26/09/2011, 11:20 PM
|
 | مايسترو المجلس العام | | تاريخ التسجيل: 18/02/2005 المكان: كاشت مع ويلهامسون بين المروج :$
مشاركات: 7,062
| |
أبو شغب , لتفسير الرؤى والأحلام والأضغاث والكوابيس والجواثيم .. الكمية محدودة !!
بدون سلام .. ولا حتى مقدمات !! النفس مش طيبة والأخلاق واصلة حدها .. واللي عنده أي اعتراض على الأسلوب أحب أعلمه إنه آخر مرة أحد اعترض علي كانت قبل سنتين وللحين أهله يجمعون أشلاءه المفرقة في كل ديرة !!   نجي الحين للمختصر المفيد مع إني بالعادة راعي طويلة بس بحكم إني أصبحت أب في لحظة تهور .. لابد إني أتقيد بالبروتوكول الأبوي وأثقل شوي !  في صباح أحد أيام وطنا الحبيب المغبر والمشمس والغثيث << الصفات الثلاث تعود للصباح وليس الوطن لذا وجب التنبيه لا تودونا بداهية ! كنت ذاهباً إلى العمل بالسيارة وكعادتي في القيادة كل شويتين أناظر بوجهي بالمراية أكحل عيوني بالوجه المشرق الذي تنبعث منه نور الإيمان والتقوى ..! << أي واحد عنده اعتراض أرجو إنه يتذكر الكلام اللي فوق .. لمصلحتكم بس المهم .. كنت أفكر في مشروع تجاري مربح ! فكرت في بناء مجمع تجاري في حلة القصمان , وفكرت في شراء حصص من أسهم نادي مانشستر سيتي , وفكرت في رئاسة نادي الهلال , وفكرت في الزواج من أنجلينا جولي وتبني أطفالها ! بس لما وصلت لمشروع الزواج من أنجلينا جولي فكرت شوي وتذكرت فيلمها هذاك يومنها محققة جرائم وتخق على مشتبه فيه مظلوم , ثم بالأخير يطلع هو المجرم !! معليش يا أم جولي .. بس ظروفي وعاداتي وديني ما تسمح لي أتزوج من وحدة ينضحك عليها من حنس مجرم  ارجعي لبراد بت يمكن يصلح لك الزبدة إني هونت من كل المشاريع اللي قبلها وقفلت على التجارة وأبوها ! وفي يوم آخر من أيام وطننا الحبيب .. وفجأة ودون أدنى مسؤولية ولا تمثل بأي حال من الأحوال ... الخ << الكلام اللي مكتوب بالمنتدى تحت رأيت فيما يرى الصاحي المستلج والدتي العزيزة تشاهد قناة أوطان .. في هالقناة مطوع لحيته هالكبر وقاعد يفسر الأحلام .. قعدت شوي مع الوالدة وهي تهمز رجليني الله يعطيها العافية وبحكم برّي وتواضعي حبيت أعطي الوالدة وجه وأسولف معها ! أنا : يمه يالغالية , بالله روحي جيبي مويه دافية وملح بسطل أحس برجولي تعبانة أمي مطنشة وما ترد ! أنا : يمّه , يمّه , يمّه ! أمي : اسكت خلني أسمع !!  بكل انكسار عضيت على شحمة وسكت وقمت أشوف وش يقول هالمطوع مفسر الأحلام  طبعاً أغلب المتصلين من النساء , وإذا كان المتصل ذكر فمن الطبيعي يكون الحلم مش له وإنما لإحدى محارمه !! إلى الآن والوضع عادي .. كنت أتوقع إن البرنامج من قناة المجد لأن الرسيفر تبعنا كان المجد ونسيت إننا مع التطور والعولمة غيرناه برسيفر الأسرة , لأني أصلاً ما أطالع التي في إلا نادراً .. المهم .. لاحظت الاتصال والرسائل النصية تكون بمبالغ كبيرة , الدقيقة أعتقد بعشرة ريال والرسالة النصية بـ 5 ريال ! هالملاحظة تهون عند الملاحظة اللي بأقولها بعد شوي .. لاحظت من هذاك اليوم , وكذلك في يومين آخرين , أن 70% من تفسير الأحلام في هذه القناة تكون : فيك عين حاسد , عين معجب غير قاصد , أنتي مسحورة , واليوم شفت المطوع المصري بالزي واللهجة السعودية يقول لمتصلة : من خلال نبرتك حزن .. وفيك جني عاشق ! وربما تكونين مستمتعة بذلك واعذريني على هذا الكلام ! وهي تقول : لا والله !! ثم يقول بكل بساطة : بارك الله فيك !! والله يا جماعة .. من أول ما أسمع صوت المتصلة أقول لأمي : ما يحتاج تخسر نفسها , فيها عين ولازم تقرأ الأذكار وترش على بيتهم .. وفعلاً يكون التفسير نفس ما ذكرت طبعاً فيه تفاسير أخرى .. مثل : أبشري بزواج ..! أو أبشري بالحمل والأولاد .. أو بمال .. إلى آخره من التفاسير المستهلكة !! وإذا كان فيه تفسير مغاير لا بد يكون تفسير شاطح .. مثل تفسير يوسف المنصور بمشاكل سامي والهلال .. وقبلها تحقيق الهلال لبطولة كأس الأبطال والكابتن ياسر .. بالأخير انلزخنا بالثلاثة وياسر ما لعب ولا مباراة من خلال متابعتي لثلاث حلقات وجدت أن خير مشروع تجاري مربح بدون أي تعب هو فتح قناة لتفسير الأحلام .. مجرد حجز بقمر النايلسات وشقة مستأجرة وديكور وكاميرا وإضاءة وباروكة لحية ويصير عندكم قناة أبوشغب لتفسير الأحلام ولأنكم عزيزين وغالين على قلبي .. بأعطيكم عرض خاص .. كل حلمين لك حلم زيادة وحتى أثبت لكم قدراتي بأعطيكم كم تفسير على الطاير لأحلامكم اللي بتحلمون فيها الليلة .. أفسرها قبل أن تحلموا بها !!  ماجد مقبل .. حلمك الليلة والله يستر علينا وعليك يشير إلى أنه معمول لك عمل سحري بحيث إنك ما تقدر تتزوج حتى ينفك هالسحر !! والذي يظهر لي أن من قام بالعمل خادمة آسيوية جارة لكم ربما رأتك وأنت تخرج القمامة للشارع وأعجبت بقوامك الرشيق الحل بسيط وسهل .. اذهب للبرميل الموجود بحارتكم والقط لك كم كيس واحرقه ثم استنشق دخانه وسيذهب ما بك إن شاء الله والله يعلم شذى في أحلامك الليلة سيظهر لي بأنك ستتزوجين قريباً , ربما هذا العام , وربما العام القادم وربما بعده وهكذا دواليك الزبدة ما راح تموتي إلا وقد تزوجتي ! أما إن كنتي متزوجة فإذاً ستحملين .. أما إن كنتي حاملاً فإنك ستلدين طفلاً << جايب شي جديد يعني أكيد طفل أجل جحش؟ أما إن كان لا هذا ولا هذاك فإذاً تعبير الرؤيا تقول أن بك سحر وما راح ينفك إلين تفطسين !  الهنوووف في حلمك الليلة يتضح لي بأن إحدى زميلاتك في الجامعة أصابتك بعين حسد لذكائك في الجامعة << واضح إنها نصبة بس أكيد بتمشينها لي وأنتي مستانسية يالذكية خخخ لهذا السبب لا تستطيعين الحصول على وظيفة ..!! وإذا أردتي الحل ,, اجمعي مراييل زميلاتك أيام الثانوية ممن درس معك بالجامعة واغسليها بماء صافي ثم تمضمضي به واشربي ثلاث جغمات وبالهنا والشفا هذه نماذج لإيضاح قدراتي في تفسير الرؤى .. ولمن يريد تفسير رؤياه لا يتردد بكتابته في هذا الموضوع وسيتم تعبيره بإذن الله .. وأبشركم راح أفسره أفسره وما عندي أضغاث أحلام أبد يعني راح أفسر أفسر الله لا يعوق بشر ! ربما فيه أخطاء إملائية أو تعبيرية أو خطية بحكم الكبر في السن والشيخوخة  أي واحد يعترض على هالأخطاء أو على الأسلوب أو التنسيق أنصحه يطلع فوق بأول الموضوع عشان ينتبه قبل ما يروح غلطة تهور أحمق  الموضوع تمت كتابته على عجل وفيها من الغث والسمين بالتأكيد ولكن كتبته للسلام عليكم وتجديد العهد الذي بيننا وبينكم فلا تدققون واجد اللياقة انتهت وما فيني حيل أراجع ..والله يا حنا من جد هرمنا .. هرمنا ..!! |
الوضع الشجري
