.





بسم الله الرحمن الرحيم

السلام عليكم ورحمة الله وبركاته


يومأ من الأيام خلال هذا الاسبوع وانا خارج من منزلي وإذا بي بأحد شيبان الحاره ومتابع للرياضه ولكن ليس بتلك المتابعة القويه وتعودت دائما عندما اقابله ان انصت إليه وكذلك اجاوبه على بعض الأسئله التي تدور في خاطره ويسألني عنها ودار بيننا هذا الحوار:



الشايب
حياك الله عبدالله كيف ياولدي

الحياه كلمه
بخير ياشايب الرحمن عساك بخير

الشايب
وش علوم الهلال

الحياه كلمه
علومه طيبه بطولتين والثالثه بالطريق بإذن الله

الشايب
طيب وراهم يوم طلع الهلال من الآسيويه حطوا اللي ماينحط لا يكون هو اللي طلع بس

الحياه كلمه
لا والله ثلاثه فرق طلعت.

الشايب
طيب الفريقين الثانيه واحد محقق بطوله اولمبي والثاني له سنين لا صغار ولا كبار ولا محلي ولا عالمي.

الحياه كلمه
أهاااا انت علومك علوم ياشايب وش تبي توصل له أهم شي الهلال ماشي في السليم

الشايب
ياولدي فيه ناس يتبعون الموجه وهمهم الوحيد هالبطوله

الحياه كلمه
طيب ياشايب انت وش رايك فيهم هذولا

الشايب
والله تبي الصدق ولا ابن عمه

الحياه كلمه
لا الصدق خل ابن عمه عند غيرنا شبعنا منهم

الشايب
هذولا الهلال غني عنهم

الحياه كلمه
كيف غني عنهم الفريق ماله غنا من جمهوره

الشايب
ياولدي خذ العلم من الشايب ... الرجال اللي اذا تأزمت الأمور قام وقلب على ربعه لجل بطوله وكأنه ماكسب شي هذا مانبيه الله غني عنه

الحياه كلمه
والله مدري عنك ياشايب علومك اليوم علوم

الشايب
هذا العلم ... جلد الذات بزياده ماهوب زين ولجل أكون منصف معك ترا ربعك بعد يرفعون الضغط

الحياه كلمه
ليش وش فيهم بعد

الشايب
وراهم يضغطون اللاعبين بكل المباريات

الحياه كلمه
مثل ايش كلها مهمه

الشايب
ياولدي كأس ولي العهد تراه صعب كله نهائيات ولا مجال للتفريط وهذا ياخذ مجهود مضاعف سواء بدني أو ذهني من اللاعبين والفنيين والاداريين.

الحياه كلمه
والله أما ذي انا معك فيها 70 % ياشايب

الشايب
أريتك لو أنهم شاركوا بالصف الثاني اللي كأنهم الأول ماهو أزين

الحياه كلمه
والله الصف الثاني أنه طيب ويقدر يوصل

الشايب
طيب واذا خسروا البطوله بيجيهم نفس اللي جاهم بالآسيويه من انتقاد

الحياه كلمه
لا والله ماراح أحد يحاسبهم لأنهم قرروا المشاركه بالصف الثاني ويمكن الثاني يقدر يحققها

الشايب
طيب لو سووا هالطريقه كيف بيكون مجهودهم بآسيا ماراح يكون أفضل باعتبار أن اللاعبين ارتاحوا من هم كأس ولي العهد سواء بدنيا أو ذهنيا ووفروه لآسيا الأهم.

الحياه كلمه
الحين ياشايب أنا معك 100 %

الشايب
بس ترا هذا مايعني ان الاداره ماقدمت شي مثل هالأخوان اللي قلتهم لك بالأول ومانعرفهم الا بآسيا

الحياه كلمه
صادق ياشايب...طيب توصي شي انا وراي شغل

الشايب
أيه تعال لا تروح باقي الأهم

الحياه كلمه
وشو بعد

الشايب
كيف اشتري أسهم في الهلال تخبر انا احب اطقطق بالأسهم

الحياه كلمه
اسهم الهلال وراك ياشايب لا يكون السكر ارتفع عليك اي اسهم الله يهديك

الشايب
ليه مافيه اسهم للهلال

الحياه كلمه
لا باقي التخصيص مطول ردد ياليل.....

