تعرف لو يقدر يسوي ( العزوبي ) زي هذي الصــورة !! ... بـتــفكــر في الزواج مثلا ؟؟؟؟ - نادي الهلال السعودي - شبكة الزعيم

سعودي أصيل · #1 28/07/2011, 10:52 PM

مسيتوا بالخير

عسى اموركم ماشيه زي الؤشطه ..

بما اني لحالي في شقتي ومااعرف اطبخ .. ومااثق بمطاعم ايرلندا حتى لو يقولون بعضها حلال .. وسحب علي أبو محمد وراح يصوم مع اهله بالرياض

قررت اغير حياتي

جايكم اليوم بشيء .. يخليك مدري كيف .. شيء يسلب العقل والجنان .. منه ترتعد فرائص الجوعان .. يجوع بعد رؤيته الشبعان ..
والله مالكم بطوالها والموضوع مايبيله تشويق بالاساس .. اجل مين يصدق ... !!!

مين يصدق أبو حميد اللي ماكان يم الطبخ ولاهو من تواليه

.. صار طباااخ مطلوب في مطعم اسطنبول اللي يتوافد علييه كل النااس .. بمختلف الأجناااس .
لدرجه الايرلنديين اللي مايعجبهم شيء يجون هالمطعم ويمخمخون عليه .. يعني جايني عرض ولا اطعم

لاااا والله جايتكم علوم مهيب هينه

صرت اعرف اسوي رز ..

وصرت اعرف اسوي ايداااااام

>>> خلك ثلاث ثواني على الألف

هذي كلها عادية بس اللي اسويه انا موب عادي .. ماوقفت والله عند حكر الرز ولا عند عدل الايدام اللي زي حق المطاعم

..
ولا والله وقفت عند تسوية الكيك بالشوكليت

صرررنا نخترع طبخااات ماتخطر على قلب

<<< مية خط تحت نخترع

لا والله خُبركم قديم .. جايكم بطبخة ..
شي شي يهبببل ويرووع !!.. أكلة محد سواها .. و ترا حتى للحين ماطلع لها اسم

توها جديده وبترك التسمية عليييكم ..

ودام اني شاركتكم بطبخاااتي عشان تسمونها لي

.. بنزل لكم صورها .. مو عشان هالشيء بس .. عشان تعرفون كمان ان العزوبي لاحط براسه شيء يجيبه .. ولابغى حياته حلوة وفله ووناسه بالراحه يلقاها .. ماوقفت على بنت تجيب له هموم اكثر من سعاده .. وتخليه يتحمل مسؤوليات هو في غنى عنها .. اي والله ترا ماوقفت على بنت <<< كنه جاب العيد

مايبيلها شيء هالطبخه .. لا وجع راس ولا تعب ولا غيره .. ومقاديرها دجاج وبندوره ونص بصله ..

ايه وشويه معجون طمطام << مفحالي امسح

وبهارات .. بس !!

قليله .. بس ياخي شغل عقلك ... خلك انسان منتج

.. لاتكتف يديك وتقول لا والله مااقدر على الشيء ذا ترا الانسان كل ماعطى نفسه افاق اوسع كل ماابدع

<<< لابو هالطبخه اللي ذل امنا عليها

شويه ماء تغوشه في الكفتيره
ثم يسكب

<<< يسمع بكتب الطبخ

بهارات هندية مع شويه فلفل

ثم تُنثَر << جاب العيد

هنا خله على النار سبع دقايق .. قم رح جهز العصير ولا السوفت درينك ( يعني مشروب غازي للي من جنبها في الانقليزي ) .. اهم شيء يكون باااااااارد

دع الكأس على حافة الطاولة ليكون جاهزا للحمل

جيب كم بسكوته عشان تحلي بعد الاكله هذي اللي مدري وش اسمها

اغسل صحن زجاجي يكفي اللي طبخت

وبالعافيه

بالله كيف ؟

خلااص قررت ماراح اتزوج ولا ابي يجيني هم .. لاني لو تزوجت ماراح تكون هالبنت احسن مني بالطبخ ووقتها راح اعصب كثير واسوي لها قلق وتجيب لي هموم وارجع نحيف زي ماكنت قبل شهرين .. وانا يالله يالله لحقت على عمري وزدت كم كيلو .. صار جسمي كأني رادوي

وصارن الايرلنديات اليا مريت من قدامهم يقولون لي ( Hello ) وارد عليهم ببرود بدون ماالتفت

.. صرت استمتع بغسل ملابسي ونشرها على الشمس .. واذا جات غيوم أوايقها من بعيد لايبللها المطر

.. وصرت اطفي اللمبات اذا مالي حاجه فيها .. واوفر الكهربه .. وصرت ارقد بدري عشان ماتفوتني مراجعه الواجب في الكلاس

ولا تهَرج علي ( ماكرينا ) الاسبانيه وتقول اني نواام ومافيني حيله اجي بدري!!

... وبعد صرت اسوي رياضه واتمشى بالسيتي سنتر بعد الغدا ....
انا كذا مرتاااح ولا ابي من يعكر حياتي ..

ايه حتى ( COSTA ) اللي كنت اشرب شاهي عنده طنشته .. صح انه فخم ومعروف

لكن ماعنده نعناع .. رزقني الله بمحل هندي يبيع نعناع .. شريت من عنده حزمه بـ 8 ريال .. وصرت اشرب واغمس فيه بسكوت ..

مايستفاد:

- الموضوع برمته اهداء ... وقهر

لشخص عزيز وغالي .. (ذالني على انه معلمني كيف اسوي الرز) .. نفسي اشوف وجهه وهو يشوف طبختي

- العزوبي يقدر يبدع حتى لو هو منتف

- الحياه حلوة حتى لو انك تعيش لحالك وخويك ساحب عليك

ورايح يصوم مع اهله

وتاركك بين اكناف ربع ماتاخذ منهم لاحق ولا باطل

يلا نشوفكم وتكفون دعواتكم بظهر الغيب ان الله يوفقني واجيب الايلتس >> درجه الانقليزي

اجيبها بعد سبع شهور ولا اقل .. ويصير اذا رجعت السعوديه أقدر اتكلم مع دحيم ونحش في أبو خلود بالانقليزي وهو مايدري وش السالفه

شوفوا كيف مجتهد واذاكر واحفظ << قولوا ماشاء الله علي

يعني اعمل بالأسباب

وادري ان السما لاتمطر ذهبا .. عاد انتوا عليكم تدعون لي ..

فمان الله

Ahmed Alharbi
سعودي أصيل