الـوصـايـا الـعـشـر لـمـن بـحـث عـن طـلـوع الـفـجـر ..!! - نادي الهلال السعودي - شبكة الزعيم

Fahad Al Sudais · #1 04/06/2011, 12:38 AM

حيـــــــــــاكم

أيها الصخصخائيون

عشاق صخ صخ في الوطن العربي الكبير

احبائي من المحيط الى الخليج

سلام من الله عليكم ورحمة منه وبركات

تراي انا جيت

جئتكم محملاً بإكليل الورد ومسبوقاً بنفحات العبير.. ألا مرحباً بكم وتباً لكل منحط حقير

جئتكم كعروة بن الورد:

أقسم جسمي في جسوم كثيرة.. وأحسو قراح الماء والماء بارد << انتهى زمانك أيها الهلالي دائماً

نخوش في الموزوع

عندي خمسة من الزملاء متزوجين حديثاً

وكل واحد منهم له مشاكله الخاصة في حياته الزوجية

وسبحان الله.. لاحظت ان اغلب المشاكل تتشابه في الإطار العام ولا تختلف الا في جزئيات صغيرة

يعني اساس المشاكل واحد.. حتى وإن اختلفت الرؤى

البعض ممكن يقول ان نفسية الرجل وتعامله مع المرأة تختلف باختلاف منطقته وحدوده الجغرافية

بمعنى اكثر وضوح وبصراحة البعض ممكن يقول البدو فيهم كذا والحضر فيهم كذا واهل الجنوب والشمال.. الخ

لكن كل هالكلام عاري من الصحة.. بدليل ان الخمسة ( كوكتيل

)

والمشكلة تقريباً واحدة والاختلافات بسيطة ولا تكاد تذكر

ولأني انسان لسني احب كثرة التنظير ودراسة الامور بتخطيط علمي مدروس باعطيكم الحلول مباشرة :

لكَ انت ايها النشمي

1- حط في بالك شي مهم جداً في بداية الزواج... هذي انسانة انتقلت من دفتر عائلة ابوها الى دفتر العائلة حقك
يعني عقدها انتقال نهائي وليس إعارة 6 شهور مثل احمد علي

وهالانسانة اللي عاشت طول هالسنين تابعة لوالدها مستحيل تبي تخليها 100% تابعة لك في شهر او شهرين

البنت الآن في بداية الزواج تعيش مرحلة انتقالية في غاية الصعوبة.. خلك حليم ووسع بالك شوي

2- البنت في بداية الامر ممكن تلاحظ عليها انها ترفض تروح معك للعزايم والمناسبات ( تنحرج لسه عروس )

لاتكبر الموضوع وخلها على راحتها حتى تتعود على اهلك ومناسباتهم.. شوي شوي وتزين الامور

ثق تماماً ان الكل عاذرها وعارفين انها منحرجة وشي طبيعي لكل بنت في حالتها.. خلك مرن

لكن اسلوب الحلف و ( تروحين طرق من ورى خشمتس ) هذا مايسمن ولا يغني من جوع

3- انتبه ثم انتبه ثم انتبه ( ثلاث اكررها ) انك تقارن بينها وبين والدتك في الطبخ

ومايحتاج اذا طبخت لك شي انك تتذمر وتقعد تمدح بطبخ الوالدة وتقول وينك يا يمّه

انت كذا تزيد العبء عليها وتحطها تحت ضغط نفسي قابل للانفجار في اي لحظة وعند أتفه الاسباب

اذا حطت لك الاكل امدح بلطف.. وبعد ماتنتهي عطها ملاحظاتك بهدوء وحبة حبة راح تتحسن

وحط في بالك ان 90% من بنات هالجيل مايعرفن يسلقن بيض

يعني المشكلة عامة

4- اذا وديتها عند اهلها نهاية الاسبوع.. عطها جوها وخلها تجلس اطول وقت ممكن

لاتنسى انها في مرحلة انتقالية مثل ماقلنا سابقاً

حنا عارفين انك توك عريس وتشتاق لها وتبي تصير قدام اهلها شديد وتبي كلمتك هي اللي تمشي

ومادامك قلت لها الساعة 11 تصيرين عند الباب لازم هي تنفذ الامر العسكري

لكن معليش علشان خاطري خلك في هالليلة بس ( رخمة ) واهجد واترك البنت ترتاح شوي عند ماما

