بيبسي ع رجعتك

بااااااك


نورت الامارت


مع اني توقعت بموت من الضحك كعادة كل مواضيعك


الظاهر مشاغل الحياة خلتك جدي

إقتباس مدخل : يمر العمر والسنين والشهور والأيام *** ويبقى حبيبي مثل ماهو " خبل "

إقتباس عموماً ... حاب أشكر الغالي " ماجد مقبل " على بثارته وثقل طينته , مزعجني كل يوم يبيني أنزل موضوع

إقتباس ومن صباح الله خير مستقبلني بالانصنصير , وألين أقبل علي وانا اللي سويت نفسي نشيط وطلعت من الدرج " خبل مو صاحي , طالع الدور التاسع بالدرج "

إقتباس المهم , وانا جالس مستمتع بالهدوء , واناظر الساعه وألا باقي دقيزتين على ركوب الطياره ..

إقتباس بصراحة انا كأن واحد مازعني بوووز على خشتي واحوليت .. اشوف الواحد عشره

إقتباس انا : يس مس .. وت دو يو هاف .؟ <-- بالانجليزي طبعاً

إقتباس انا : بليز قيف مي تشكن ميل وذ ابل جوس

إقتباس انا : هههههههههههههه سديت نفسي عن الاكل الله يآخذ عمرك ... بليز قيف هم ماي اوردر .. اي آم نوت انقري .. هي از سد نفسي

إقتباس اخذت شنطتي ورحت للصرافة اللي بزاوية السوق لا أكثر ولا اقل .. حولت 5000 ريال سعودي إلى 4800 درهم اماراتي

يعطيك الف عافية على الموضوع المميز
شكرا لك على القصة الدرامي

نفس قصه التاكسي حصلت معايا بس انا نسيت اغراض اشتريتهم بالسوق ملابس ووالا اليوم الثاني الصباح الاقيهم تحت بالرسبشن رجعهم التاكسي آخر الليل....

هههههههههههههههه كل التوفيق لك وللهلال

إقتباس الرسالة الأصلية كتبت بواسطة حروف الغلا منور المنتدى لي عودة بعد ما اوزع بيبسي ع رجعتك بااااااك نورت الامارت مع اني توقعت بموت من الضحك كعادة كل مواضيعك الظاهر مشاغل الحياة خلتك جدي

جدي وألا شيخ القبيله

-----------------

إقتباس الرسالة الأصلية كتبت بواسطة عصويد عصويد

لا حول ولا قوة إلا بالله ...
أنت يعني لازم تحارشني
وبعدين أنت ألين الحين تبيع جح على خط القصيم .؟
عموما الرد عليك انت بالذات بيكون في رد جديد خاص لك..
راجع لك بعد ما أخلص من الباقين
أجل أشتر حبتين جح واحصل على يوسفندي مجاناً هههههههههههههههههه
راجع لك قريب ..
-----------------

إقتباس الرسالة الأصلية كتبت بواسطة alfayhaa Sport يعطيك الف عافية على الموضوع المميز شكرا لك على القصة الدرامي

أهم شيء أنك قريته زين وأعجبك
----------------

إقتباس الرسالة الأصلية كتبت بواسطة ولد ســـدني نفس قصه التاكسي حصلت معايا بس انا نسيت اغراض اشتريتهم بالسوق ملابس ووالا اليوم الثاني الصباح الاقيهم تحت بالرسبشن رجعهم التاكسي آخر الليل....

كويس انها رجعت اليوم الثاني ..
ان ما خاب ضني ان اليوم الاول كانت أمورك طيبه جداً
----------------

إقتباس الرسالة الأصلية كتبت بواسطة ~DARK KNiGHT~ مبرووووكـ رجعة المحفظة والله أنك صادق لو ضاعت المحفظة عندنا كان متمرمط مرمطة مايعلم فيها الا ربك لكن الحمدلله والله دبي جدا متطورة من كل النواحي يعني شف مجرد انك عطيته توقيت ركوبك ومن وين الى وين جابلك اياه

يارجال لو قلت له لون سروال السواق كان جابووه بعد
----------------

إقتباس الرسالة الأصلية كتبت بواسطة جنرال الهلالي هذي دبـــي ياصبـــي ..

هز الفنجال وقل بس ..
وبعدين أنا اول مره اشوف واحد يشرب لبن بشنبه
اهنيك على التوقيع
----------------

إقتباس الرسالة الأصلية كتبت بواسطة مـوت ومـيـلآد ! أنآ قآيله كم سنه وتشوف دبي كل سكآنهآ سعوديين ! الله يعينك يَ محمد بن رآشد عليهم !

قويييييييييييييييييييييييييييييييييه
دوري غيرها
----------------

إقتباس الرسالة الأصلية كتبت بواسطة Ą7ṧąş ặŁ3ắĽ๓ هههههههههههههههه كل التوفيق لك وللهلال

----------------
مدري الظاهر اني كاتب تحليل عن مباراة الهلال مو موضوع ..

هلا وغلا حياك الله وبياك مستر بعير زاحف بالغرفه
منور الحته يا الغالي والحمد لله سلامتك >> يابخيل ليه ما اخذتني معك

بعدين ياخي حرام عليك وش فيك صاير اقشر
عط الرجال جوه وشبك له السماعه خله يستانس معك بالرحلة

إقتباس وهالموضوع بأسرده علشان يفكني من شره .. " هااااهـ انبسطت يا مجوودي .؟ .. يالله قوم فرفش أنت وصلعتك تقول مدرس خصوصي "

صلعتي يا مفتري !! كل ها الشعر الجذاب وتقول صلعتي
هذا وانا الوحيد اللي اداوم بدون شماغ من شان وشسمه

إقتباس أنا : بروح دبي ماجد : طيب بالله جب لي وجبة من البيك

هههههههههههههههههههههههههههـ
يا خي انت رايح الامارت يعني اطور شوي وش جاب البيك >> قلب عليه

إقتباس وفتحت الآي باد وشبكت السماعات وجلست أتفرج على مسرحية ( ابو سارهـ بالعمار ) محملها قبل الرحلة بيوم

ياخي انتم مدري متى تطورون الطيارات في الدول المتقدمه
فيها افلام ومسرحيات وكل شي ولى عصر الايباد وما الى ذلك >>متعوب على الى ذلك

إقتباس المهم طلبت المشرف اللي بالرحله وشرحت له وضعي والحمد لله نقلني لمقعد ثاني ...

ول ول والله ياأنك اقشر ياخي جرحت مشاعر الرجال
مفروض تكمل خيرك ووتحمل كلها نوصي ساعة !!
من ناحيتي لو يجلس جنبي الفريان مستحيل اقوم اكمل وامري الى الله

إقتباس وفعلاً وصلتني المحفظه مثل ماهي وما نقص منها ولا شيء .. والله نظام وسياسة قوية جداً حتى في طريقة إدارتهم للتكاسي .. أهنيكم يالامارات على هذا النظام .

بصراحة موقف صعب جدا وربك ستر .. والحمد لله ان ركبت تكسي محترم لو انك راكب مع الكداده كان رحت فيها هههههه الا فيه كداده بالامارات
والحمد لله على عودة المحفظة وبها المناسبة ابي طبق شوكلاته من انوشه السبت الصباح على مكتبي

تسلم حبيب البي كوكو على الموضوع والحمد لله على سلامتك يا صديقي
بس ودي اعرف من اللي مترجم لك الانجلش لا يكون وشسمه الفلبيني اللي عندكم

سلام يا صاحبي ..

وتحياتي لك دائماً .