السلام عليكم ورحمة الله وبركاته
في البدايه هارد لك لنا المستوى في مباراه امس .. وربي اني مع الاهداف حتى تصفيق ماصفقت كالعاده !!
مستوى هزيل ... فريق ملخبط .. ماعنده هدف .. ويلعب بخطة غريبه وهي 4-2- خرابيط - 1
صناعة اللعب في كل قواميس التدريب عمرها ماتكون كذا ياتوماس دول
انا من خلال متابعتي لتوماس دول في 7 وديات تقريبا و7 مباريات رسميه ... قدرت اكتشف اشياء للأسف مخيبه للامال
توماس دول حقيقة انظلم بتأخر انظمام اللاعبين ومعسكرات المنتخب والاصابات واجانب جدد وبحكم انه اول مره يدرب في الشرق الاوسط و و
نجي للمنطق
الرجال ذبحته الاصابات بنسبة 10%
غيابات المنتخب تقريبا 15 %
عدم انسجام الاجانب الجدد تقريبا بعطيها 5% لانه العله في الفرق كامل مو بس في الاجانب
لو نجمعها بتطلع 40%
والـ 60 % الباقيه اعتبرها دباشه من توماس دول
توماس دول لو بدخل معه في مقابله شخصيه زي ماسوى ابوفيصل ... راح يأكلني هوا وراح يقول اشياء خطيره تشدني له ومالوم ابوفيصل انه انبهر من كلامه ... لكن كلامه صعب يتم تطبيقه في الواقع
اللي سواه توماس ... هو
اللامركزيه ... وحنا نطلق عليها كمشجعين " فوضويه " في خط الوسط
يعني انا اتحدى احد يجي يعطيني مركز ايمانا الحقيقي في المباراه ... او مركز الفريدي او مركز الشلهوب او مركز الدوسري لاني شفتهم يهجمون من كل مكان
طريقه حلوه ... لكن اللامركزيه هذي ... خلت مثلا عزوز الدوسري يركض بالكره لمدة تزيد عن 15 ثانيه لحاله لانه مالقى زميل فاتح له !!
ليه ؟ بسبب اللامركزيه هذي ... كل لاعب يرركض علشان يضيع دفاعات الفريق الخصم .. وفي الحقيقه هو يضيع زميله في الفريق
لانه مو واقف في مكان يخليه يستلم بسرعه .. ولاهو راح يوقف في مركز حنا متفقين عليه في التمرينات علشان امررها في ذاك المركز وهو يركض لها وياخذها
يعني كأنك تبي تذبح ناس هاجمين على ديرتك بأنك تطلق عليهم رؤوس نوويه ... تعدم الاعداء وتعدم ديرتك معها
دول صحيح بطريقة اللامركزيه ضيع دفاعات الفريق الخصم
ولكن في الحقيقه ضيع وسطنا اللي مو عارف وين يمرر ولمن !!
امثله على كلامي
كلام المعلق انه الفريدي اناني ... وبعدها رجع وكرر الكلمه يوم عزوز الدوسري بالغ في الاختفاظ الكره
هذي مو انانيه في الحقيقه ... بس لانه مافيه احد واقف في مكانه علشان امرر له
وبرضو في اخر دقيقه يوم عزوز الدوسري يمرر الكره لهرماش ... توهق هرماش لانه مالقى احد فاتح له لان اللاعبين يركضون بعشوائيه
ولو تلاحظون ... 90% من تمريرات الفريق ... كلها للخلف
لان اللاعبي اللي في الامام يركضون بحيث يتوهون المدافعين وفي الحقيقه هم يتوهون زملائهم
الطريقه هذي ممكن تنفع بنسبه بسيطه جدا زي ماحصل في الاهلي " اذا كان الفريق الخصم يعتمد على مراقبة لاعب بلاعب " وهذي خطه قديمه اكل الدهر عليها وشرب
بينما الحل اللي تستخدمه كل الانديه الناجحه حاليا واولهم برشلونا
هو الضغط على حامل الكره ... وهالطريقه هذي تودي طريقة الاخ توماس دول ورى الشمس ... لان الضغط بيخلي اللاعب يمرر الكره بطريقة سريعه وطبعا راح تكون تمريره خاطئه لان اللاعب مايدري وين خويه واقف لانهم يطبقون اللامركزيه !!