صدقني بيجيلك فترة بعد سبع شهور او ثمان تقول لها ( تكفين يرحم امس نامي عندهم الليلة

)

5- اذا كنت من الشباب اللي يعرس ويطلع في شقة لحاله.. لا تحرص كثير انك تعزم الشباب عندك حتى لو على قهوة

لا تصدق عمرك وتسوي فيها ابوعيال وحياكم الله والقهوة زاهبة و وين القدوع يا مره

اركد شويات على البنت.. ترى القهوة اللي كنت تشوف امك وشغالة اهلك يسوونها بخمس دقايق يوم كنت عند اهلك غير

هذي عروس يا حبيبي.. كل شي تطلبه منها تعتبره اختبار صعب وتتوتر اعصابها

دلتها غير وفناجيلها غير وتقديمها غير.. تحس نفسها تحت المجهر في كل صغيرة وكبيرة

6- اذا رحت تتقضى مقاضي البيت.. جب لها اللي تبيه ولا تكون توحدي وتفرض رايك غصب

هي متعودة على اكل معين عند اهلها طول هالسنين.. مستحيل تغصبها على اللي انت تبيه بيوم وليلة

7- جينا لأم المصايب.. الكوافيرة

اذا قالت لك ودني للكوافيرة يوم الاربعاء او الخميس علشان في عزيمة او مناسبة

اذا قالت ودني الساعة 4 العصر.. ودها الساعة 3
واذا قالت لك تعال خذني الساعة 8 العشاء.. لاتروح قبل الساعة 9.. مايحتاج تحرق دمك ولا تتنرفز

8- نفس الشيء ينطبق على العرس.. اذا وديتها لا تجيبها قبل اذان الفجر.. خلك ريلاكس

عارفين انك توك معرس وتبي زوجتك.. لكن حاول تقدّر ان العرس شيء مقدس عند معشر النساء

عط نفسك اجازة هالليلة وحاول تنام بدري

9- لاتحاول تتدخل كثير بلبسها واغراضها الشخصية دامها لسه عروس.. انت كذا تهينها وانت ماتقصد

هي راح تفسر كلامك انها مو ذاك الزود وماعندها ذوق.. خلك بحالك واتركها تلبس اللي تبي

10- باختم لك بأروع مثل قيل في هذه الحياة

امش عليه وصدقني بترتاح :

طنش تعش تنتعش

لكِ انتِ ايتها السنعة

1- من اول ليلة.. حاولي ترسخين بذهنه ان اهم شيء عندك هو طاعة الرحمن ومعاملتك بما يرضي الله

2- انزعي من قلبك كثرة الوساوس والتحرج.. اندمجي اكثر مع هالزوج وحاولي الوصول الى مشاعره

3- في كل فرصة حاولي تمدحين اهله عنده واشكري ربك بصوت مسموع ان الله اعطاك اب وام غير اللي عندك

صدقيني هالكلام ومدح والديه له مفعول السحر عند الزوج وراح تملكينه من اقصر الطرق

4- اول شهرين من الزواج.. اختصري مشاويرك قدر الامكان.. كل مشاويرك

5- اذا كنتي عند اهلك واتصلتي عليه.. احذري وانتبهي من مباغتته بسؤال استفزازي مثل : وينك فيه ؟؟

هالسؤال انتي تشوفينه عادي.. لكن هو يشوفه تحقيق

اذا اتصلتي خشي بالموضوع دوغري وعطيه الزبدة دون الحاجة لمثل هذا السؤال

ثم اذا جاء ياخذك بالليل وانتم بالسيارة تقدرين مع السوالف تسحبينه بالكلام وتعرفين وين كان

6- اذا كان فيه مباراة وشفتيه جالس متحمس عند التلفزيون.. لا تصيرين بثره

ولاتكثرين الروحه والجيّه قدامه.. بالعكس حاولي تفاجئينه بشاهي ومكسرات دون مايطلب.. خلك ذكيه

