يا حصة . وين المشكلة !! هذا هي يا يبا !! طيب عرفنا المشكلة !! وش بقي ؟؟ ووين الخلل ! - نادي الهلال السعودي - شبكة الزعيم

@@almoreb@@ · #1 02/07/2011, 06:19 PM

السلام عليكم ورحمة الله وبركاته

كيفكم يا أعضاء وعضوات المجلس الكريم

أنا أعرف أن العنوان مدري وش يبي

بس والله في عقلي دوامة من الأفكار والهواجس طبعا غير هواجس الطب والجامعة .. فخلوها ع ربكم

المهم

لا يخفى عليكم يا أخوة يا كرام المشاكل الجمة التي نعاني منها للأسف في السعودية أو في بلداننا العربية من

مشاكل اقتصادية
مشاكل إجتماعية
مشاكل الغزو الفكري
مشاكل مخرج 5 اللي ما انتهى من عشرطعشر قرن

مشاكل مسبح .. أ أ أ أقصد شارع الملك عبدالله في جدة
مشاكل شارع السيح في المدينة وتهوية الحرم والحفرة هذي اللي رجتنا من يوم ما أعرف نفسي

مشاكل الرواتب وانخفاضها مع مغالاة الأسعار !
مشاكل ساهر ورسايله اللي كنها رسايل مخطوبة لعريسها بعد الملكة

مشاكل الزواج وأبو مقبل اللي من أيام حرب الخليج وهو يبي يعرس

مشاكل المرأه الله يصلحها وقيادتها للسيارة
مشاكل بطالة وعطالة الشباب وبرنامج نطاقات المنقذ

مشاكل المستشفيات الحكومية والخاصة وغلاء العلاج
مشاكل استاد الملز وتفتيش العساكر للمشجعين كأنك داخل طيارة مو ملعب

مشاكل الشباب في أوقات الترفيه والكلمة اللي يكرهوها .. ممنوع ياخوي عوائل بس

مشاكل الحكم السعودي وتطفيشه من المحيط الرياضي

:
:
:
:
الخ ...

أكيد كلنا نعرف هذه المشاكل وشبعنا من اللت والعجن فيها وفي الكلام عليها وأظن أن الأصوات قد بحت والأقلام قد جف حبرها .. من كثر ما تطرقنا الى هذه المشاكل .. ولكن الشئ اللي محيرني واللي خلاني أترك كتاب الأناتومي وأهوجس في سلسلة كبيرة من الهواجيس اللامنتهية هو...

بما أن الكل عارف وش هي المشاكل والكل عارف طريقة حل هذه المشاكل أو على الأقل طريق يؤدي الى حلها أو حل بعض منها ... وكل ما تروح محل تلاقي العالم طفشانة وتصرخ وتولول وتطالب بحلول عاجلة ... ومافي أحد بالدنيا كلها حتى الطفل الرضيع ما تكلم في مشاكلنا ...!!

طيب وين المشكلة !! ليش إلى الان مافي حلول والحال زي ما هو وأردى

يعني المسؤولين عايشين بكوكب ثاني !!
والا وزير الطرق عنده مروحية تجيبه من بيته وما يمر من مخرج 5 ولا قد راح مره للمدينة ومر من طريق السيح !!
والا أمانة جده مش معترفه بطريق الملك عبدالله وناوية تقلبه مسبح !!

والا وزير الشباب والرياضة ما عنده قريب له راح لاستاد الملز وفتشوه العساكر الين لقى نفسه بالأخير بسروال بدون فانيلة !

والا وزير الصحة ما عنده قريب له يبي يعمل عملية استئصال مرارة لا سمح الله وقعد ينتظر دوره 3 شهور الين طفشت المرارة !!

والا وزارة الداخلية ما عندهم عيال ويبون يتزوجوا بس حادتهم ظروفهم ومو عارفين من وين يجيبوا ه ال100 ألف !! والا ممكن عيالهم عندهم ملاهي مخصصة لهم وما يطلعون للمنتزهات ويسمعون كلمة ...(عوائل) ..

يعني فهمووووني بالله . وين المشكلة

دامنا كلنا عارفين وش هي المشاكل وكلنا عارفين وش هي الطرق السليمة والصحيحة لحل هذه المشاكل ... وش بقي

جاوبوني تكفون واقطعوا عني ه الهواجيش وخلوني أكمل أحفظ ه الشرايين والأوردة في دمجة بني الإنسان

شطحة

اللي يقولي كم مرة ذكرت كلمة (مشكلة) في الموضوع له هدية مقدمة من ساهر

أحمد - برلين