ثاني شي .. بالنسبه لي "
فريق مايطبق طريقة الضغط على حامل الكره ... مااعتبره فريق كرة قدم "
الهلال يخلي الفريق الثاتي يسلتم ويركض لبابنا ... والمشكله حنا نركض لبابنا اسرع منهم ... طيب ورى ماتضغط عليه وتاخذ الكره منه وانتهت السالفه ؟؟
وبسبب عقم طريقة توماس دول .. اختفى بريق ايمانا اللي كنا ننتظره على احر من الجمر
بسبب انه مافيه مراكز معروفه للاعبين الوسط ... تلقى ايمانا يستلم ويدخلون عليه خمسة لاعبين وياخذون الكره منه ... العيب مو في ايمانا .. العيب في طريقة دول الي ضيعت ايمانا وضيعت كل لاعبين الفريق
ولو تلاحظون ... فوزنا ع القادسيه في الشوط الاول ... لان توماس دول تخلى عن قناعاته شوي في طريقة اللامركزيه ... وصار يلعب كرات طويله ... وحنا استغلها الوحش العربي وسجل هاتريك
وعلى فكره
العربي مع سوء الخطه اللي يلعب فيها دول ... الا انه اثبت انه وحش ... لاعب لو كان موجود وقت قيريتس كان وربي تلقونه كل ثلاث جولات طاق له هاتريك ع الطاير
لاعب امكانياته قويه ... بس طريقة "
بربسني " اللي يستخدمها دول الغت الكثير من نجوميته زي ماالغت نجومية ايمانا كليا ولايهون الكوري
بحسبه بسيطه
تخيلوا معي العربي ويو بيونغ سو يلعبون في الاتحاد على طريقة ديمتري ... بالله كيف بيصير لعبهم ؟ اتحدا اي فريق يوقفهم بحكم قوتهم الجسديه ... وطريقة لعب ديمتري المنظمه نوعا ما وهي الاطراف والعرضيات الممتازه
اللي وصلت له .. توماس دول صاير زي اللي توه متخرج من ثانوي ويبي يصير طيار .. ويوم راح يقدم انصدم بالواقع انهم ماقبلوه وعلشان كذا قام ولفقها في عقليات اللاعبين
طيب انت كلامك صح .. عقليات اللاعبين انا احط عليها 40% من المستوى الهزيل ... لكن خطتك لها 60% من الهزل اللي نشوفه في الهلال
بحكم حبي للتدريب ومتابعتي للمدربين وطريقة تعاملهم مع المباراه اكثر من المباراه نفسها
تذكرت ابيل براقا المدرب البرازيلي السابق لنادي الجزيره الاماراتي ... وقلت وينك عنا
اذا تبي تشوف فريق ... يعرف يتمركز .. يمررون بطريقه عجيبه .. فريق متماسك في الفوز او الهزيمه .. يبي لك مدرب زي براقا
صحيح انه برازيلي وانا ماشوف انها عيب بالعكس .. مو كل اوروبي قيريتس ترى
بس تخيل لما يجيك ايمانا ويمرر كره في منطقه فاضيه ... وفجأه تلاقي لاعب منطلق من ورى ماشي مليون استلم الكره وكمل الين وصل لمرمى الخصم
هذي تسمى المركزيه ... وهي عكس اللي يسويه دول تماماً وبرضو عكس طريقة قيريتس
انا اذا جيت امرر لك .. مو شرط امرر لك وانت واقف قدامي ... لا
انا بمرر الكره للمركز هذا ... وانت مسؤوليتك تجي تاخذها ... هذي الطريقه اللي تتعب كل فريق ... ولكم في برشلونا عبره ... افضل فريق يطبق المركزيه بشكل ممتاز طبعا
غلطه ابوفيصل مو انه تعاقد مع دول ... لا ... انا مالومه لان الكلام يقنع كثير في المقابله وخاصه الكلام اللي نشوفه من دول حاليا
لكن الغلطه اللي سواها انه تعاقد معه 3 سنوات ... مدرب مغمور مااتهور واحط على ظهري شرط جزائي بسبب مقابله
وهذا كلام الكابتن فيصل ابواثنين اللي اسعدني بصراحه لانه الصوت اللي يقدر يوصل للاداره لابلاغهم بالحقيقه اللي ذكرتها هنا .....والي قراها هو من طريقة لعب توماس دول
وهنا
طبعا كلامه عن مباراة الامس
وفي الهايه يعلم الله انه كلامي مو محاربه لتوماس دول ولالغيره
اللي يهمني بالاول والاخير هو مصلحة الهلال ... والهلال بالمستوى الهزيل هذا ماعتقد يعدي دور المجموعات في ابطال اسيا
هذا ماعندي وادري اني هذرت عليكم لكن هذا ملخص لشخصية الكائن الحي اللي اسمه توماس دول
الوضع المتطور