الشايب
وراهم طيب في التفزيون يوم يجي واحد يصايح ويقول ليش ماتطلعون قوائم مالية علشان الناس تعرف كم يصرف وكم يدخل؟

الحياه كلمه
أهاااا .... أنت شفته؟

الشايب
ايه شفته الرجال معصب أجل له شراكه ولا له ورث بالهلال

الحياه كلمه
لا ياشايب هذا الله يستر عليه عند مشكله وحاط دوبه بدوب الهلال

الشايب
أهاااا... طيب وش جاه على مدير المركز الاعلامي بالهلال شاب عليه يوم انه كل ماتكلم نقز بنحره وانت بوق وانت فيك وفيك ... هم وراهم يجيبون هالعالم اللي لسانه طويل على قل دبره بالتلفزيون وأحنا ناقصين صياح كفايه بزارينا بالبيت وصياحهم.

الحياه كلمه
هذا ياشايب عنده مشكله مع الناس كلهم ... لكن فكنا منه ياشايب اهم شيء العالم عارفه أنه يصفي حسابات على غير سنع.

الشايب
أجل اسمع مني

الحياه كلمه
آمر ياشايب

الشايب
بإذن الله خروج آسيا مايروح عبث

الحياه كلمه
كيف يعني

الشايب
بطولة المللك بيجيبها الهلال بيجيبها

الحياه كلمه
الله يسمع منك .... بس يقولون فيه فريق يبي يحققها لجل يدخل كأس آسيا السنه القادمه ومتحمس لها.

الشايب
متحمس ... طبعا هذي قهقهة الشايب يوم عرف الفريق
اللي تقول متحمس والله مايذب ريع ياعبدالله دامه يغني على الأطلال

الحياه كلمه
والله انك تجيب العلم وصحيح علومك غانمه ياشايب.

الشايب
أما الحين الله يستر عليك

الحياه كلمه
الله يرضا لي عليك ياشايب الرحمن مع السلامه









.

الشايب
متحمس ... طبعا هذي قهقهة الشايب يوم عرف الفريق
اللي تقول متحمس والله مايذب ريع ياعبدالله دامه يغني على الأطلال

الحياه كلمه
والله انك تجيب العلم وصحيح علومك غانمه ياشايب.

______________________________

هههههههههههههههههههه الله يرجك يالشاايب


حيااه رد ع الشايب بحتراام اوك

خخخخخخخ


يعطيك العاافيه

عوأأأأأأأأأأأأأأفــــي .... تقبل تحيــاتي ,,

مشكور وما قصرت

بالتوفيق للزعيم

تسلم اخي انت وشايبك

اسلوب جميل يغير من الاجواء المشحونه

ورسائل بشكل رائع لبعض الجماهير المنجرفه خلف الاعلام الاصفر

تخيلوا ان الهلال ماحقق اي بطوله من سنتين والله بيكون حالنا مأساوي


الحمد لله ان الله خلقني هلالي (والله مساكين اللي مايشجعوا الهلال)

شكرا لك

اسلوب رائع وسلس ويهدي الخاطر

احترامي لك وللشايب

إقتباس طيب الفريقين الثانيه واحد محقق بطوله اولمبي والثاني له سنين لا صغار ولا كبار ولا محلي ولا عالمي.

فليعلم هذا اصحاب الكلام الجارح والانتقاد الحاد الأغبياء والمتطاولين على لاعبي الزعيم

:: مشكووووور على الموضوع المميز والفريد من نوعه ::

أهنييييك على شايبك ^_^

والله يكتب الي فيه صالح وخيره للزعيم

.

يعطيكم العافيه جميعا والله يوفق الهلال في كل مكان وزمان



.

اسلوووبك قمة بالذوووق وبالتشووويق شكرا لك ي بططططل استمر فاستمرارك يعني اان الابداع لايزال بخير

يعطيكم العافيه جميعا والله يوفق الهلال في كل مكان وزمان