السلام عليكم ورحمة الله وبركاته حبيت اقولكم هالموضوع
لانه الصراحه مهم للاعبين الهلال وخاصه محمد نامي

بالنسبه للاعب يااخوان والله انه يبغى وقفة الجمهور معاه حتى يقدر يخدم الهلال ويتعلم من اخطائه ولايعيدها نامي يااخوان من يوم ماجاء للهلال محد فيه منكم يمدح فيه كله تجريح وسب واللاعب يعتبر من لاعبين الهلال ماادري الاداره ليه ماوقفت هذي المواضيع مثل ماوقفتها عشان ياسر القحطاني
ماعلينا احب اقولكم حاجه محمد نامي انا تقابلت معاه في مطار المدينه وكنت جاي من القصيم للمدينه وبعدها لجده بس عشان الخطوط السعوديه احسن خطوط بالعالم جلست بالمطار 5 ساعات وحصلت فيه نامي وواحد من اصحابه وجلسنا مع بعض واخذتنا السوالف مع بعض وتكلمت معاه عن المدربين السابقين وعن اللاعبين وبااخر شي سألته عن نفسه قلت ليه الجمهور مايبغاك يامحمد انت اللي اشوفه منك لاعب سريع وعندك لياقه بس فيه اشياء كثيره تغلط فيها وانا اقولك اياها لو الادارة ماحصلت شي فيك حلو صدقني ماجلست الى الحين في الهلال اكيد عندك موهبه بس لسى ماطلعتها كلها ليه؟؟؟؟


قالي بالحرف الواحد انا من المدينه المنوره وجيت للرياض مااعرف فيها احد ابد وجالس لوحدي في الشقه من الشقه للنادي ومن النادي للشقه لااصحاب ولا اروح ولا اطلع اكيد بعد كل هذا مستواي ماراح يتحسن قلت ليه النادي طيب مايخليك تسكن مع واحد من اللاعبين الشباب قال الادارة عليها من سكن اللاعب لوحده بس
المهم قلتله خلاص انت تزوجت واكيد ان نفسيتك بتكون احلى مدام زوجتك معاك قال ادعوا لي وان شاء الله الموسم الجاي راح يتغير محمد نامي وبتكون نفسيته حلوه وبيعرف يقدم اللي يرضي الله ويرضي نفسه والجمهور ان شاء الله

فااتمنى يااخوان تكفون خلونا نكون معاه ونوقف عنده هو واي لاعب يخطئ مو لازم ندخل المنتدى بعد كل مباراة ونسب هذا ونقول مانبغى هذا ونلعن هذا احنا جمهور الهلال لازم اننا قبل المباراة نشجع كل لاعب عشان يدخل المباراة وهو حاس ان الجمهور يشوفه مو يشوف لاعب واحد ويترك اثنين ولو يخطي قام يسبه ويلعنه

يعني اللي اشوفه ان اكثر الجمهور قبل المباراة يتحمس عشان لاعبين او ثلاثه ولو يخطئ واحد فيهم ماقال حاجه بس لو يخطي واحد من اللاعبين اللي ماتحمس لهم على طوول طقطق موضوع بالمنتدى قبل ماتخلص المباراة وخذ سب باللاعب ياجمهور خلونا لو مره نوقف مع اللاعبين كلهم



واسف اني طولت عليكم بس كنت ابغى اكتب هالموضوع عشان نعرف ان اللاعبين اوادم مثلنا ولهم احساس ويدخلون المنتدى ويقرون اللي ينكتب عنهم






تقبلوا تحياتي والسلام عليكم ورحمة الله وبركاته