اتركي عنك اسلوب الكمخ : مادري وش تحبون بهالكورة.. يا كرهي للكورة

<< ام التوتر ياشييييخ

7- اختاري الوقت المناسب للطلب اذا كنتي تبين تطلبين شي لك او للبيت

مالها داعي يدخل الظهر تعبان ويصطدم فيك بلسان اطول من فاتورة العثيم

8- راعي ظروفه المادية.. راعي ظروفه المادية.. راعي ظروفه المادية << بالـ 3

9- لاتكثرين استخدام التلفون قدامه.. علشان ماياخذ عنك فكرة انك ثرثارة وراعية طق حنك وهذره

10- واختم لك ايضاً بأهم كلمة ونصيحة :

احترميه.. طبقي مفهوم احترام الزوج بكامل حذافيره

نصيحة مزدوجة للطرفين.. هو و هي

مشاكلكم لا تطلع لأحد.. أياً كان

حلّوا مشاكلم بينكم في بيتكم او غرفتكم

انتي عند ادنى مشكلة تروحين تهذرين عند امك وخواتك

وهو يروح يهذر عند اخوانه وزملائه

وتبقى النفسيات تعبانه والكل يفتي على راسك

أي واحد منكم يحس انه متضايق ويبي يفضفض.. يفرش سجادته ويتجه لرب العالمين

ويطلب الله انه يسمح الامور ويكشف الضر ويؤلف القلوب.. وكفى

.
.
.

اختم هذرتي بمعلقة صديقي العزيز الشاعر الأموي شليويح العطاوي

:

عزّ الله انّى ما عشقت الرعابيبْ
ما ادري طبع أو مُوفّقتني قناعهْ
يا طول ما نركب على الفطّر الشيبْ
وكم مارد جيته تعاوى سباعه
ياما لمسنا قرصنا بالمشاعيبْ
وياما دفعناهن ورا الشمس ساعه
وكم ليلة نوختها تصرخ النيبْ
وزن البيوت اللي كبار رباعه
واضوي عليهم كنهم لي معازيب
ليا رمى عذب الثنايا قناعه
اهدِّي الحامي واخطِّي الاطانيب
وآخذ مهاوية الجمل باندفاعه

سلام علاكم

الزعيم سام6 · #2 04/06/2011, 12:48 AM

يآهلآ أبو صخاخيآت
نورت المجلس بقدومكك يآلغآلي

بعض الوصايا مهمة جدا بنظري ..

إقتباس

4- اذا وديتها عند اهلها نهاية الاسبوع.. عطها جوها وخلها تجلس اطول وقت ممكن

وهذا كلام كبير ولازم يعرفه الكل بصراحة

إقتباس

وهالانسانة اللي عاشت طول هالسنين تابعة لوالدها مستحيل تبي تخليها 100% تابعة لك في شهر او شهرين

والله وصايا ونصائح في قمة الأهمية والله ..

إقتباس

النصائح المزدوجة
مشاكلكم لا تطلع لأحد.. أياً كان
حلّوا مشاكلم بينكم في بيتكم او غرفتكم
انتي عند ادنى مشكلة تروحين تهذرين عند امك وخواتك
وهو يروح يهذر عند اخوانه وزملائه
وتبقى النفسيات تعبانه والكل يفتي على راسك
أي واحد منكم يحس انه متضايق ويبي يفضفض.. يفرش سجادته ويتجه لرب العالمين
ويطلب الله انه يسمح الامور ويكشف الضر ويؤلف القلوب.. وكفى

وفي ذي وآلله انك صآدق اهم شئ ماتكبر المشكلة عشان شئ مايسوى انه يكون كبر عبست تمر

والله يوفق جميع الآزوآج يآرب ,, ويخلي ازواجهم لهم يآرب ,,
ربي يحمي الجميع من المشاكل الزوجية يآرب ..
ويوفق عيالنا وبناتنا لما يحبه آلله ويرضاه ..
وماقصرت يالصخرة على الموضوع المهم والمفيد خصوصا العطلة جآية والكثير مقبل على زوآجات ..

لآهنت يابو صخرات

حروف الغلا · #3 04/06/2011, 12:50 AM

ما شا الله كل هالنصائح للمتزوجين حديثا

و لا قصدك شخص معين بشحمه و لحمه

الحين انا عندي سؤال

تبغي تفهمنا انك مطبق كل هالكلام و النصايح الحلوة

الله يوفقك المتزوجين

و عقبال اللي بالطريق

فَيْلَـسُــ زَمَانَهُ ـــوفْ · #4 04/06/2011, 12:50 AM

ابو صآلح الله يهديك كآن كتبت للمتورطين فقط

لكن دام الموضوع هيك .!!

