مابقى للاجوبة الا سؤال*********** وش بقى من مجد ما طال الهلال
الامير عبدالرحمن بن مساعد كتب هذا البيت الجميل جداً في صفحته في تويتر، ولكن و لاسبابه الخاصة، سبق أن اعلن أنه لا يريد كتابة قصيدة في الهلال، مايعني أنه لن يكمل القصيدة أو على الأقل لن ينشرها!
ولأن البيت جميل وعلى طريقة قصائد عبدالرحمن بن مساعد، اللي من أول بيت تعرف انها قصيدة راح تاخذك لعالم اخر، فـانا اتمنى ان اسمعها منه في يوم من الايام.
ولكن، والى ذلك الحين، حبيت اطرح فكرة اتمنى تعجبكم
كل واحد فينا يحاول يكمل هالقصيدة بكلماته الخاصة وباستخدام مطلع القصيدة اللي كتبها الامير ونعرضها في النهايه عليه. أقل شي اننا ممكن بهالطريقة نقنعه يكملها وينشرها
وحاولت اني ابدأ هذي التجربة بهذي المحاولة اللي اقول فيها:
مابقى للاجوبة الا سؤال ............. وش بقى من مجد ماطال الهلال
ياخذ التاريخ يكتبه بيديه ............ بالنقاط وبالبطولات الثقال
لا نوى يكسب مباراةٍ كسبها ....... بالمهاره.... بالخطط... أو إرتجال
مايهمه حكي ناسٍ (يحلمون) ....... مايحب القول، تعجبه الفعال
يقعد الجمهور، مستانس، يقول ..... التعب ولاّ العنا لاجلك حلال
التكاتف بين جمهوره وبينه ...... روعه... وآيه من ايات الجمال
الفرق تخشى ملاقاته لأنه ........ صال في كل الملاعب ثم جال
ماتهزه ريح واللي في مكانه ........ فوق في عالي السما.. صعب المنال
لو تهب العاصفه تبغى تهزه ........ ماتزيده غير قوة واحتمال
يعشق التتويج ويحب البطوله ...... قال ابيها واشهد انه صدق طال
لو لهالنادي يدين وله رجول ......... كان يمشي في فخامة واختيال
يامشكك في زعامتْه لزمانه ......... ذاك نادي القرن... ياولد الحلال
اسأل التاريخ واسمع وش يقول ...... وكان باقي بعد قوله مايقال..
الهلالي بين كل افراد جيله ........... أكثر اللي يفرحون بلا جدال!
وسلامتكم واتمنى تكون الابيات مناسبة وتعجبكم وانا في انتظار مشاركاتكم بما تجود به قريحتكم حتى لو بيتين يكفي، كل واحد يطلع ابداعاته واهم شي المشاركة وجمع اكبر عدد من الابيات الشعرية لعرضها على سمو الامير واتمنى نوصل على الاقل لــ 100 بيت من كلماتكم انتم...
وتحياتي لكم
وكل التوفيق للزعيم