20/11/2011, 08:55 PM
|
 | زعيــم مميــز | | تاريخ التسجيل: 03/08/2005 المكان: في المنصة
مشاركات: 15,836
| |
ســوآلــف شــتـويه بيـن احضآن منقــد جـدي ..
بسم الله الرحمن الرحيم  شسمه لنا مدري كم يوم داخلين الشتاء ولا حسينا بهالشيهالاجواء متغيره هالايام مره برد مره حر مره هلال <~ طيب ياارابح لا والمشكله هالادمي الزعاق اللي بجريده الرياض مدري الجزيره كل يوم ناط علينا ض2 بيجينا هواء بارد الاسبوع الجاي قدام من افغانستان ومره قادم من العراق ومن بكره مانشوف الا عج وخياس وشمس القوايل تصبح عليك وتقول وين الزعاق حقكم يابخيلين مير من تالي ماحس بطعم الشتاء مثل اول واحس انه مب زي اول ,, يالله من اول الله عَ ذيك الايام اذا دخل الشتاء تجتمع العائله الكريمه بالغرفه وفيها 4 دفايات كل وحده شكل ,, وحده ع شكل مدخنه والثانيه نجفه وكل واحد مننا ماسك زاويه منسسدح واحد منبطح والثالث حاط خبزه بالجبن فوق الدفايه ونايم وناسيها وهالخبزه ماغير تبخر علينا كمبودي جبن  ,, مانقصنا بالغرفه هذي الا نكتب عَ الباب ملجأ خادم الحرمين للعوائل البردانه ,, لا واحياآن عاد يعني اذا جت المربعانيه نطلع هالدفايات ونجيب منقد وفي روابه منقل ,, المهم اتوقع هالمنقد حق جدي المتوفي منذ عام الف واربعمائه قبل الميلاد يعني من زمآن البعيد ,, منقد حديد في حديد كآنه كابرس قديم وفيه كببر اللهم ياكافي يقولون انه كآن مهآد منصور البلوي يومه صغيره .. لو نطبخ فيه ذبيحه ونحط جنبه برقات ودلال وكذا كفىآ طبعا كلنا نشيله ونطلع من المستودع وتجتمع العائله الكريمه كلن يساعد الثاني فَ الشيله كآننا شايلين مفطح ونحطه بوسط الغرفه .. ونجتمع عليه كلنا كأننا الهنود الحمر ناقصنا دخانهم الكبير اللي ناخذ منه 3 موشات ونسوي دوائر ونمرر ع بقيه العائله <~ سلامات المهم نحطه وكلن مجتمع عليه وكل واحد مننا لابس 5 بجامات و4 سراويل بجامه الكبيره واثنين ببسي وكل واحد منا معه بياله زنجبيل فاضيه ,, شاربينها ومخلصينها ونحتري احد يصب لنفسه عشان كل واحد يمد بيالته يالله وش هالكسل مب لهدرجه فيه ,, لا واحيآن يقالنا نحلي اذا ابوي جاب لنا ابو فروه واحيان ابو فريوه ذاك اللي كآنه بصل مشوي ونرميه داخل المنقد وماتسمع الا طخ طخ طيخ .. وكل واحد بملعقته يحتري حقته تستوي مسويين لبنانين يشوون آوصاآل . واللي يقهرني اذا تهاوشنا لا هذي حقتي وهذي حقته ومدري وش .. المشكله كلها نفس الطعم والحجم واللون مدري وش الفرق .. والبلا ايام المدارس ذيك الايام الوآحد مننا عشان ابوي وامي يصحونا يجيبون اذن من الاماراه عشان يحضرون سامري عند غرفه كل واحد ولا عرضه .. الا انا يجيبون لي سلام ملكي .. المهم من اول وش حليلنا اذا صحينا من النوم نتسابق انا واخواني اسرع واحد يدخل الحمام الله يعزكم بس بالشتاء يالله دفني وادفك اذا قمنا نتعازم عند باب الدوره كل واحد يقول باليمين والله ان تدخل قبلي والثاني يقول انت الاكبر يجي الاحترام عاد زين وانا لادخلت اصك الباب واشغل الحنفيه حقه المويه يعني تراي صاحي واروح للبانوي وانسدح واخذ لي غفوه عَ حسب عاد ,, ويالله تجيني احلام خايسه يعني واحد نايم بالحمام الله يكرمكم بتجيني احلام زينه .. وبعدها رح للمدرسه يلعبون علينا صفوا طابور ويالله التمارين الرياضيه عشان الجسم تجيه حراره وانواع السباكه فينا المشكله مافي الا مدرس مصري هو يسوي التمارين وربعنا كل واحد بمكتبه ماتشم الا ريحه شاهي وحليب وتسمع صوت قرمشه شابوره طيب وراهم مايسون تمارين معنا .. ويقولون بعد قم للمعلم وفه التبجيلا امحق تبجيل الا قم للمعلم وعطه الشابوره واكثر شي يقهرني لاجاك بالطابور مصري لابس فنيله وحده بس تحس انها عريييضه وسمييكه وفيها جبن <~ بيتزا .. احس اهله جايبينها له طلبيه من الصعيد القطبي  .. واهله مدسمين امه سندوتشه فول ومفطرينه حلبه وفلافل يعني بالعرببي ابن امه يدخله براد ,, البرد يبي يدخل فيه ويبنط يروح للطالب السعودي الهزيل المسكين لا والله من زين الريحه انت تنصمع من ريحته وتحس بحراره من جسمك تحس انها من التمارين ولاتدري انها من الريحه لا واحسن شي الليل اذا جت مباره الهلال عَ القناه الاولى ويجي محمد خيري يقول بامكانكم استكمال بقيه المباره على القناه الثانيه وحنا كلنا نغير للقناه الثانيه وشعارها القديم النايم كآنها خنفساء بيضاء ,, المهم المهم ادعوا ان الله يجيب مطر وخففوا من هالذنوب ياذا الحراميه اجل نصلي صلاه استسقاء وتمطر بالكويت ما احكمك يارب  والزعاق يرحم والديك نظامك قديم تلعب عَ العالم اذا تبي تكشت انت واهلك ولاتبون زحمه بهالبر تقول ترى بكره فيه عج والحاله صعبه وكل واحد يلزم بيته وانت فالها الله يصلحك سلآآآم |
اتوقع انه تخزن في ظهري 
من كثر مااكلت 
<<
بس بعتبار ان هذا اول شتاء لنا في مدينتا الجديدة 
الوضع العادي