امش معي انت وابو مقبل خلنآ نمر على ربعنآ الجدد

المغرب

بطبق هالي تقوله تكفى

**الـــــــــواوا** · #5 04/06/2011, 01:43 AM

حيــا الله الصخره

إقتباس


	حط في بالك شي مهم جداً في بداية الزواج... هذي انسانة انتقلت من دفتر عائلة ابوها الى دفتر العائلة حقكيعني عقدها انتقال نهائي وليس إعارة 6 شهور مثل احمد علي

ههههههههآآآي أللحين وش ذنبه أحمد علي يصير طقطقه فالمجلس

-عساهم يطبقوون بس
أسمع من أذن وطلللع من الثانيه
يا أني أعرف وآحد جلللطه ودي الليله قبل مايصبح يقرأ هالوصايا
عشان يتعدل مع إني عارف بو طبييع مايجوز عن طبعه .

تتوقع شخص تعوود ع فرد العضلات والتسفييل بتفيد معه هالوصايا !؟

الله يكون بعون حديثي الزواج

تششكر يا ريس لاهنت

انه الهــــلال..وكفى · #6 04/06/2011, 01:45 AM

وعليكم السلام

يعطيك العافيه على النصائح ..وان شاءالله يستفيدون منه الاخوة والاخوات

لكن العنوان يوحي بأنهم مقبلين على حرب

وماالمقصود بالفجر بالعنوان

إقتباس


	- في كل فرصة حاولي تمدحين اهله عنده واشكري ربك بصوت مسموع ان الله اعطاك اب وام غير اللي عندك صدقيني هالكلام ومدح والديه له مفعول السحر عند الزوج وراح تملكينه من اقصر الطرق

تحبهم تحترمهم تقدرهم اذا شافت منهم شيء تسكت ولاتقوله
لكن تمدحهم امامه ..ليش ..يعني علشان يتأكد انها تحبهم !!

إقتباس


	ولاتكثرين الروحه والجيّه قدامه..

هذي الكل مايحبها

إقتباس


	: مادري وش تحبون بهالكورة.. يا كرهي للكورة << ام التوتر ياشييييخ

طيب واذا هي تحب الكوره وهو لا ... وش الحل ؟؟

إقتباس


	- اول شهرين من الزواج.. اختصري مشاويرك قدر الامكان.. كل مشاويرك

بالعكس اول شهرين يتعود فيها الزوج

يعني اول شهرين ماتروح لمشاويرها المعتاده .. وبعد الشهرين رجعت مثل اول بيستغرب ويستكثر مشاويرها

إقتباس


	مثل : وينك فيه ؟؟

اتفق معك

لو كل زوجين عاملوا بعض كأصدقاء كأصدقاء كأصدقاء <<بالثلاث

كلن راح يفكر براحة الاخر ويتنازل لأجل الاخر ولن تكون هناك مشاكل

شكرا لك ونصائح بعيده عن التنظير

هلالي ارسنلاوي · #7 04/06/2011, 01:46 AM

إقتباس


	6- اذا كان فيه مباراة وشفتيه جالس متحمس عند التلفزيون.. لا تصيرين بثره ولاتكثرين الروحه والجيّه قدامه.. بالعكس حاولي تفاجئينه بشاهي ومكسرات دون مايطلب.. خلك ذكيه اتركي عنك اسلوب الكمخ : مادري وش تحبون بهالكورة.. يا كرهي للكورة << ام التوتر ياشييييخ

هههههههههههههههههههههههههههههههههههههههههههههههههههههههه

أنـا وصلت هنا ووقفت ما عاد قدرت أكمل

--

صراحة موضوع كبير ونصائح مميزه ، بالضبط كـ صاحب الموضوع

وصراحه نادر ما تجد الكاتب الماهر إلـي يخليك تتمنى الموضوع ما يخلص

واصل يا بطل

ولا تقطعنا بالرابطه هـناك ، ترا دينلسون حالف إنـه يطلع إن ما رجعت للرابطه

.اشواق الزعيم. · #8 04/06/2011, 01:46 AM

اكثر كلامك ثرثرة على الفاضي ومضيعة للوقت

كتبت جملة اتوقع بالخطاء طلعت منك بس هي احلى واجمل جملة بالموضوع ككل

إقتباس


	أي واحد منكم يحس انه متضايق ويبي يفضفض.. يفرش سجادته ويتجه لرب العالمين ويطلب الله انه يسمح الامور ويكشف الضر ويؤلف القلوب.. وكفى .

Ms. Star · #9 04/06/2011, 01:50 AM

تصدق أول ماقريت العنوان فكرته موضوع ديني

المهم نخش فالمقسوم

إقتباس


	- حط في بالك شي مهم جداً في بداية الزواج... هذي انسانة انتقلت من دفتر عائلة ابوها الى دفتر العائلة حقك يعني عقدها انتقال نهائي وليس إعارة 6 شهور مثل احمد علي

صاير كوميدي ع غفلة

إقتباس


	اذا كان فيه مباراة وشفتيه جالس متحمس عند التلفزيون.. لا تصيرين بثره ولاتكثرين الروحه والجيّه قدامه.. بالعكس حاولي تفاجئينه بشاهي ومكسرات دون مايطلب.. خلك ذكيه اتركي عنك اسلوب الكمخ : مادري وش تحبون بهالكورة.. يا كرهي للكورة << ام التوتر ياشييييخ

شرايك جيل اليوم البنت تحب الكورة والرجال عكس

خويتي أول ماتملكت وجا يشوفها أول سؤال سئلها وش تشجعين ؟؟
قالت : الهلال
قال : أشوا فكرت النصر

مسسسسسسخرة

إقتباس


	8- راعي ظروفه المادية.. راعي ظروفه المادية.. راعي ظروفه المادية << بالـ 3

صارت أمك ثم أمك ثم أمك

صحيح الحياة صعبة المفروض كلاهما عندهم وظايف ولا
بيروحون فيهآ ~~

إقتباس


	اختم هذرتي بمعلقة صديقي العزيز الشاعر الأموي شليويح العطاوي : عزّ الله انّى ما عشقت الرعابيبْ ما ادري طبع أو مُوفّقتني قناعهْ يا طول ما نركب على الفطّر الشيبْ وكم مارد جيته تعاوى سباعه ياما لمسنا قرصنا بالمشاعيبْ وياما دفعناهن ورا الشمس ساعه وكم ليلة نوختها تصرخ النيبْ وزن البيوت اللي كبار رباعه واضوي عليهم كنهم لي معازيب ليا رمى عذب الثنايا قناعه اهدِّي الحامي واخطِّي الاطانيب وآخذ مهاوية الجمل باندفاعه

أيام نت أندرستاند

أدور جملة مفهومه عجزت

^
^
عموما مو كن الموضوع نصآيح مستقبلية للــ
للــ

الهلالي دائما

يُحفظ في المفضلة خخخخ قواك الله + بصير أحسن من اللي تحتي شمها ورجعها

معيض يمشي بين الزهور · #10 04/06/2011, 01:52 AM

ماشاء الله عليك خلاص من اليوم ورايح بسميك (صخصخ .DR)

اهنيك على اسلوبك ف يكتابة النصائح
وانا اشوف ان اهم نصيحة (حل المشاكل داخل البيت) والمشكلة الاكبر اذا قلت المشكلة لواحد كمخة

فعلا اذا بغيت الاستشارة عليك الاختيار بعناية مو تسئل اي واحد والطريق .

استمر يا (صخصخ .DR) ولاتحرمنا من مواضيعك
انصحك تسوي لك موضوع اسبوعي وتسميه قهوة الاربعاء

غيرك مهو احسن منك

•●ώђḿ~ · #11 04/06/2011, 02:00 AM

_

الحقيقة موضوع جميل ومميز من اخيِ .. الصخرة , نصائح قيّمه أسأل الله عز وجل انّ يجعلها في ميزان حسناتك يارب , ولا يحرمك أجر هذا الموضوع ..

وأسال الله انّ يبعد المشاكل عن الأزواج , والله يوفق جميع اولاد وبنات المسلمين يارب ..

.
.

اخوَك , وَهَــّـِمْ